Jenadik 42

Mèn kelok Yusop umwèk ma Mesir mubelik mènhik

1Bil Yakob nakeyòkh gah mok mènhik èn Mesir, rik nak nachal ma mèn kuwòt bèhbeh eh, “Nahey bok nyob ga-gel bok nyob bena-néh kaban rik nyob? 2Yék hòj ikeyòkh èn Mesir nak mok menéh. Wèk lah ma nak bok belik mènhik nak, supaye èk èmgos bok tok èkèsbes nòm chènrok.” #Tèn 7:12. 3Jadik kelok bèhbeh Yusop rik umbesepuloh nak umwèk mubelik menéh ma Mesir nak. 4Tapik kalòw Bènyamin, pek Yusop nòm néy amèk wèh nak, Yakob tok naꞌèr-or ma rik nak namhoh samak umnak. Sebab rik nak natukh kalòw ilok-ilok nambelakuk ma kuwòt eh nak.

5Jadik kuwòt bèhbeh Yakob nak umwèk ma Mesir untok mubelik menéh. Jajéh sènꞌòy mòy umwèk keꞌjèk, sebab chènrok naꞌtèk hòj mok èn tèk Kanaꞌan keꞌjèk. 6Bil mase nak Yusop nak hòj najadik menterik rayak èn Mesir. Dak Yusop lah irik jèlwal menéh nak ma kenèmbek sènꞌòy rik lèj-lãj ma Mesir. Jadik bil mèn kelok bèhbeh Yusop nak umlòy ma Mesir, umnak umtud èn sòy rik nak. 7-9Bil Yusop nanéh ma mèn kelok eh nak, nakenal ma umnak, tapik umnak tok umkèlnal ma rik nak. Dak bil nanéh ma umnak umtud ma rik nak, Yusop nabelekh ma nèꞌpòk eh nèng-nèng tòp tentang mèn kelok eh nak.

Dak anak Yusop nagèw-gòw gerèk tok nakèlnal ma umnak, dak nacharak narèk-rok ma mèn kelok eh nak, “Nòm lok nyob lãj?”

Dak umnak umsaꞌod, “Kandék kilãj nòm tèk Kanaꞌan bok kichèn kimbelik mènhik.”

# Jen 37:5-10. Tapik Yusop natanas ma umnak, “Nyob doh mèsmus! Nyob had nyob lãj ma doh untok nyomnéh julak-julak ma negare kandék doh, sebab kaum nyob nak nyob chèn nyomkèrlah ma kandék!”

10Umnak umsaꞌod, “Hõy, yãng! Kandék kuli hãh doh kilãj had untok kimbèꞌlik mènhik. 11Kandék kenèmbek kibemèrpek nòm néy apak kandéh. Kandék doh sènꞌòy rik kènmën, bok kedak mèsmus nyob!”

12Tapik Yusop natanas wèl ma umnak, “Bòj! Nyob had nyob lãj ma doh untok nyomnéh julak-julak èn lok negare kandék doh tok bejenagak, sebab nyob kèk nòng untok nyomkèrlah ma kandék!”

13Dak umnak umsaꞌod wèl, “Hõy! Nèng-nèng tòp, kandék kuli hãh doh nar belas mèrpek. Kandék kenèmbek nòm néy apak kandéh, èn tèk Kanaꞌan. Pek kandéh rik las alëj nak tik mok samak apak kandéh. Dak pek kandéh rik naꞌnéy nak hòj hèy-hõy.”

14Tapik Yusop nachal, “Had kemën gerèk ichal nak, nyob nak mèsmus! 15Nak, yék akal iteréy ma nyob: kalòw pek nyob rik las alëj nak nalãj ma doh, bok ilèkh nèlchal nyob nak kemën. Tapik nòm kuwase rajak Mesir yék ipèrhod ipantakh ma nyob: kalòw pek nyob nak tok nalèj-lãj, yék tok iꞌèr-or nyob nyomwèk nòm tèk Mesir doh. 16Néy sènꞌòy nòm nyob haros namak bok naꞌéd pek las alëj nyob nak ma doh. Agat nak, nyob rik gèhnih itèrhan èn jél anuh sampéy inéh kalòw nèlchal nyob naꞌtèk kemën. Dak kalòw nyob sèꞌlok ma yék bok pek nyob nak tok mèk-mok, pastik nyob nak mèsmus!” 17Dak Yusop natèrmòj ma kenèmbek kelok eh nak umgel tigak arik èn jél.

18Dak èn arik tenigak nak Yusop nachal ma umnak, “Yék doh sènꞌòy rik behormad ma Allah. Teꞌèl lah ilok rik yék iꞌor doh, bok akal nyob gos: 19kalòw nyob nak mémang sènꞌòy rik kènmën, perak lah néy sènꞌòy nòm nyob namgel èn kelòj jél doh, dak nyob rik gèhnih mak lah bok èn menéh ma kewarge nyob rik umchèꞌrok. 20Tapik pas nak nyob haros nyomꞌéd pek nyob rik las alëj nak ma yék, supaye imlèkh nèlchal nyob nak kemën bok tok ibehukom ma nyob nyomkebes.”

Dak umnak umhoh umteꞌèl ilok rik Yusop nachal nak. 21Dak anak umnak umcha-chal kaban rik um, “Puꞌdoh Allah nahukom ma èk sebab tènꞌèl èh ma pek èh Yusop nèng-nèng tòp. Rik nak naꞌinchak ma èk, dak èk pon ènéh ma rik nak naderite geb, tapik èk tok èbegorgèr. Unak lah sebab eh èk puꞌdoh èkenak kenèmbek derite doh.”

22Dak Rubèn nachal, “Hatòp nak yék ihuwok ma nyob agok nyomperèdjèd ma lenitòw nak. Tapik nyob doh tok nyob kèngyòkh! Jadik puꞌdoh Allah nahukom ma èk sebab èk hòj èkèrbes ma Yusop.” #Jen 37:21,22. 23Yusop nalèkh ma kuy chenarak umnak, tapik umnak tok umlèng-lèkh ma hal nak. Bil Yusop nacharak ma umnak atèk, rik nak had nacharak kuy sènꞌòy Mesir, bok mok néy sènꞌòy rik èg-oglèkh maksod eh ma umnak èn kuy Ibrani. 24Dak bil nakeyòkh ma nèlchal umnak, Yusop naperak ma umnak dak nayèm-yam. Nòm kerek nak, Yusop nalos dak nacharak ma umnak wèl. Dak anak Yusop naꞌor ma askah muròt bok mubeg ma Simion èn mad mèn kelok eh rik gèhnih.

Mèn kelok Yusop ummak ma tèk Kanaꞌan

25Nòm kerek nak, Yusop naꞌor ma kuli eh muchuwoh menéh mutèrbikh ma apek mèn kelok eh. Dak naꞌor ma umnak julak-julak mutèrlos muchor duid pèrak rik mèn kelok eh hòj umbayar naꞌtèk, ma apek umnak pinéy-pinéy. Dak rik nak keꞌjèk naꞌor ma kuli eh muꞌog nèygéy untok muꞌèn èn nèbchib umnak. Dak umteꞌèl lah umnak rèk nak. 26Dak anak mèn kelok Yusop nak ummèrwãd menéh um tèk èn kerek kuda kelday um, dak umma-mak. 27Bil is hòj nambelayèg, umnak umtarak nòm nèbchib um untok muselòg. Dak anak néy sènꞌòy nòm umnak napog ma apek eh untok namtèrgéy ma kuda kelday eh. Dak rik nak nanéh duid pèrak rik nabayar hatòp mok èn kelòj apek eh, èn balikh menéh nak. 28Rik nak nachal ma mèrpek eh, “Duid yéh hatòp hòj umtèrlos! Néh lah che nyob èn kelòj apek idoh!” Dak hup umnak lègtëg bok umtukh, dak umcha-chal kaban rik um, “Ilok Allah hòj nateꞌèl ma èk?”

29Bil hòj umbeleh ma tèk Kanaꞌan, umnak umꞌoglèkh ma apak um Yakob kenèmbek ilok rik hòj nabelakuk ma umnak: 30“Sènꞌòy rik beperintah èn Mesir nak narèk-rok ma kandék. Rik nak natanas ma kandék doh sènꞌòy mèsmus, bok nachal kandék kiwèk ma nak kimnèh-néh julak-julak ma negare umnak, supaye èmkèrlah ma umnak! 31Kandék hòj kiꞌoglèkh ma rik nak kandék doh sènꞌòy kènmën, kedak mèsmus! 32Nèng-nèng tòp kandék doh nar belas mèrpek. Kandék kenèmbek nòm néy apak kandéh, èn tèk Kanaꞌan. Pek kandéh rik las alëj nak tik mok samak apak kandéh èn anak. Dak pek kandéh rik naꞌnéy nak hòj hèy-hõy. 33Tapik rik beperintah nak nachal nachèn namteréy ma kandék bok namlèkh kalòw kandék doh sènꞌòy rik kènmën. Dak naꞌor kimperak néy sènꞌòy namgel èn anak, dak kandék rik gèhnih kimak bok kiꞌèn menéh ma kewarge kandéh rik umchèꞌrok. 34Tapik pas nak naꞌor kandék kimꞌéd pek kandéh rik las alëj nak ma rik eh nak, bok gerèk nak lah nalèkh kandék doh kedak mèsmus tapik sènꞌòy rik kènmën. Dak bil nak akal natèrlos ma kandék mèrpek kinak, bok boléh lah kibèꞌlik bok kijèlwal èn tèk Mesir nak.”

35Asòh umterawòl menéh nòm apek umnak, dak umkèdjed umnéh upòh duid pèrak rik umbayar hatòp nak mok èn apek um pamòy. Bil umnak ròb apak um umnéh ma upòh nak, dak umnak kenèmbek umtukh geb. 36Dak apak um Yakob nachal ma umnak, “Nyob lah irik sèjyèj ma kuwòt yéh! Yusop hòj hõy, bok Simion pon hòj hõy keꞌjèk. Bok puꞌdoh nyob chèn nyomkod wèl ma Bènyamin?! Ènjoh geb derite idoh!”

37Dak Rubèn nachal ma apak eh, “Og lah Bènyamin nak ma yék imjagak eh, bok akal itèrmak eh. Kalòw yék tok iterèꞌmak kuwòt hãh nak, hãk boléh hakèrbes ma wèh kuwòt bèhbeh yéh nak.”

38Tapik Yakob nasaꞌod, “Hõy! Tok iꞌèg-og Bènyamin namhoh samak nyob. Kelok eh Yusop hòj nakebes, bok puꞌdoh had rik nak hék kuwòt yék nòm Rahèl. Yék doh hòj tatak, bok kalòw ilok-ilok nabelakuk ma rik nak èn nèbchib nyob nak, akal nyob uy ma yék ingèm-ngòm sampéy ikebes.”

Currently Selected:

Jenadik 42: KKT

Highlight

Copy