लुकस 23
23
पिलातुसस ही अगू नू येसुस
(मत्तिस २७:१-२, ११-१४; मरकुस १५:१-५; युहन्नस १८:२८—१९:१-१८)
1इदिही ख़ोख़ा कोहाँ सभा ता होरमा आलर चोचर की येसुसिन रोमी हाकिम पिलातुसस गुसन ओन्दरर। 2आर आस मइयाँ एन्ने दोस लगबअनुम बाचर, “इस एम्हय आलरिन ‘एनिम यहुदिर ही बेल ख्रिस्त हिकदन’ अउर ‘निम रोमी बेलस गे बटी मला तिरआ पड़ारओ’ बआ की आलरिन बहकअनन ख़क्खकम।”
3पिलातुसस आसिन मेन्जस, “एन्दरा निन यहुदिर ही बेल हिकदय?”
येसुस किर्ताचस की बाचस, “निनुम गा अन्नेम बअदय।”
4ख़ने पिलातुसस यहुदी मुध नैगरिन अउर गोहड़ान बाचस, “एन ई आलस नू एन्दरा दोस हूँ मला ख़क्खकन।”
5लेकिन आर बग्गेम जोर नन्जर की बाचर, “ई आलस तंग्हय कत्थन गालिल प्रदेस ती ओरे नन्जस की इसन यरुसलेम गुटी गोट्टे यहुदिया प्रदेस ता आलरिन सिखाबअनुम भड़काअ लगदस।”
हेरोदस ही अगू येसुस
6पिलातुसस इदिन मेन्जस की, “एन्दरा ई आलस गालिली हिकदस?” बाचस की मेन्जस। 7ख़ने आस हेरोद एन्टिपास बेलस ही इलाका ता हिकदस बअना अख़चस आस आसिन हेरोद बेलस गुसन तइय्यस चिच्चस। अबड़ा उल्ला नू हेरोद बेलस यरुसलेम नुम रहचस। 8एकाबिरी हेरोद बेलस येसुसिन इरियस ख़ने आस कोहड़े खुसमारस। एन्देरगेका हेरोद बेलस येसुस ही पत्त नू मेन्जका रहचस। औंगे ढेर उल्ला ती येसुसिन भेट नन्ना आस ही मने रहचा अउर येसुस एकअम चमत्कार नन्जका एःरा गे आस असरा नना लगियस। 9आस आसिन बग्गे मेन्जस, लेकिन येसुस एन्दरा हूँ आना मला किर्ताचस। 10यहुदी मुध नैगर अउर मोसास ही व्यवस्था सिखाबउर इज्जर की आसिन जोड़तोड़ दोस लगबआ हेल्लरर। 11ख़ने हेरोद बेलस तंग्हय सिपाहिर गने येसुसिन ठट्ठा नन्जस। अउर आसिन लज्जे मोख़तअना खतरी बेलस ही अत्तना किचरिन अत्ताचस की रोमी हाकिम पिलातुसस गुसन किर्ताचस चिच्चस। 12अउलम पिलातुसस अउर हेरोद बेलस संगे मन्जर केरर, एन्देरगेका पहले आर ही मझही नू दुस्मनी रहचा।
येसुस गे पिटरना दन्डे चिरका
(मत्तिस २७:१५-२६; मरकुस १५:६-१५; युहन्नस १८:३९—१९:१६)
13ताब पिलातुसस यहुदी मुध नैगरिन, सासकर अउर आलरिन ख़ोड़चस की बाचस, 14“निम ई आलस आलरिन बहकाबअदस बअदर की इसिन एंग्हय गुसन ओन्दरकर। अउर एःरा इसिन निम्हय अगू नुम जंच्चकन, लेकिन एका कत्था ही पत्त नू निम इस मइय्याँ दोस ठेकबाचकर अदिन एन आस मइयाँ मला ख़क्खकन। 15हेरोद बेलस हूँ दोस मला ख़क्खियस की इसिन फेर एम्हय गुसन किर्ताचस चिच्चस। अउर एःरा, इस पिटरना जोगे एन्देर नलख हूँ मला नन्जका रअदस। 16औंगे एन इसिन कोर्रा लौतओन की अम्बोन चिओन।”
17[अक्कू असला चलन लेखा कट्टना पबनी नू पिलातुसस ओन्टा कैदिरिन अम्बना चाड़ रहचा।]#२३:१७ अक्कू असला चलन लेखा कट्टना पबनी नू पिलातुसस ओन्टा कैदिरिन अम्बना चाड़ रहचा एकअम-एकअम लिखरका पच्चा बाइबल गुट्ठी नू ई पद मल्ला।
18लेकिन होरमा आलर चिच्चयार नुम बाचर, “इसिन पिटा अउर एमा गे बरब्बासिन अम्बा चिआ!” 19बरब्बास रोमी बेलस ही बिड़दो नू यरुसलेम सहर नू हुलहुली नन्जका अउर आल पिटना करने आस जेहेल नू सजतारका रहचस।
20पिलातुसस येसुसिन अम्बना मने नन्नुम आर गने फेर कच्छनखरस। 21लेकिन आर जोरसे चिच्चियारआ हेल्लरर, “इसिन कुरुस नू टंगआ, कुरुस नू टंगआ!”
22पिलातुसस तिसर बेर आरिन बाचस, “एन्देरगे? इस एन्देर मलदव नन्जका रअदस दरा? एन तो इस नू पिटरना जोगे एन्देर गुनहा हूँ मला ख़क्खका रअदन! औंगे इसिन कोर्रा लौतओन की अम्बोन चिओन।”
23लेकिन आर कोहड़े चिच्चयार नुम बाचर, “हुसिन कुरुस नू टंगअम पड़ारओ!” अउर आर ही चिच्चयारना दिम जितचा। 24औंगे पिलातुसस येसुसिन आर बाचका लेखम नन्ना हुकुम चिच्चस। 25आस बरब्बासिन अम्बियस चिच्चस, ने रोमी बेलस ही बिड़दो नू सहर नू हुलहुली नन्जका अउर आल पिटका करने जेहेल नू रहचस। आसिनुम अम्बा चिआ बआ की आर नेचका रहचर। अउर पिलातुसस येसुसिन एन्देर नना बेद्दर अदिनुम नना बआ की आ आलर ही ख़ेक्खा नू सोंपचस चिच्चस।
येसुस कुरुस नू अरगतारदस
(मत्तिस २७:३२-४४; मरकुस १५:२१-३२; युहन्नस १९:१७-२७)
26सिपाहिर येसुसिन कुरुस नू टंगआ गे होआ लगियर ख़ने, कुरेनी बअना अड्डा नू रऊ सिमोन बऊ आलसिन ख़क्खियर। आस तंग्हय पद्दा ती यरुसलेम सहर तरा बरआ लगियस। सिपाहिर आसिन धरचर की येसुस ही कुरुसन चेड़ताचर की आस ही ख़ोख़ा-ख़ोख़ा होताचर। 27बग्गे आलर ही गोहड़ा येसुस ही ख़ोख़ा काला लगिया। असन मुक्कर हूँ रहचर, ने चिख़नुम-ओलखनुम रहचर। 28लेकिन आर तरा किर्रियस की येसुस बाचस, “अना यरुसलेम ता आलिरो, निम एंग्हय खतरी ती हूँ बग्गे निम निम्हय खतरी अउर निम्हय ख़द्दर ही खतरी चिंख़ा। 29एन्देरगेका एःरा, अन्ने उल्ला बरआ लगी का आलर बओर, ‘बंझली मुक्कर अउर ख़द्दरिन दुधही मला उनतुऊ मुक्कर कोहड़े आसिस ख़क्खका मुक्कर हिकनर।’ 30आ बेड़ा आलर परता गुट्ठी न बओर, ‘एम्हय मइयाँ खतरअय!’ अउर टुँगरिन ‘एमन झपअय!’#होसेस १०:८ 31एन्देरगेका हरियर मन्नन लेखा एंगन तो आलर एन्ने नन्नर होले, ख़ैका मन्नन लेखा आलरिन आर एन्देर ननोर होत्एन?”
32गुनहा नन्जका दुई गोड़े आलरिन हूँ आर येसुस गने पिटा गे होआ की काला लगियर। 33आर खोपड़ी#२३:३३ खोपड़ी ई अड्डा खोपड़ी लेखा एथरना लेके इदिही नामे खोपड़ी उइरा बारना अड्डा नू अड़सियर ख़ने असन आर येसुसिन कुरुस नू टंगचर अउर आ दुई गोड़े गुनहा नन्जकारिन हूँ ओर्तोसिन येसुस ही तिना तरा अउर दोसरसिन डेब्बा तरा कुरुस नू टंगचर। 34आबिरी येसुस बाचस, “अना बाबा, इरिन छेमा नना, एन्देरगेका इर एन्देर नना लगनर अदिन बलनर।” ख़ने आर येसुस ही झुलन बखरा नन्जर की चिट्ठा सज्जर।#अस्सनापाड़ना २२:१८
35आलर इज्जर की एःरा लगियर। यहुदी सासकर येसुसिन ठट्टा नन्नुम बाचर, “एःरा, इस दोसररिन बछाबाचस, अगर इस धर्मेस ही चज्जिका बछाबऊ ख्रिस्त हिकदस होले, इस तंगनुम बछाबओस नेकआ।”#अस्सनापाड़ना २२:७
36अउर सिपाहिर हूँ बरचर की आस गे तिस्सा अंगुर ही मध चिच्चर की लज्जे मोख़तअनुम बाचर,#अस्सनापाड़ना ६९:२१ 37“अगर निन यहुदिर ही बेल हिकदय होले, निंगन बछाबआ।”
38आस ही कुक्क मइयाँ “इस यहुदिर ही बेलस हिकदस” बआ की लिखिरका दोस ही सिलेट उइरका रहचा।
39कुरुस नू टंगरका गुनहा नन्जका आलर मदहे ती ओर्तोस येसुसिन एन्ने बअनुम निन्दा नन्जस, “एन्दरा निन ख्रिस्त मलदय? हिकदय होले निन निंगन अउर एमरिन हूँ बछाबआ।”
40लेकिन आसिन डपटाचस की दोसरस एन्नेकी बाचस, “निन धर्मेस ती मला एल्चदय? निन हूँ तो आस ही लेखम दन्डे खेपआ लगदय। 41नाम तो मलदव नलख नन्जका ही दन्डे ख़क्खा लगदत, लेकिन आस तो एन्दरा हूँ मलदव नलख मला नन्जका रअदस।” 42ख़ने आस येसुसिन बाचस, “अना येसू, निन निंग्हय राजी नू बरओय होले एंगन हूँ सुरता ननके।”
43येसुस आसिन बाचस, “मानिम एन निंगन बअदन, इन्नम निन एंग्हय गने मेर्ख़ा नू मनोय।”
येसुस ही खेअना
(मत्तिस २७:४५-५६; मरकुस १५:३३-४१; युहन्नस १९:२८-३०)
44-45अक्कू लगभग बारा ख़रख़की रहचा ख़ने बिड़ना लग्गा गे बन्द मन्जा अउर तिन बजे गुटी सौंसे राजिन उख़ा ती कुल्लकी रहचा। अउर धर्मेस ही एड़पा नू टंगरका परदा मइयाँ ती किइयाँ गुटी चर्रा की दुई फड़ा मन्जा केरा। 46अउर येसुस जोरसे चिच्चयारस की बाचस, “अना बाबा, एन एंग्हय बोलतन निंग्हय ख़ेक्खा नू सोपदन।”#अस्सनापाड़ना ३१:५ इरम बअदस की आस खेअदस कादस।
47मइयाँ ता मन्जका कत्थन इरियस की रोमी सिपाहिर ही कप्तानस धर्मेस ही महबा नन्तेम बअदस, “मानिम ई आलस धर्मी रहचस।”
48ई हुरमी मन्जकन एःरा बरऊ आलर तंग्हय-तंग्हय छतिन ठोकोरनुम चिंख़नुम एड़पा तरा किर्रियर। 49लेकिन गालिल ती बरचका येसुस ही संगेर अउर आस ही ख़ोख़ा-ख़ोख़ा इकू मुक्कर गेच्छा तिम इज्जर की इबड़ा हुरमी मन्जका कत्था गुट्ठी न एःरा लगियर।
येसुस ही माड़तारना नलख
(मत्तिस २७:५७-६१; मरकुस १५:४२-४७; युहन्नस १९:३८-४२)
50-51एःरा, ओरोत योसेफ नामे मन्जका आलस रहचस, आस यहुदिया प्रदेस ता अरिमाथिया सहर ता आलस रहचस। आस दव अउर दोसरा आलर ती आदर ख़क्खका आलस रहचस, अउर आस धर्मेस ही राजी बरओ बआ की असरा एःरा लगियस। यहुदी कोहाँ सभा ता आलर येसुसिन पिटा गे सोचआ लगियर ख़ने आस बिड़दो नन्जका रहचस। 52आस पिलातुसस गुसन केरस की येसुस ही केच्चका देहन माड़आ गे नेचस। 53ख़ने आस केच्चका देहन कुरुस ती किय्या एत्ताचस की अउर कफन किचरी ती पुज्जियस, अउर ओन्टा मसड़ा नू उइयस, एकदन पखनन खोदचर की कमचका रहचर। आ मसड़ा नू पहले नेख़य केच्चका देह हूँ मला उइरका रहचा। 54आ उल्ला यहुदिर ही जिरारना-उल्ला ही सपड़ारना उल्ला रहचा। अउर जिरारना-उल्ला ओरे मना बिद्दकी रहचा।
55गालिल प्रदेस ती येसुस गने बरऊ मुक्कर हूँ योसेफस ही ख़ोख़ा-ख़ोख़ा केरर अउर आ मसड़ा नू येसुस ही केच्चका देहन एकन्ने उइरका रहचा अदिन इरियर। 56ताब आर असते ती केरर की येसुस ही केच्चका देह नू ख़सआगे गमकारना मलहम अउर इसुंग सपड़ाचर।
लेकिन दोसरा उल्ला नेम्हा जिरारना-उल्ला मन्जका करने आर यहुदी व्यवस्था ही पेसका लेखा आर जिरारर।#उरख़ाकाना २०:१०; व्यवस्था ५:१४
Currently Selected:
लुकस 23: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
