लुकस 20
20
येसुस ही अधिकार ही पत्त नू मेन्ना ख़ोजना
(मत्तिस २१:२३-२७; मरकुस ११:२७-३३)
1ओन्द उल्ला धर्मेस ही एड़पा नू येसुस आलरिन सिखाबअतेम अबड़रिन दवसमाचार मेन्तआ लक्का रहचस। ख़ने यहुदी मुध नैगर गने मोसास ही व्यवस्था सिखाबउर अउर यहुदी अगुवार आस गुसन बरचर की मेन्जर, 2“एका अधिकार ती निन इबड़ा नलखन नन्दय? या निंगा गे ई अधिकार चिऊ ने हिके? एमन तेंगा।”
3येसुस आर गे बिड़दाचस की बाचस, “एन हूँ ओन्टा कत्था मेनोन, एंगन तेंगा। 4युहन्नास बप्तिस्मा चिअना अधिकार धर्मेस ती ख़क्खका रहचस, का आलर ती?”
5ई कत्थन मेन्जर की आर ताम-ताम नू कच्छनखरआ हेल्लरर, “अक्कू नाम एन्देर बओत? ‘धर्मेस ती’ बओत होले, ‘निम युहन्नासिन एन्देरगे मला पत्ताचकर?’ बओस की आस बओस। 6लेकिन ‘आलर ती’ बओत होले, इबड़ा आलर नमारिन पखना ती लोओर की पिटोर, एन्देरगेका युहन्नास अगमजानी रहचस बआ की आर पत्तअनर।” 7औंगे आर बिड़दाचर की बाचर, “एम बलदम, एस्ते ती आ अधिकार ख़क्खियस।”
8ताब येसुस आरिन बाचस, “अन्ने हिके होले एन एका अधिकार ती इबड़ा नलखन नन्दन, अदिन एन निमरिन मला तेंगोन।”
उरुबस ही बटकी नू नलख ननुर ही खिरी
(मत्तिस २१:३३-४६; मरकुस १२:१-१२)
9अदिही ख़ोख़ा येसुस आलरिन ई खिरिन तेंगा हेल्लरस, “ओरोत आलस ओन्टा अंगुर ही बटकी नन्जस, अउर बटिदारर गे चिच्चस। अउर तान ढेर उल्ला ही खतरी एड़पन अम्बियस की चले केरस। 10अंगुर पन्जका बेड़ा नू बटिदारर गुसन अंगुर ही ख़न्जपा ओन्दरआ गे उरुबस तंग्हय बखरा होआ गे नोकरसिन तइय्यस। लेकिन बटिदारर आसिन लौचर की निदिम तइय्यर चिच्चर। 11औंगे फेर आस दोसरा नोकरसिन तइय्यस। बटिदारर आसिन हूँ लौचर की आसिन लज्जे मोख़ताचर की निदिम तइय्यर चिच्चर। 12फेर आस तिसर नोकरसिन तइय्यस। अउर अबड़र आसिन हूँ कुहुरकुट्टा लौचर की अंगुर बटकी ती ओथरर चिच्चर। 13फेच्चा नू अंगुर बटकी ता उरुबस बाचस, ‘एन एन्देर ननोन? एन एंग्हय चोन्हा एंग्दसिन तइय्योन। होले आर आसिन तो मानिम आदर ननोर!’ 14लेकिन बटिदारर तंग्दसिन इरियर की ताम-ताम कच्छनखरआ हेल्लरर, ‘इस तो बटकी ता उरुबस ही तंग्दस हिकदस, बरा, इसिन पिटोत, होले बटकी नम्हय दिम मनो कालो!’ 15औंगे आर आसिन अंगुर बटकी ती नतख़तेम बाहरी ओथरर की पिटियर।”
येसुस आरिन मेन्जस, “अक्कू आ बटकी ता उरुबस इबड़ा बटिदाररिन एन्देर ननोस?”
16“आस बरओस की आ बटिदाररिन पिटोस, अउर तंग्हय अंगुर बटकिन दोसरर गे चिओस।”
इदिन आलर मेन्जर ख़ने आर बाचर, “एन्ने इकला हूँ मला मना नेकआ!”
17अदिही ख़ोख़ा येसुस आर तरा इरियस अउर बाचस, “अगर एन्ने इकला हूँ मला मना नेकआ बअदर होले, धर्मेस ही इबड़ा बचन एन्दरा बआ बिद्दकी र' ई अदिन एंगन तेंगा,
‘एका पखनन राजमिस्तिरिर बेकम्मा बाचर की मला इन्झरर,
आ पखना दिम एड़पा ही जग ओक्तो बिरी ता बग्गे मोल ही पखना मन्जा।’
18ने आ पखना नू खतरओर होरमर चकनाचुर मनोर कालोर, अउर नेख़ाय मइयाँ आ पखना खतरओ आद आरिन ख़ोड़सो की गुन्डा ननो चिओ।”
बटी चिअना ही पत्त नू मेन्ना ख़ोजना
(मत्तिस २२:१५-२२; मरकुस १२:१३-१७)
19ताब आ बिरिम मोसास ही व्यवस्था सिखाबउर अउर यहुदी मुध नैगर येसुसिन धरआ बेद्दा लगियर, एन्देरगेका आर बुझुर ख़च्चिका रहचर का येसुस आर ही बिड़दो नुम ई खिरी बाचका रहचस, लेकिन आर आलर ती इल्चियर। 20औंगे आर मोका एःरा लगियर, आर जोक्क आलर गे घुस चिच्चर की तइय्यर का धरम ही भेंस ननोर की येसुस ही मलदव कत्था नू धरओर की आसिन रोमी राजी ख़ापुर ही ख़ेक्खा नू चिआ गे बिचार नन्जर। 21अदिही ख़ोख़ा अबड़ा आलर येसुसिन एन्ने बाचर, “अना गुरु, एम अख़दम का निन मानिम आबोन बअदय अउर मानिम कत्था सिखबअदय, अउर निन आलर ही बइय्यन एरदय की कत्था मला सिखबअदय, लेकिन धर्मेस ही डहरेन मानिम गने सिखबअदय। 22औंगे एमन तेंगा का, एन्दरा रोमी बेलस गे बटी चिअना ठिक र' ई का मला?”
23लेकिन येसुस आर ही मलदव बिचारन अख़चस की आरिन बाचस, 24“एंगन ओन्टा चँदी ही डल्लरन एदआ। इय्या नेख़ाय छाप अउर नामे र' ई?”
आर बाचर, “रोमी बेलस ही।”
25ख़ने आस आरिन बाचस, “होले रोमी बेलस गे एन्दरा चिअना र' ई, अदिन रोमी बेलस गेम चिआ, अउर धर्मेस गे एन्दरा चिअना र' ई, अदिन धर्मेस गेम चिआ।”
26असन आस आलर ही मझही नू बाचका कत्था नू आर आसिन धरआ पोल्लर, अउर आस ही उत्तर ती छक्केम मन्जर की आर छछेम मन्जर केरर।
केच्चका ती उज्ज चोअना ही पत्त नू मेन्ना ख़ोजना
(मत्तिस २२:२३-३३; मरकुस १२:१८-२७)
27अदिही ख़ोख़ा केच्चका आलस उज्जा मला चोओस बआ की पत्तऊ जोक्क सदुकी बऊ यहुदिर ती ओन्द दुई गोड़े आलर येसुस गुसन बरचर की आसिन एन्ने बाचर, 28“गुरु, मोसास एमा गे लिखचस की चिच्चका रहचस का, एकअम बेंजरका भइय्योस बेगर ख़द्दख़र्रा ही खेअदस होले, तंग्ड़िस आस ही आलिन बेंजरआ की भइय्योस गे ख़द्दख़र्रा जन्मआ पड़ारई।#२०:२८ जन्मआ पड़ारई। ढेर बछर अगू इस्राएल नू अगर आलस बेन्जरदस की बेगर ख़द्द जन्माचकम खेअदस होले आस ही भइर मधे नू ओर्तोस तंग नासगोन बेन्जरना चलन रहचा। अउर आस जन्माचका कोहाँ ख़द्दस आस ही पहेला ता तंग आलस ही ख़द्द मन्ना चलन रहचा। अउर आ पहेला ख़द्दसुम पहेला ता आलस ही नामे अउर खुर्जी ही हकदार मना लगियस। व्यवस्था २५:५-१० एःरा।#व्यवस्था २५:५ 29ओन्द बेड़ा नू सात भइर रहचर। कोहाँस बेंजरस, लेकिन आस बेगर ख़द्दख़र्रा मन्जकम केच्चस। 30औंगे मझलस तंग नासगो गने बेंजरस, लेकिन आस हूँ ख़द्द बेगर केच्चस। 31अदिही ख़ोख़ा सझलस अदिन बेंजरस, लेकिन आस हूँ ख़द्द बेगर केच्चस। अन्नेम सतो भइर अदिन बेंजरर की होरमर बेगर ख़द्दख़र्रा जन्माचकम केच्चर। 32ख़ोख़ा नू आ आली हूँ केच्चा। 33औंगे अक्कू एमन तेंगा, केच्चका ती उज्जा चोअना बेड़ा आ आली आर मधे नेख़य मुक्का मनो? एन्देरगेका सतो झन अदिन बेन्जरकाचर।”
34येसुस आरिन बाचस, “ई ख़ेख़ेल ता आलर बेंजरनर। 35लेकिन केच्चका ती उज्जा चोअनर की मेर्ख़ा काना जोगे मन्जका आलर असन मलम बेंजरनर। 36एन्देरगेका, आर केच्चका ती उज्जा चोचका रअनर अउर आर फेर इकला हूँ मला खेओर। औंगे आर मेर्ख़ादुतर लेखअम मनोर। अउर आर धर्मेस ही ख़द्दख़र्रा मन्जका रअनर। 37लेकिन केच्चकर उज्जा चोअनर बअना कत्था मोसास हूँ लघरआ लक्का झुकड़ी ती एदाचस चिच्चस। असन आस धर्मेउर्बसिन ‘अबराहामस, इसाहकस अउर याकुबस ही धर्मे’ बाचस की एदाचस चिच्चस।#उरख़ाकाना ३:६ 38का आस केच्चका आलर तो धर्मेसिन ओहमा मला नन्नर, लेकिन उज्जना आलर धर्मेसिन ओहमा नन्नर, एन्देरगेका आस ही खतरिम आर होरमर उज्जकम रअनर।”
39ख़ने मोसास ही व्यवस्था सिखाबउर मधे नेकउम-नेकउम बाचर, “अना गुरु, निन मानिम बाचकय।” 40इदिही ख़ोख़ा फेर आर आसिन एन्दरुम कत्था मेना गे डिढ दुम मला नन्जर।
ख्रिस्तस नेख़ाय तंग्दस?
(मत्तिस २२:४१-४६; मरकुस १२:३५-३७)
41येसुस आरिन मेन्जस, “आलर एन्देरगे ख्रिस्तसिन बेल दाउदस ही तंग्दस बअनर? 42-43एन्देरगेका दाउदस लिखचका डन्डी ही पुथी नू आस तानुम एन्ने बाचका रअदस,#अस्सनापाड़ना ११०:१
‘यहोवा धर्मेस एंग्हय उर्बा ख्रिस्तसिन बाचस,
निंगन हिंड़उरिन एन निंग्हय ख़ेड्ड ही तरुवा किय्या मला पड़ारना गुटी
निन एंग्हय तिना ख़ेक्खा पक्खे ओक्का।’
44दाउदस तानिम आसिन उर्बायो बअदस, होले ख्रिस्तस एकसे दाउदस ही तंग्दस मनोस?”
येसुस मोसास ही व्यवस्था सिखाबउर ही बिड़दो नू चेताबअदस
(मत्तिस २३:१-३६; मरकुस १२:३८-४०)
45एकाबिरी होरमा आलर मेना लगियर, ख़ने येसुस तंग्हय चेलारिन बाचस, 46“धरमी आलर दिगहा झुलन अत्तनर की कुद्दका-कुद्दनर, बजार नू मोन्जरा ख़क्खा गे बेद्दू, यहुदिर ही सभाएड़पा गुट्ठी नू मुध अड्डा अउर भोजे गुट्ठी नू मुध अड्डन बिद्दू मोसास ही व्यवस्था सिखाबउर ती होसियार रआ। 47आर बेवार ही एड़पन बच्चनर, अउर तमन बेस्स एदआ गे दिगहा-दिगहा गोहरारनर। आर गे कोहड़े दन्डे ख़क्खरओ।”
Currently Selected:
लुकस 20: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
