Mātaiō 20
20
Te palapole o nā tāngata yanga i te pā toki vine
1“Nō kiai, ko lāua oki te Pātileia o te Langi pe te tangata e tayi ana pā toki viné. Wano loa iāna i te vaveāo ulu tangata kē lōmamai yanga i loto o tona pā vine ia. 2Wakapono loa iāna kē tuku i o lātou tali e takitayi moni tiliva#20:2 moni tiliva: Ēleni, tēnali. i te ayo, tuku ai ia lātou kē yanga i loto o tona pā vine ia.
3Kē oko ki te ola iva, wano loa iāna ki vao, ana kitea loa nā tāngata ia ko wetū wua i te mākete, kāyi a lātou yanga. 4Mea loa iāna kia lātou peia, ‘Wō kōtou yanga i loto o taku pā viné, ka tali atu lāi au ia kōtou kē tautonu.’ 5Eia, wō loa lātou.
Wano oki iāna wakawōu ki vao i te tūtonungā-lā, peia oki i te ola tolu, mea oki pe ana meanga lāí. 6Kē oko ki te ola lima i te awiawi, wano atu iāna ki vao, ana kitea oki te toe kau ko wetū wua. Mea loa iāna kia lātou, ‘E wea kōtou na wetū wua ai i kinei pau te ayo tākatoa nei ma te onge yanga?’
7Pau mai loa lātou peia, ‘Kāe oki tangata na wakalavengia mātou kē yanga nō ona.’
Eia, mea atu ai iāna kia lātou, ‘Wō oki kōtou yanga i loto o taku pā viné.’
8Kē akaawiawi, mea loa te pū o te pā vine ia ki tona tangata wakayaele yanga, ‘Valongia mai te kau yanga, tali atu koe ia lātou; wakauyu koe mai te kau mumuli, oko wua atu ki te kau mumuá.’#Levitiku 19:13; Teutelonomi 24:15
9Ko te kau na kāmata i te ola lima i te avatea nei, na maua o lātou tali e takitayi moni tiliva. 10Eia, kē lōmamai te kau nā yanga taumuá, manatu loa lātou ka wolo atu tō lātou tali. Yaulā, e takitayi wua oki a lātou moni tiliva na talia mai. 11I te maua mainga o o lātou tali ia, kāmata loa lātou e te pawupawu i te tangata ia. 12Mea loa lātou peia ki ai, ‘Ko te kau mumuli a koe na wakalave nei, e tayi wua o lātou ola nā yanga ai. Eia, na wakaweolo koe ia lātou ma mātou nā ngaengaea e te yanga i te vela kakati o te ayo nei.’
13Kākole lā te meanga a te Pū ia ki te toe o lātou, ‘E te yoa ē, kāe aku yanga kino kia koe. Kāle lā tāua na wakapono kē yanga koe nō te moni tiliva e tayi nei? 14Liko tō tali, wano. Ko winangalo au e te tali i te tangata muli e pito yanga nei kē weolo ma koe. 15E kiai lā ko ia aku lāi te tika i aku mea ka winangalo nō aku moni nei? Na makeā lā koe nō tēlā au e tangata atawai ki te toe kau?’
16Nō kiai, ko te kau e wakamulí, ka taka lātou ki mua, peia oki te kau e lā muá, ka taka lātou ki muli.”#Mātaiō 19:30; Māleko 10:31; Luka 13:30
Na yivayiva wakawōu ia Iētū i tona matenga
(Māleko 10:32-34; Luka 18:31-34)
17Eia, wakaake atu ai ia Iētū ki Iēlūtalema; ia ana e yaele ia, taki mai loa iāna i te tino angaulu mā lua pipi ki te kaokao, mea loa peia kia lātou, 18“Wakalongo mai! Ka wakaake tātou ki Iēlūtalema, ka tukungia te Tama a te Tangata ki nā tatakuvai wowolo ma nā akoako tule, ka tūā oki lātou ia ana ki te utunga o te mate 19ma te tuku atu ia ana ki nā Ētene o Lōmá, ka wai akanaua iāna e lātou, wai ma te vayi ia ana, wakatātaulo atu ai. Yaulā, e tolu ayo i muli mai ka wakatūngia iāna ki te ola!”
Te wakavalenga a te matua wawine
(Māleko 10:35-45)
20Eia, yau loa te wawine a Tepetaiō, te matua wawine o Iākōpo ma Ioane, ko lātou tokatolu, tūtulivae loa ki mua o Iētū ma te wakavale atu ki ai pē ka pole iāna.
21“E wea lā tau mea ko winangalo?” te uwi atunga a Iētū.
Pau atu iāna peia, “Kē oko ki tō Pātileia, wakapono mai ake koe pē ka nōnō lua aku tama nei, te toe ki tō kaokao mātau, peia te toe ki tō māyui.”
22Eia, mea atu loa ia Iētū kia lātou peia, “Ko yē a kōtou īloloa e wea tā kōtou mea e talikai mai nei. Ka maua lā ia kōlua e te inu i te kapu o te tīngā āku ka inu nei?”
“Ka maua ia māua,” tā lāua meanga.
23Pau atu ai ia Iētū kia lāua, “Ko tika wua, ka inu lāi kōlua i taku kapu ka inu nei; yaulā, kāe aku tika kē iki ko ai ka nō ki toku kaokao mātau ma toku māyui. Ko nā konga ia oki na penapenangia mō te kau a toku Matua na wiliwilí.”
24Kē langona e te toe tino angaulu pipi te mea ia, kamuloa lātou līlili i lua tāīna ia. 25Tauvalo ai ia Iētū ia lātou ki te konga e tayi, mea loa pēnei, “Ko a kōtou īloloa, ko nā wakayaele o te wī wenua ko wakapū ia lātou lā lunga o te kakai, peia oki te kau wowoló, ko tāki mana wua lā lunga o lātou.#Luka 22:25-26 26Kia kōtou lā ko yē mea peia. Pē ko winangalo oki te toe o kōtou kē tiketike iāna, ka yau loa iāna wai tāvini mō kōtou,#Mātaiō 23:11; Māleko 9:35; Luka 22:26 27peia ki te tangata e winangalo kē maomua iāná, ka yau loa wai tāvini yakayaka mō kōtou. 28Ko peia lāi oki ki te Tama a te Tangata nei, e kiai iāna na yau kē tāviningia, na yau lā iāna wai tāvini ma te tuku i tona olānga wai tali mō te wainga tāngata.”
Na wakaolangia lua tāne matapō
(Māleko 10:46-52; Luka 18:35-43)
29Kē maka ia Iētū ma ana pipi ia Iēliko, ālu mai loa te patanga tangata tokawolo ia ana. 30E tokalua tāne matapō nā nōnō i tawa o te ngutuala ia, na a lāua langona ko yau ia Iētū lā kiai. Eia, kakā loa lāua peia, “E te Atu, te tama a Tāvita ia ē, wakaaloa mai ake koe ia māua!”
31Wakalapangia loa lāua e te kau ia, mea loa kia lāua, “Auyē vāvā!” Yaulā, ongo kino atu ai loa tā lāua kakā, “E te Atu, te tama a Tāvita ia ē, wakaaloa mai ake koe ia māua!”
32Tū loa ia Iētū tauvalo ia lāua. “Ka wea au ia kōlua?” tana uwi atunga.
33Pau mai oki lāua peia, “E te Atu ē, ko winangalo māua kē kakalo o māua mata.”
34Kamuloa ia Iētū tatōngia i te wakaaloa ia lāua, mimili loa tona lima i o lāua mata. Na peia ngatai, kakalo oki o lāua mata, ālu atu ai lāua i muli o Iētū.
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau