Mātaiō 25
25
Te palapole o te tino angaulu kiva tamāwine
1“I te vāia ia, ka lāua te Pātileia o te Atua pe te tino angaulu kiva tamāwine na wō ma a lātou mōlī kē welāvei i te tāne ka wakaao.#Luka 12:35 2E tokalima o lātou tamāwine pāioio, e tokalima oki tamāwine wai wanewane. 3Ko te tokalima pāioió, na takitaki wua i a lātou mōlī ma te onge yinu onga wua a lātou. 4Yaulā te tokalima wai wanewané, na takitaki i a lātou mōlī ma nā ava yinu ko kikī. 5Na wano ē oki te yaunga a te tāne ka wakaaó, kamuloa lātou wiamomoea, lōwiwia atu ai tākatoa.
6Kē oko lā ki te tūluāpō, tangi mai oki peia te leo ia: ‘Ēnei te tāne ka wakaaó! Lōmamai ki vao welāveingia iāna!’
7Eia, āla tākatoa loa nā kiva tamāwine ia, wakayilawolo ai i a lātou mōlī. 8Mea loa te kau pāioió ki te kau wai wanewané, ‘Aumai ake nā toe yinu mai a kōtou yinu nā. Na yila matemate a mātou mōlī nei.’
9Kākole lā tā lātou mea atunga, ‘Ēkole, e yē lava mā tātou pau. E yē wō ai okoa mai ni yinu mā kōtou i te kau e oko yinú.’
10Yaulā, kē wō atu te kau tamāwine pāioio ia oko yinu, oko mai oki te tāne ka wakaaó. Ko te tokalima na penapená, wō atu loa ki loto mā ana ki te imukai o te wakaaonga, pupuni oki ma te pū.
11I muli wua mai, ōko mai loa te toe kau tamāwine ia, mea loa peia, ‘E te Pū, e te Pū ē! Yuyuke mai ake te pū kia mātou!’
12Yaulā, mea mai oki te tāne wakaao ia, ‘Ko tala atu au i te tika, ko yē aku iloa ko ai kōtou.’
13Nō kiai, onoono kōtou wakalelei,” te meanga a Iētū, “nō tēlā, e yē a kōtou iloa e wea te ayo ma te ola [ka yau ai te Tama a te Tangata]#25:13 Ko te yikunga nei ko yē i loto o nā toe pōkai talatala..”
Te palapole o nā tāleni
(Luka 19:11-27)
14Mea oki iāna wakawōu, “Ko lāua loa te Pātileia o te Langi pe te tangata ka wano i tona tele, valovalo loa i ona tāvini kē tuku ai i ana penupenu kia lātou kē tautea. 15Tuku loa iāna e lima tāleni#25:15 tāleni: ko weolo wua te tāleni e tayi ki te wolo o te tūtaki o te 20 matawiti yanga, ko taliweolo oki ki te pūtē kōlo. ki te toe tāvini, tuku oki ki te toe e lua tāleni, peia ki te toe, e tayi ana tāleni. Na tau iāna peia kē kaleka lelei ki o lātou māloyi. Eia, wano atu ai iāna i tona tele. 16Ko te tāne e lima ana tālení, e kiai loa na pōvalevale, wano loa okooko wakaona i nā moni ia, eia, maua mai ai e toe lima ngaua tāleni onga. 17Na peia oki te kovi e lua ana tālení, maua mai oki lua ana toe tāleni onga. 18Yaulā te kovi e tayi ana tālení, wano loa keli te lua i nā kelekelé, nanā ai i te moni a tona pū ia.
19Na loa lāi te vāia, niko mai loa te pū o nā tāvini ia, ulu e wea te talatala o ana tāleni na tuku atu kia lātou ia. 20Eia, ko te tāne na liko i te lima ngaua tālení, yau loa iāna aumai ma te toe lima ngaua tāleni, mea loa peia, ‘E te Pū, e lima au tāleni na tuku mai. Onoono mai koe, na maua wakawōu ia aku e toe lima ngaua.’
21Pau mai loa peia te pū, ‘Na kalule ongo tau yanga, e te tāvini lelei ma te manakia ia! Ko koe na taute wakalelei i nā mea likiliki wuá; i te vāia nei ka tuku au ia koe kē wakayaele i te wolonga o te penupenu. Yau lā koe ki loto kē vēvēia wakatai ma tō pū.’
22Yau oki te tāne e lua ana tālení, mea loa peia, ‘E te Pū, na tuku mai koe e lua aku tāleni. Onoono lā koe, na maua wakawōu mai ia aku ni lua toe tāleni.’
23Pau mai oki te pū, ‘Na kalule ongo tau yanga, e te tāvini lelei ma te manakia ia! Ko koe na taute wakalelei i nā mea likiliki wuá; i te vāia nei ka tuku au ia koe kē wakayaele i te wolonga o te penupenu. Yau lā koe ki loto kē vēvēia wakatai ma tō pū.’
24Eia, yau loa te tāvini e tayi wua ana tālení, mea loa peia, ‘E toku Pū ē, ko aku iloa e kovi loa koe tikatai, ko maua wua ia koe e te tope i nā mea e kiai koe na toki, ma te wakapuke i nā mea e kiai koe na lūlū́. 25Nō kiai au na mataku ai, wano loa au nanā i tau tāleni ia ki nā kelekelé. Onoono mai koe, ēnei lāi tau moni na aumai kia akú.’
26Mea mai oki te pū peia kia ana, ‘E te tāvini kino ma te angakole ia ē! Na au iloa ko tope au i nā mea e kiai au na toki, ma te wakapuke i nā mea e kiai au na lūlū́. 27Pī pē koe na tuku i aku moni ia ki te kau pāngika moní kē wakaona mai ai ni moni kē koi ai au i taku niko mainga?
28Eia wua, waokia mai te tāleni maia ana, tuku atu ki te tāvini e laungaulu ana tālení. 29Ko te kovi oki e maua ana meá, ka tukuna atu lāi ni toe mā ana kē onga wua; yaulā te kovi kāni ana meá, ko ana mō mea lewu oki e takotó, ka waokia lāi maia ana.#Mātaiō 13:12; Māleko 4:25; Luka 8:18 30Ko te tāvini kalukole nei, tili pukupuku atu ia ana ki vao ki te pōulingá, te konga e i ai te wakayapiyapi ma te katikati nio.’#Mātaiō 8:12; 22:13; Luka 13:28
Te wakavānga openga
31“Kē yau te Tama a te Tangata i tona yilatū ma te wī āngela, ka nō iāna ki tona potu kānapanapa o te Langi.#Mātaiō 16:27; 19:28 32Ka maliu mai te kakai o te wī wenua ki mua ōna, ka vavae oki iāna i te wī tāngata te toe tangata mai te toe, pe te taute māmoe e vavae i nā māmoe mai nā puakanió. 33Ka tuku ēna nā māmoe ki tona kaokao mātau, ko nā puakanio oki ki tona māyui.
34Eia lā te Aliki koa talatala ai ki te kau e i tona mātaú, ‘Lōmamai lā kōtou, e te kau na wakaleleingia e toku Matuá; nōnō i tō kōtou tuanga, koia te pātileia na penapenangia mō kōtou mai te wowounga o te ao nei. 35Ia aku oki nā wiakaiá, na aumai kōtou ni popoa mā aku, ia aku nā wiainuá, na aumai kōtou ni yua mō oku. Nā tangata wilo au i te puyo o kōtou, yaulā nā valo kōtou ia aku ki o kōtou wale. 36Ia aku nā ulu kākawú, nā wakakawu kōtou ia aku, ia aku nā makí, nā taute kōtou ia aku, ia aku nā yelea i te waleāulí, nā lōmamai kōtou ayiayi mai ia aku.’
37Eia lā, koa mea mai ai te kau tū tautonu ia peia kia ana, ‘E te Atu, nō wea te vāia na wāngai ai mātou ia koe i ō wiakai, ma te vāia na wāinu ai mātou ia koe i ō wiainu? 38Nō wea oki te vāia nā tangata wilo ai koe, na valo ai mātou ia koe ki o mātou wale, ma te vāia nā ulu kākawu ai koe, na wakakawu ai mātou ia koe? 39E wea oki te vāia na kite ai mātou ia koe nā maki, ma te vāia nā i te waleāuli ai koe, na wō atu ai mātou ayiayi ia koe?’
40Ka talatala mai oki pēnei te Aliki, ‘Ko tala atu au i te tika, i te wī vāia nā wai ai kōtou i nā mea nei ki te kovi lewu loa atu o oku tāīna nei, nā wai kōtou peia nōoku nei.’
41Eia, wuwuli loa iāna mea ki te kau e i tona māyuí, ‘E te kau na loimataina ia ē, wō ki nā kongá maia aku nei ki loto o te awi e yē mutu, na penapenangia nō te tiāpolo ma ana āngelá. 42Nā wiakaia au, e kiai loa kōtou na aumai ni popoa mā aku, nā wiainua au, e kiai loa kōtou na aumai ni yua mō oku. 43Nā tangata wilo au, e kiai loa kōtou na valo ia aku ki o kōtou wale; nā onge kākawu au, e kiai loa kōtou na wakakawu mai ia aku; nā maki au, nā i loto oki o te waleāuli, e kiai loa kōtou na taute mai ia aku.’
44Eia, ka iliili mai oki lātou pēnei kia ana, ‘E te Atu, nō wea te vāia na kite ai mātou ia koe nā wiakaia, pēkole nā wiainua, pēkole nā tangata wilo, pēkole nā onge kākawu, pēkole nā maki, pēkole nā i te waleāuli, nā yē maua ai oki ia mātou e te paletua ia koe?’
45Eia lā, koa talatala mai ai iāna kia lātou pēnei, ‘Ko tala atu au i te tika, ia kōtou oki e kiai nā wai i nā mea nei ki te kovi lewu loa atu o oku tāīna nei, e kiai lāi kōtou nā wai mai peia kia aku nei.’
46Eia, ko te kau ia ka wō atu lātou ki te tūā e yē mutu, ko te kau tū tautonu lā ka wō atu lātou ki te ola e yē ngata.”#Tāniela 12:2
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau