Jenadik 40

Yusop naꞌoglèkh maksod nèꞌpòk wèh pegaway rajak

1Hòj maròp lènmad nòm kerek nak, mok nar sènꞌòy nòm pegaway rajak Mesir rik betès-dos ma rajak. Naꞌnéy pegaway nak kèrjak eh naꞌèn nèngꞌòng ma rajak.#40:1 naꞌèn nèngꞌòng ma rajak. Pegaway nak sènꞌòy rik bepenting. Rajak nak natukh kalòw mèsmus eh musèꞌlok murachon ma nèngꞌòng eh nak. Jadik pegaway nak lah sènꞌòy rik betasik òng nèng-nèng untok rajak, dak umpechaye ma rik nak untok namjagak ma nèsgos rajak. Dak naꞌnéy wèl ketuwe sènꞌòy rik tèlꞌèl ruti untok rajak. 2Dak rajak naꞌõl ma wèh pegaway eh nak, 3dak najél wèh èn dékh ketuwe askah, tempad chachod rik umjél ma Yusop hatòp. 4Ketuwe askah naꞌor ma Yusop namjagak bok namꞌuros ilok rik wèh pegaway nak wèperlu. Dak wègel dèngwòng èn kelòj jél nak.

5Bil néy layèg, pegaway rik beꞌuros nèngꞌòng nak napòk, dak rik tèlꞌèl ruti nak pon napòk keꞌjèk. Dak nèꞌpòk wènar nak tok samak bok maksod wèpòk nak pimòy. 6Bil yèhyah eh jakal, Yusop nalãj ma wènar nak, dak nanéh mad wènar nak lèꞌjãk. 7Dak Yusop natanyak ma wèh pegaway nak, “Nahey is doh mad kaꞌan lèꞌjãk?”

8Dak wèsaꞌod, “Layèg tèk yar yapòk, dak tok mèk-mok chok pon rik namꞌoglèkh ma yar maksod nèꞌpòk yah nak.”

Yusop nachal, “Had Allah hék irik èg-og nènglèkh tentang maksod nèꞌpòk sènꞌòy. Chal lah nèꞌpòk kaꞌan nak ma yék.”

9Jadik pegaway rik beꞌuros nèngꞌòng nak nachal nèꞌpòk eh ma Yusop, “Èn nèꞌpòk inak mok inéh tèngtèng anggor èn mad yéh. 10Tèngtèng nak mok tigak lènwòy eh. Bil mèn lènwòy nak hòj umbesèꞌlak, sejèkh umbebèꞌngak, dak umbekèꞌbek hòj tuhak. 11Dak bil nak yék ikèmwòp kuléh nèngꞌòng rajak. Jadik yék itelèh kebek anggor nak bok ipenyẽd cheboh eh ma kelòj kuléh rajak, dak iꞌog ma rajak namꞌòng.”

12Dak anak Yusop nachal ma pegaway nak, “Udoh lah maksod nèꞌpòk hãh nak: tigak lènwòy nak bemaksod tigak arik. 13Dak tigak arik wèl rajak akal natèrwòl ma hãk nòm jél doh. Rik nak akal natèrlos hãk ma kèrjak chachod rik hateꞌèl hatòp, dak akal haꞌèn nèngꞌòng ma rajak wèl. 14Dak bil hal méj nak nabelakuk ma hãk, tulong lah belekh che yék. Yék iꞌas hãk méj hup hãh ma yék bok hamꞌoglèkh lah ma rajak tentang yék, supaye namtèrwòl ma yék nòm jél doh keꞌjèk. 15Sebab che kènmën eh, nèng-nèng tòp mok sènꞌòy umròt ma yék bok umꞌéd yék nòm tèk sènꞌòy Ibrani ma tèk Mesir doh. Dak èn anuh pon yék tok itèlꞌèl ilok-ilok rik sèk sampéy patod mujél ma yék èn anuh!”

16Dak pegaway rik naꞌnéy nak, rik tèlꞌèl ruti untok rajak nak, nakeyòkh bil Yusop naꞌèg-oglèkh maksod nèꞌpòk naꞌtèk. Rik nak nanéh maksod nèꞌpòk nak méj, jadik rik nak nachal ma Yusop: “Yék hòj ipòk keꞌjèk. Dak èn kelòj nèꞌpòk inak itèl-tol tigak ragok ruti. 17Èn kelòj ragok rik èn balikh nak mok beragik-ragik ruti untok rajak. Tapik mèn chèp umlãj bok umchèh-chòh ma ruti èn kelòj ragok rik itèl-tol nak.”

18Dak Yusop nasaꞌod, “Udoh lah maksod nèꞌpòk hãh nak: tigak ragok nak bemaksod tigak arik keꞌjèk. 19Dak tigak arik wèl rajak akal naꞌor askah eh mupanychòkh kuy hãh, dak akal umtajòl esik hãh èn tunggol. Dak mèn chèp akal umchòh séj esik hãh.”

20Hòj tigak arik nòm kerek nak, nalòy lah ma arik nèsyos rajak Mesir nak. Dak rajak pon mok jamuwan rik rayak untok kenèmbek pegaway eh. Dak anak rajak naꞌor mutèrwòl ma wèh pegaway naꞌtèk nòm jél — rik beꞌuros nèngꞌòng bok rik beꞌuros ruti nak — dak naꞌor muꞌéd wènar nak wèmted èn mad kenèmbek pegaway rik gèhnih. 21Dak rajak natèrlos pegaway rik beꞌuros nèngꞌòng eh nak ma kèrjak chachod eh nèng-nèng tòp, bok naꞌèn kuléh nèngꞌòng ma rajak wèl. 22Tapik ma pegaway rik beꞌuros ruti nak rajak naꞌor ma askah eh mukèrbes bok mutajòl esik eh èn tunggol. Kenèmbek eh nak nabelakuk tehad gerèk Yusop hòj nachal hatòp. 23Tapik pegaway rik beꞌuros nèngꞌòng naꞌtèk hòj nawel geb ma Yusop, bok tok nabènglekh wèl ma rik nak.

Currently Selected:

Jenadik 40: KKT

Highlight

Copy