Mātaiō 19
19
Te tatala wakaaonga
(Māleko 10:1-12)
1Kē oti ia Iētū e te talatala i nā muna ia, maka loa iāna ia Kalilea, wano loa lā loto o te wuti wenua ko Iūtea ki te toe kaokao o te kauvai ko Iōlītāna. 2Nā ālu mai oki lā muli ōna nā maliunga tangata tokawolo, wakaola oki iāna i o lātou maki i kiai.
3Lōmamai loa nā toe Pālitea wakatōkā ia Iētū, iliili loa peia, “Tala mai ake, ko tanga lā i te Tule kē tatala te tāne i tana wawine nō te wī manatunga wua?”
4Pau atu loa ia Iētū peia, “E kiai lā kōtou na kauwi i te yīlava e tala mai i te wakauyunga o te ao nei, ‘na wowou te Atua ia lāua, e tāne ma te wawine’?#Kēnete 1:27; 5:2 5Na mea oki te Atua, ‘Nō kiai oki te tāne ka maka ai i tona matua tāne ma tona matua wawine, ka nonoa atu ai iāna ki tana wawine, ka lilo mai oki lāua wai tino e tayi.’#Kēnete 2:24 6E kiai oki lāua e lua, e tayi lā. Nō kiai, ia lāua na wakatayingia e te Atuá, auyē loa e tangata e vavae.”
7“E wea lā ia Mōte na mea ai kē tuti te tāne e pēpa tatala ia lāua ki tana wawine ma te tuku atu ia ana kē wano?” tā lātou iliili mainga. #Teutelonomi 24:1-4; Mātaiō 5:31
8Pau atu oki ia Iētū, mea loa, “Na pole ai ia Mōte kē maka kōtou i a kōtou wāwine, nō te totoko oki o o kōtou ngākau. Yaulā, e kiai ko teia te manatunga a te Atua mai te yāyākinga. 9Ko tala atu au, ko te tāne e maka i tana wawine nō nā toe manatunga wua, e kiai lā nō te yanga motutāunga, wakaao atu ai ki e toe wawine, e tāne motutāunga iāna.”#Mātaiō 5:32; 1 Kōlīnētia 7:10-11
10Mea loa nā pipi a Iētū kia ana, “Pē ko te tū tēnei o te tāne ki tana wawine, e lelei atu loa kē yē wakaao.”
11Pau atu ai ia Iētū peia, “E kiai ko te tākatoanga ka āwuwū mai ki aku talatala nei, kia lātou wua lā na tuku ai te Atua i te māwutú ka āwuwū mai. 12Nō tēlā, ni eunuka nā toe tāngata mai tō lātou wānaunga; ko te toe kau lā, ko te tangata na meangia lātou wai eunuka; ko te toe kau oki e mea na wakapono lāi ia lātou wai eunuka mō te Pātileia o te Langi. Ko te kau oki e āwuwū ki aku muna nei, kē popole o lātou ngākau ki ai.”
Te kauliki liliki ma Iētū
(Māleko 10:13-16; Luka 18:15-17)
13Eia, aumai loa nā tāngata i nā tama liliki ia kia Iētū, kē tuku i ona lima ki lunga o lātou ma te tataku. Yaulā, kaemata loa e nā pipi te kau na aumaingia nā tama ia.
14Mea ai ia Iētū pēnei, “Tuku wua mai i te kauliki lilikí kē lōmamai kia aku nei, auyē loa lātou e ālaia, ko te Pātileia oki o te Langi nō te kau pē lātou nei.” 15Kē oti iāna e te tuku i ona lima ki lunga o lātou ma te wakalelei ia lātou, wano atu loa iāna mai kiai.
Te lōpā penupenutini
(Māleko 10:17-31; Luka 18:18-30)
16E kiai na loa, yau oki te tāne ia kia Iētū, uwi loa pēnei kia ana, “E te Pūāpī ē, e wea taku mea lelei ka wai e maua ai ia aku te ola e yē ngata?”
17Kākole lā te paunga a Iētū pēnei, “E wea koe na uwi mai ai kia aku ni wea nā mea lelei? Ko te Atua wua tokotayi ko lelei. Pē lā koe ko vavaka kē oko ki te ola, kē talingatai koe i te wī wakauwenga a te Tule.”
18Uwi oki te tāne ia ki ai, “Ko nā tule pēwea?”
Pau atu ai ia Iētū, “ ‘Auyē patu tangata, auyē motutāunga, auyē kaiā, auyē talayayā i te tangata,#Ēkoto 20:13-16; Teutelonomi 5:17-20 19kē māmalu atu koe ki tō matua tāne ma tō matua wawine’; peia oki te toe, ‘Kē mina atu koe i tō tangata tupu pē au minanga lāi ia koe nā.’ ”#Ēkoto 20:12; Teutelonomi 5:16; Levitiku 19:18
20Eia, mea oki te lōpā ia peia, “Na pau tākatoa ia aku e te taute i nā mea ia. Ni wea atu ai aku toe mea ka wai?”
21Pau atu ai ia Iētū pēnei, “Pē lā koe ko winangalo kē yakolele wua, wano lā, okongia atu au wī penupenu pau, tau atu ai i nā moni ki te kau vevé, eia lā koa maua ai oki ma au penupenu i te Langi. Eia, yau ai loa koe ālu mai ia aku.”
22Yaulā, i te wakalongonga a te lōpā ia i nā talatala a Iētū ia, wano loa iāna ma te yōyātia nō tēlā iāna e tangata penupenutini.
23Eia, mea ai ia Iētū ki ana pipi pēnei, “Ko tala atu au i te tika, ko te konga tēnei ko wakaō ngatā ai te tangata penupenutini ki te Pātileia o te Langi. 24Ko tāwaki lua atu au kia kōtou, e waingāwie ake i te kāmela kē ulu iāna lā loto o te pū o te nila i te tangata penupenutini kē wakaō ki te Pātileia o te Atua.”
25Kē wakalongo ana pipi i te talatala ia, kamuloa lātou mālili wua, iliili loa ki ai, “Ko ai wua ai ka maua tona ola?”
26Eia, kakalo ai ia Iētū kia lātou, mea atu loa, “I te tangata nei e mea waingatā, i te Atua lā ko waingāwie wua te wī mea tākatoa.”
27Pau atu loa ia Pētelo peia kia ana, “Ia mātou na maka pūpū loa i te wī mea pau i te ālunga ia koe! Ni wea atu ai nā mea ko takoto mai mā mātou?”
28Talatala loa ia Iētū peia kia lātou, “Ko tala atu au i te tika, kē wakawōungia te wī mea tākatoa, kē nō te Tama a te Tangata ki lunga o tona potu yilatea nui, ko kōtou lāi nā ālu mai ia akú ka nōnō ki lunga o te laungaulu mā lua potu wakavā i te laungaulu mā lua yōlonga o Ītalāelá.#Mātaiō 25:31; Luka 22:30 29Ko te tangata na maka i tona wale, mēkole i ona tāīna ma ona tuaine, i ona mātutua, peia tana wawine,#19:29 tana wawine: Ko ngalo lua muna nei i nā toe pōkai talatala. ana tama ma ona tuanga wenua nōoku nei, ka aumaia kia ana e lau taime te wolo lā lunga atu, ka maua oki iāna te ola kāe ngatanga. 30Yaulā, e tokawolo te kau e lā mua i te vāia nei, ka taka lātou ki muli i te vāia ia, e tokawolo oki te kau e wakamuli i te vāia nei, ka taka lātou lā mua.”#Mātaiō 20:16; Luka 13:30
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau