Mātaiō 24
24
Nā wakamailonga o te vāia wakaweuwi
(Māleko 13:1-13; Luka 21:5-19)
1Eia, maka loa ia Iētū i te Waleyā, kē yaele atu iāna ki vao, lōmamai loa ana pipi tou kia ana i nā wale e i kiai ia. 2Mea loa peia ia Iētū kia lātou, “Ko a kōtou kitea nā wale nei? Ko tala atu au i te tika, kāe watu lewu loa e takoto i lunga o te toe watu i nā wale nei, ka pau āwuwū loa e te lepetia ki lalo.”
3Eia, ko nō ia Iētū i lunga o te Maunga ko Oliveta, lōmamai ngalo wua loa nā pipi kia ana, mea loa peia ki ai, “Tala mai ake, e wea te vāia e tupu ai nā mea nei? E wea oki te wakailo o tau yaunga ma te wakamutunga o te ao nei?”
4Tala atu loa ia Iētū kia lātou, “Onoono kōtou wakalelei, auyē loa e tangata e vati ia kōtou. 5E tokawolo te kau ka lōmamai i toku ingoa ma te mea ē, ‘Ko oku te Metia,’ e wainga oki te tangata ka vavale kia lātou. 6Ka a kōtou langona te yalulu o te tamaki mai nā konga pipili ma nā longo tamaki mai nā konga mamao. Eia wua, onoono kōtou wakalelei, auyē wetō nā palo. Ēeke, ka tupu lāi nā mea ia, yaulā e kiai ake na oko ki te wakamutunga. 7Ka tū mai te toe wenua tamaki atu ki te toe wenua, peia te toe pātileia ki te toe pātileia. Ka tupu nā vāia papango, ka tupu oki te ngāluelue wenua i nā toe konga. 8Ko te wakauyunga wua tēnei o te wī mate ka yau, ka lāua te tīngā o nā tuātoto o te wawine koa wānau.
9Eia, ka tukungia kōtou e lātou kē takikinongia, kē patua oki kē mamate. Ka veiangia kōtou e te wī wenua tākatoa nōoku nei.#Mātaiō 10:22 10Kē oko ki te vāia ia, e tokawolo te tangata ka wulikē mai o lātou lotokono ia aku, ka wakatau vati oki ma te veliveli ia lātou lāi. 11E wolo te peloveta ngutu vativati ka wetū mai, e tokawolo oki te tangata ka vavale kia lātou. 12Ka wano atu te yanga kikino a te tangata ki te ongo, nō kiai ka anutoke ai te tū winangalo o te lainga o te tangata i te toe kau. 13Ko te tangata lā ka tū wakamakeke oko wua atu ki te yawenga, ka maua ia ana te ola.#Mātaiō 10:22 14Ko te Longo Lelei o te Pātileia nei, ka akongia taumua kē puni loa te ao nei tākatoa wai kite mō te wī wenua. Eia lā, koa oko ai ki te yawenga.
Te mea wakaveliveli ma te wakamataku
(Māleko 13:14-23; Luka 21:20-24)
15“Eia, ke a kōtou kitea te mea wakavelivelí na wakatūa wai mea tāivaiva ko tū i te yionga yā, nā talā mai e Tāniela pelovetá, (kē wakamau wakalelei te tangata e kauwiá ke ana iloa), #Tāniela 9:27; 11:31; 12:11 16eia lā, ko te kau e nōnō i Iūtea, kē welele lātou ki nā maungá. 17Auyē loa e tangata e i lunga o tona wale e leilo ki lalo aumai penupenu ki vao.#Luka 17:31 18Auyē oki e tangata e i loto o nā konga tokikai e niko aumai i tona peleue. 19Ka tupu te yōyātia i nā ayo ia ki te kau wāwine e yapū, ma nā mātutua wawine e wāwū tamá. 20Tataku kōtou kē yē tupu tā kōtou welelenga i te vāia makalili, pēkole i te Tāpati. 21Ka tupu te yōyātia ongo i nā ayo ia, kāe loa kino peia na kitea mai te yāyākinga o te ao nei, oko wua mai ki te vāia nei; kāe oki mea peia wakawōu e tupu.#Tāniela 12:1; Āpōkālupo 7:14 22Pī pē e kiai na yemu potongia nā ayo ia, kāe loa tangata e ola. Yaulā, nō te kau na ikingiá, ka yemu potongia ai nā ayo ia. 23I te vāia ia, kē mea mai e tangata kia koe, ‘Onoono ake, ēnei te Metia,’ pēkole, ‘Ko ona tēlā,’ auyē loa kōtou e loloku ki ai. 24Nō tēlā, ka wetū mai nā Metia vativati ma nā peloveta vativati, wai mai a lātou wakailo mana ma nā yanga wakawotu kē vavale ai oki ma te kau na ikingiá, pē ka a lātou maua. 25Wakalongo mai! Na tala atu au taumua kia kōtou i nā mea nei.
26Pē ka mea atu e tangata, ‘Ēlā te kovi ia, ko i te mētēpala,’ auyē kōtou e wō ki ai; pēkole kē mea atu, ‘Ēnei iāna, ko i te pia i loto loa,’ auyē kōtou e loloku ki ai.#Luka 17:23-24 27Pē te uwila oki e lapa i te langí, e kitea tona yila mai te wenakenga o te lā ki te yopungā-lā, ka peia lāi oki te Tama a te Tangata kē yau iāna. 28I te konga oki e tike ai te tino na mate, ko i kiai lāi te konga o nā āetó ko wakalulu mai ai.#Luka 17:37
Te kakao mainga o te Tama a te Tangata
(Māleko 13:24-27; Luka 21:25-28)
29“I muli wua mai o te vāia tūngayala ia,
‘ka wakapōulingia te lā,
e yē yila wakawōu te māina;
ka makulu nā mata mai te langi,
ka lūlūa te wī tino mana o te langi mai o lātou ala e wō ai.’#Ītaia 13:10; 34:4; Ētēkiela 32:7; Ioela 2:10, 31; 3:15; Āpōkālupo 6:12-13
30Ko te vāia teia ka kakao mai ai te wakailo o te Tama a te Tangata i te langi, ka tōkia te wī wenua o te ao nei e te wakayapi. Ka a lātou kitea oki te Tama a te Tangata ko yau i lunga o nā kāpuāó, i tona mana awukele ma te yilatū mōtoilele.#Tāniela 7:13; Tēkālia 12:10-14; Āpōkālupo 1:7 31Ka unga mai iāna i ana āngela ma te vavalo o te tangi pū, kē opoopoa mai te kau āna na iki mai te wā ngaua yionga matangi o te ao nei, mai te toe kōtinga o te langi oko wua atu ki te toe.
Te āpī mai te lākau tuke
(Māleko 13:28-31; Luka 21:29-33)
32“Kāleka lā, kē wakamau kōtou i te āpī o te lākau tuke: I te vāia e wakamālūlū ai ona lā, koa wekao mai ma ona lau, na a kōtou iloa wua koa talivave mai te vāia māyana. 33Eia, ke a kōtou kitea na tupu te wī mea nei, ko a kōtou īloloa wua na talipili mai te vāia e niko mai ai iāna, koa tatū mai i te pū. 34Ko tala atu au i te tika, e yē pau te taitangata nei e te mamate kē tupu loa nā mea nei tākatoa. 35Ka ngangalo te langi ma te ao nei, ko aku muna lā e yē ngangalo loa.
Kāe tangata ko iloa te ayo ma te ola
(Māleko 13:32-37; Luka 17:26-30, 34-36)
36“Kāe loa tangata ko iloa ēna te ayo ma te ola, peia nā āngela o te Langi, peia oki te Tama,#24:36 peia oki te Tama: ko ngangalo nā muna nei i nā toe pōkai talatala. yaulā ko te Matua Yā wua ko iloa. 37Pē nā mea nā tupu i te vāia o Noá, ka wai lāi oki peia te yaunga o te Tama a te Tangata.#Kēnete 6:5-8 38I nā ayo i mua o te vai tuluvī, nā valenga wua te wī tāngata e te inuinu ma te taumamaya, te wakaao ma te tuku atu kē wakaaoa, oko wua atu ki te ayo na ulu ai ia Noa ki loto o te ālaka. 39E kiai na a lātou īloloa e wea te mea ka tupu, oko wua atu ki te vāia na pā mai ai te vai tuluvī popō ia lātou ngangalo atu. Ka peia loa oki kē oko ki te ayo e yau ai te Tama a te Tangata.#Kēnete 7:6-24 40E tokalua tāne i te konga tokikai, ka kāvea atu te toe, ka makatia mai te toe. 41E tokalua wāwine i te konga tāvili tītona, ka kāvea atu te toe, ka makatia mai te toe.
42Nō kiai, onoono kōtou wakalelei, e yē a kōtou īloloa oki e wea te ayo e niko mai ai tō kōtou Atu. 43Yaulā, kē mailonga ia kōtou te mea nei: Pī pē na iloa taumua e te tangata nō ona te walé e wea te ola o te pō e yau ai te tōpakava, ka leoleo wakalelei iāna auyē loa tona wale ia e kaiāngia. #Luka 12:39-40 44Nō kiai, kē peia oki kōtou i te penapenanga kē papa ngaleka, nō tēlā ka yau te Tama a te Tangata i te ola e yē manatua e kōtou.
Te tāvini manakia ma te tāvini kino
(Luka 12:41-48)
45“Ko ai lā te tāvini manakia ma te tuwunga oki? Ko ona te kovi na tukuna e te pū kē wakayaelea nā tāvini i tona ngutuale, kē tiutiu i a lātou popoa i te vāia na kaleka. 46Valea loa te tāvini ia kē pukea mai e tona pū ko mea iāna peia. 47Ko tala atu au i te tika, ka tuku te pū i te tāvini ia kē wakayaelea ana wī penupenu tākatoa. 48Yaulā pē iāna e tāvini kino, manatu loa peia tona ngākau, ‘Ka wano ē oki toku pū e niko mai ai.’ 49Eia, yāyāki loa iāna e te yākinikini i nā toe tāvini, taumaya wua ai oki ma te inuinu i tawa o te kau e kokona wuá. 50Ka niko mai oki tona pū i te ayo e yē ana manatua, ma te ola e yē ana iloa. 51Ka yemu potongaina iāna e tona pū, kave atu ai ia ana ki te konga o te kau ngutuluá, e i kiai te wakayapi ma te katikati nió.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau