Mātaiō 16
16
Te umatinga kē tayi wakailo
(Māleko 8:11-13; Luka 12:54-56)
1Eia, lōmamai loa nā Pālitea ma nā Tātukeá kia Iētū, uwi wakaaniani atu loa kia ana kē wakaāli mai iāna kia lātou e wakailo mana mai te Langi.#Mātaiō 12:38; Luka 11:16
2Pau atu loa ia Iētū peia, “Kē awiawi koa mea kōtou, ‘Ka tauyala wua te leva nō tēlā te langi ko kula.’ 3Peia oki i te mōtāyao, ‘Koa takanonoa te leva, nō tēlā na wakakula te langi koa langipapa.’ Ko maua ia kōtou e te wuli i te tū o te leva kē kakalo wua ki te langi, e wea lā e yē maua ai ia kōtou e te wuli i nā ayiayi o te vāia nei? 4Ko ulu te taitangata kikino onge Atua nei kē tayi wakailo mana. Kāe loa wakailo mana e avatua, eia wua ko te wakailo o Iōná.”#Mātaiō 12:39; Luka 11:29 Eia, maka atu ai ia Iētū ia lātou, wano loa.
Te wakaōpuē a nā Pālitea ma nā Tātukea
(Māleko 8:14-21)
5I tā lātou wōnga ki te toe kaokao o te loto, ngalopoaina loa i nā pipi e te takitaki ni walaoa. 6Mea loa ia Iētū peia kia lātou, “Onoono kōtou wakalelei! Auyē vavale wua i te wakaōpuē a nā Pālitea ma nā Tātukeá.”#Luka 12:1
7Eia, wakatau muyumuyu wua ai lātou, “Na mea ai iāna peia nō tēlā, e kiai tātou na takitaki mai ni walaoa.”
8Na iloa wua e Iētū ni wea a lātou mea e muyumuyu ia, uwi loa iāna peia ki ai, “E te kau lotokono yakaliki ia ē, e wea kōtou e muyumuyu ai ē nō tēlā kāyi walaoa? 9E kiai ake na mau ia kōtou? Ko yē a kōtou manatua lā te lima ngaua walaoa na wāngai ai te limanga mano tangatá, ē wea oki a kōtou kete kai kikī na wakaputu?#Mātaiō 14:17-21 10Pēkole, te witu ngaua walaoa na wāngai ai i te wānga mano tangatá, ē wea oki a kōtou kete kai kikī na wakaputu?#Mātaiō 15:34-38 11Nō wea na yē mailonga ai ia kōtou ē, ko yē talatala atu au nō nā walaoa? Yaulā, onoono wakalelei kōtou auyē vavale wua i te wakaōpuē a nā Pālitea ma nā Tātukeá!” 12Eia, mailonga ai ia lātou, ko yē talatala iāna kē onoono lātou wakalelei i nā īti e wakaōpuē ai nā walaoá, yaulā, i nā akoakonga takayala a nā Pālitea ma nā Tātukeá.
Na wakamamata e Pētelo ia Iētū
(Māleko 8:27-30; Luka 9:18-21)
13Lōmamai loa ia Iētū ma ana pipi ia ki te tuanga wenua i tawa o te ōile ko Kaitalea Pilipi, uwi loa iāna peia ki ana pipi, “Ko ai te Tama a te Tangata i nā meanga a te wī tāngata?”
14Pau atu oki lātou, “Ko tala te toe kau, ko Ioane Pāpetītō koe; ko mea oki nā toe, ko Ēlia; ko te toe kau lā ko mea ko Ielemia, pēkole ko koe te toe o nā pelovetá.”#Mātaiō 14:1-2; Māleko 6:14-15; Luka 9:7-8
15Iliili ai iāna kia lātou, “Ko pēwea ai kōtou? Ko ai lā au i a kōtou meanga?”
16Pau atu loa ia Timona Pētelo peia, “Ko te Metia#16:16 te Metia: Ēleni, te Kilito; peia i te yīlava 20. koe, te Tama a te Atua ola.”#Ioane 6:68-69
17Talatala atu oki ia Iētū ki ai, “Valea loa koe, e Timona te tama a Ioane ia! E kiai ko te tangata na talangia atu kia koe te mea nei, ko toku Matua lā i te Langí. 18Nō kiai ko tala atu au, ko Pētelo#16:18 Pētelo: te wakatakanga, e watu koe; i lunga o te papa nei ka patu ai au i taku Ēkālētia, e yē maua loa i te mana o te Pō e te tuluki mai. 19Ka avatu au kia koe i nā tāvili o te Pātileia o te Langi; ko au mea e wakayā i te ao nei, ka wakayāina lāi i te Langi, peia au mea e wakatanga i te ao nei, ka wakatangaina lāi i te Langi.”#Mātaiō 18:18; Ioane 20:23 20Eia, wakalapa loa ia Iētū i ana pipi, auyē loa lātou e tala wua atu ki e tangata ko te Metia iāna.
Na yivayiva ia Iētū i tona matenga
(Māleko 8:31–9:1; Luka 9:22-27)
21Mai te vāia ia, kāmata ai ia Iētū e te wakamaepa ki ana pipi, mea loa peia, “Ka wano lāi au ki Iēlūtalema, e wolo te wī mea ka takikinongia ai au i nā lima o te kau mātutua, nā tatakuvai wowolo ma nā akoako tulé. Ka patua oki au kē mate, yaulā kē oko ki te tolu o te ayo ka wakatū akawōungia mai au ki te ola.”
22Eia, taki loa e Pētelo ia Iētū ki te kaokao, wakalapa loa peia ia ana, “E te Atu ē, auyē loa kē tupu te mea nā!”
23Wuwuli loa ia Iētū, mea atu ai peia kia Pētelo, “Wano ki nā kongá, e Tātani! Na lilo koe wai ālai i toku ala. Ko yē i loto o koe nā manatunga a te Atua, ni manatunga tangata wua lā.”
24Eia, talatala ai ia Iētū ki ana pipi, mea loa, “Ko te tangata ka ālu mai ia aku, kē maka pūpū iāna i te wī manatunga a tona tino tangata, wai ma te amo i tana tātaulo, yau ai lā muli ōku.#Mātaiō 10:38; Luka 14:27 25Ko te tangata oki e wakatītī i tona olānga#16:25 tona olānga: ko te wulinga o te muna Ēleni ia, ko te ola mēkole te vaelua; peia i te yīlava 26. mō ona wua ka kayā iāna i te ola; ko te tangata lā e wakakayā i tona olānga mō oku nei, ka maua tona ola.#Mātaiō 10:39; Luka 17:33; Ioane 12:25 26E wea te kalu ka aumaia ki e tangata pē ka maua ia ana te ao nei tākatoa, yaulā tona vaelua ko kayā? Pēkole, e wea oki tana mea ka yoani atu kē wakaniko mai ai tona vaelua? 27Ka yau oki te Tama a te Tangata i loto o te yilatū o tona Matua ma ana āngelá, ka yoani atu iāna i te wī tāngata takitai kē tautonu lāi ki ana yanga nā wai.#Mātaiō 25:31; Talamo 62:12; Lōma 2:6 28Ko tala atu au i te tika, ko te toe kau e wetū nei, e yē a lātou tongia loa te mate i mua ake ka a lātou kitea ai te Tama a te Tangata i te oko mainga ma tona Pātileia.”
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau