लुकस 8
8
येसुसिन सँगे चिऊ मुक्कर
1अदिही ख़ोख़ा येसुस सहर-सहर अउर पद्दा-पद्दा कुद्दनुम धर्मेस ही राजी ही दवसमाचार मेन्तआनुम कुद्दा लगियस। अउर आसी गने बारह गोड़े चेलर रहचर। 2अउर कय बग्गे मुक्कर हूँ येसुस गने रहचर, इबड़र मलदव बोलता अउर रोगे गुट्ठी ती कोड़े मन्तारका रहचर। आर मदहे ती मग्दलिनी बअना मरियम ती सात ठो मलदव बोलता येसुस ओथरका रहचस, 3अउर योअन्ना, ने हेरोद एन्टिपासस ही ढिबा इरु-ख़ोजुस खुजासस ही तंग्हय आली रहचा, अउर सुसन्ना। इर अउर दोसरा मुक्कर हूँ तम्हय खुर्जी ती येसुस अउर आस ही चेलर ही संगरा नना लगियर।
बिया चाँख़उस ही खिरी
(मत्तिस १३:१-२३; मरकुस ४:१-२०)
4एकाबिरी एका बग्गे आलर ख़ोड़रर, अउर सहर-सहर ती आलर आस ही हेद्दे बरचर, ताब आस अबड़रिन ओन्टा खिरी तिंगियस, 5“ओरोत आलस बिया चाँख़आ उरख़स, अउर चाँख़ओ बिरी थोरे बिया डहरे नू खत्तरा, अउर आलर ही ख़ेड्ड ती तिर्ख़रा, अउर ओड़ा गुट्ठी अदिन पेत्ता मोक्खा। 6थोरे बिया पखना मन्जका ख़ल्ल नू खत्तरा, अउर आद कुन्दियाकिम ख़इय्या, एन्देरगेका आ ख़ल्ल हल्ले मला रहचा। 7थोरे बिया अच्च झुकड़ी नू खत्तरा, अउर अदी गने अच्च झुकड़ी हूँ कुन्दिया, अउर अदिन परदा मला चिच्चा। 8थोरे बिया दव ख़ल्ल नू खत्तरा, अउर कुन्दिया की सय गुना ख़ंजपा ख़न्जा।”
ई बग्गे बाचका ख़ोख़ा आस जोरसे बाचस, “नेख़य गने मेन्ना ख़ेबदा र' ई, आस मेना नेकआ।”
खिरी ही मने
(मत्तिस १३:१०-२३; मरकुस ४:१०-२०)
9येसुस ही चेलर ई खिरी ही मने एन्दरा हिके बाचर की आसिन मेन्जर। 10येसुस बाचस, “निमरिन धर्मेस ही राजी ता भितरी कत्था बुझुरआ गे लुर चिरकी र' ई, लेकिन दोसरर गने तो एन खिरी नू कच्छनखरदन का, ‘अबड़र एरोर की हूँ मला एःरा नेकआ अउर मेनोर की हूँ मला बुझुरआ नेकआ।’#यसायाहस ६:९-१०
येसुस बिया चाँख़उस ही खिरिन बुझावअदस
(मत्तिस १३:१८-२३; मरकुस ४:१३-२०)
11“अक्कू खिरी ही मने इद हिके: बिया तो धर्मेस ही बचन हिके। 12डहरे ही कुटी नू खतरका बिया अबड़र हिकनर, ने मेन्नर, लेकिन बचन मेन्नर की मला पत्तआ नेकआ अउर मला बछरआ नेकआ बआ की सैतान बरई की अबड़र ही जिया ती बचनन हुई काली। 13पखना मन्जका ख़ल्ल नू खत्तरका अबड़र हिकनर, ने बचन मेन्नर की रिझिरनुम आर गरहन नन्नर। लेकिन अदी ही सिर मला मनी, अउर थोरे बेड़ा ही खतरी अबड़र पत्तअनर, लेकिन परिक्छा ही बेड़ा नू अबड़र पत्तअनन ती हटरनर कानर। 14अच्च झुकड़ी गुट्ठी ही मझही नू खत्तरका अबड़र हिकनर, ने बचन मेन्नर, लेकिन ख़ोख़ा नू ई जिन्गी ता चिन्ता, खुर्जी, सुखे अउर रिझ नू रअनर की बढरआ पोलनर, अउर आर ही ख़ंजपा पाना पुल्ली। 15लेकिन दव ख़ल्ल नू खत्तरका बिया अबड़र हिकनर, ने बचन मेन्नर की दव जिया नू समड़अनर की उइनर अउर फेच्चा गुटी टिकआ की बग्गे ख़न्जपा ख़ंजनर।
बिल्ली ही खिरी
(मरकुस ४:२१-२५)
16“ने हूँ बिल्ली दगनर की संजगी ती मला कुल्लनर, न तो खटिया किइयाँ उइनर, लेकिन भितरी बरऊ आलर गे बिल्ली मना नेकआ बआ की पक्खा नू उइनर।
17“अक्कू मला एथरना हुरमी कत्था गुट्ठी बहरी एथरोओ, अउर भितरी कत्था गुट्ठी बुझुरआ ओंगोतारओ अउर बिल्ली नू ओन्दरतारओ।
18“औंगे होसियार रआ, निम धर्मेस ही बचनन एकान्ने की मेन्दर, एन्देरगेका नेख़य गने र' ई, आस गे और चितारओ, अउर नेख़य गने मल्ला, आस गुसन राचका हूँ होरओ कालो।”
येसुस ही तंगियो अउर भैयोर
(मत्तिस १२:४६-५०; मरकुस ३:३१-३५)
19ख़ने येसुस ही तंगियो अउर भइर आस गुसन बरचर, लेकिन गोहड़ा ही करने आस ही हेद्दे बरआ पोल्लर। 20नेकउम आसिन बाचर, “निंगयो अउर भइय्योर निंगन भेट नना गे बहरी इज्जका रअनर।”
21लेकिन आस अबड़रिन बाचस, “इंगियो अउर भइय्योर आरिम हिकनर, ने धर्मेस ही कत्थन मेन्नर, अउर अदी लेक्खा एकनर।”
येसुस आँधाड़ान सान्त नन्जस
(मत्तिस ८:२३-२७; मरकुस ४:३५-४१)
22ओन्द उल्ला येसुस तंग्हय चेलर गने डोंगा नू अरगियस, अउर आस अबड़रिन बाचस, “नाम ताल ही आ पक्खे कालोत।” अउर आर डोंगा नू अरगियर की केरर। 23अबड़र काला हेल्लरर आ बिरी येसुस ख़न्दरस केरस। ताल नू कोहाँ आँधाड़ बरचा। डोंगा अम्म ती निदा हेल्लरा, अउर अबड़र सस्ती नू पड़ारर। 24ख़ने अबड़र हेद्दे केरर की आसिन एज्जरताआनुम बाचर, “अना गुरु, अना गुरु, नाम मुलख़ा लगदत।” आस चोचस की ताका अउर अम्म ही लाटन केप्पस, अउर अबड़ा ठमकरा केरा अउर हुरमी सान्त मन्जा।
25आस आरिन बाचस, “निम्हय पत्तअना एसन केरा?”
अबड़र इल्चियर, अउर छक्केम मन्जर अउर ताम-ताम बआ हेल्लरर, “इस ने हिकदस? इस ताका अउर अम्मन हूँ पेसदस, अउर अबड़ा इस ही पेसकन मनई।”
नाद लक्का आलस
(मत्तिस ८:२८-३४; मरकुस ५:१-२०)
26येसुस अउर आस ही चेलर गेरासेनस ता प्रदेस नू अड़सियर केरर, एकदा गालिल ही आ पक्खे र' ई। 27एकाबिरी येसुस डोंगा ती इत्तियस ताब आस सहर ता ओरोत आलस ख़क्खियस, नेका नाद लक्का रहचा। आस ढेर उल्ला गुटी झुला मला अत्ता लगियस, अउर एड़पा नू मला रआ लगियस आस मसड़ा#८:२७ मसड़ा यहुदिर ही मसड़ा गुफा गुट्ठी नू रआ लगिया। अड्डा गुट्ठी नू रआ लगियस। 28आस येसुसिन इरयस की चिच्चियारस अउर आस ही अगु ख़ेड्ड नू ख़ोल्ख़रस की जोरसे बाचस, “अना हुरमी ती कोहाँ धर्मेस ही तंग्दय येसू, निंग्हय एंग्हय ती एन्देर नलख? बिन्ती नन्दन का एंगन दन्डे अम्बा चिआ।” 29एन्देरगेका येसुस मलदव बोलतन आस ती उरख़ा काला गे पेसका रहचस। आसिन बग्गे चोटी नाद धरचकी रहचा। आसिन सिकड़ी ती ख़ेड्ड ख़ेक्खन हेआकी उइया लगियर अउर ख़ापा लगियर, लेकिन आस अबड़न ख़च्चा चिआ लगियस। अउर नाद आसिन फिटकी अड्डा नू कुत्तआ लगिया।
30येसुस आसिन मेन्जस, “निंग्हय एन्देर नामे हिके?” आस बाचस, “फौज#८:३० फौज गिरिक नू “गोहड़ा” बाचका र' ई अउर अदी ही मने छव हजार सिपाहिर मन्नर।” एन्देरगेका आस मइयाँ ढेर बग्गे नाद गुट्ठी कोरोचकी रहचा।
31नाद गुट्ठी येसुसिन बिन्ती नन्जा, “एमन मला मुंजुरना गड्डी#८:३१ मला मुंजुरना गड्डी यहुदिर ई गड्डी नू केच्चका आलर ही बोलता गुट्ठी अउर नाद गुट्ठी न धर्मेस ही रायबड़ी उल्ला नू मला बरना गुटी उइका मन्नर, बअनर की पत्तअनर। नू काला गे अमा पेसआ।”
32असन परता ही डिप्पा नू किस्स ही ओन्द कोहाँ जेर मेना लगिया। ताब अबड़ा नाद गुट्ठी बिन्ती नन्जा, “एमन अबड़ा किस्स नू कोरआ चिआ।” येसुस अबड़न काला चिच्चस। 33ताब नाद गुट्ठी आ आलस ती उरख़ा की किस्स गुट्ठी नू केरा, अउर आ किस्स गुट्ठी परता ही ड़िप्पा ती किय्या डेग्चा की समुदर नू मुन्ख़िया की केच्चा।
34इबड़ा मन्जका कत्थन किस्स ख़ापुर इरियर अउर बोंगर, अउर सहर अउर पद्दा नू केरर की ई कत्थन तिंगियर। 35इबड़ा मन्जकन आलर एःरा गे येसुस गुसन बरचर, अउर एका आलस ती नाद गुट्ठी उरख़की रहचा, आसिन येसुस ही ख़ेड्ड गुसन झुला अत्तका अउर कोड़े मन्जका की उक्का इरियर, अउर अबड़र इल्चियर। 36इरकर गुट्ठी नाद लक्का आलस एकसे कोड़े मन्जस बआ की अदिन अबड़ा आलरिन तिंगियर। 37गेरासेनस ता आसपास ता हुरमी पद्दन्ता आलर येसुसिन अबड़र पद्दन्ती उरख़ा काला गे बाचर की बिन्ती नन्जर, एन्देरगेका अबड़र एकदम इलच्का रहचर। औंगे येसुस डोंगा नू अरगियस की किर्रियस। 38लेकिन एका आलस ती नाद गुट्ठी उरख़की रहचा, आस “येसुस गने काला चिआ” बाचस की बिन्ती नना हेल्लरस। लेकिन येसुस आसिन एन्ने बाचस की तइय्यस, 39“निन निंग्हय एड़पा किर्रा, अउर धर्मेस निंगा खतरी एक्का कोहाँ नलख नन्जका रअदस, अदिन आलरिन तेंगा।” ताब आस केरस, अउर येसुस आस ही खतरी एक्का कोहाँ नलख नन्जकाचस, अदिन हुरमी सहर नू तेंगा हेल्लरस।
याइरसस ही तंगदा अउर ख़ेस बहना आली
(मत्तिस ९:१८-२६; मरकुस ५:२१-४३)
40येसुस किर्रियस ख़ने बरओ बिरी आलर आस ही स्वागत नन्जर, एन्देरगेका आर होरमर आस ही आसे एःरा लगियर। 41ख़ने याइरसस नामे ही ओन्द ओर्तोस यहुदिर ही सभाएड़पा ता सासकस बरचस की येसुस ही ख़ेड्ड नू खत्तरस, अउर तंग्हय एड़पा नू बरआ बआ की आसिन बिन्ती नन्जस, 42एन्देरगेका आस ही बारह बछर ही ओन्टे लेका तंगदा खेआ बिद्दकी रहचा। येसुस कानुम रहचका बिरी आलर आसिन चारो तरती चेपआ लगियर।
43बारह बछर ती ख़ेस बहना रोगे ती दुक्खे ख़क्खका ओन्टा आली हूँ रहचा। अदिन ने हूँ कोड़े नना पोल्लर।#८:४३ अदिन ने हूँ कोड़े नना पोल्लर। पहिलका एकअम सँस्करन गुट्ठी नू एन्ने हूँ टुड़रकी र' ई, आ आली तंग्हय हुरमी ढिबन मँदर मोख़ा गे बैधर गे चिच्चा की मुन्जिया, लेकिन आद कोड़े मला मना ओंगिया। 44आद ख़ोख़ा तरती बरचा की येसुस ही झुला ही ओन्टा गन्डन छुबचा, ख़ने अदी ही ख़ेस बहना आ बाकिम रोक्करा केरा। 45येसुस बाचस, “एंगन ने छुबचा?”
ख़ने होरमर एम मला छुबचकम बाचर, ख़ने पतरुसस अउर आस गने रउर बाचर, “अना गुरु, गोहड़ा निंगन घेरचा की तुक्की।”
46लेकिन येसुस बाचस, “नेकइम एंगन छुबचकम रअनर, एन्देरगेका सवंग एंग्हय ती उरख़का एन अख़चकन।” 47अक्कू एन नुख़रआ पोल्लोन बअना कत्था अख़चा की इल्चनुम असरनुम आ आली येसुस ही ख़ेड्ड नू खत्तरा। अउर एन्दरगे एन येसुसिन ओसड़चकन, अउर एकसे तुरतेम कोड़े मन्जकन, अदिन होरमा आलर ही मझही नू तिंगिया। 48येसुस अदिन बाचस, “ए बेटी, निंग्हय पत्तअना निंगन कोड़े नन्जा, अक्कू निन कलय धर्मेस ही सान्ती निंग्हय गने मन्ननेकआ।”
49येसुस बअतेम रहचस, यहुदिर ही सभाएड़पा ता सासकस ही एड़पन्ती ओरोत आलस बरचस की बाचस, “निंगदा केच्चा केरा, अक्कू गुरुसिन दुक्खे मला चिआ।”
50लेकिन येसुस इदिन मेन्जस की याइरससिन बाचस, “अमा एल्चा, पत्तआ लेका, अउर आद कोड़े मनो कालो।”
51एकाबिरी आस एड़पा नू अड़सियस ख़ने आस पतरुसस, युहन्नास, याकुबस अउर कुकोय ही तंगियो तम्बर अम्बरकी दोसरा नेकन हूँ भितरी कोरआ मला चिच्चस। 52असन होरमर चिंख़तेम ओलख़तेम रहचर, लेकिन आस बाचस, “अमा चिंख़ा, आद केच्चकी मल्ला, लेकिन ख़न्दरकी र' ई।”
53आद केच्चा किरकी र' ई बआ की अबड़र अख़आ लगियर औंगे आस ही मइयाँ अल्खियर। 54लेकिन येसुस अदी ही ख़ेक्खन धरचस की बाचस, “अनय एंग्हय ख़द्द चोअय।” 55ख़ने अदी ही जिया किर्रिया की बरचा, अउर आद लघलेम चोचा, अउर आस अदिगे एन्दरुम ओना गे चिआ बाचस की पेसस। 56अदी ही तंगियो तम्बर छक्केम मन्जर, लेकिन एन्दरा मन्जकी रहचा अदिन नेकन हूँ अमके तेंगा बआ की येसुस आरिन पेसस।
Currently Selected:
लुकस 8: KRUX
Highlight
Share
Compare
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
