Mātaiō 18
18
Ko ai ko matamatua atu i te Pātileia o te Langi?
(Māleko 9:33-37; Luka 9:46-48)
1I te vāia ia, lōmamai loa nā pipi iliili kia Iētū pēnei, “Ko ai wua ai ko matamatua atu i te Pātileia o te Langi?”#Luka 22:24
2Tauvalo mai loa ia Iētū e tama lewu kē yau tū i te puyo o lātou. 3Mea oki iāna peia, “Ko tala atu au i te tika, e yē ō loa kōtou ki te Pātileia o te Langi mē yē maua ia kōtou e te wakatūkē kē lāua te tū o te kauliki liliki.#Māleko 10:15; Luka 18:17 4Nō kiai, ko te tangata ka wakayakayaka ia ana pe te tama lewu nei, ko ona lāi ka matamatua atu i te Pātileia o te Langi. 5Ko te tangata oki ka āliki mai i te tama lewu pēnei i toku ingoa, ko āliki mai lāi iāna ia aku.
Nā mea e yukiyukia ai kē yala
(Māleko 9:42-48; Luka 17:1-2)
6“Ko te tangata oki e wakatōkā atu kē yala te toe o te kauliki e loloku mai kia aku nei, e lelei atu loa te kovi ia kē yelea tona uwa ki te watu tāvili tongi, wakamalemo atu ai ia ana ki te newu o te moana.
7I te wakamataku te mate o te ao nei nō nā mea e yukiyukia ai te tangata kē yala! Ka tupu lāi oki nā mea ia, yaulā i te wakamataku te mate o te kovi ko ona ko wakatupua nā yanga ia!
8Pē ko tō lima pēkole tō vae ko yala ai koe, yemutia ki vao, maka ki nā kongá. E lelei atu koe kē oko ki te ola ma te lima tayi, pēkole ma te vae tayi i te tilia koe ma lua ō lima, pēkole ma lua ō vae ki loto o te awi e mumula wua ē vāia wua atu. 9Pē oki ko tō mata ko yala ai koe, nanape ki vao, maka ki nā kongá. E lelei atu koe kē ō ki te ola ma te mata tayi, i te tilia koe ma lua ō mata ki loto o te awi o Āte.#Mātaiō 5:29
Te palapole o te māmoe ngalo
(Luka 15:3-7)
10“Onoono wakalelei, auyē kōtou e wakavāvā i te toe o te kau liliki nei; nō tēlā, ko tala atu au, ko o lātou āngela i te Langi ko wetū wua i mua o te aloalo o toku Matua i te Langi. 11[Na yau oki te Tama a te Tangata nei ulu i te kau nā ngangaló.]#18:11 Ko i loto o nā toe pōkai talatala nā muna e taliweolo ki te Luka 19:10.
12E wea tā kōtou manatunga? Pē oki e tai tangata e tino welau ana māmoe, kē ngalo lā e tayi, e yē maka lā iāna i te tino iva mā iva e i nā maungá, wano atu ai ulu i te māmoe na yeyē ia? 13Ko tala atu au i te tika, ka kitea lāi ēna, ka wolo atu tona vēvēia i te māmoe e tayi ia i te lauiva mā iva e kiai na yeyḗ. 14Ko peia lāi oki tō kōtou#18:14 tō kōtou: ko i nā toe pōkai talatala, toku. Matua i te Langi, ko yē winangalo iāna kē ngalo te toe o te kau liliki nei.
Wakayakoina te takayala o te toe
15“Kē wai atu tō taina i te yala kia koe, wano koe tala kia ana i tona takayala ia kia kōlua wua tokalua. Pē ka wakalongo mai iāna ki tau meanga ia, na maua wakawōu mai ia koe te taina ia.#Luka 17:3 16Kē yē wakalongo lā iāna kia koe, niko koe wakawōu, kave lā koe e tokotayi pēkole e tokalua tangata i ō tawa, kē ‘wakaponowia te wī tāyīnga e te tala a te tokalua pēkole a te tokatolu kite.’#Teutelonomi 19:15 17Pē lā iāna e yē pā e te wakalongo atu kia lātou, tala koe ki te ēkālētia; pē ko yē pā lāi iāna e te wakalongo atu ki te ēkālētia, wakalilo koe ia ana pe te tangata onge Atua, pēkole pe te taetae teló.
Te wakayā ma te wakatanga
18“Ko tala atu au i te tika, ko a kōtou mea e wakayā i te ao nei, ka wakayāina lāi i te Langi, peia a kōtou mea e wakatanga i te ao nei, ka wakatangaina lāi i te Langi.#Mātaiō 16:19; Ioane 20:23
19Ko tala wakawōu atu au: kē āwuwū e tokalua o kōtou i te ao nei ki nā mea a kōtou ka wakavale atú, ka waia mai lāi e toku Matua i te Langi. 20I te konga oki e wakalulu ai e tokalua pēkole e tokatolu i toku ingoa, ko i kiai au ko i te puyo o lātou.”
Te palapole o te tāvini kakīonge
21Eia, yau loa ia Pētelo iliili kia Iētū peia, “E te Atu, ē wea taime ka yua ai au i nā yala a toku taina kē wai mai kia aku? Ka oko mō ki te witu taime?”#Luka 17:3-4
22Pau atu loa ia Iētū peia, “Ko tala atu au, e kiai e witu taime wua, e lauwitu taime o te witu!#18:22 e lauwitu taime o te witu: mēkole, e lauwitu mā witu taime.
23Nō kiai, ko lāua te Pātileia o te Langi te aliki na manatu kē wakatautonu i nā kaiū a ona tāvini. 24I tana yāyākinga i te yanga ia, takia mai loa kia ana te tāne ia, ē wea milioni tālā tana kaiū.#18:24 ē wea milioni tālā: Ēleni, e laungaulu mano tāleni; ko weolo te tāleni e tayi ki te tūtaki o te tangata yanga e laulua matawiti. 25Nō tēlā e yē maua ia ana e te tūtaki, wakauwe loa te aliki ia kē okongia iāna, tana wawine ma ana tama, peia ana wī penupenu tākatoa, kē tali ai te kaiū āna ia.
26Eia, wakatō tūtulivae loa te tāvini ia ki mua o te aliki, wakavale māmate loa, mea loa peia, ‘Kē manavatoka ake koe ia aku, ka tali atu lāi au i te wī mea tākatoa kia koe.’ 27Wakaaloa atu ai te aliki ia ana, yua loa i tana kaiū ia, tuku atu ai ia ana kē wano.
28Yaulā, wano atu ai te tāvini ia ki vao, kite atu loa i te toe yoa tāvini e kaiū kia ana e yē wolo loa te moni.#18:28 e yē wolo loa te moni: Ēleni, e lau te tēnali (e moni tiliva). Ko weolo te tēnali ki te tūtaki o te tangata yanga ki te ayo e tayi. Liko loa ēna te tāvini ia, yoni i te uwá. ‘Tali mai tau kaiū,’ tana naumatenga ki ai.
29Wakatō tulivae oki te toe tāvini ia ki lalo, wakavale māmate ai ki ai, mea loa, ‘Kē manavatoka ake koe ia aku, ka tali atu lāi au kia koe.’
30Yaulā e yē pā loa te kovi ia, wano atu loa, mea kē tilingia te tāne ia ki te waleāuli, maka ai i ai oko wua atu ki te vāia e peke ai tana kaiū ia. 31Kē kitea atu e nā toe tāvini te mea ia, kamuloa lātou yōyātiaina, wō atu loa tala ki tō lātou pū i te wī mea na tupu.
32Eia, tauvalo loa te aliki i te tāvini ia ki loto, mea loa peia, ‘E tāvini kino pē koe! Ēnei au na yua i tau kaiū tākatoa, nō tēlā koe na wakavale mai kia aku. 33Pī ko ia koe ka wakaaloa i te toe tāvini pē koe nā, pē eku oki na wakaaloa atu ia koe nā!’ 34Nō te lili o te aliki, tuku atu loa ēna te tāvini ia kē takikinongia e nā tiaki o te waleāuli, oko wua atu ki te vāia e peke tākatoa ai tana kaiū ia.
35Ka peia oki toku Matua i te Langi kē wai atu kia kōtou takitayi, pē kōtou e yē yua i nā takayala a o kōtou tāīna mai o kōtou ngākau.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau