लुकस 21

बेवा ही भेटी

(मरकुस १२:४१-४४)

1येसुस एःरा लगियस। असन उरुब आलर धर्मेस ही एड़पा ही भेटी सजना बकसा नू भेटी अरगआ लगियर। 2अउर आस ओरोत गरिब बेवान असन तामा ही थोरहेम डल्‍लर अरगका हूँ इरियस। 3अउर इदिन इरियस की आस बाचस, “एन निमन मानिम बअदन, ई गरिब बेवाद होरमर ती बग्‍गे भेटी अरगकी र' ई। 4एन्‍देरगेका इबड़र तो तम्‍हय खुर्जी ती बछाबाचका मधे ती भेटी अरगर, लेकिन ई गरिब बेवाद तो तंग्‍हय गने मन्‍जका जिविका चलबअना हुरमी खर्चनुम अरगचकी र' ई।”

धर्मेस ही एड़पा नास मन्‍ना पत्‍त नू येसुस ही मुन्‍द तेंगना

(मत्‍तिस २४:१-२; मरकुस १३:१-२)

5एकअम चेलर धर्मेस ही एड़पा ही पत्‍त नू एन्‍ने बआ की कच्‍छनखरआ लगियर, “एकसे आद बेस्‍स-बेस्‍स पखना अउर अरगका भेटी गुट्‍ठी लेक सिंगरारकी र' ई।” ख़ने येसुस बाचस, 6“निम एकदन एरदर, एन्‍ने बेड़ा बरओ एकाबिरी ओन्‍टा पखना मइयाँ दोसरा पखना मला रओ। हुरमी धसतारओ कालो।”

दुक्‍खे अउर साधरना

(मत्‍तिस २४:३-१४; मरकुस १३:३-१३)

7चेलर येसुसिन मेन्‍जर, “अना गुरु, इद इकला मनो? अउर इद मन्‍ना ती अगू एन्‍देर चिन्‍हा मनो?”

8आस बाचस, “होसियार रआ, निमरिन ने हूँ मला ठकआ नेकआ एन्‍देरगेका बग्‍गे आलर एंग्‍हय नामे नू ‘ख्रिस्‍त एनिम हिकदन’ बअनुम बरओर अउर ‘ख़ेख़ेल मुन्‍जरना बेड़ा अड़सिया किर्की र' ई बओर’ लेकिन आर ही ख़ोख़ा अमके कला। 9निम लड़ाई अउर हुलहुली मन्‍जका हल्‍लन मेनोर आ बिरी अमके एल्‍चा। फेच्‍चा मन्‍ना ती अगू ई कत्‍था गुट्‍ठी मन्‍ना चाड़ र' ई। लेकिन आ बिरिम ख़ेख़ेल ही अन्‍त मला मनो।”

10येसुस फेर आरिन बाचस, “जाती, जाती ही बिड़दो नू, अउर राजी, राजी ही बिड़दो नू चोओर। 11अनाजर कोहाँ-कोहाँ ख़ेख़ेल नुकुरना गुट्‍ठी बरओ। अकाल गुट्‍ठी अउर महामारी गुट्‍ठी मनो। मेर्ख़ा नू बग्‍गे एल्‍चना अउर हयकट चिन्‍हा गुट्‍ठी एथरओ।

12“लेकिन इबड़ा कत्‍था गुट्‍ठी मन्‍ना ती अगू, आलर निमन साधरनुम यहुदिर ही सभाएड़पा नू नतख़तेम दोस लगबओर अउर जेहेल नू सजओर। अउर बेलर अउर हाकिमर ही अगू इज्‍जतओर। 13लेकिन आबिरी एंग्‍हय पत्‍त नू निमा गे गोवाह चिअना मोका मनो। 14औंगे तंगन बछाबअना खतरी एन्‍दरा बओन बआ की पहिलेतिम मला सोचओम बआ की अपना जिया नू सोचआ होआ। 15एन्‍देरगेका एन निमरिन एन्‍ने कच्‍छनखरना कत्‍था अउर बुद्‍धी चिओन का, निम्‍हय बिड़दो ननुर बिड़दआ पोल्‍लोर अउर बिड़दो नना गे पोल्‍लोर। 16इय्‍या गुटी का, निंगियो निम्‍बर अउर भइय्‍योर बहिनर, पाहियर अउर संगेर हूँ निमरिन धरतओर, अउर निम मधे नेकन-नेकन हाकिमर पिटोर। 17एंग्‍हय नामे खतरी निमरिन होरमा आलर बिड़दो ननोर। 18लेकिन निम्‍हय कुक्‍क ता ओन्‍टा चुट्‍टी हूँ मला खत्‍तरओ। 19एन्‍ने हुरमी खल्‍ल ही दुक्‍खे गुट्‍ठी नू हूँ निम एंगन पत्‍तअनुम रओर होले निम मुन्‍जा मलका उज्‍जना ख़क्‍खोर।”

यरुसलेम ही नास

(मत्‍तिस २४:१५-२१; मरकुस १३:१४-१९)

20ख़ने येसुस आरिन बाचस, “यरुसलेमन सेनार घेरचका एरोर, ताब अदी ही उझड़ारना हेद्‍देम अड़सकी र' ई बअनन अख़आ। 21आ बेड़ा यहुदिया प्रदेस नू मन्‍जकर परता तरा बोंगा नेकआ। सहर नू मन्‍जकर सहर अम्‍बा नेकआ अउर पद्‍दा नू रउर सहर नू मला कोरआ नेकआ। 22एन्‍देरगेका ई बेड़ा धर्मेस यरुसलेम सहर ता आलरिन दन्‍डे चिअना बेड़ा हिके। एन्‍नेकी धर्मेस ही बचन नू लिखिरका कत्‍था गुट्‍ठी हुरमी पुरा मनो।#होसेस ९:७ 23अबड़ा उल्‍ला नू भरिदेह अउर ख़दमाख़ो मुक्‍कर ही खतरी और बग्‍गे मुसकिल मनो। एन्‍देरगेका ई राजी नू कोहाँ दुक्‍खे बरओ, अउर कोहाँ धर्मेस ही दन्‍डे ई जाती ता आलर मइयाँ खतरओ। 24बैरिर नेकन-नेकन टडरी ती ख़ोतोर की पिटोर, अउर बग्‍गे गोड़ेरिन हेओर की दोसरा राजी गुट्‍ठी नू होओर। अउर नन-यहुदिर ही बेड़ा मला मुंजुरना गुटी आर यरुसलेमन ख़ेड्‍ड किइयाँ तिरख़ोर की उइय्‍योर।

धर्मेस तय्‍यका एन आल तंगदन बरना ही बेड़ा

(मत्‍तिस २४:२९-३१; मरकुस १३:२४-२७)

25“चन्‍दो, बिड़ी अउर बिनको गुट्‍ठी नू चिन्‍हा गुट्‍ठी एथरओ, अउर समुन्‍दर ही ख़रख़ना अउर लहरा गुट्‍ठी लेके ख़ेख़ेल ता हुरमी जाती ता आलर एलचोर अउर अक्‍तारओर।#यसायाहस १३:१०; इजिकि'एलस ३२:७; यो'एलस २:३१; चलख़का कत्‍था ६:१२-१३ 26ख़ेख़ेल नू बरना कत्‍था गुट्‍ठी ही इल्‍चका खतरी आलर केचका आलर लेखा मनोर, एन्‍देरगेका मेर्ख़ा ता सवंग गुट्‍ठी नुकुरओ। 27आ बेड़ा नू ख़ेख़ेल ता हुरमी आलर धर्मेस तय्‍यका एन आल तंग्‍दसिन कोहाँ सवंग अउर महबा गने बदाली नू ख़ेख़ेल तरा बरनन एरोर।#दानि'एलस ७:१३; चलख़का कत्‍था १:७ 28एकाबिरी इबड़ा कत्‍था गुट्‍ठी ओरे मनो ताब निम्‍हय जियन बड़ियर नना की इज्‍जआ, एन्‍देरगेका निम्‍हय बछरना हेद्‍देम र' ई।”

अन्‍जिर मन्‍न ती सिखिरना

(मत्‍तिस २४:३२-३५; मरकुस १३:२८-३१)

29ख़ने येसुस आरिन ओन्‍टा खिरी तिंगियस, “अन्‍जिर ही मन्‍न अउर दोसरा हुरमी मन्‍नन एःरा, 30एकाबिरी अबड़ा नू ख़ोरनन एरदर होले, निम अख़दर का बिड़ना बेड़ा अड़सिया। 31एन्‍नेकिम एन बाचका इबड़ा एलचना चिन्‍हा गुट्‍ठी मना हेल्‍लरओ होले धर्मेस ही राजी हेद्‍देम र' ई बआ की निम अख़ओर।”

32“मानिम, एन निमरिन बअदन, इबड़ा हुरमी मन्‍जका कत्‍था गुट्‍ठी पुरा मला मन्‍ना गुटी ई पिढ़ी ता आलर नास मला मनोर। 33मुन्‍दा मेर्ख़ा अउर ख़ेख़ेल टगरओ की काला गे सेब्‍बा र' ई, लेकिन एंग्‍हय बचन इकला हूँ मला टगरओ।

हुरमी बेड़ा सपड़ारका रआ

34“लेकिन निम निम्‍हय पत्‍त नू होसियार रआ, महलेता ओन्‍ना मोख़ना, उंखना अउर जिन्‍गी ही फिकिर ती निम्‍हय जियन अरबा ओंगो, अउर निम्‍हय मइयाँ अनचोखएम आ उल्‍ला फन्‍दा लेखा बरओ। 35एन्‍देरगेका गोट्‍टे ख़ेख़ेल नू रऊ होरमर मइयाँ एन्‍नेम फन्‍दा बरओ। 36औंगे हुरमी बेड़ा सपड़ारका रआ, ‘आ हुरमी एलचना कत्‍था गुट्‍ठी ती बछरआ गे अउर धर्मेस तय्‍यका एन आल तंग्‍दस ही एरना नू इज्‍जआ ओंगना सवंग एमा गे चिआ’ बआ की सगरो उल्‍ला धर्मेस गने गोहरारआ।”

37अबड़ा उल्‍ला नू येसुस भैर उल्‍ला धर्मेस ही एड़पा नू सिखाबआ लगियस, अउर माख़ा बिरी सहर ती उरख़ा की जैतुन बअना डिप्‍पा नू भैर माख़ा रआ गे काला लगियस। 38आस ही कत्‍थन मेना गे होरमा आलर पैरिम धर्मेस ही एड़पा नू बरआ लगियर।

Currently Selected:

लुकस 21: KRUX

Highlight

Copy

Compare