लुकस 24
24
येसुस ही उज्जा चोअना
(मत्तिस २८:१-१०; मरकुस १६:१-११; युहन्नस २०:१-१०)
1हप्ता ही पहिल उल्ला पैरिम आ मुक्कर सपड़ाचका गमकारना मलहम अउर इसुंग होच्चर की आर मसड़ा नू केरर। 2आर असन अड़सका ख़ोख़ा मसड़न कुल्लका कोहाँ पखनन हटबाचका इरियर। 3लेकिन आर भितरी कोरचर ख़ने उर्बा येसुस ही देहन#२४:३ उर्बा येसुस ही देहन एकअम गिरिक पुथी गुट्ठी नू देह मला ख़क्खरा लेका लिखरकी र' ई। मला ख़क्खियर। 4एकाबिरी आर ई कत्था ही पत्त नू अकबकरका बिरी अनचोखएम बिलचना किचरी अत्तका दुई गोड़े आलर आर हेद्देम इज्जर। 5अबड़ा मुक्कर कोहड़े इल्चियर की ख़ेख़ेल तरा कुक्कन नेवख़का रहचर, लेकिन आ दुई गोड़े आलर बाचर, “निम उज्जुसिन केच्चकर ही मझही नू एन्देरगे बेद्दर? 6येसुस इसन मल्लास, लेकिन आस उज्जा चोचका रअदस। गालिल नू रहचस ख़ने आस निमरिन एन्दरा बाचका रहचस अदिन सुरता नना, 7आस बाचका रहचस का, ‘धर्मेस तय्यका एन आल तंग्दस पपहा आलर ही ख़ेक्खा नू पड़ारओस, कुरुस नू टंगतारओस अउर तिसर उल्ला नू फेर केच्चका ती उज्जना चाड़ र' ई।’”
8आबाकी आर येसुस बाचका कत्थन सुरता नन्जर। 9ख़ने आर मसड़ा ती किर्रियर की असन मन्जका हुरमी कत्था गुट्ठी ही पत्त नू आर येसुस ही एगार चेलर अउर दोसरा होरमा आलरिन तिंगियर। 10आ मुक्कर मरियम मग्दलिनी, योअन्ना अउर याकुबस ही तंगियो मरियम अउर दोसरा मुक्कर रहचर। आरिम इबड़ा मन्जका हुरमी कत्थन मुध चेलरिन तिंगियर। 11लेकिन ई कत्थन आर एन्नेम बअनर बाचर की मुध चेलर मला पत्ताचर। 12लेकिन पतरुसस चोचस की बुंगनुम मसड़ा तरा केरस, अउर आस ख़ोलख़रस की इरियस ख़ने कफन किचरिन मुसगका लेका इरियस। इबड़न इरियस की आस छक्केम मन्नुम एड़पा तरा किर्रियस।
येसुस इम्माउस ता डहरे नू
(मरकुस १६:१२-१३)
13अउलम येसुस ही दुई गोड़े चेलर यरुसलेम ती एगार किलोमिटर लेखा गेच्छा नू इम्माउस नामे मन्जका पद्दा तरा काला लगियर। 14अउर आर येसुस ही पत्त नू यरुसलेम नू मन्जका कत्था गुट्ठी न कच्छनखरआ लगियर। 15आर कच्छनखरतेम रहचर, आ बिरिम येसुस तानिम बरचस की आर गने एका हेल्लरस। 16लेकिन आर आसिन चिन्हआ पोल्लर। 17येसुस आरिन बाचस, “निम इकनुम-इकनुम एन्दरा ही पत्त नू कच्छनखरआ लगदर?”
अउर आर असन इज्जर केरर। आर ही मुही उदास एथरआ लगिया।
18आ दुई मदहे ती क्लेओपास नामे मन्जकस येसुसिन मेन्जस, “यरुसलेम ती कुद्दके की बरचकय की हूँ इन्नेला असन एन्दरा मन्जकी र' ई बअना कत्थन बल्लू आल निन लेका रअदय!”
19येसुस मेन्जस, “एकन्ने कत्था?”
आर बाचर, “नासरत ता येसुस ही पत्त नू मन्जका कत्था। आस ओरोत अगमजानी रहचस, धर्मेस ही अउर होरमा आलर ही अगू हयकट लग्गना नलख गुट्ठी न ननू अउर दव कत्था गुट्ठी सिखाबऊ आलस रहचस। 20लेकिन नम्हय यहुदी मुध नैगर अउर सासकर आसिन पिटना दन्डे चिच्चर की कुरुस नू टंगचर। 21लेकिन आसुम इस्राएली आलरिन छुटकारा चिओस बआ की एम असरा नन्जका रहचकम। लेकिन अक्कू एन्दरा बओम ई मन्जका कत्था गुट्ठी हूँ इन्ना तिन उल्ला मन्जा किर्रकी र' ई। 22-23आ बग्गे लेका मला, एम्हय लेखअम आसिन ख़ोख़ाबऊ जोक्क मुक्कर इन्ना पैरिम उर्बास ही मसड़ा नू केरर, लेकिन आर आस ही देहन मला ख़क्खियर। आर किर्रियर की दुई गोड़े मेर्ख़ादुतर ही देखार ख़क्खका कत्थन अउर मेर्ख़ादुतर आरिन ‘उर्बास उज्जियस केरस’ बाचका कत्था ती एम छक्केम मन्जका रअदम। 24इदिन मेन्जर की एम्हय जोक्क संगेर हूँ मसड़ा नू एःरा केरर। आर आ मुक्कर बाचका लेखअम ख़क्खियर लेकिन आसिन मला इरियर।”
25ख़ने येसुस आरिन बाचस, “अना लुर मलका आलरो, निम्हय जिया कय बग्गे सकत मन्जा किर्रकी र' ई, का अगमजानिर बाचका कत्थन मला पत्तअदर? 26एन्दरा ख्रिस्तस तंग्हय आदर ख़क्खना ती अगू इबड़ा हुरमी दुक्खेन खेपना चाड़ मला रहचा दरा?” 27ख़ने येसुस मोसास अउर होरमा अगमजानिर ती ओरे नन्जस की होरमा धरमपुथी नू तंग्हय पत्त नू लिखचका कत्था गुट्ठी ही मने आर गे बुझाबाचस चिच्चस।
28तिनो गोड़े एका पद्दा नू काला लगियर अदी ही हेद्देम अड़सा बिद्दका रहचर। लेकिन येसुस और गेच्छा काला बिद्दका लेखा नन्जस। 29लेकिन आ दुई गोड़े चेलर आसिन बाचर, “माख़ा मना लगी, इन्ना निन एम्हय गने रआ।” ख़ने आस आर गने रआ केरस। 30एकाबिरी आस आर गने ओना उक्कियस आस असमान होच्चस की धन्यवाद चिच्चस अउर असमान किच्चयस की आर गे चिच्चस। 31आ बिरिम आर अख़चर की चिन्हचर, लेकिन आ बिरिम येसुस आर ती बिलारस केरस। अउर आर एन्नेकी कच्छनखरआ हेल्लरर, 32“आस नम्हय गने डहरे नू कच्छनखरतेम धरमपुथी ही मने बुझाबाचका बिरी नम्हय जिया नू रिझ ती गद-गद मन्जकी रहचा मला!”
33आर आ बिरिम चोचर की यरुसलेम किर्रियर अउर अबड़ा एगार चेलर अउर आर गने ख़ोड़रकरिन ख़क्खियर। 34अउर आर आ दुई गोड़ेरिन एन्ने बाचर, “मानिम उर्बास उज्जा चोचका रअदस अउर आस सिमोन बअना पतरुसस गुसन एथरका रहचस।”
35ख़ने आ दुई गोड़े चेलर डहरे नू मन्जका कत्था अउर येसुस असमान किच्चो की चिओ बिरी एकसे आसिन चिन्हचर, अदिन दोसरा चेलारिन तिंगियर।
येसुस चेलर गुसन एथेरदस
(मत्तिस २८:१६-२०; मरकुस १६:१४-१८; युहन्नस २०:१९-२३; मुध चेलर १:४-८)
36आर इबड़ा कत्थन कच्छनखरआ लगियर, येसुस अनचोखएम आर ही मझही नू इज्जस अउर बाचस, “निमा गे सान्ती मना नेकआ।”
37लेकिन आर गा इल्चियर की बयारर अउर सोच्चर का एम नादन एःरा लगदम। 38लेकिन आस आरिन बाचस, “निम एन्ने एन्देरगे एल्चदर? एन्दरगे जिया नू एन्ने संखा नन्दर? 39एंग्हय ख़ेक्खा अउर ख़ेड्डन एःरा, एनिम हिकदन, एन नाद मलदन बआ गे एंगन कप्पा की एःरा। एन्देरगेका नाद ही तो आहड़ा अउर ख़ोचोल मला मनी, लेकिन निम एरदर, एंग्हय तो र' ई।”
40एन्ने बाचस की आस तंग्हय ख़ेक्खा ख़ेड्डन एदस। 41आर ई बग्गे खुसमारर अउर छक्केम मन्जर का आर पत्तअम पोल्लर। ख़ने येसुस आरिन बाचस, “एन्दरा निम्हय गुसन एन्दरुम ओन्ना मोख़ना र' ई?” 42आर बिताचका इन्जो ही ओन्द कुटिया आस गे चिच्चर। 43अउर आस अदिन होच्चस की आर ही अगू नुम मोक्खस।
44ख़ने आस आरिन बाचस, “निम्हय गने राचका बिरी एन बाचका कत्था गुट्ठी इदुम हिके, मोसास ही व्यवस्था, अगमजानिर अउर अस्सनापाड़ना पुथी नू एंग्हय पत्त नू लिखिरका हुरमी कत्था पुरा मन्नम पड़ारओ।”
45ख़ने आस धरमपुथिन बुझुरआ गे आर ही जियन खुल्लियस चिच्चस, 46अउर आस आरिन बाचस, “एन्ने लिखिरकी र' ई का, ख्रिस्तस दुक्खे उठबओस अउर तिसर उल्ला नू केच्चका ती उज्जा चोओस, 47अउर यरुसलेम ती ओरे नन्जका ख़ेख़ेल ता गोट्टे जतियरिन आस ही नामे नू पाप ती जियन किर्तअना अउर पाप छेमा ही पत्त नू तेंगम पड़ारओ। 48निमुम इबड़ा मन्जका हुरमी कत्था गुट्ठी इरका करने एकअनेकिम हूँ निमा गे तेंगम पड़ारओ। 49अक्कू एःरा, एम्बस निमा गे चिओन बाचका नेम्हा बोलतन एन निम्हय गुसन तइय्योन। लेकिन नेम्हा बोलतस ही सवंग मला ख़क्खरना गुटी निम ई यरुसलेम सहर नुम रअके।”#मुध चेलर १:४
येसुस ही मेर्ख़ा काना
(मरकुस १६:१९-२०; मुध चेलर १:९-११)
50इदिही ख़ोख़ा येसुस चेलारिन सहर ती बाहरी बेथानिया पद्दा तरा होच्चस केरस। असन अड़सियस की आस तंग्हय ख़ेक्खन उठाचस की आरिन आसिरबाद चिच्चस। 51आस आर गे आसिरबाद चिअनुम, आस आर ती छिन्डरस अउर मेर्ख़ा नू होतारस। 52आर आसिन ओहमा नन्तेम, अउर कोहड़े रिझिरनुम यरुसलेम किर्रियर। 53अउर आर धर्मेस ही ओहमा नन्तेम धर्मेस ही एड़पा नू हुरमी उल्ला रआ हेल्लरर।
Currently Selected:
लुकस 24: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
