मुध चेलर 25
25
फेस्तसस ही अगू नू पावलस ही मुद्दा
1फेस्तसस तंग्हय छेत्र ती बरचका तिन उल्ला ख़ोख़ा कैसरिया ती यरुसलेम केरस। 2यहुदी मुध नैगर अउर यहुदी अगुवर आसिन पावलस ही बिड़दो नू दोस लगाचर। 3ख़ने पावलसिन यरुसलेम नू त'इय्या चि'आ ब'आ की बिन्ती नन्जर एन्देरगेका आर पावलस बर'ओस होले डहरेनुम पिटोम ब'आ की योजना कमचका रहचर। 4लेकिन फेस्तसस आरिन एन्ने बिड़दाचस की बाचस, “पावलसिन कैसरिया नुम थुनचर की उइका र'अनर अउर एन हूँ चाँड़ेम असन काला लगदन। 5निम मधे एक'अम-एक'अम अगुवर एंग्हय गने असन गुचा। अगर पावलस एन्दर'उम मलदव नन्जका र'अदस होले आर असानुम दोस लगब'आ नेक'आ।”
6फेस्तसस आर गुसन आठ-दस उल्ला गुटी यरुसलेम नू रहचस की कैसरिया नू किर्रियस। दोसरा उल्ला आस न्याय नन्ना अड्डा नू उक्कियस की पावलसिन ओन्दर'आ नेक'आ बाचस की पेसस। 7पावलस अड़सियस ख़ने यरुसलेम ती बरचका यहुदिर आसिन चारोतरती ती घेरचर की आस ही बिड़दो मला बेस्स दोस गुट्ठी लगाचर। लेकिन आर एन्दरा हूँ दोस ही सबुत चि'आ पोल्लर। 8पावलस आरिन बिड़द'आनुम बाचस, “एन न यहुदी धरमपुथी ही बिड़दो नू, न धर्मेस ही मन्दिर ही बिड़दो नू, न तो रोमी कोहाँ बेलस ही बिड़दो नूम एन्दर'उम मलदव नलख नन्जका र'अदन।”
9लेकिन यहुदिरिन खुस नना गे फेस्तस पावलसिन बाचस, “एन्दरा निन यरुसलेम काला की असन एंग्हय अगू नू इबड़ा कत्था ही पत्त नू न्याय मना नेक'आ ब'आ की निन बेद्ददय?”
10लेकिन पावलस बाचस, “एन रोमी कोहाँ बेलस ही अदालत ही अगू नू इज्जका र'अदन। इसानुम एंग्हय न्याय मना पड़ार'ओ। एन यहुदिर ही बिड़दो नू एक'अम मलदव मला नन्जका र'अदन ब'अना कत्था निन हूँ अख़दय। 11अगर एन पिटरना जोगे ही एन्दर'उम गुनहा नन्जका र'अदन होले एन खे'आ गे राजी रअदन, लेकिन इर एंगन एन्दर'उम अबजस लगाबचका र'अनर, अबड़ा मधे एकदा हूँ मानी मल्ली होले ने हूँ एंगन इर ही ख़ेक्खा नू सोप'आ पोल्लोर। एन रोमी कोहाँ बेलसिनुम एंग्हय न्याय नना चि'आ ब'आ की बिन्ती नन्दन।”
12ताबसिले फेस्तसस सल्हा चि'ऊ आलर गने सल्हा नन्जस की पावलसिन बाचस, “निन रोमी बेलस गने बिन्ती नन्जका र'अदय, औंगे निन रोमी बेलस गुसानुम कालके।”
बेल अग्रिपासस गने फेस्तसस ही सल्हा
13जोक्क उल्ला ख़ोख़ा फेस्तससिन स्वागत नना गे बेल अग्रिपासस अउर आस ही तंगड़ी बरनिकी कैसरिया नू अड़सियर। 14ख़ने आर असन बग्गे उल्ला गुटी रहचर की फेस्तसस पावलस ही पत्त नू बेल अग्रिपाससिन एन्ने बा'अनुम तिंगियस चिच्चस, “फेलिक्सस थुनचका ओरोत आलस इसन र'अदस। 15नेख़य पत्त नू, एन यरुसलेम नू रहचकन ख़ने, यहुदी मुध नैगर अउर अगुवर आस ही बिड़दो नू दोस लगाचर की आसिन दन्डे चि'आ पड़ार'ओ बाचर की बिन्ती नन्जर। 16लेकिन एन आरिन बाचकन, ‘दोस लगाचका आलस दोस लगबु'ऊ आलर ही अगू नू आ कत्था ही पत्त नू ब'अना मोका मला ख़क्खना गुटी एक'अम आलसिन हूँ दन्डे चि'अना रोमिर ही चलन मल्ला।’ 17आर असन बरचर ख़ने एन देर मला नन्जकन की दोसरा उल्ला न्याय नन्ना अड्डा नू उक्ककन की पावलसिन ओन्दर'आ नेक'आ बाचकन की पेसकन। 18पावलस ही बिड़दो ननुर आस गुनहा नन्जका एन्दरुम मलदव दोस लगब'ओर का बाचकन की सोच'आलक्कन, लेकिन आर अन्ने मलदव दोस हूँ लगब'आ पोल्लर। 19लेकिन आर ही आनानखरना आर ही दुम धरम ही पत्त नू अउर केच्चका येसुस ही पत्त नू रहचा, नेकन पावलस उज्जनम र'अदस बाचस की जिद्दी नन्जस। 20औंगे इबड़ा कत्था ही पत्त नू मेनाख़ोजा गे हूँ पोल्लकन। औंगे ‘यरुसलेम कालोन की निंग्हय न्याय असनुम ननोन होले मला मनो?’ बाचकन की मेन्जकन। 21लेकिन पावलस रोमी बेलसुम न्याय नना नेक'आ ब'आ की बिन्ती नन्जस ख़ने एन रोमी बेलस गुसन आसिन मला त'इना गुटी इसानुम बेस्स कुना एःरा-ख़ोजा गे पेसका र'अदन।”
22अग्रिपासस फेस्तससिन बाचस, “एन आ आलस ही कत्थन मेना बेद्दन।”
ख़ने आस बाचस, “निन नेला मेना ओंगदय।”
23दोसरा उल्ला अग्रिपासस अउर बरनिकी कोहड़े धुमधाम ती सेनापतिर अउर सहर ता मुध आलर गने यहुदिर ही सभा'एड़पा नू कोरचर। फेस्तसस पेसका लेखा पावलसिन ओन्दरर। 24फेस्तसस बाचस, “बेल अग्रिपासस अउर एम्हय गने इसन मन्जका होरमा आलरो, निम ई आलसिन एरदर, नेख़य पत्त नू गोट्टा यहुदिर ‘ई आलस अक्कु ती उज्जना जोगे ही मल्लस’ ब'आ की यरुसलेम नू अउर इसन हूँ एंग्हय गने बिन्ती नन्जका र'अनर। 25एन ई आलस नू इस पिटरना दन्डे ख़क्खना जोगे ही एन्दरु'उम दोस मल ख़क्खकन। लेकिन इस रोमी बेलस गुसन बिन्ती नना गे बिद्दका करने एन इसिन रोमी बेलस गुसनुम त'इना निर्नय नन्जकन। 26इदिही पत्त नू एन रोमी बेलसिन लिख'आ गे खास कत्था एन्दरा हूँ मल्ला। औंगे एन इसिन निम्हय अगू नू, अउर खासकरके, अना बेल अग्रिपास, निंग्हय अगू नू ओन्दरका र'अदन, अउर एम इस ही जाँच नन्जका ख़ोख़ा एन एन्दरु'उम लिख'आ ओंगोन होत्'एन। 27एन्देरगेका कैदिस ही बिड़दो नू एन्दर'उम दोस बेगर तेंगम आसिन त'इय्या गे एंगा गे बेस्स मला लग्गिया।”
Currently Selected:
मुध चेलर 25: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
