Mātaiō 23
23
Na wakalapa ia Iētū i nā Akoako-Tule ma nā Pālitea
(Māleko 12:38-39; Luka 11:43, 46; 20:45-46)
1Eia, talatala loa ia Iētū ki nā patanga tangata ia ma ana pipi, mea loa pēnei: 2“Ko nā akoako tule ma nā Pālitea, ko nōnō lātou i te vāenga o Mōte. 3Nō kiai, kē talingatai kōtou ki ai ma te wai i te wī mea a lātou e akoako atu kia kōtou. Yaulā, auyē kōtou e wua i a lātou yanga, ko yē wakamātau oki lātou e te wai i nā mea a lātou e ako ia. 4Ko lulu oki ni āmonga tāewawana, wakaili ai ki lunga o nā pokoivi o te wī tāngata, yaulā lātou ko yē papā loa e te mimili wua atu e mangamangālima kē wakaneke ai nā āmonga ia.
5Ko a lātou wī yanga, e mea wua ko wai kē onoonowia e te kakai. Ko wakatotongi oki i nā pia liliki e wawao ai nā yīlava o te Puka Yā e i lunga o lātou#23:5 nā pia liliki e wawao ai nā yīlava o te Puka Yā e i lunga o lātou: Ēleni, pīlāteli. Ko nā mea ia, ni pūpū pia liliki ko i loto ai nā yīlava o te Puka Yā (Ēkoto 13:1-6; Teutelonomi 6:4-9; 11:13-21). Ko wawao lātou i nā mea ia lā mua o te lae ma te lima māyui e pili ki te watumanava, e wakailo ko māmalu ki nā wakauwenga a te Atua (Ēkoto 13:9, 16; Teutelonomi 6:8; 11:18). ma te wakaloloa i nā tautaunga kāveluvelu i nā tipi o o lātou kākawú.#23:5 Ko wawao te tangata i nā mea nei wai wakailo o tō lātou wakatapunga ki te Atua (onoono ki te Nūmelo 15:37-41). #Mātaiō 6:1 6Ko mina oki lātou kē nōnō i nā konga e lā mua o nā imukai, peia ki nā vāenga e vavaengia i loto o nā walepulé. 7Ko mina lātou kē wakateniteningia e te tangata i nā māketé, ko mina oki kē tauvalongia lātou e te kakai ni ‘Pūāpī.’#23:7 Pūāpī: ko te wulinga mai te leo Ālama, Rabbi.
8Ko kōtou lā, auyē loa kē tauvaloa ni ‘pū,’ nō tēlā e tayi wua o kōtou Pū, ni tāīna oki kōtou tākatoa. 9Peia oki, auyē kōtou e tauvalo wua atu i e tangata i te ao nei e ‘matua’, nō tēlā e tayi lāi o kōtou Matua, ko i te Langi oki iāna. 10Auyē oki kōtou kē tauvalongia ni ‘pūāpī’, nō tēlā e tayi lāi o kōtou Pūāpī ko te Metia. 11Ko te tangata wolo i loto o kōtou nā, ko ona tō kōtou tāvini.#Mātaiō 20:26-27; Māleko 9:35; 10:43-44; Luka 22:26 12Ko te tangata e wakatiketike ia ana wua ka wakayakayakangia, ko te tangata lā e wakayakayaka ia aná ka wakatiketikengia.#Luka 14:11; 18:14
Na wakalapa ia Iētū i te tū ngutulua
(Māleko 12:40; Luka 11:39-42, 44, 52; 20:47)
13“I te wakamataku tō kōtou mate, e nā akoako tule ma nā Pālitea ia ē, ngutulua mā! Na pupuni kōtou i te pū o te Pātileia o te Langi lā mua o nā tupu o te wī tāngata. Ia kōtou oki e yē ūlu ki loto ia, ko ālai lā kōtou i te kau e naumate kē ūlu ki loto ia.
14[I te wakamataku tō kōtou mate, e nā akoako tule ma nā Pālitea ia ē, ngutulua mā! Ko pau nei nā wale o nā wāwine takawuá i tā lātou yanga, ko wai alaala wua ai kē yē mailonga a kōtou yanga ia lā loto o a kōtou tatakunga loloa. Ko nā tāngata nei oki, e utunga loa kino tō lātou mea!]#23:14 Ko i loto o nā toe pōkai talatala nā muna e taliweolo ki te Māleko 12:40; Luka 20:47.
15I te wakamataku tō kōtou mate, e nā akoako tule ma nā Pālitea ia ē, ngutulua mā! Ko wai o kōtou tele ki nā konga mamao o te wenua ma te moana kē maua mai e pipi e tayi; kē maua oki e pipi, tāwaki lua loa tā kōtou meanga ia ana wai tama nō Āte pē kōtou nā.
16I te wakamataku tō kōtou mate, e nā wakayaele matapō ia ē! Ko mea kōtou pēnei, ‘Kē tuku tika#23:16 tuku tika: Rar. taputoꞌu e tangata ki te Waleyā, e yē tikangia te mea ia; yaulā kē tuku tika e tangata ki nā kōlo o te Waleyā ia, ka mana tana tukungā-tika ia.’ 17E nā matapō pāioio ia ē! E wea te mea matamatua atu: ko nā kōlo, pēkole ko te Waleyā e wakatapua nā kōlo ia? 18Ko mea oki kōtou peia, ‘Kē tuku tika e tangata ki te atalau, e yē tikangia te mea ia; kē tuku tika lā e tangata ki nā matanga e i lunga ia, ka mana lāi tana tukungā-tika ia.’ 19E te kau matapō ia ē! Ko ai ko wolo atu: ko te matanga, pēkole ko te atalau e wakatapua te matanga ia? 20Nō kiai, ko te tangata e tuku tika ki te atalaú, ko tuku tika lāi iāna ki te atalau ma te wī mea e i lunga ia. 21Ko te tangata oki e tuku tika ki te Waleyā, na tuku lāi tana tika ki ai maana e wakaāwi i loto ia. 22Peia oki te tangata e tuku tika ki te Langí, na tuku lāi tana tika ia ki te potu o te Atua maana e wakamalele i lunga ia.#Ītaia 66:1; Mātaiō 5:34
23I te wakamataku tō kōtou mate, e nā akoako tule ma nā Pālitea ia ē, ngutulua mā! Ko kave kōtou i te tuanga ngaulu o nā lau kāilo kaí o nā lākau tanu a kōtou, te minete, te āneto ma te kūmeno. Maka lā kōtou i nā mea kalunui o te Tule, pe te tū tautonu, te manavaaloa ma te tū manakia. Ko nā mea tikāi teia a kōtou ka taute, auyē oki kōtou e maka i nā toe mea ia.#Levitiku 27:30 24E nā wakayaele matapō ia ē! Ko taau kōtou ki vao i te naonao mai nā yua inú, wolo lā kōtou ki loto i te kāmela!#23:24 Ko te naonao ma te kāmela oki na yē wakatikangia wai popoa i te Levitiku 11:4, 23.
25I te wakamataku tō kōtou mate, e nā akoako tule ma nā Pālitea ia ē, ngutulua mā! Ko palupalu kōtou ia vao o a kōtou kapu ma nā meleki, yaulā ia loto, ko yeyele loa i te noni penupenu ma te umiti kala. 26E nā Pālitea matapō ia ē! Taumua kōtou e te palupalu ia loto o te kapu ma te meleki, eia lā koa māyinayina ai mā vao.
27I te wakamataku tō kōtou mate, e nā akoako tule ma nā Pālitea ia ē, ia kōtou i te ngutulua! Ko wekiki wua kōtou pe nā menema na pēnia kē mumuka wua; ko mōtoilele te onoononga o vao, yaulā ia loto ko kī yeyele i te ivi tangata mamate ma te wī mea wakalialia.#Yanga 23:3 28Ko weolo wua kōtou peia, ia vao, ko wakaāli kōtou ki te kakai ni tāngata kōtou tū tautonu, yaulā ia loto, kamuloa yeyele wua i te ngutulua ma te yua pūlenga.”
Na yivayiva ia Iētū i tō lātou utunga
(Luka 11:47-51)
29“I te wakamataku tō kōtou mate, e nā akoako tule ma nā Pālitea ia ē, ngutulua mā! Ko wowou kōtou i nā menema o nā peloveta ma te wakalākei i nā lua o te kau tū tautonú. 30Ko wai oki a kōtou muna peia, ‘Pī pē mātou nā ōla i te vāia o o mātou mātutuá, e yē wekau loa mātou ki te wakayekenga a lātou i nā toto o nā peloveta ia.’ 31Yaulā, ko wakamamata mai lāi kōtou ē, ni ulaula kōtou nō lātou, te kau na patua nā peloveta ia. 32Ēeke, wakayawe atu kōtou i te yala na yāyākina e nā mātutua o kōtou ia!
33E nā ōvī ia ē! E te wanaunga vīpela ia ē! Ka mea kōtou pēwea e yao ai mai te utunga o Āte?#Mātaiō 3:7; 12:34; Luka 3:7 34Nō kiai, ka wakaunga atu au kia kōtou nā ni peloveta, ni tāne tūwuwunga ma nā pūāpī. Ka patua e kōtou te toe kau o lātou ma te wakatātaulo atu, ka vayia oki te toe kau i loto o o kōtou walepule ma te yalavaka ia lātou lā te wī ōile pau. 35Nō kiai, ka wakailingia ki lunga o kōtou te utunga o nā toto yalakole tākatoa na wakayekengia i te ao nei, mai te toto yalakole o Āpelá ki te toto o Tākālia, te tama a Palakia na patua e kōtou i te vā o te yionga yā ma te atalaú.#Kēnete 4:8; 2 Wakapapanga 24:20-21 36Ko tala atu au kia kōtou i te tika, ko nā mea nei loa tākatoa, ka wakailia ki lunga o te taitangata nei.
Te tangi o Iētū ia Iēlūtalema
(Luka 13:34-35)
37“E Iēlūtalema, e Iēlūtalema ē, na patu koe i nā pelovetá ma te kamukamu ki te watu i te kau na ungaina atu e te Atua kia koe nā. Ē wea taime nā ngau ē toku ngākau kē kowikowi i au tama ki te konga e tayi, pe te moa e kokowi i ana punua ki lalo o ona pakayaú, yaulā koe e kiai loa nā pole! 38Tēnei lā, ka maka pūpūngia tō Waleyā kē ngaongao wua.#Ielemia 22:5 39Ēnei au e tala atu nei, e yē kite wakawōu loa koe ia aku, oko wua atu ki te vāia e wakamamata ai tō ngutu pēnei, ‘Valea loa iāna e yau ma te ingoa o te Atú.’ ”#Talamo 118:26
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau