लुकस 19
19
येसुस अउर बटी उठबऊ जक्कैस
1अदिही ख़ोख़ा येसुस यरिहो सहर नू कोरचस की अजगुतिम कला लगियस। 2आ सहर नू जक्कै नामे मन्जका ओरोत आलस रहचस। आस बटी उठबुउर ही हाकिमस रहचस। आस गुसन बग्गे धन-खुर्जी रहचा। 3आस येसुसिन एःरा बेद्दा लगियस। लेकिन आस पुड्डा रहचस अउर आलर ही गोहड़ा करने आस येसुसिन एःरा पोल्ला लगियस। 4औंगे आस येसुसिन एःरा गे आलर ही अगु-अगू बुंगनुम केरस की ओन्टा कोहाँ मन्न नू अरगियस। एन्देरगेका येसुस आ डहरे मन्तेम काला लगियस। 5एकाबिरी येसुस आ अड्डा नू अड़सियस, ख़ने आस मेन इरियस की आसिन बाचस, “अना जक्कै, चाँड़े एत्ता की किइयाँ बरा, एन्देरगेका इन्ना एन निंग्हय एड़पा नुम पाही रआ गे कालोन।”
6ख़ने जक्कैस चाँड़ेम किइयाँ इत्तियस की बरचस ख़ने बग्गे रिझ ती आसिन तंग्हय एड़पा होच्चस केरस। 7इदिन इरियर की होरमा आलर एन्ने बआ की गनगन नना हेल्लरर, “आस पपहस ही एड़पा नू पाही रआ गे काला लगदस।”
8लेकिन जोक्क बेड़ा ख़ोख़ा जक्कैस इज्जस की उर्बासिन बाचस, “अना गुरू, एन एंग्हय खुर्जी ही अधहा बखरन गरिबर गे चिओन, अउर नेख़अम ती ठक्चन की होच्चका रअदन होले, आर गे एन अदी ही चार गुना किर्तओन चिओन।”
9येसुस बाचस, “इन्ना ई एड़पा ता आलरिन धर्मेस बछाबचका रअदस। एन्देरगेका ई जक्कैस हूँ अबराहामस ही बनस ता आलस#१९:९ अबराहामस ही बनस ता आलस अबराहामस लेखा जक्कैस हूँ धर्मेस नू पत्ताचका करने आस धर्मेस ही ख़द्दस मन्जका रअदस। आस चाही अबराहामस ही बनस ता आलस मन्जका लेके धर्मेस आसिन मला बछाबचका रअदस। दुम हिकदस। 10एन्देरगेका धर्मेस तय्यका एन आल तंगदन ई ख़ेख़ेल नू जक्कैस लेखा एबसेरका आलरिन बेद्दा अउर बछाबआ गे बरचका रअदन।”
एबसेरका सोना डल्लर ही खिरी
(मत्तिस २५:१४-३०)
11येसुस यरुसलेम सहर हेद्देम मन्जका करने धर्मेस ही राजी चाँड़ेम बरओ बआ की आलर सोच्चका रहचर। औंगे आस ही कत्था मिनू आलरिन येसुस ओन्टा एन्ने खिरी बाचस, 12“ओरोत खन्दानी आलस गेच्छा ता राजी नू केरस की तंग्हय राजी नू सासन नन्ना ख़क्खियस की किर्रना बिचार नन्जस। 13औंगे तान काना ती अगू तंग्हय दस गोड़े नोकररिन मिख़ियस की आर गे ओन्टा-ओन्टा सोना ही डल्लर चिच्चस की बाचस, ‘एन मला किर्रना गुटी ई डल्लर ती बेपार नना।’ 14लेकिन तंग्हय राजी ता आलर आसिन हिंड़आ लगियर। औंगे आर केरका ख़ोख़ा आस ही राजी ता आलर ‘ई आलस एम्हय खतरी बेल मला मना नेकआ’ बाचर की खबर तइय्यर।
15“लेकिन आ आलस बेल मन्जस किम किर्रियस। ख़ने तान डल्लर चिच्चका नोकररिन तंग्हय गुसन मेख़ा गे आनियस, एन्देरगेका बेपार ती आर कय बग्गे अर्जाचर बआ की आस अख़आ बिद्दका रहचस। 16ख़ने पहिल नोकरस बरचस की बाचस, ‘अना उरुबायो, निंग्हय चिच्चका ओन्द डल्लर ती और दस डल्लर अर्जाचकन।’ 17ख़ने आस आसिन बाचस, ‘चाबस! दव नोकर, निन थोरे कुना नू पत्तऊ मन्जकय। अक्कू निंगा दस ठो सहर गुट्ठी मइयाँ अधिकार चिओन।’ 18ख़ने दोसरस बरचस की बाचस, ‘अना उरुबायो, निंग्हय चिच्चका डल्लर ती और पाँच ठो डल्लर अर्जाचकन।’ 19उरुबस आसिन हूँ बाचस, ‘अक्कू निंगा पाँच ठो सहर मइयाँ अधिकार चिओन।’
20“लेकिन फेर तेसर ओर्तोस बरचस की बाचस, ‘अना उरुबायो, निंग्हय डल्लर इसन र' ई। इदिन एन रुमाल नू हेचकन की नुड्डका उइका रअदन। 21एन्देरगेका निन सकत आलय हिकदय। औंगे निन मला अर्जाचका खुर्जी ती होअदय, अउर निन ख़ेक्खा ती मला इद्दिका उब्जन ख़ोयदय की होअदय।’ 22ताब उरुबस आसिन बाचस, ‘अना मलदव नोकर, निन कच्छनखरका इबड़ा कत्था गुट्ठी तिम एन निंग्हय इन्साफ ननोन! निन एंगन सकत आलन हिकदन बअदय, एन्दरन एन उइया मला चिच्चका रअदन, अदिनुम एन नेअदन, अउर एन्दरन एन मला चांख़का रअदन, अदिनुम एन ख़ोयदन होले, 23निन एंग्हय डल्लरन एन्देरगे ब्याज नू मला चिच्चकय? एन अक्कुन ब्याज गने अदिन ख़क्खोन पहें।’
24“ख़ने उरुबस तंग्हय हेद्दे इज्जका आलरिन बाचस, ‘आस गुस्ते आ दस डल्लरन होआ की नेख़य गुसन दस ठो डल्लर र' ई आस गे चिआ।’
25“लेकिन अबड़र आसिन बाचर, ‘अना उरुबायो, आस गुसन दस ठो डल्लर र' ई दिम।’ 26ताब उरुबस बाचस, ‘एन निमरिन बअदन, नेख़य गुसन र' ई, आस गे और बग्गे चितारओ, लेकिन नेख़य गुसन मल्ला आस गुसन थोरे कुना मन्जका हूँ आस ती बचरओ कालो। 27लेकिन बेलस असन मन्जका आलरिन एन्नेकी बाचस, एन बेल मन्जका मला बिद्दुर एंग्हय मुदैरिन इसन ओन्दरआ अउर आरिन एंग्हय मुन्दहारे पिटा।’”
येसुस यरुसलेम नू बेलस लेखा कादस
(मत्तिस २१:१-११; मरकुस ११:१-११; युहन्नस १२:१२-१९)
28ख़ने इबड़ा कत्थन बाचस की येसुस यरुसलेम तरा काला हेल्लरस। 29एकाबिरी आस अउर आस ही चेलर बेथफागे अउर बेथानिया पद्दा हेद्दे जैतुन बअना परता नू अड़सियर ख़ने तंग्हय दुई गोड़े चेलारिन एन्ने बाचस की तइय्यस, 30“निम्हय अगू ता पद्दा नू कला, अउर आ पद्दा नू कोरते-कोरतेम ओन्टा गदहा ख़द्दन खुटुरका निम ख़क्खोर। अइय्या नू अक्कुन गुटी ने हूँ मल्ला अरिगका। अदिन खोल्ला की इसन ले ओन्दरआ। 31अगर नेकइम ‘इदिन एन्देरगे खोल्लदर?’ बओर की निमरिन मेनोर होले, ‘उर्बास गे इदिही चाड़ र' ई’ बअके।”
32आ दोनो चेलर केरर, अउर येसुस आरिन एकन्ने बाचका रहचस अन्नेम ख़क्खियर। 33एकाबिरी आर गदहन खोल्ला हेल्लरर ख़ने अदी ही उरुबर आरिन मेन्जर, “निम ई ख़द्दन एन्देरगे खोल्लदर?”
34आर बाचर, “उर्बास गे इदिही चाड़ र' ई।” 35आर गदहन येसुस हेद्दे ओन्दरर, अउर तंग्हय किचरी गुट्ठी न अदी ही मइयाँ अट्टियर की येसुसिन ओकताचर। 36एकाबिरी येसुस काला हेल्लरस ताब आलर तम्हय किचरिन डहरे नू अट्टियर।#१९:३६ किचरिन डहरे नू अट्टियर। आलर येसुस एकना डहरे नू आर किचरी गुट्ठी न अट्टना ही मने येसुस कोहड़े महबा ही जोगे हिकदस बअना हिके। इदिही मने आर येसुसिन बेल मानचका मने लग्गी। २ बेलर ९:१३
37आस जैतुन परता ही ढरकाह नू अड़सियस ख़ने चेलर ही गोहड़ा, आर इरका हुरमी सवंगिया नलख गुट्ठी न सुरता नन्जर की रिझिरनुम जोर-जोरसे चिच्चियारनुम धर्मेस ही ओहमा नना हेल्लरर,
38“धर्मेउर्बस ही नामे नू बरऊ बेलस धैन हिकदस।
मेर्ख़ा नू सान्ती मना नेकआ अउर धर्मेस ही महबा मनन नेकआ।”#अस्सनापाड़ना ११८:२६
39लेकिन गोहड़ा ता एकअम-एकअम यहुदी बअना फरिसिर येसुसिन बाचर, “अना गुरु, निंग्हय चेलारिन छछेम रआ बआ की केबरआ।” 40लेकिन आस बाचस, “एन इबड़रिन छछेम रआ गे मला बओन, इबड़र छछेम मन्जर होले तो इबड़ा पखना गुट्ठी हूँ चिच्चियारआ हेलरओ।”
येसुस यरुसलेम खतरी चिंख़ियस
41एकाबिरी येसुस यरुसलेम सहर हेद्देम अड़सियस ख़ने सहरन इरियस की एन्नेकी चिख़नुम बाचस, 42“ए यरुसलेम ता आलरो, निम हूँ सान्ती ख़क्खा गे एन्देर नना पड़ारओ बआकी अख़ना होले दव मनो दने, लेकिन निम अदिन चिन्हअम पोलकर! 43एन्देरगेका निम्हय मइयाँ एन्ने उल्ला बरओ का, निम्हय मुदैर सहर ता चौगुड़ तरती घेरओर की हुरमी तरती लोओर अउर निमन मुच्चोर। 44यरुसलेम सहर अउर असता आलरिन नास ननोर। आर ओन्टा पखना मइयाँ दोसरा पखनन मला उइयोर एन्देरगेका धर्मेस निमरिन बछाबआ गे बरचका बेड़न निम चिन्हा पोलकर।”
येसुस धर्मेस ही एड़पा नू कादस
(मत्तिस २१:१२-१७; मरकुस ११:१५-१९; युहन्नस २:१३-१६)
45ताब येसुस धर्मेस ही एड़पा ही चाली भितरी कोरचस अउर ख़िन्दू-बिसू आलरिन आस असले की एन्ने बअनुम बोंगताचस, 46“धरमपुथी नू लिखरकी र' ई, ‘एंग्हय एड़पा गोहरारना ही एड़पा मनो।’#यसायाहस ५६:७; यरमियास ७:११ लेकिन निम तो इदिन डाकुर ही अड्डा कमचका रअदर!”
47येसुस धर्मेस ही एड़पा नू सगरो उल्ला सिखाबआ लगियस। लेकिन यहुदी मुध नैगर, मोसास ही व्यवस्था सिखाबउर अउर जोक्क यहुदी अगुवर आसिन पिटा बेद्दा लगियर। 48अन्नू हूँ अबड़र आसिन पिटा गे एन्देर उपाय हूँ मला ख़क्खियर, एन्देरगेका होरमा आलर आस ही बचन मेना गे पसिंग नना लगियर।
Currently Selected:
लुकस 19: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
