मुध चेलर 24

पावलस फेलिक्‍सस ही अगू नू

1पाँच उल्‍ला ख़ोख़ा हुरमी ती कोहाँ यहुदी नैग हननियस अउर कय गोड़े मोसस ही व्‍यवस्‍था सिखाब'उर तर्तुल्‍लस ब'अना वकिलसिन होच्‍चर की कैसरिया नू अड़सियर। आर होरमर कोहाँ हाकिमस गुसन पावलस ही बिड़दो नू मुद्‍दा चिच्‍चर। 2एकाबिरी पावलसिन मिख़ियर ख़ने ताब तर्तुल्‍लसस एन्‍ने ब'अनुम आसिन दोस लगब'आ हेल्‍लरस, “अना महोदय फेलिक्‍स, निन बुद्‍धियार ती सासन नन्‍जका करने एम बग्‍गे सान्‍ती ख़क्‍खका र'अदम, अउर निन ई जतियर ही खतरी दव मन्‍ना नलख नना लगदय। 3इबड़ा कत्‍थन एम हुरमी अड्‍डा नू भितरी जिया ती इन्‍जरदम। 4एन निंग्‍हय बग्‍गे बेड़ा हो'आ गे मला चाहदन, अन्‍नू हूँ एन बाचका कत्‍थन मेना चि'आ। 5ई आलस जाँहिपतर दुक्‍खे चि'ऊ, गोट्‍टा ख़ेख़ेल ता गोट्‍टा यहुदिर ही मझी नू आन्‍दोलन ननू, अउर नासरी ब'अना गोहड़ा ता मुध अगुवस ही रुप नू एम ख़क्‍खका र'अदम। 6इस धर्मेस ही एड़पन हूँ असुध नना बेद्‍दा लगियस, औंगे आबाकिम एम इसिन धरचकम। [अउर इसिन एम्‍हय व्‍यवस्‍था लेखा न्‍याय नन्‍जकम की दन्‍डे चि'आ बिद्‍दकम। 7लेकिन सेनापती लुसियसस इस म'इयाँ दोस लगबु'उरिन निंग्‍हय अगू नू बर'आ गे पेसस।] 8अक्‍कू निन अपनेम इस ही जाँच नन्‍जकय होले एम इसिन लगाचका दोस ही इबड़ा हुरमी कत्‍था आस ती अख़'आ ओंगदय।” 9असन बरचका दोसरा यहुदिर हूँ अबड़ा कत्‍था गुट्‌ठिन हुरमी मानी हिके ब'आ की गोवाह चिच्‍चर।

फेलिक्‍सस ही अगू नू पावलस बिन्‍ती नन्‍दस

10ख़ने हाकिमस ब'आ बाचस की पावलसिन इसारा नन्‍जस ख़ने आस बिड़दाचस की बाचस, “ढेर बछर ती निन यहुदी जाती ता न्‍याय ननू मन्‍जका र'अदय ब'अना कत्‍थन अख़चकन की एन और हूँ रिझ ती एंग्‍हय पत्‍त नू ब'ओन। 11एन यरुसलेम नू ओहमा नना केरका १२ उल्‍ला ती बग्‍गे मल मन्‍जकी र'ई। ई कत्‍थन निन अख़'आ ओंगदय। 12इर न तो एंगन एक'अम आलर गने बहस नन्‍नन ख़क्‍खियर, न धर्मेस ही मन्‍दिर नू, न यहुदिर ही सभा'एड़पा नू, या सहर नू आलरिन बहका बा'अनन ख़क्‍खियर, 13न तो एंगन अक्‍कू दोस लगब'आ लक्‍का कत्‍था गुट्‍ठी ही आर सबुत चि'आ गे ओंगोर। 14लेकिन ई कत्‍थन एन निंग्‍हय अगू नू मन'ओन का एका उर्बस ही डहरेन इर झुठ ब'अनर, आ लेखम व्‍यवस्‍था अउर अगमजानिर ही पुथी नू लिखरका हुरमी कत्‍था गुट्‌ठिन पत्‍त'अनुम एन एंग्‍हय पुरखर ही धर्मेस ही ओहमा नन्‍दन। 15धर्मी अउर अधर्मिर दोनोर ही केच्‍चका ती उज्‍जा चो'अनर ब'अनन इर अपनेम इन्‍जरका लेखा एन धर्मेस नू असरा नन्‍दन। 16औंगे आलर अउर धर्मेस दोनोर ही अगू नू एन एंग्‍हय विचारन सुध उइय्‍या बेद्‍दन।

17“जोक्‍क बछर ख़ोख़ा एंग्‍हय जतियर ही खतरी दान अउर भेटी चि'आ गे एन यरुसलेम नू बरचका रहचकन। 18इबड़र एंगन ख़क्‍खियर ख़ने एन सुध नन्‍ना बिधिन पुरा नन्‍जकन होच्‍चका रहचकन। आ बेड़ा एंग्‍हय गने असन बग्‍गे आलर मल रहचर, न तो होहल्‍ला दुम रहचा।#मुध चेलर २१:१७-२८ 19लेकिन एसिया ती बरचका कय गोड़े यहुदिर एंगन धर्मेस ही मन्‍दिर नू इरियर। अगर आर ही एंग्‍हय बिड़दो नू एन्‍दर'उम कत्‍था र'ई होले आरुम निंग्‍हय गुसन बर'आ की मुद्‍दा चि'अना रहचा। 20मला होले एन यहुदिर ही कोहाँ सभा ही अगू नू इज्‍जका रहचकन ख़ने इर एक'अम मलदव नलख एंग्‍हय नू ख़क्‍खका र'अनर होले अदिन ब'आ नेक'आ। 21आर एंगन ओन्‍टे लेका कत्‍था नू दोस लगव'आ ओंगनर होत्‍'एन। एन्‍देरगेका आर ही मझी नू एन कोहाँ सोर ती चिच्‍चियारका रहचकन ख़ने एन एन्‍ने बाचका रहचकन, ‘केच्‍चकर फेर उज्‍जा चो'अनर ब'अना कत्‍था नू एन पत्‍ताचका करने इन्‍ना निम्‍हय अगू नू एंग्‍हय मुद्‍दा चलर'आ लगी।’”#मुध चेलर २३:६

22फेलिक्‍सस उर्बस ही डहरे ही पत्‍त नू बेस्‍स कुना अख़'आ लगियस औंगे आरिन एन्‍नेकी बाचस, “सेनापती लुसियसस इसन बर'ओस होले एन निम्‍हय मुद्‍दा ही फैसला ननोन चि'ओन।” 23ई बग्‍गे बाचस की फेलिक्‍सस कप्‍तानसिन “पावलसिन बेस्‍स कुना एरकेख़ोजके, अउर आस गे चाड़ पड़ारका चिज गुट्‍ठी ही व्‍यवस्‍था ननू चि'ऊ आस ही संगेरिन काला बर'आ चि'अके, अउर आस गने कड़ा बेबहार मला ननके” बाचस की पेसस।

फेलिक्‍सस अउर द्रुसिल्‍ला ही अगू नू पावलस

24जोक्‍क उल्‍ला ख़ोख़ा फेलिक्‍सस यहुदी तंग'आलिन द्रुसिल्‍लन संगेम ओन्‍दरस की बरचस, ताब आस पावलसिन मिख़ियस की ख्रिस्‍त येसुस म'इयाँ पत्‍त'अना ही पत्‍त नू आस ती मेन्‍जस। 25लेकिन पावलस “धर्मेस ही धार्मिक पेसकन मन'आ की नलख नना पड़ार'ओ, अपना जियन अधिन नू उइय्‍या पड़ार'ओ अउर धर्मेस ही रायबड़ी उल्‍ला बर'आ लगी” ब'आ की ब'आ लगियस ख़ने फेलिक्‍सस अक्‍तारस अउर एन्‍ने बाचस, “मन्‍जा, इन्‍ना गे ई बग्‍गेम र'आ चि'आ, अक्‍कू निन कला। मनो होले एन निंगन फेर मेख़ोन।” 26फेलिक्‍सस पावलस ती घुस ख़क्‍र'ओ का ब'आ की असरा उइय्‍का रहचस। औंगे आस पावलसिन घड़ी-घड़ी मेख़ा की कच्‍छनखर'आ लगियस।

27लेकिन दु'ई बछर ख़ोख़ा फेलिक्‍सस ही बदला नू पर्कि'अस फेस्‍तस ब'अना आलस हाकिम मन्‍जस की बरचस, ख़ने फेलिक्‍सस यहुदिरिन खुस नना गे पावलसिन जेहेल नूम उइय्‍यस की केरस।

Currently Selected:

मुध चेलर 24: KRUX

Highlight

Copy

Compare