लुकस 13

पाप ती जियन किरतआ मला होले खेओर

1आ बेड़ा असन कय गोड़े आलर रहचर, आ गालिलिर ही पत्‍त नू येसुसिन तिंगियर, नेकन पिलातुसस पिटयस की अबड़र ही ख़ेसन दाँड़े मन्‍जका ख़ेस गने मेसा बाचका रहचस। 2ख़ने येसुस अबड़रिन बाचस, “आ गालिलिर एन्‍नेकी पिटरर, एन्‍दरा निम इबड़ा गालिलियर दोसरा हुरमी गालिलियर ती बग्‍गे पपहा रहचर बअदर की बुझुरदर? 3मला! एन निमरिन बअदन, एन्‍ने मला, लेकिन निम हूँ पाप ती जियन मला किरतओर होले निम होरमर एन्‍नेम नास मनोर। 4या एन्‍दरा निम एन्‍ने सोचदर का, आ अठारा गोड़े आलर, ने सिलोआम नू धरहरा खत्‍तरा की केच्‍चका रहचर, एन्‍दरा अबड़र यरुसलेम नू रउर दोसरा होरमा आलर ती बग्‍गे पपहा रहचर? 5एन्‍ने मला, लेकिन एन निमरिन बअदन, निम हूँ पाप ती जियन मला किरतओर होले, निम होरमर एन्‍नेम नास मनोर।”

अन्‍जिर मन्‍न ही खिरी

6ताबसिले आस ई खिरी तिंगियस, “एकअम ओरोत आलस तंग्‍हय अंगुर बटकी नू ओन्‍टा अन्‍जिर ही मन्‍नन इद्‌दका रहचस। आ मन्‍न नू ख़न्‍जपा ख़न्‍जा का बाचस की एःरा बरचस, लेकिन एन्‍दरा हूँ मला ख़क्‍खियस। 7ख़ने आस बटकी ख़ापुसिन बाचस, ‘एःरा, तिन बछर मन्‍जा, एन ई अन्‍जिर ही मन्‍न नू ख़न्‍जपा बेद्‍दन, लेकिन मला ख़क्‍खदन। इदिन ख़न्‍डा चिआ, इद ख़ेख़ेलन एन्‍दरगे छेकचकी रओ?’ 8लेकिन बटकी ख़ापुस बाचस, ‘अना उरुबायो, इदिन और ओन्‍द बछर रआ चिआ। एन इदिही चौगुड़ती अरख़ोन की मलजल सजओन चिओन। 9अउर अदिही ख़ोख़ा ख़न्‍जपा ख़न्‍जओ होले कोड़ेम हिके, मला ख़न्‍जओ होले निन अदिन खन्‍डके चिअके।’”

येसुस जिरारना-उल्‍ला नू कोड़े नन्‍दस

10ओन्‍द जिरारना-उल्‍ला एकअम ओन्‍टा यहुदिर ही सभाएड़पा नू येसुस सिखाबआ लक्‍का रहचस। 11असन ओन्‍टा आली रहचा, नेकन अठारा बछर ती मलदव बोलता लक्‍की रहचा। अउर आद कुबड़ी मन्‍जा की सोझ इज्‍जआ पोल्‍ला लगिया। 12येसुस अदिन इरियस, अउर मिख़ियस की बाचस, “अना आली, निन निंग्‍हय रोगे ती कोड़े मन्‍जकी किरकी रअदी।” 13ताब आस अदी ही मइयाँ तंग्‍हय ख़ेक्खा उइयस, अउर आद आ बिरिम सोझ मन्‍जा केरा अउर धर्मेस ही ओहमा नना हेल्‍लरा।

14लेकिन यहुदिर ही सभाएड़पा ता सासकस कयरारस, एन्‍देरगेका येसुस जिरारना-उल्‍ला नू कोड़े नन्‍जका रहचस, अउर आस आलरिन बाचस, “नलख नन्‍ना छव उल्‍ला र' ई। औंगे ई छव उल्‍ला भितरी बरआ की कोड़े मना, जिरारना-उल्‍ला नू मला।”#उरख़ाकाना २०:९-१०; व्‍यवस्‍था ५:१३-१४

15लेकिन उर्बास आनियस, “अना कपटी गुट्‍ठी रो! निम मधे नेकउम जिरारना-उल्‍ला नू गोहाली अउर तबेला ती तंग्‍हय अड्‍डोन या गदहन खोल्‍लदर की अम्‍म ओन्‍तआ गे मला होओदर दरा? 16होले इद अबराहामस ही तंगदा नेकन अठारा बछर ती सैतान हेचकी रहचा, एन्‍दरा जिरारना-उल्‍ला नू अदिन कोल्‍लना चाड़ मल्‍ला दरा?” 17येसुस ई कत्‍थन बाचका ख़ोख़ा आस ही बिड़दोर लज्‍जरर केरर, लेकिन आस नन्‍जका हुरमी महबा नलख गुट्‍ठी नू आलर खुसमारर।

राई दाना अउर खमिर ही खिरी

(मत्‍तिस १३:३१-३३; मरकुस ४:३०-३२)

18ताब येसुस बाचस, “धर्मेस ही राजी एन्‍देर लेखा र' ई? अदिन एन एन्‍देर गने जोक्‍खओन? 19आद राई ही ओन्‍टा दाना लेखा र' ई। एकअम आलस होच्‍चस की तंग्‍हय बटकी नू चाख़चस, अउर आद परदिया की मन्‍न मन्‍जा अउर ओड़ाख़ाख़ा गुट्‍ठी अदी ही ठल्‍ली गुट्‍ठी नू खोता कमचा।”

20ख़ने येसुस फेर अबड़रिन बाचस, “धर्मेस ही राजिन एन एन्‍देर गने जोक्‍खओन? 21आद खमिर लेखा र' ई। अदिन ओरोत आली पच्‍चिस किलो गुन्‍डा नू लिंडया अउर हुरमी गुन्‍डादुम खमिरी मन्‍जा केरा।”

सक्‍कुड़ बली

(मत्‍तिस ७:१३-१४, २१-२३)

22ख़ने आस सहर-सहर अउर पद्‍दा-पद्‍दा मन्‍जस की डहरे इकनुम आलर गे सिखाबअनुम आस यरुसलेम तरा केरस। 23एकअम ओर्तोस आसिन मेन्‍जस, “अना उर्बायो, एन्‍दरा बछरनन ख़क्‍खुर थोरहेम रअनर?”

ख़ने आस अबड़रिन बाचस, 24“सक्‍कुड़ बली ती भितरी कोरआ गे कोसिस नना, एन्‍देरगेका एन निमरिन बअदन, बग्‍गे आलर कोरआ बेद्‍दोर लेकिन कोरआ पोल्‍लोर। 25एकाबारी एड़पा ता उरुबस चोअदस की बली मुच्‍चदस, निम बाहरी इज्‍जदर की एन्‍ने बअनुम बलिन ठोकठोकम बअदर, ‘अना उर्बायो, एम्‍हय खतरी बलिन तिसगआ चिआ!’ आस निमन बिड़दोस की बओस, ‘निम एकसते बरचका रअदर एन बलदन!’ 26ताब निम बआ हेल्‍लरओर, ‘एम निंग्‍हय गने ओन्‍डकम, मोक्‍कम, अउर निन एम्‍हय पद्‍दा एड़पा नू सिखाबचकय।’ 27लेकिन आस फेर बओस, ‘एन निमन बलदन निम एसते बरचका रअदर। ए मलदव नलख ननू होरमा आलारो, एंग्‍हय गुसते चइलकला!’#अस्‍सनापाड़ना ६:८ 28ताब निम अबराहामस, इसाहकस, याकुबस अउर होरमा अगमजानिरिन धर्मेस ही राजी भितरी एरोर, लेकिन निम अपनेम बाहरी हेबड़रका एरोर, ताब असन निम कोहड़े चिंख़ोर अउर पल्‍लन किटरओर! 29आलर पुरुम अउर पच्‍छिम, उत्‍तर अउर दखिन, चारो तरती बरओर अउर धर्मेस ही राजी ता भोजे नू ओक्‍कोर। 30एःरा, ने ख़ोख़ा रअनर आर अगू मनोर, अउर ने अगू रअनर आर ख़ोख़ा मनोर।”

येसुस यरुसलेम ही खतरी दुक्‍खे मन्‍ना

(मत्‍तिस २३:३७-३९)

31आ बिरिम थोरे यहुदी बअना फरिसिर बरचर की येसुसिन बाचर, “निन इसते ती उरख़ा की चइलकला, एन्‍देरगेका हेरोद एन्‍टिपासस निंगन पिटा बेद्‍दस।”

32आस अबड़रिन बाचस, “कला की आ चिगलन बआ, ‘एःरा, इन्‍ना अउर नेला एन नाद गुट्‍ठी ओथरोओन अउर बेमरहारिन कोड़े ननोन, अउर तिसर उल्‍ला नू एंग्‍हय नलखन मुन्‍जोन।’ 33लेकिन इन्‍ना, नेला अउर नेलबेन्‍जा एंगा एकाम पड़ारो, एन्‍देरगेका यरुसलेम बाहरी एकअम अड्‍डा नू अगमजानिस मला पिटतारओस।

34“यरुसलेम, ए यरुसलेम ता आलरो! निम अगमजानिरिन पिटदर, अउर नेकन धर्मेस निम्‍हय गुसन तइय्‍यस आरिन पखना ती लोअदर! एकन्‍ने ख़ेर तंग्‍हय ख़द्‍दन डेना किइयाँ ख़िवड़ई अन्‍नेम एन कय बेर एन निमरिन ख़ोड़आ बिद्‍दकन, लेकिन निम एन्‍ने नना मला बिद्‍दकर। 35औंगे एःरा, निम्‍हय एड़पा उझड़ारका अम्‍बतारओ। एन निमन बअदन, इकला गुटी निम ‘धैन हिकदस, धर्मेउर्बस ही नामे नू बरउस’ मला बओर, आ उल्‍ला गुटी निम एंगन मला एरोर।”#अस्‍सनापाड़ना ११८:२६

Currently Selected:

लुकस 13: KRUX

Highlight

Copy

Compare