लुकस 14
14
जिरारना-उल्ला नू जलान्धर रोगे कोड़े मन्जका
1ओन्द जिरारना-उल्ला नू येसुस यहुदी बअना फरिसिर ही ओरोत सासकस ही एड़पा नू मन्डी ओना केरस, अउर असन मन्जका आलर आसिन हेद्दे ती जोहआ लगियर। 2ओरोत आलस आस ही अगुतरा रहचस, आस गे जलान्धर रोगे#१४:२ जलान्धर रोगे ई रोगे लग्गो होले आलर ही देह नू अम्म लेखा ख़ोड़रई अउर इतरु ती ख़ेक्खख़ेड़ पुख़की मनी! लक्की रहचा। 3ख़ने येसुस मोसास ही व्यवस्था सिखाबउर अउर यहुदी बअना फरिसिरिन बाचस, “व्यवस्था लेखा जिरारना-उल्ला नू रोगियरिन कोड़े नना ठिक र' ई का मला?”
4लेकिन अबड़र एन्दरा हूँ मला बाचर। ख़ने आस आ बेमरहासिन छुबचस की कोड़े नन्जस की तइय्यस चिच्चस। 5अउर आस अबड़रिन बाचस, “निम मधे नेख़यदुम ख़द्दख़र्रर या अड्डो जिरारना-उल्ला नू कुबी नू खत्तरओ होले तुरतेम अदिन नतख़ोर की बाहरी मला ओथरओर दरा?” 6ख़ने अबड़र आसिन ई कत्था ही पत्त नू एन्देर हूँ बआ पोल्लर।
7असन बरऊ पाहियर ओक्का गे मइन-मइन अड्डा चाजनन इरियस की येसुस ओन्टा खिरी तिंगियस, 8“एकाबिरी निंगन बेन्जा भोजे नू नेकइम नेवता चिओर होले मइन अड्डा नू अमके ओक्का, एन्देरगेका असन निंग्हय ती कोगहा आलसिन नेवता चिच्चका मनोस।#नेतकत्था २५:६-७ 9होले ने निंगन अउर आसिन नेवता चिच्चका रहचस, आस बरओस की निंगन बओस, ‘ई आलस गे अड्डा चिआ।’ होले निन लजरओय की हुरमी ती किइयाँ अड्डा नू ओक्कना मनो। 10नेकउम निंगन नेवता चिओर होले, मुन्दा कालके की हुरमी ती किइयाँ अड्डा नू ओक्कके, होले नेवता चिऊ आलस बरओस की निंगन बओस, ‘अना संगी मइयाँ कला की ओक्का।’ आ बेड़ा असन उक्कुर होरमर ही अगू नू निंग्हय इज्जत मनो। 11एन्देरगेका ने तानुम कोहाँ मना बेद्दनर आर सन्नी ननतारओर, अउर ने तंगन सन्नी एदनर आर कोहाँ मन्तारओर।”
12ख़ने आस तंगन नेवता चिउसिन हूँ बाचस, “इकलअम निन उल्ला महले माख़ा ता भोजे चिओय होले, निंग्हय संगेरिन, भइर, कुटुम्बरिन अउर उरुब परोसियरिन नेवता मला चिआ, महलेता आर हूँ निंगन नेवता चिओर की बदली किर्रतोओर चिओर। 13लेकिन इकलअम निन भोजे चिओय होले, किड़ारिन, लुलारिन, लंगड़ारिन, अउर अन्धारिन नेवता चिआ। 14अउर निन धैन मनोय, एन्देरगेका निंगा गे पैंचा तिरआ गे अबड़र गने एन्दरा हूँ मला मनो। लेकिन धर्मी आलर ही केच्चका ती उज्जा चोअना उल्ला धर्मेस निंगा आ नलख ही बदला नू निंगा गे इनाम चिओस।”
कोहाँ भोजे ही खिरी
(मत्तिस २२:१-१०)
15येसुस ही कत्थन मेन्जर की आस गने ओना उक्का मदहेर ती ओर्तोस बाचस, “धर्मेस ही राजी नू भोजे ओनोर आर कोहड़े आसिस ख़क्खू आलर हिकनर।”
16लेकिन आस आसिन बाचस, “एकअम ओरोत आलस ओन्टा कोहाँ भोजे सपड़ाचस की ढेर बग्गे आलरिन नेवता चिच्चस। 17ख़ने आस तंग्हय नोकरसिन भोजे ओन्ना बेड़ा नू नेवता चिच्चकारिन एन्ने बआ गे तइय्यस, ‘बरा, अक्कू हुरमी सपड़ारकी र' ई।’ 18लेकिन आ नेवता चिच्चकार होरमर ओन्टा-ओन्टा बहना नन्जर की बरआ मला बिद्दियर। ओर्तोस बाचस, ‘एन ख़ल्ल ख़िन्दका रअदन, अदिन एःरा गे कला पड़ारओ। एंगन छेमा नना चिआ।’ 19दोसरस बाचस, ‘एन पाँच जोःड़ा गोहला अड्डो ख़िन्दका रअदन, अउर अक्कुन अबड़न जंचआ गे कादन। एंगन छेमा नना चिआ।’ 20फेर तेसरस बाचस, ‘इपालिम एन बेन्जरका रअदन, औंगे एन बरआ पोल्लोन।’ 21ताब नोकरस किर्रियस बरचस की तंग्हय उरुबसिन ई कत्थन बाचस चिच्चस। ताब एड़पा ता उरुबस कयरारस की तंग्हय नोकरसिन बाचस, ‘सहर ता डहरे गुट्ठी अउर गल्ली गुट्ठी नू चाँड़ेम कला। गरिबरिन, लुलारिन, अन्धहारिन अउर लंगड़ा-लुलहारिन इसन भितरी ओन्दरआ।’ 22ताब नोकरस बाचस, ‘उरुबायो, निंग्हय पेसका लेखा नलख मन्जकी र' ई, लेकिन और अड्डा बछरकी र' ई।’ 23ख़ने उरुबस नोकरसिन फेर बाचस, ‘मुध डहरे गुट्ठी अउर गल्ली गुट्ठी मन्तेम कला की आलरिन बड़पेलहा नना की भितरी ओन्दरआ, अउर एंग्हय एड़पा निदा नेकअन। 24एन्देरगेका एन निमरिन बअदन, नेवता चिच्चका मधे नेकउम हूँ एंग्हय भोजे ओन्ना मोख़ना ता सबादन चखआ पोल्लोर।’”
चेलर तिरआ पड़ारना मोल
(मत्तिस १०:३७-३८)
25ओन्द उल्ला आलर ही कोहाँ गोहड़ा येसुस गने काला लगिया, आस किर्रियस की अबड़रिन बाचस, 26“नेकउम एंग्हय गुसन बरदस, अउर आस तंग्हय तंगियोन-तम्बासिन, मुक्कन, ख़द्दख़र्रा, भइरिन, बहिनरिन अउर तंग्हय जियन हूँ एंग्हय ती कोहड़े चोन्हा नन्दस होले, आस एंग्हय चेला मना पोल्लोस। 27ने तंग्हय कुरुसन#१४:२७ कुरुसन कुरुसन चेड़आ ही मने येसुस ही लागी दुक्खे खेपना अउर खेआ गे लागी हूँ सपड़ारना हिके। चेड़अरकी एंग्हय ख़ोख़ा मला कादस, आस एंग्हय चेला मना पोलदस। 28अगर निम मधे नेकइम ओन्टा धरहरा कमआ बेद्दस होले, आ धरहरा कमना की मुन्जना खरचा तंग्हय गने र' ई का मला बअदस की एन्दरा आस पहले तिम ओक्कदस की हिसाब मला नन्दस दरा? 29अगर आस जग ओक्ताचका ख़ोख़ा मुन्जा पोल्लोस होले, इरु आलर होरमर एन्ने बओर की आसिन अलख़ा हेलरओर, 30‘ई आलस कमआ गे तो हेल्लरस लेकिन मुन्जा पोल्लस।’ 31फेर एकअम बेलस दोसरा बेलस गने लड़ाई नना कादस होले तंग्हय गने मन्जका दस हजार गोड़ेर ही बिड़दो नू बरऊ बिस हजार गोड़ेर गने लड़ाई नना ओंगोन का मला बआ की पहलेम ओक्कोस की मला सोचदस दरा? 32अगर आस पोलदस होले, आ दोसरा बेलस गेच्छम रहचका बिरी मेल-जोल ही कत्थन मेना गे दुत तइय्योस। 33अन्नेम निम्हय मझही ती नेकइम तंग्हय गने मन्जका हुरमी चिजन मला अम्बोस, आस एंग्हय चेला मना पोल्लोस।
एम्बा बिगड़ारका बेक
(मत्तिस ५:१३; मरकुस ९:५०)
34“बेक दव हिके, लेकिन बेक ही एम्बा बिगड़ारओ कालो होले फेर एकातरु आद एम्बा ननतारओ। 35आद ना तो ख़ल्ल गे ना खाद ही खतरी नलख लग्गी। आलर अदिन हेबड़नर चिअनर। नेख़य मेन्ना ख़ेबदा र' ई आस मेना नेकआ।”
Currently Selected:
लुकस 14: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
