Mātaiō 26
26
Te wunanga kē mate ia Iētū
(Māleko 14:1-2; Luka 22:1-2; Ioane 11:45-53)
1Kē oti te talatala a Iētū i nā mea nei tākatoa, mea loa iāna ki ana pipi, 2“Ko a kōtou īloloa, koa toe lua ayo e oko ai ki te Wakamālienga o te Paata, ka tukungia atu te Tama a te Tangata kē wakatātaulongia.”#Ēkoto 12:1-27
3Eia, wakalulu loa nā tatakuvai wowolo ma te kau mātutua o te kakai i te wale mōtoilele o te takuvai wolo, ko Kaiāpa, 4wuna ai lātou kē liko nanā wua ia Iētū kē patu atu ia ana kē mate. 5Yaulā, mea loa lātou, “Auyē tātou e wai i te mea nei i te vāia o te Paata ko te tupu mai te wakataukatinga i loto o te kakai.”
Na omoyia te tino o Iētū i Pētānia
(Māleko 14:3-9; Ioane 12:1-8)
6Nā i Pētānia ia Iētū, nā i loto o te wale o te tāne e lapangia kia Timona te tangata lēpela. 7Eia, yau loa te wawine ia ma te mōina alapata, e manongi moni wolo, lilingi loa ki lunga o te ulu o Iētū, ko nō ma te teke kaokao i lunga o te kaingākai.#Luka 7:37-38
8Kē onoono atu nā pipi i te mea ia, kamuloa lātou mālili wua, muyumuyu mālie wua loa lātou, “E wea te manongi nei na vayipātaingia ai? 9Pī pē te manongi nei na okongia, ka wolo atu te moni ka maua mai kē kave atu ai mā te kau vevé!”
10Mailonga loa ia Iētū a lātou talatala ia, mea loa iāna ki ai, “E wea kōtou e wakayeuyeu ai i te wawine nei? E yanga loa lelei tana mea na wai mai kia aku nei. 11Ko te kau vevé ko i tawa wua o kōtou i te wī vāia, ko oku lā e yē nō wua au pēnei ki o kōtou tawa.#Teutelonomi 15:11 12Ia ana na lilingi mai i te manongi ki lunga o toku tino nei, ko penapena iāna ia aku nō toku tanunga. 13Ko tala atu au i te tika, i te wī konga pau e akongia ai te Longo Lelei nei i te ao tākatoa nei, ka talatalangia tana yanga nei wai mayalanga ia ana.”
Na pole ia Iūta kē vati ēna ia Iētū
(Māleko 14:10-11; Luka 22:3-6)
14Eia, wano loa te toe o te tino angaulu mā lua pipi, ko Iūta Ikaliota tona ingoa, ki nā tatakuvai wowolo, 15uwi loa ki ai, “E wea tā kōtou mea ka aumai mā aku pē ka tuku atu au ia ana kia kōtou?” Eia, wakalau loa lātou e lautolu moni tiliva, kave atu ai mā ana.#Tēkālia 11:12 16Mai te vāia ia, tilomata wua loa ia Iūta kē tai ona vā kaleka kē liko ai ia Iētū tuku atu kia lātou.
Te Wakamālienga o te Paata
(Māleko 14:12-21; Luka 22:7-13, 21-23; Ioane 13:21-30)
17I te ayo mua o te Wakamālienga o nā Walaoa Yē Wakaōpuēá, lōmamai loa nā pipi a Iētū kia ana, iliili loa peia ki ai, “Ko i wea te konga ko manatu ai koe kē wō mātou penapena, kē taumaya ai koe i te Paata?”
18Mea atu loa iāna, “Wō kōtou ki te ōile, ko i ai te tangata, mea atu kōtou kia ana, ‘Na mea mai te Pūāpī pēnei: Koa talivave te vāia na wakaponongia nōoku, ka taumaya ai au i te Paata ma aku pipi i tō wale.’ ” 19Eia, wai oki nā pipi i te yanga ia kē tautonu ki nā muna a Iētū nā talatala kia lātou i te penapenanga i te Paata.
20Kē akaawiawi, nōnō loa ia Iētū ki lalo i te kaingākai, ma te tino angaulu mā lua pipi. 21Ia lātou e taumamaya ia, talatala loa ia Iētū peia, “Ko tala atu au i te tika, ka vati te toe o kōtou nā ia aku.”
22Kamuloa oki lātou wetō nā palo, iliili takitai ai lātou kia ana ma te mea peia, “E te Atu, e yē tano ko oku teia e mea ai koe nā, mō?”
23Pau atu ai ia Iētū, “Ko te kovi na wakatau toko a māua walaoa ki loto o te avá, ko ona ka vatia au.#Talamo 41:9 24Ka wano lāi peia te Tama a te Tangata kē tautonu ki nā muna na tutingia nō oná. Yaulā, i te wakamataku te mate o te kovi ka vatia te Tama a te Tangata! E lelei atu loa pī pē iāna e kiai na wānaungia mai!”
25Eia, mea loa ia Iūta, te kovi ka vatia iāná, “E yē tano ko oku teia e mea ai koe nā, mō e te Pūāpī?”
Kākole lā te meanga a Iētū ki ai, “Ēeke, ēnā loa e talaina mai e koe nā.”
Te Kaingākai a te Atu
(Māleko 14:22-26; Luka 22:14-20; 1 Kōlīnētia 11:23-25)
26Ia lātou e taumamaya ia, liko loa ia Iētū i nā walaoa, wakaatawai loa ma te vayivayi, tuku atu ai ki ana pipi, mea loa peia, “Liko mai, kai, ko toku tino tēnei.”
27Eia, liko oki iāna i te kapu, wakaatawai loa ma te tuku atu kia lātou, mea loa peia, “Inu mai te kapu nā kōtou tākatoa. 28Ko toku toto tēnei o te wakapononga#26:28 wakapononga: ko i nā toe pōkai talatala, wakapononga wōu a te Atua na wakamalingingia mō te wainga tāngata kē yuangia ai a lātou yala.#Ēkoto 24:8; Ielemia 31:31-34 29Ko tala atu au, e yē inu wakawōu loa au i nā yua o te wua vine, oko wua atu ki te ayo ka inu ai au ma kōtou i te uwaina wōu i te Pātileia o toku Matua.”
30Kē oti tā lātou yīmene, wō loa lātou ki te maunga ko Oliveta.
Na yivayiva ia Iētū ka nanā ia Pētelo ia ana
(Māleko 14:27-31; Luka 22:31-34; Ioane 13:36-38)
31Eia, mea loa ia Iētū kia lātou, “I te pō nei lāi ka pau āwuwū kōtou e te maka ia aku nō nā mea ka tupu kia aku nei; na tutingia oki pēnei,
‘Ka patu au i te taute māmoe,
ka yola te lāngai māmoe ki nā kongá.’#Tēkālia 13:7
32Yaulā, kē wenake au ki lunga mai te mate, ka wano au lā mua o kōtou ki Kalilea.”#Mātaiō 28:16
33Mea atu ai ia Pētelo kia Iētū, “E yē maka loa au ia koe, wua atu oki te wī tāngata ka maka ia koe.”
34Kākole lā te meanga a Iētū ki ai, “Ko tala atu au i te tika, i mua ake ka kakā ai te toa moa i te pō nei, na tāwaki tolu tau nanānga ia aku.”
35Naumate lā ia Pētelo, “Ēkole lava, e yē nanā loa au ia koe, wua atu au ka palewa i ō tawa.” Na naumate lāi oki peia te katoanga o ana toe pipi kia ana.
Te tatakunga a Iētū i te tukono i Kētetemane
(Māleko 14:32-42; Luka 22:39-46)
36Eia, wō loa ia Iētū ma ana pipi ki te konga e meangia kia Kētetemane, mea ai iāna peia kia lātou, “Nōnō wua kōtou i kinei, kē wano ake au tataku i kilā.” 37Kave loa iāna ia Pētelo ma lua tama a Tepetaiō, eia, yau loa te yōyātia ongo ki loto ōna. 38Mea loa iāna peia kia lātou, “Kamuloa toku vaelua tatōngia e te tīngā, lāua au ka mate. Nōnō wua kōtou i kinei, āla wua tātou wai ma te onoono.”
39Yōyō atu loa iāna ni mō toe ki mua, wakangoto wuli pūnou loa iāna ki lalo, tataku ai peia, “E toku Matua ē, e yē maua mō ia koe e te kave atu i te kapu o te mate nei maia aku? Auyē lā kē tupu aku manatunga, ko au manatunga lā kē tupu.”
40Eia, niko mai loa iāna ki ana pipi, onoono atu lā ko vayilowi. Mea loa iāna peia kia Pētelo, “E yē maua loa mō ia kōtou kē āla wua ake mā aku e tayi ola? 41Āla wua kōtou ma te tataku kē yē yukiyukia mai kōtou. Ko unati wua oki te vaelua, yaulā te tino ko wewei wua.”
42Eia, niko lua loa iāna tataku, mea loa pēnei, “E toku Matua ē, e yē maua mō kē kave atu ake koe i te kapu nei maia aku? Yaulā oki kē inu lāi au, kē tonu ngaleka ki au manatunga.”
43Kē niko wakawōu mai iāna kia lātou, onoono atu i te kau ia na momoe wakawōu, kamuloa nā kilimata taenanawa. 44Eia, maka atu ai iāna ia lātou, niko tolu loa tataku pē ana muna lāi nā mea i mua atú.
45Niko mai loa iāna ki ana pipi, mea loa kia lātou, “Ko vayilowi lāi kōtou ma te manavaleka? Kakalo ake! Na oko ki te ola e tukungia ai te Tama a te Tangata ki te lima o te kau e wai ki te yalá. 46Wetū ki lunga, ka wō tātou! Onoono ake, ēnei koa yau te kovi ka vatia aú!”
Na likoa ia Iētū
(Māleko 14:43-50; Luka 22:47-53; Ioane 18:3-12)
47Ia Iētū e talatala ia, kakao mai oki ia Iūta, te toe o te tino angaulu mā lua pipí, ko ona ma te pupu tangata tokawolo ko tāwi a lātou koke ma nā patu lākau. Na ungaina mai lātou e nā tatakuvai wowolo ma te kau mātutua o te kakaí. 48Na laupono taumua oki te kovi vativati ia i tana wakamailonga kia lātou: “Ko te tangata āku ka yongí, liko kōtou ia ana.” 49Eia, pukoyo atu loa ia Iūta kia Iētū, mea loa, “Kē ola koe, e te Pūāpī!” yongi atu ai ia ana.
50Kākole lā te meanga a Iētū, “E te yoa, wai kē oti tau yanga na yau ai koe nā.”#26:50 wai kē oti tau yanga na yau ai koe nā: mēkole, e wea tau mea na yau ai?
Lakai mai loa te pupu tāne ia ki mua, taupuke mai lunga o Iētū, pupulu wakamakeke ia ana. 51Nō tā lātou yanga ia, ūnu loa te koke a te toe tākanga a Iētū nā i ai, vavalu ai mai lunga o te valoyeunga o te takuvai woló, motu te talinga ki vao.
52Mea loa ia Iētū kia ana, “Wakaulu tau koke nā ki tona wawao; ko lātou oki e liko i te koké, ka mamate lāi i te koke. 53Ko manatu mō koe e yē maua ia aku e te tauvalo atu ki toku Matua kē paletua mai? E peia ngatai wua loa kē tuku mai iāna e tino angaulu mā lua mano pupu āngela kia aku nei. 54Yaulā, ka mea ai oki pēwea e tupu ai nā muna o te Puka Yā e mea mai, ka tupu lāi peia te waiwainga o te wī mea?”
55Eia, mea loa ia Iētū ki te patanga tangata ia, “E tangata lā au wakatupu kino na lōmamai ai kōtou ma a kōtou koke ma nā patu lākau liko ia aku? Ia aku nā nō ma te akoako i loto o te Waleyā i te wī ayó, e kiai loa kōtou nā liko ia aku. 56Yaulā oki, na waia pēnei tākatoa nā mea nei kē wakatupu ai nā muna na tutingia e nā pelovetá.”
I te vāia ia, maka loa te wī pipi ia ana, welele ki nā kongá.
Na tū ia Iētū ki mua o te Kōnitala
(Māleko 14:53-65; Luka 22:54-55, 63-71; Ioane 18:13-14, 19-24)
57Ko te kau na likoa ia Iētū́, kave loa lātou ia ana ki te wale o Kaiāpa te takuvai wolo, ko wakalulu oki i kiai nā akoako tule ma te kau mātutuá. 58Ko Pētelo lā nā mamao ki muli tana ālu mainga, oko wua atu ki te kolo e lā vao o te wale o te takuvai woló. Ulu loa iāna ki loto, nō i tawa o nā tāngata leoleó ke ana kitea ka wea atu ai lātou ia Iētū.
59Yanga loa nā tatakuvai wowolo ma te lulu Kōnitala tākatoa ia e te ulu tāyīnga, kē maua ai ia lātou e te patu ia Iētū kē mate. 60Yaulā, kāe loa kulakulanga mea a lātou na maua, wua atu oki e tokawolo te kite vativati nā lōmamai ki mua.
Eia, wetū mai loa te tokalua ia ki mua, 61wakamamata loa pēnei: “Nā mea te kovi nei, ‘Ka maua ia aku e te lepeti ki lalo i te Waleyā o te Atua, e tolu oki ayo ka wakatū ai ēku wakawōu.’ ”#Ioane 2:19
62Eia, matete loa ki lunga te takuvai wolo, uwi loa peia kia Iētū, “Kāe lā au talatala ki nā mea nei? Nō wea ai te tala ūwingāyala a te kau e tāyī ai ia koe nei?” 63Yaulā, na kapi te ngutu o Iētū.
Mea ai te takuvai wolo ki ai, “Ko wakauwe atu au kia koe lā loto o te tukungā-tika i te ingoa o te Atua Ola, tala mai koe kia mātou pē ko koe te Metia, te Tama a te Atua.”
64Pau atu oki ia Iētū, “Ēeke, ēnā loa e a kōtou meangia nā. Yaulā, ko tala atu kia kōtou tākatoa, i nā vāia lā mua nei ka a kōtou kitea te Tama a te Tangata ko nō i te kaokao mātau o te Atua Awukelé, i te yaunga i lunga o nā kāpuāo o te langi.”#Tāniela 7:13
65Eia, yayae loa te takuvai wolo i ona kākawu, wai loa ma tana muna, “Na wakakino iāna i te Atua! E wea tātou ka winangalo ai kē yī toe kite? Ēnei, na a kōtou langona tana wakakino Atua.#Levitiku 24:16 66Tuku mai tā kōtou tika.”
Pau atu oki lātou peia, “Na pono kē tau tona yana!”
67Eia, yūvalevale loa lātou i tona tupu, wai ma te motomoto ia ana ki te lima.#Ītaia 50:6 Nā patu te toe kau i ona papo 68ma te mea pēnei, “E te Metia ē, yivayiva mai ake, ko ai na motoa koe?”
Te nanānga a Pētelo ia Iētū
(Māleko 14:66-72; Luka 22:56-62; Ioane 18:15-18, 25-27)
69I te vāia ia, nā nō lāi ia Pētelo i loto o te kolo o te wale ia, yau loa te toe tokotoko tamāwine ia kia ana, mea loa pēnei ki ai, “Kāle lā ko koe te toe nā tataka ma Iētū o Kalileá?”
70Yaulā, nanā loa iāna i mua o lātou tākatoa ma te mea peia, “Ko yē aku iloa ni wea au muna e talatala mai nā.”
71Eia, wano loa iāna ki vao, ki te konga i te pū e ūlu mai aí. Kitea mai loa iāna e te toe tokotoko tamāwine, eia, mea loa te tamāwine ia ki te kau i kiaí, “Ko te kovi nei, nā tataka ma Iētū o Nātalētá.”
72Nanā wakawōu oki iāna lā loto o te tuku tika, mea loa, “Ko yē aku iloa te tāne nā!”
73E kiai na loa, wō loa te kau nā wetū i ai kia Pētelo, mea loa peia ki ai, “Na pono ngaleka lāi ko koe te toe o lātou, ko tau wakalale talatala ko talā mai koe.”
74Kāmata loa iāna e te wakakino ia ana lāi ma te tuku tika pēnei kia lātou, “Kē tūā mai te Atua ia aku mē ko yē tautonu aku muna nei! Ko yē aku iloa te tāne nā!”
I te vāia lāi ia, kakā oki te toa moa. 75Eia, mayala loa ia Pētelo nā muna a Iētū nā yalu mai kia aná, “E yē oko ki te tolu o te kakānga o te toa moa i te pō nei, na tāwaki tolu tau nanānga, ko yē au iloa ko ai au.” Eia, wano atu loa iāna ki vao, kamuloa tōkia e te wakayapi.
Currently Selected:
Mātaiō 26: PKP
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau