Mātaiō 1
1
Nā tūpuna o Iētū Metia
(Luka 3:23-38)
1Ko te wakapapanga tēnei o nā tūpuna o Iētū Metia,#1:1 Iētū Metia: pēkole, Iētū Kilito. Ko te Metia i te leo Ēpela (Mashiach) ma te Kilito i te leo Ēleni (Christos) ko weolo wua lua muna nei, koia: “te tangata na wakatapua ki te yinu”. e tama nā Tāvita, e tama nā Āpelaama.
2Ko Āpelaama te matua tāne o Ītaaka,
ko Ītaaka te matua o Iākōpa,
ko Iākōpa te matua o Iūta ma ona tāīna.
3Ko Iūta te matua o Pēleta ma Tela, ko te matua wawine ko Tāmala.
Ko Pēleta te matua o Ētelōna,
ko Ētelōna te matua o Lama,
4ko Lama te matua o Āmīnātapa,
ko Āmīnātapa te matua o Nātona,
ko Nātona te matua o Talamona.
5Ko Talamona te matua tāne o Poāta, ko Laapa tona matua wawine.
Ko Poāta te matua o Ōpeta, ko Luta tona matua wawine.
Ko Ōpeta te matua o Iēte,
6ko Iēte te matua o te aliki ko Tāvita.
Ko Tāvita te matua tāne o Tōlomona, ko tona matua wawine ko te wawine a Ūlia.
7Ko Tōlomona te matua o Lēōpoāma,
ko Lēōpoāma te matua o Āpia,
ko Āpia te matua o Ata,#1:7 Ata: ko Ātapa tona toe ingoa, te tangata watu yīmene i nā Talamo.
8ko Ata te matua o Iēōtāpata,
ko Iēōtāpata te matua o Iōlama,
ko Iōlama te matua o Ūtia,
9ko Ūtia te matua o Iōtama,
ko Iōtama te matua o Āata,
ko Āata te matua o Ētekia,
10ko Ētekia te matua o Manāte,
ko Manāte te matua o Āmona,
ko Āmona te matua o Iōtia.
11Ko Iōtia te matua o Iēkōnia ma ona tāīna i te vāia na kāvea ai ki Pāpulōnia.#2 Aliki 24:14-15; 2 Wakapapanga 36:10; Ielemia 27:20
12I muli mai i te vāia na kāvea ai ki Pāpulōnia:
ko Iēkōnia te matua o Talatiela,
ko Talatiela te matua o Tēlupāpela,
13ko Tēlupāpela te matua o Āpiūta,
ko Āpiūta te matua o Ēliākima,
ko Ēliākima te matua o Ātola,
14ko Ātola te matua o Tātoka,
ko Tātoka te matua o Ākima,
ko Ākima te matua o Ēliūta,
15ko Ēliūta te matua o Ēleātala,
ko Ēleātala te matua o Mātāna,
ko Mātāna te matua o Iākōpa.
16Ko Iākōpa te matua o Iōtēpa, te tāne a Mālia, na wānau mai ai ia Iētū, e tauvalongia ko te Metiá.
17Nō kiai, e laungaulu mā wā taitangata maia Āpelaama kia Tāvita, e laungaulu mā wā taitangata maia Tāvita ki te vāia na kāvea ai ki Pāpulōnia, e laungaulu mā wā oki taitangata mai te kaveinanga ia ki te vāia na oko mai ai te Metia.
Te wānaunga o Iētū Metia
(Luka 2:1-7)
18Ko te waiwainga tēnei nō lunga o te wānaunga o Iētū Metia. Na wakalavengia tona matua wawine ia Mālia wai wawine mā Iōtēpa, yaulā, i mua ake ka nōnō ai lāua, kitea mai loa ia Mālia, na yapū iāna i te mana o te Vaelua Yā.#Luka 1:27 19Ia Iōtēpa oki tana tāne e tangata tū tautonu, e kiai loa iāna na wakatūyā i te mea ia kē iloa e te kakai, kē yē wakamā oki ia Mālia. Mānatu loa iāna kē wakavavae nanā wua ia Mālia.
20Yaulā, i muli wua o tana manatunga ia, wakaāli mai loa te āngela a te Atu kia ana i loto o te miti, mea loa peia, “Iōtēpa te tama a Tāvita ē, auyē mataku koe e te kave ia Mālia ki wale wai wawine mā au, ko te yapū i loto ōna ia na yau mai te Vaelua Yā. 21Ka wānau iāna e tamatāne, ka lapa koe i tona ingoa ko Iētū,#1:21 Ko Iētū te wulinga ki te leo Ēleni. Ko tona ingoa Ēpela ko Iōtua, ko te wakamaepanga, “ko wakaola te Atu”. ka wakaola oki iāna i ona tāngata mai a lātou yala.”#Luka 1:31
22Na tupu loa tākatoa nā mea nei, na tautonu lāi ki nā talatala a te Atu nā mea pēnei lā loto o te pelovetá, 23“Ka yapū te kiva tamāwine, e tamatāne tana mea ka wānau mai, ka lapaina tona ingoa ko Īmānuela”; ko te wakamaepanga, “Ko ia tātou te Atua”.#Ītaia 7:14 (LXX)
24Wowo mai loa ia Iōtēpa mai tana miti ia, eia, wai ai iāna i te wī mea a te āngela a te Atu na wakauwe mai kia ana ia, kave ai ēna ia Mālia ki tona wale, wai wawine mā ana. 25Yaulā, e kiai lāua na momoe wakatai, oko wua atu ki te vāia na wānau mai ai tana tama. Eia, lapa loa ia Iōtēpa i tona ingoa kia Iētū.#Luka 2:21
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau