Mātaiō 17
17
Te wakatūkēinanga o Iētū
(Māleko 9:2-13; Luka 9:28-36)
1E ono ayo na pange, kave loa e Iētū ia Pētelo, ko Iākōpo ma tona taina ko Ioane i tawa ōna, taki loa ia lātou ki lunga o te maunga tiketike, ko lātou wua.#2 Pētelo 1:17-18 2Eia, wakatūkēngia loa iāna lā mua o lātou i kiai, kamuloa tona tupu kanapa pe te lā, mukavakevake wua ma ona kākawu pe te yila teá. 3Eia, wakaālia mai loa ia Mōte ma Ēlia lā mua o lātou, ko talatala ma Iētū.
4Eia, talatala ai ia Pētelo kia Iētū, mea loa, “E te Atu ē, ia tātou kāe lelei peia i kinei. Ka pā mō koe kē wowou au e tolu pūtala, e tayi nō koe, e tayi nō Mōte, e tayi oki nō Ēlia?”
5Ia ana e talatala ia, na peia wua ake, ūwi mai loa te kāpuāo kānapanapa ia lā lunga o lātou, kokoto mai oki te leo ia mai loto o te kāpuāo ia, mea loa pēnei, “Ko taku Tama wakaemaema tēnei, kamuloa au pūmanava wua ia ana. Wakalongo kōtou kia ana!”#Kēnete 22:2; Teutelonomi 18:15; Talamo 2:7; Ītaia 42:1; Mātaiō 3:17; 12:18; Māleko 1:11; Luka 3:22
6I te longonga a nā pipi i te leo ia, akawetō wulipūlou loa ki lalo, kamuloa wulutia e te mataku. 7Yaulā, yaele mai loa ia Iētū wakapaki ia lātou, mea loa peia, “Wetū ki lunga, auyē kōtou e mātataku.” 8Kē kakalo atu lātou ki lunga, kāe loa tangata a lātou na kite atu, ko Iētū wua lā.
9Kē lēilo mai lātou mai te maunga ia, tutuku loa ia Iētū kia lātou, mea loa, “Auyē loa kōtou e tala wua atu ki e tangata i te mea na wakaālia atu kia kōtou ia, oko wua atu ki te vāia e tū wakawōu mai ai te Tama a te Tangata mai te mate.”
10Eia, uwi loa lātou kia Iētū peia, “E wea te kau akoako tulé e mea ai ē, ko Ēlia ka yau taumua i te Metia?”#Malaki 4:5
11Pau atu oki ia Iētū peia, “Ēeke, ko tautonu wua, ko Ēlia lāi ka yau taumua penapena kē papa te wī mea. 12Ko tala atu lā au, na oko takele mai ia Ēlia, yaulā e kiai na a lātou iloa iāna, nā wai wua lā lātou kia ana i nā mea a lātou nā winangalo ai. Ka peia lāi te Tama a te Tangata nei, ka takikinongia oki iāna e lātou.”#Mātaiō 11:14 13Eia, mailonga ai i nā pipi, ko talatala ia Iētū kia lātou nō lunga ia Ioane Pāpetītō.
Te tamatāne na ulungia e te tēmoni
(Māleko 9:14-29; Luka 9:37-43a)
14Ia lātou e nīniko mai ki lalo ia, ko kali mai te lulunga tangata tokawolo. Yau loa te tāne ia, tūtulivae lā mua o Iētū. 15Mea loa iāna peia, “E te Atu ē, wakaaloa mai ake koe i taku tamatāne nei. E maki ko wuti te tino tona mea, kē vivili mai oki kamuloa i te kino ongo, ko tō wakakei iāna ki loto o te awi, pēkole o nā yua. 16Na aumai au ia ana ki au pipi nā, yaulā, e kiai na maua ia lātou e te wakaola ia ana.”
17Pau atu loa ia Iētū pēnei, “E te taitangata piko e yē lotokono ia ē! E wea te loa o taku nōnga i o kōtou tawa? Ka manavatoka wua lā au pēnei ia kōtou? Aumaia te tama nā kia aku!” 18Taumakomako loa e Iētū te tēmoni ia, ulu mai oki ki vao o te tama ia. Yawea oki te tama ia i te vāia ia lāi.
19Eia, lōmamai ngalo wua loa nā pipi kia Iētū, ma te iliili kia ana, mea loa, “E wea na yē maua ai ia mātou e te tutuli i te tēmoni ia ki vao?”
20Pau atu loa iāna peia, “Nō tēlā, ko māyangiyangi wua o kōtou lotokono. Ko tala atu au i te tika, pē e yī mō lotokono lewu wua o kōtou pe te wua tīnapí, ka maua ia kōtou e te talatala ki te maunga nei, ‘Teke koe mai kinei ki kilā’, ka teke lāi iāna. Kāe loa mea e waingatā ia kōtou kē wai.#Mātaiō 21:21; Māleko 11:23; 1 Kōlīnētia 13:2 21[Yaulā, ko te tū tēmoni nei oki ko waingatā e yau ai ki vao, kē lā loto loa o te tataku ma te wakawiakai.]”#17:21 Ko i loto o nā toe pōkai talatala nā muna e taliweolo ki te Māleko 9:29.
Na talatala wakawōu ia Iētū nō tona matenga
(Māleko 9:30-32; Luka 9:43b-45)
22Kē wakatayi mai nā pipi kia ana i Kalilea, talatala loa ia Iētū kia lātou peia, “Ka tukungia te Tama a te Tangata nei ki loto o nā lima o te tangata kē vativatia. 23Ka patu lātou ia ana kē mate, kē oko lā ki te tolu o te ayo, ka wakatūngia mai iāna ki te ola.” Na kamuloa oki nā pipi tatōngia i te wakaaloa.
Te telo o te Waleyā
24Kē ōko mai ia Iētū ma ana pipi ki Kāpelenāuma, lōmamai loa te kau taetae telo o te Waleyā iliili kia Pētelo, mea loa peia, “Ko yē tūtaki lā tō kōtou pūāpī i te telo o te Waleyā́?”#Ēkoto 30:13; 38:26
25“Ēeke, ko tūtaki iāna,” tana pau atunga.
I te ulu mainga a Pētelo ki loto o te wale, taumua oki ia Iētū e te iliili kia ana, “E wea tō manako, e Timona? Ko ai ko tūtakia nā telo ma nā toe moni kaiū ki te wī aliki o te ao nei? Ko o lātou tāngata lāi, pēkole, ko te toe kau?”
26“Ko te toe kau,” te pau atunga a Pētelo.
Mea atu ai ia Iētū kia ana, “Eia, e yē tūtaki telo lāi nā tāngata wenua, ko tanga wua lātou. 27Yaulā oki, ko yē lelei kē kinokino mai lātou kia tātou, nō kiai, wano lā koe ki te loto, tili i tau kati ma te wakavae ki lalo. Liko koe i te ika mua ka lalave mai; wakamanga i tona ngutu, ka au kitea te moni tiliva ka lava mō taku telo ma tau telo.#17:27 telo: ko te moni tēkela teia. Liko mai koe i te moni ia, kave atu ai kia lātou mā tāua.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau