Jenadik 41

Rajak Mesir napòk

1Hòj nar tawon nòm kerek nak, rajak Mesir pon natapòk. Èn nèꞌpòk eh nak, rik nak natèd-ted èn béng Òng Tibok Nil. 2Dak tok-tok nanéh mok tujoh lembu rik méj bok tingꞌũs umhuwòl nòm òng tibok nak, dak umgéy rambang èn béng. 3Dak pas nak nanéh tujoh lembu mòy wèl umlãj nòm òng tibok nak. Mèn lembu nak laꞌes bok rangkẽny. Dak tujoh lembu rik rangkẽny nak pon umted èn béng òng Nil nak, èn chening tujoh lembu tingꞌũs naꞌtèk. 4Dak mèn lembu rik belaꞌes bok rangkẽny nak umgéy tujoh lembu rik méj bok tingꞌũs nak! Dak anak rajak nawòg.

5Tapik rik nak naselòg wèl dak natapòk nèꞌpòk rik mòy wèl. Èn nèꞌpòk doh rajak nanéh tujoh juréy menéh rik méj bok rayak rik lèn-lut nòm néy tangkéy. 6Dak anak nalut keꞌjèk tujoh juréy menéh rik mòy wèl. Tapik menéh nak kasẽp, sebab hòj natehòr nòm pantil gurun èn sòy is dak nadèrhas bok nasèrlah ma menéh nak. 7Dak anak juréy rik umbekasẽp nak umgéy tujoh juréy rik méj bok rayak naꞌtèk! Dak anak rajak nak nawòg wèl, dak nabelekh rik nak napèk-pòk.

8Bil yèhyah eh nak, rajak nasuwéh hup eh. Jadik rik nak nakòw ma kenèmbek sènꞌòy rik umbehalak ròb sènꞌòy rik cherèꞌdìk èn tèk Mesir nak. Rajak naꞌoglèkh ma umnak kenèmbek tentang nar nèꞌpòk eh naꞌtèk, tapik tok mok chok pon dapad namꞌoglèkh maksod nèꞌpòk eh nak. #Dan 2:2.

9Dak sèj-sòj eh, pegaway rik beꞌuros nèngꞌòng nak nachal ma rajak, “Yãng rajak, yék hòj iteꞌèl salah! Pay doh yék ibelekh, mok hal yék haros imꞌoglèkh ma hãk! 10Nèng-nèng tòp hãk haꞌõl ma yék bok ma pegaway rik beꞌuros ruti nak. Dak hãk hajél ma yar èn kelòj dékh ketuwe askah. 11Bil yar yagel èn kelòj jél nak, mok néy layèg nak yar yatapòk, dak maksod nèꞌpòk yah nak tok samak. 12Dak mok néy lenitòw Ibrani èn anak samak yar, rik nak néy kuli ketuwe askah. Yar yaꞌoglèkh ma rik nak ilok rik yatapòk nak, dak rik nak naꞌoglèkh tèꞌlalah ma yar maksod nèꞌpòk yah nak. 13Dak kenèmbek hal nak nabelakuk, tehad gerèk rik nachal. Hãk hòj hatèrlos ma yék imkèrjak ma hãk wèl, tapik pegaway rik beꞌuros ruti nak hãk hòj hatajòl eh èn tunggol bok nakebes.”

Yusop naꞌoglèkh tèꞌlalah maksod nèꞌpòk rajak

14Jadik rajak naꞌor ma mèn kuli eh muwèk bok muꞌéd Yusop ma rik nak. Umnak sejèkh umtèrwòl Yusop nòm jél. Yusop nachukur bakh eh dak nalòg nèglòg rik méj, dak pas nak nawèk natèrbuk ma rajak. 15Rajak nachal ma Yusop, “Layèg tèk yék hòj ipòk, dak tok mèk-mok chok pon boléh namꞌoglèkh ma yék maksod nèꞌpòk inak. Tapik yék hòj ikeyòkh gah hãk boléh haꞌoglèkh maksod nèꞌpòk nak.”

16Dak Yusop nasaꞌod ma rajak, “Yãng rajak, yék doh tok boléh. Tapik Allah boléh, bok akal naꞌog senaꞌod rik méj untok hãk bok tok hasèhwèh wèl.”

17Jadik rajak naꞌoglèkh ma Yusop, “Èn nèꞌpòk inak, yék itèd-ted èn béng Òng Tibok Nil. 18Dak tok-tok yék inéh mok tujoh lembu rik méj bok tingꞌũs umhuwòl nòm òng nak, dak umgéy rambang èn béng. 19Dak pas nak mok keꞌjèk yék inéh tujoh lembu mòy wèl umlãj; lembu nak laꞌes bok rangkẽny. Yék tok pernah inéh lembu rik belaꞌes gerèk nak èn kenèmbek tèk Mesir doh! 20Dak mèn lembu rik rangkẽny bok belaꞌes nak umgéy sòj tujoh lembu tingꞌũs rik umlãj naꞌtèk! 21Tapik yab hòj umgéy kenèmbek lembu gèhnih nak, mèn lembu nak had tik rangkẽny geb! Dak anak yék iwòg. 22Nòm kerek nak yék ipòk wèl, bok inéh tujoh juréy menéh rik méj bok rayak, rik lèn-lut nòm néy tangkéy. 23Dak pas nak mok nalut tujoh juréy rik mòy wèl, tapik menéh nak kasẽp, sebab hòj natehòr nòm pantil gurun èn sòy is dak nadèrhas bok nasèrlah ma menéh nak. 24Dak anak mèn juréy rik umbekasẽp nak umgéy sòj tujoh juréy rik méj bok rayak naꞌtèk! Yék hòj iꞌoglèkh nar nèꞌpòk inak ma sènꞌòy rik umbehalak, tapik tok mok chok pon dapad namꞌoglèkh ma yék maksod nèꞌpòk inak.”

25Dak Yusop nachal ma rajak, “Yãng rajak, nar nèꞌpòk hãh nak mok maksod rik chachod. Allah hòj napèrnéh ma hãk ilok Rik Nak akal nateꞌèl. 26Tujoh lembu rik méj ròb tujoh juréy menéh rik méj nak mok maksod rik chachod: nar-nar nak bemaksod tujoh tawon. 27Dak tujoh lembu rik umhèh-hoh nak, rik rangkẽny bok belaꞌes nak, unak pon bemaksod tujoh tawon. Samak keꞌjèk ma tujoh juréy menéh rik umbekasẽp nak, rik tèrhòr nòm pantil gurun nasèrlah nak. Maksod eh nak, akal nalãj tujoh tawon rik mok chènrok bok tok mèk-mok mènhik. 28Bok gerèk yék ichal ma hãk atèk, Allah hòj napèrnéh ma hãk ilok Rik Nak akal nateꞌèl, èn tèk-tik tok nabelakuk: 29Untok tujoh tawon akal mok mènhik rik beduyon-duyon èn kenèmbek tèk Mesir doh. 30-31Tapik nòm kerek nak, untok tujoh tawon wèl akal mok chènrok bok tok mèk-mok mènhik. Chènrok nak akal terok geb, sampéy kenèmbek tèk nak kuwèg bok sènꞌòy umwel geb ma mase rik beduyon-duyon nak. 32Allah hòj naꞌog ma hãk nar nèꞌpòk nak, dak maksod eh nak Allah hòj naꞌampèk hal nak pastik akal nabelakuk, bok Rik Nak hòj namteꞌèl géj doh.

33Jadik puꞌdoh hãk patod hamkèk néy sènꞌòy rik cherèꞌdìk bok lèng-lèkh, dak og lah ma rik nak namꞌuros ma kenèmbek èn tèk Mesir doh. 34Dak pas nak, méj lah kalòw hapili keꞌjèk pegaway mòy rik umbetulong beꞌuros ma tèk doh, dak untok tujoh tawon rik beduyon-duyon akal bok umchatuk nègtòg nòm kenèmbek selay èn Mesir namjadik limak penol, dak néy penol nak dol bok jagak. 35Tujoh tawon rik méj-méj nak hòj namlèj-lãj, jadik og lah kuwase ma mèn pegaway hãh nak untok mudol bok mujagak mènhik rik umchatuk nak, supaye mok mènhik èn lok-lok kote èn tèk Mesir doh. 36Dak nòm mènhik rik umdol nak, nyob akal nyob tabéh untok musim chènrok rik jakal namlãj èn tèk Mesir doh selamak tujoh tawon, supaye negare doh agok namhõy sebab chènrok nak.”

Yusop najadik menterik rayak èn tèk Mesir

37Rajak Mesir ròb kenèmbek pegaway eh umsetujuk ma enampèk Yusop nak méj. 38Dak rajak nachal, “Tok mèk-mok che èk èmtèrbuk sènꞌòy mòy gerèk Yusop doh. Hòj tèꞌlalah Ruway Allah mok samak rik nak.” 39Jadik rajak nak nachal ma Yusop, “Allah hòj napèrnéh kenèmbek hal nak ma hãk, bok tok mèk-mok sènꞌòy mòy rik cherèꞌdìk bok lèng-lèkh gerèk hãk doh! 40Yék akal iꞌog ma hãk hamkuwase èn kenèmbek negare doh, bok kenèmbek sènꞌòy rik umgèl-gel èn tèk Mesir doh akal umhoh ma nèrꞌor hãk. Èn kenèmbek Mesir doh, had yék irik lebéh rayak nòm hãk.”#Tèn 7:10. 41-42Dak anak rajak nateg nòm tikh eh chìnchìt eh rik benèbchòb kerajaꞌan, dak nacherog chìnchìt nak ma tikh Yusop. Dak rajak nachal, “Puꞌdoh yék itèrꞌòj hãk hajadik menterik rayak bok haperintah ma kenèmbek tèk Mesir doh.” Dak rajak natèrlòg ma Yusop bajuk rik méj-méj, dak natèrgòj rantéy mas ma geloh eh. #Dan 5:29. 43Dak rajak naꞌog ma Yusop kerite kuda rik has untok sènꞌòy rik kedua paléng penting èn Mesir. Dak bil Yusop naꞌòj ma kerite kuda nak, mok sènꞌòy umcheroh nèng-nèng bok umꞌèh-éh, “Hormad lah ma rik nak!” 44Dak rajak nak nachal ma Yusop, “Yék lah rajak, bok puꞌdoh iꞌor gerèk doh: èn kenèmbek tèk Mesir doh, sènꞌòy tok boléh umteꞌèl ilok-ilok pon kalòw hãk tok haꞌèr-or.” 45Dak rajak natèrjal kenëh Yusop nak nòm kuy Mesir nak Sapnat-Panéyah. Rajak naꞌog ma Yusop keꞌjèk néy babok rik bekenëh Asnat untok namjadik léh eh. Asnat nak kuwòt babok Pòtipèra, imam èn kote Òn. Jadik gerèk nak lah Yusop nabekuwase èn kenèmbek tèk Mesir. 46Bil Yusop natekèd nakerèꞌjak untok rajak Mesir, umor eh tigak puloh tawon.

Dak Yusop naperak nòm istane rajak nak dak nawèk namnèh-néh ma lok-lok tèk èn Mesir nak.

47Bil èn tujoh tawon rik méj nak, tèk Mesir nak natèrlut hasil nègtòg rik beduyon-duyon. 48Jadik untok tujoh tawon nak Yusop naꞌor muchatuk nègtòg rik umtòg nak namjadik limak penol, bok néy penol nak umdol èn kote-kote. Èn tiyab kote nak, umnak umdol menéh rik hòj umtòg nòm kenèmbek selay rik tilok ma kote nak. 49Menéh rik umchatuk nak ibuk geb, gerèk pantéy èn béng òng laud, sampéy lènbéh eh tok boléh mukirak sebab menéh nak had ibuk geb.

50Tèk-tik tok nalèy-lòy musim chènrok, Yusop nadapad nar kuwòt bèhbeh eh nòm léh eh Asnat. (Asnat nak kuwòt Pòtipèra, imam kote Òn nak.) 51Yusop nachal, “Allah hòj nachèrmun ma yék sampéy iwel ma kenèmbek senusah yéh, bok iwel ma sèndéh yéh tentang kewarge apak yék.” Sebab nak Yusop natèrjal kenëh kuwòt eh rik mulak long nak Manaseh.#41:51 Manaseh nak chëh eh samak gerèk nèlchal kuy Ibrani rik bemaksod “wèl-wel.” 52Dak Yusop nachal wèl, “Èn negara rik hòj iderite doh, Allah naꞌog kuwòt ma yék.” Dak Yusop natèrjal kenëh kuwòt alëj eh nak Èprayim.#41:52 Èprayim nak chëh eh samak gerèk nèlchal kuy Ibrani rik bemaksod “Allah naꞌog kuwòt.”

53Nòm kerek nak, tujoh tawon rik beduyon-duyon èn Mesir nak hòj sòj. 54Dak nalãj lah tujoh tawon chènrok, tehad gerèk Yusop naramal nèng-nèng tòp. Dak èn lok-lok tèk rik gèhnih natekèd lah chènrok, tapik èn tèk Mesir tik mok mènhik um.#Tèn 7:11. 55Tapik tok lamad wèl kenèmbek sènꞌòy Mesir nak pon umtekèd umcherok, dak umnak umꞌèh-éh ma rajak bok umsemany nèygéy. Dak rajak naꞌor ma sènꞌòy Mesir nak, “Wèk lah ma Yusop bok teꞌèl ilok rik naꞌor ma nyob.”#Yoh 2:5. 56Bil chènrok nak hòj nabelèrhir èn kenèmbek tèk Mesir nak, Yusop napog kenèmbek dékh nèldol menéh, dak rik nak natekèd najèlwal menéh nak ma sènꞌòy Mesir. 57Èn kenèmbek bumi chènrok nak terok geb. Jadik sènꞌòy nòm kenèmbek negare mòy pon umlãj ma Mesir untok mubelik menéh nòm Yusop.

Currently Selected:

Jenadik 41: KKT

Highlight

Copy