Mātaiō 22
22
Te palapole o te imukai wakaaonga
(Luka 14:15-24)
1Talatala wakawōu oki ia Iētū kia lātou lā loto o te palapole, mea loa peia: 2“Ko wakatau au i te Pātileia o te Langi pe te aliki na penapena e imukai nō te wakaaonga o tana tamatāne. 3Wakaunga loa iāna i ona tāvini kē wō akailo ki te kau āna na való kē lōmamai ki tana imukai ia, yaulā, e kiai lātou na papā.
4Eia, unga mai oki iāna ni toe tāvini ma te mea atu peia kia lātou, ‘Wakailo atu ki te kau āku na való, na papa i te vāia nei taku imukai e te penapena. Na pau aku puakatolo mōmomona ma nā punua wāngai e te patu, na papa te wī mea tākatoa. Lōmamai ki te imukai o te wakaaonga.’
5Yaulā, e kiai loa na a lātou malawia te mea ia; na wō lā lātou, teia ki tona pā tokikai, teia ki tana yanga. 6Ko te katoanga o te kau ia, taupuke loa mai lunga o nā tāvini ia takikino ia lātou, patu atu ai kē mamate. 7Na kamuloa te aliki pau nā lili ia lātou. Wakaunga loa i ona vāeau kē yīmokamokaina te kau patu tangata ia, tutu atu ai i tō lātou ōile tū te yila.
8Eia, talatala ai iāna ki ona tāvini, mea loa, ‘Na papa te imukai o te wakaaonga e te penapena, yaulā ko te kau āku na való ko yē kaleka loa lātou kē lōmamai. 9Wō lā kōtou ki nā tīkotinga o nā ngutuala matuá, valo mai i te tangata wua a kōtou ka kite kē lōmamai ki te imukai o te wakaaonga.’ 10Eia, wō atu ai nā tāvini ia ki nā ngutuala valo mai i te wī tāngata wua ka makoyia e lātou, kānoni wua te kau lelei ma nā palalā; kamuloa te pia o te wakaaonga ia kapi i te tangata.
11Yaulā, kē ulu mai te aliki ki loto onoono i nā tāngata na valongia ia, kite atu loa iāna i te tāne ia, kāe ona kākawu wakaaonga ko wawao. 12Iliili loa iāna peia ki ai, ‘E te yoa ē, nō wea koe na oko mai ai ki loto nei ma te onge kākawu wakaaonga?’ E kiai loa te tāne ia na ngangana mai.
13Eia, mea atu ai te aliki ki ona tāvini, ‘Yelengia nā lima ma nā vae o te kovi nā, tili atu ia ana ki vao ki te konga pōulinewu, e i kiai te wakayapiyapi ma te katikati nió.’ ”#Mātaiō 8:12; 25:30; Luka 13:28
14Wakaweuwi loa ia Iētū pēnei, “E tokawolo oki lātou na valongia, yaulā, e tokalewu wua lātou na ikingia.”
Te tūtaki telo kia Kaitala
(Māleko 12:13-17; Luka 20:20-26)
15Eia, wō loa nā Pālitea laupono e palāni kē matapili ai lātou ia Iētū i ana muna ka talatala. 16Wakaunga loa i a lātou toe pipi ma nā tāngata mai te pupu o Ēlotá kē wō kia ana. Iliili loa lātou ki ai peia, “E te Pūāpī, ko a mātou iloa e tangata yakolele koe, ko akoako koe i te winangalo o te Atua ma te tika. Ko yē wakatūkēngia oki au manatunga e te tangata, nō tēlā ko yē au tuanakia o lātou tū. 17Tala mai ake, e wea keke tau manatunga? Ko tautonu mō i tā tātou Tule kē tūtaki telo tātou kia Kaitala, mēkole?”
18Yaulā na iloa wua e Iētū a lātou manatunga kikino ia, mea loa iāna peia kia lātou, “E te kau ngutulua ia ē! E wea kōtou e matapili mai ai ia aku? 19Wakaāli mai ake te moni e tūtaki ai nā teló.” Aumai loa lātou e moni tiliva kia ana. 20Eia, uwi loa iāna kia lātou, “Nō ai te tūtū ma te ingoa na tutingia i lunga nei?”
21“Nō Kaitala,” tā lātou pau mainga.
Mea atu ai ia Iētū kia lātou, “Kave kia Kaitala i nā mea lāi a Kaitala, kave oki ki te Atua i nā mea lāi a te Atua.”
22Kamuloa lātou mīmīngutu wua i tana meanga ia. Eia, maka loa lātou ia ana, wō atu ai.
Te wakaaonga i te Tūwakawōunga
(Māleko 12:18-27; Luka 20:27-40)
23I te ayo ia lāi, lōmamai loa nā Tātukea ia, ko lātou te kau e mea kāe tūwakawōunga mai te mate,#Yanga 23:8 iliili loa kia ana peia, 24“E te Pūāpī ē, na tuti mai ia Mōte i te tule mō tātou, pē na mate te tāne ma te onge tama, ka wakaao tona taina i te wawine taka ia kē maua mai ai ni tama mā te tāne na maté.#Teutelonomi 25:5 25Eia, e tokawitu tāīna nā nōnō i te puyo o mātou i kinei. Wakaao loa te uluaki, mate loa ma te onge tama, maka loa i te wawine taka ia ki tona taina. 26Na peia oki ki te lua ma te tolu o te tāīna, oko wua atu ki te witu. 27I te pae openga, mate loa te wawine ia. 28Eia, kē oko lā ki te Ayo ka wetū wakawōu ai te kau na mamaté, nā ai wua ai te wawine ia i te tokawitu tāīna ia, nō tēlā na wakaao oki lātou tākatoa ia ana?”
29Kākole lā te meanga a Iētū ki ai, “Ko takayala wua kōtou, nō tēlā ko yē maliu tika kōtou i te Puka Yā, pēkole i te mana o te Atua. 30Kē oko ki te tūwakawōunga mai te mate, e yē wakaao lātou, e yē tukungia oki kē wakaaongia; ka lāua oki lātou pe nā āngela o te Langí. 31Eia wua, nō lunga o te tūwakawōunga o te kau na mamaté: E kiai lā kōtou na kauwi i nā muna a te Atua na tala mai kia kōtoú, na mea mai oki peia, 32‘Ko oku te Atua o Āpelaama, te Atua o Ītaaka ma te Atua o Iākōpa’? E kiai iāna i te Atua nō te kau na mamaté, e Atua lā iāna nō te kau e ōlá.”#Ēkoto 3:6
33I te wakalongonga a te maliunga tangata ia, kamuloa mīmīngutu wua i ana āpī ia.
Te tule matamatua
(Māleko 12:28-34; Luka 10:25-28)
34I te longonga a nā Pālitea na kakapi wua nā ngutu o nā Tātukeá ia Iētū, wakalulu loa lātou. 35Wakatōkā mai loa te toe o lātou ia Iētū, e kovi tuwunga i te Tule, iliili mai loa peia ki ai kē matapili ai ia ana,#Luka 10:25-28 36“E te Pūāpī ē, ko i wea te wakauwenga matamatua atu i te Tule?”
37Pau atu loa ia Iētū peia, “ ‘Kē winangalo atu koe i te Atu tō Atua ma tō ngākau tākatoa, ma tō vaelua tākatoa, ma tō manako tākatoa.’#Teutelonomi 6:5 38Ko te wakauwenga maomua ma te matamatua tēnei. 39Ko peia oki te lua: ‘Kē mina atu koe i tō tangata tupu pē au minanga lāi ia koe nā.’#Levitiku 19:18 40Ko i lua wakauwenga nei oki ko wakamakeke ai te Tule tākatoa ma nā akoakonga a nā pelovetá.”
E tama nā ai te Metia?
(Māleko 12:35-37; Luka 20:41-44)
41Ko wakalulu lāi nā Pālitea i kiai, uwi loa ia Iētū kia lātou peia, 42“E wea tā kōtou manatunga nō te Metia?#22:42 te Metia: mēkole te Kilito E tama iāna nā ai?”
“E tama nā Tāvita,” tā lātou pau atunga.
43Iliili oki ia Iētū kia lātou pēnei, “Nō wea ai ia Tāvita nā talatala ai lā loto o te mana o te Vaelua Yā, na tauvalo ai ia ana e ‘Atu’? Na mea oki ia Tāvita pēnei:
44‘Na mea te Atua ki toku Atu peia:
Nō koe ki toku lima mātau,
ke aku tukungia ō veiá
ki lalo o ō papāvae.’#Talamo 110:1
45Pē oki ia Tāvita na tauvalo ia ana e ‘Atu’, nō wea ai te Metia ka lilo mai ai wai tama nā ana?”
46Kāe tangata loa na maua e te pau muna atu kia Iētū; mai te ayo ia lāi, kāe loa tangata na luluta e te iliili muna wakawōu kia ana.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau