लुकस 9
9
बारह चेलर तइरका
(मत्तिस १०:५-१५; मरकुस ६:७-१३)
1ताब येसुस बारह चेलारिन सँगेम मिख़ियस, अउर आर गे हुरमी नाद गुट्ठी ओथरना अउर रोगे गुट्ठी कोड़े नन्ना सवंग अउर अधिकार चिच्चस। 2ख़ने आस आरिन धर्मेस ही राजी ही पत्त नू तेंगा गे अउर रोगे गुट्ठी कोड़े नना गे तइय्यस। 3आस आरिन बाचस, “निम डहरे एका गे एन्दरा हूँ मला होआ—न डन्डा, न झोला, न असमा, न ढिबा, न तो दुई जोड़ झुला हूँ। 4एका एड़पा नू निम कोरओर असानुम रअके अउर अस्तेतिम बिदा मनके। 5एकसन निम्हय स्वागत मला मनी होले निम आ सहर ती उरख़ना बेड़ा निम्हय ख़ेड्ड ता धुलिन अबड़र ही बिड़दो नू गोवाह ही खतरी ख़ेत्ता#९:५ ख़ेड्ड ता धुलिन अबड़र ही बिड़दो नू गोवाह ही खतरी ख़ेत्ता इदिही मने येसुस ही पत्त नू कत्था मेन्ना इन्झरका आलरिन निन इन्झरकय अउर अक्कू निंग्हय अबड़र गने एन्दरअम नलख मल्ला बअना हिके। चिआ।”
6ताब चेलर बिदा मन्जर, अउर दवसमाचार मेन्तआनुम, अउर हुरमी तरा बेमरहारिन कोड़े नन्तेम पद्दा-पद्दा केरर।
येसुस ही पत्त नू मेन्जस की हेरोदस अकबकरदस
(मत्तिस १४:१-१२; मरकुस ६:१४-२९)
7ई हुरमी मन्जका कत्था गुट्ठी ही पत्त नू मेन्दस की गालिल प्रदेस ता सासक हेरोद एन्टिपासस अकबकरस, एन्देरगेका युहन्नास केच्चका ती उज्जा चोचका रअदस बआ की ने-ने बआ लगियर। 8अउर नेकउम बआ लगियर, “एलियास एथरका रअदस।” ख़ने दोसरर बआ लगियर, “ढेर पहले ता अगमजानिर मधे ओर्तोस केच्चका ती फेर उज्जा चोचका रअदस।” 9ताब हेरोदस बाचस, “युहन्नास ही कुक्कन एन खान्डताचकान, लेकिन इस ने हिकदस, नेख़य पत्त नू एन एन्ने कत्था गुट्ठी मेन्दन?” ख़ने आस येसुसिन भेट नना बिद्दियस।
येसुस पाँच हजार आलरिन ओन्ताचस
(मत्तिस १४:१३-२१; मरकुस ६:३०-४४; युहन्नस ६:५-१३)
10ख़ने मुध चेलर किर्रियर की बरचर अउर अबड़र नन्जका हुरमी नलखन येसुसिन तिंगियर। ताबसिले आस अबड़रिन लेका होच्चस की बेथसेदा बअना सहर नू केरस। 11लेकिन ई कत्थन अख़चर की आलर ही गोहड़ा आस ही ख़ोख़ा-ख़ोख़ा लग्गिया। आस अबड़रिन स्वागत नन्जस, अउर धर्मेस ही राजी ही पत्त नू तिंगियस, अउर नेका-नेका गे कोड़े मन्ना चाड़ रहचा अबड़रिन कोड़े नन्जस।
12अक्कू बिड़ी पुत्ता हेल्लरा ख़ने बारा गोड़े चेलर बरचर की आसिन बाचर, “आलर ही गोंहड़न तइय्या चिआ, अउर अबड़र हेद्दे ता पद्दा नू कालोर की ओना मोख़ा गे अउर रआ गे अड्डा बेद्दा नेकआ, एन्देरगेका इसन तो अन्ने एन्दरा हूँ मला ख़खरिई।”
13लेकिन आस आरिन बाचस, “निमिम इर गे ओना मोख़ा गे चिआ।” ताब आर बाचर, “एम्हय गने पाँच ठो असमा अउर दुई ठो इन्जो लेका र' ई। महलेता नाम काला की ई होरमा आलर गे ओन्ना मोख़ना ख़ेदा पड़ारओ होत्एन।”
14एन्देरगेका असन लगभग पाँच हजार मेतर रहचर।
ताब येसुस तंग्हय चेलारिन बाचस, “आरिन पचास-पचास नना की पाता-पाती ओक्तआ चिआ।”
15ख़ने अबड़र अन्नेम नन्जर अउर होरमारिन ओक्ताचर चिच्चर। 16ताब येसुस आ पाँच ठो असमान अउर दुई ठो इन्जोन होच्चस की मेर्ख़ा तरा इरियस की धन्यवाद चिच्चस, अउर आस असमन अउर इन्जोन किच्चियस की अबड़न ख़ट्टा चिआ बआ की चेलर गे चिच्चस। 17आर होरमर कुल उड़ना गुटी ओन्डर मोक्खर। एंगरका असमा अउर इन्जो ही टुकड़ा गुट्ठी ख़ोड़चर ख़ने बारा डौड़ा निन्दरा।
पतरुसस ही इन्झरना
(मत्तिस १६:१३-१९; मरकुस ८:२७-२९)
18ओन्द बेर येसुस ओतख़ेम गोहरारआ लगियस ख़ने चेलर हूँ आस गने रहचर, अउर आस अबड़रिन मेन्जस, “आलर एन ने हिकदन बअनर?”
19अबड़र बाचर, “नेकइम बप्तिस्मा चिऊ युहन्नास बअनर, नेकइम एलिया, अउर दोसरर बअनर, पहले ता अगमजानी गुट्ठी मधे ओर्तोस केच्चका ती उज्जा चोचका रअदस।”
20आस आरिन बाचस, “लेकिन निम एन्दरा बअदर? एन ने हिकदन?”
पतरुसस किर्ताचस की बाचस, “निन धर्मेस ही ख्रिस्त हिकदय।”
येसुस तंग्हय खेअना ही पत्त नू मुन्द तेंग्दस
(मत्तिस १६:२०-२८; मरकुस ८:३०—९:१)
21लेकिन येसुस आरिन कड़ा चेताब चिच्चस की पेसस, का अबड़र ई कत्थन नेकन हूँ मला तेंगा नेकआ। 22ख़ने आस बाचस, “धर्मेस तय्यका एन आल तंग्दस गे बग्गे दुक्खेन झेलओस अउर यहुदी अगुवार, यहुदी मुध नैगर अउर मोसास ही व्यवस्था सिखाबउर दुसओर। आस पिटतारओस, लेकिन तिसर उल्ला नू आस उज्जा चोओस।”
23ताब आस होरमारिन बाचस, “नेकइम एंग्हय ख़ोख़ा बरना मने ननोस होले आस तंगन इनकार नना पड़ारओ, अउर हुरमी उल्ला तंग्हय कुरुसन#९:२३ कुरुस इसन कुरुस चेड्डना ही मने येसुस ही करने तंग्हय जिया तिम दुक्खे खेपना अउर खेआ गे हूँ सपड़ारना हिके। चेड़ओस की एंग्हय ख़ोख़ा लग्गा पड़ारओ। 24एन्देरगेका ने तंग्हय जियन बछाबआ गे मने नन्दस होले, आस अदिन एबसदस, लेकिन ने एंग्हय खतरी तंग्हय जियन एबसदस होले, आस अदिन बछाबओस। 25एन्देरगेका गोट्टे ख़ेख़ेलन ख़क्खदस की हूँ तंगन एबसदस अरा नास नन्दस होले आस गे एन्देर नफा मनी दरा? 26लेकिन नेकइम एंग्हय ती अउर एंग्हय बचन ती लजरदस होले धर्मेस तय्यका एन आल तंगदन हूँ तंग्हय महबा नू, अउर बबस अउर नेम्हा मेर्ख़ादुतर ही महबा नू बरओस होले आस गने लजरओस। 27लेकिन एन मानिम निमन बअदन, इसन इज्जका आलर मधे नेकइम-नेकइम रअनर, ने धर्मेस ही राजिन एरना ती अगू मला खेओर।”
येसुस ही रुप बदलारना
(मत्तिस १७:१-८; मरकुस ९:२-८)
28इबड़ा कत्था बाचका ही लगभग आठ उल्ला ख़ोख़ा येसुस पतरुस, युहन्नास अउर याकुबसिन तंग्हय गने होच्चस की गोहरारआ गे परता मइयाँ केरस। 29आस गोहरारओ बिरी आस ही मुही ही रुप बदलारा, अउर आस ही झुला पक्काम पन्डरु मन्जा की बिल्चा हेल्लरा। 30अनचोखएम आस दुई गोड़े आलर गने कच्छनखरनन एथरस, आर मोसास अउर एलियास रहचर। 31अबड़र मेर्ख़ा ता बिल्ली ही महबा नू एथरर की अउर येसुस ही खेअना ही पत्त नू कच्छनखरआ लगियर। एकदन आस यरुसलेम नू पुरा नना बिद्दका रहचस। 32पतरुसस अउर आस गने रहचकर एकदम ख़न्दरआ लगियर। लेकिन एकाबिरी एज्जरर ख़ने अबड़र आस ही महबा अउर आस गने इज्जका आ दुई गोड़े आलरिन इरियर। 33ताब आ दुई गोड़े आलर आस ती काला हेल्लरर ख़ने पतरुसस येसुसिन बाचस, “अना गुरु, नाम इसन रअना दव र' ई। नाम तिन ठो खुपड़ी कमओत, ओन्टा निंगा गे, ओन्टा मोसास गे अउर ओन्टा एलियास गे।” आस बल्लस का तान एन्दरा बआ लगियस।
34पतरुसस ई कत्था कच्छनखरते-कच्छनखरतेम ओन्टा बदाली बरचा की आरिन कुल्लिया, अउर आर बदाली भितरी कोरआ हेल्लरर ख़ने अबड़र इल्चियर। 35आ बिरी बदाली ती एन्ने बअना ओन्टा अवाज बरचा, “इस एंग्दस हिकदस, नेकन एन चज्जका रअदन। इस ही कत्थन मेना।”
36ई कत्था कच्छनखरका ख़ोख़ा असन येसुस ओतख़ेम लेका एथरस। अबड़र छछेम रहचर अउर ताम इरका कत्थन अबड़ा उल्ला नू नेकन हूँ मला तिंगियर।
येसुस मलदव बोलता लक्का कुक्कोसिन कोड़े नन्जका
(मत्तिस १७:१४-१८; मरकुस ९:१४-१७)
37दोसर उल्ला एकाबिरी येसुस अउर आ चेलर परता ती इत्तियर, ख़ने ओन्टा कोहाँ गोहड़ा आसिन भेट नना बरचा। 38आ बिरिम गोहड़ा ती ओरोत आलस चिच्चियारस की बाचस, “अना गुरु, एन निंग्हय गने बिन्ती नन्दन, एंग्दस मइयाँ सोग्गे नना। एन्देरगेका इस एंग्हय ओन्टे लेका ख़द्दस हिकदस। 39आसिन मलदव बोलता धरई अउर आस अन्चोखेएम चिच्चियारस, अउर आसिन एंठमोचर ननी अउर आस ही बई ती गोंन्ज उरख़ी। आसिन पटकिई-पिदख़िई की सोरे-सोरे अम्बी। 40एन निंग्हय चेलारिन आ मलदव बोलतन ओथरा चिआ बआ की बिन्ती नन्जकन, लेकिन आर पोल्लर।”
41ताब येसुस बिड़दाचस, “ए मला पत्तऊ अउर मलदव आलरो, एन इकला गुटी निम्हय गने रओन अउर निमरिन सहते रओन? निंग्दसिन इसन ओन्दरआ।”
42एकाबिरी आस बरआ लगियस ख़ने नाद आसिन पटगाचा चिच्चा, अउर एंठमोचर नन्जा। लेकिन येसुस आ मलदव बोलतन केप्पस, अउर आ ख़द्दसिन कोड़े नन्जस की आस ही तम्बस गे सोंपचस चिच्चस। 43अउर धर्मेस ही एन्ने कोहाँ नलखन इरियर की होरमा आलर छक्केम मन्जर।
येसुस तंग्हय खेअना ही पत्त नू फेर मुन्द तेंगदस
(मत्तिस १७:२२-२३; मरकुस ९:३०-३२)
येसुस नन्जका हुरमी नलख नू होरमर छक्केम मन्जका इरियस की, आस तंग्हय चेलारिन बाचस, 44“ई कत्थन निम अमके मोधरआ, एन्देरगेका धर्मेस तय्यका एन आल तंगदन आलर ही ख़ेक्खा नू धरतारआ बिद्दका रअदस।” 45लेकिन अबड़र ई कत्थन मला बुज्झरर। एन्देरगेका इदिन अबड़र मला बुझुरआ नेकआ बआ की अबड़र ती नुख़ुतारकी रहचा। अबड़र ई कत्था ही पत्त नू आसिन मेना गे एल्चा लगियर।
हुरमी ती कोहाँ ने हिके
(मत्तिस १८:१-५; मरकुस ९:३३-४०)
46आ बिरी अबड़र मधे कोहाँ ने हिके बअना पत्त नू आर ही मझही नू बहस चोचा। 47येसुस आर ही जिया ता कत्थन अख़चस की ओन्टा ख़द्दसिन होच्चस की तंग्हय हेद्दे इजताचस, 48अउर आरिन बाचस, “ने एंग्हय नामे नू ई ख़द्दस लेखा सन्नी ख़द्दसिन गरहन ननोस, आस एंगान गरहन नन्दस, अउर ने एंगान गरहन ननोस, आस एंगन तइयुसिन गरहन नन्दस। एन्देरगेका निम मधे ने होरमर ती सन्नी रअदस, आसिम कोहाँ मन्दस।”
ने निम्हय बिड़दो नू मल्लास आस निम्हय तरा मनोस
(मरकुस ९:३८-४०)
49ताब युहन्नास बाचस, “अना गुरु, ओर्तोस निंग्हय नामे ती नाद गुट्ठी ओथरनन एमा गे इरकम, अउर एम आसिन अन्ने नन्ना ती छेकचकम, एन्देरगेका आस एम्हय गोहड़ा ता आलस मला रहचस।”
50ख़ने येसुस आसिन बाचस, “आसिन अमा छेकआ, एन्देरगेका निम्हय बिड़दो मला ननुर निम्हय तरम रअनर।”
सामरिर ती बिड़दो
51येसुस ही मेर्ख़ा काना बेड़ा हेद्दे अड़सा हेल्लरा ख़ने आस यरुसलेम तरा मानिम काला बिद्दियस। 52ख़ने आस खबर हुऊ आलरिन तान काना ती अगुम तइयस। अबड़र केरर, अउर आस ही खतरी हुरमी कुच्छ सपड़आगे सामरिर ही ओन्टा पद्दा नू केरर। 53लेकिन येसुस यरुसलेम तरा काना कत्थन अख़चर की आ पद्दा ता आलर आसिन स्वागत मला नन्जर। 54ताब इदिन इरियर की आस ही चेलर याकुबस अउर युहन्नास बाचस, “उर्बायो, एन्दरा निन चाहदय का मेर्ख़ा ती चिच्च खतरआ की इर नास मना नेकआ बआ की नाम पेसओत?”#२ बेलर १:९-१६
55लेकिन येसुस किर्रियस की अबड़रिन केप्पस।#९:५५ लेकिन येसुस किर्रियस की अबड़रिन केप्पस। एकअम-एकअम स्रोत नू एन्ने हूँ लिखरकी र' ई। (अउर एन्नेकी बाचस, “निम नू एकन्ने खल्ल ही जिया मना पड़ारओ, अदिन तो निम मला अख़च्का रअदर। एन तो आलरिन नास नना गे मला लेकिन अबड़रिन बछाबआ गे बरचका रअदन।”) 56ख़ने आर दोसरा पद्दा तरा केरर।
येसुसिन ख़ोख़ाचका ही तिरआ पड़ारना मोल
(मत्तिस ८:१९-२२)
57येसुस अउर आस ही चेलर काला हेल्लरर ख़ने, ओरोत आलस आसिन बाचस, “अना उर्बायो, निन एकसन काले एन हूँ निंग्हय ख़ोख़ा लग्गोन।”
58ताब येसुस बाचस, “चिगला गुट्ठी ही लाता र' ई, अउर मेर्ख़ा ता ओड़ाख़ाख़ा गुट्ठी गे खोता र' ई, लेकिन धर्मेस तय्यका एन आल तंग्दस ही तो कुक्क उइना अड्डा हूँ मल्ला।”
59आस दोसरसिन बाचस, “एंग्हय ख़ोख़ा लग्गा।”
लेकिन आस बाचस, “अना उर्बायो पहले काला की एम्बासिन माड़ा गे काला चिआ।”
60लेकिन आस आसिन बाचस, “केच्चकारिन तम्हय मुरदन माड़आ#९:६० केच्चकारिन तम्हय मुरदन माड़आमुरदा माड़ना कत्थन यहुदिर बग्गे मानआ लगियर। लेकिन मुरदन माड़ना ती कोहाँ कत्था येसुस ही ख़ोख़ा काना हिके बअना आस बाचस। चिआ, लेकिन निन कला की धर्मेस ही राजी ता दवसमाचार मेन्तआ।”
61फेर दोसरस हूँ बाचस, “अना उर्बायो, एन निंग्हय ख़ोख़ा लग्गोन, लेकिन पहले एंग्हय एड़पा ता आलर गुसते बिदा होआ चिआ।”#१ बेलर १९:२०
62येसुस आसिन बाचस, “ने ख़ेक्खन गोहला नू उइनर की ख़ोख़ा तरा इरु ने हूँ धर्मेस ही राजी ही जोगे मला मन्नर।”
Currently Selected:
लुकस 9: KRUX
Highlight
Share
Compare
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
