मुध चेलर 26
26
पावलस बेल अग्रिपासस ही अगू नू
1अग्रिपासस पावलसिन बाचस, “निन निंग्हय पत्त नू ब'आ ओंगदय।” ख़ने पावलस तंग्हय ख़ेक्खन पसड़ाचस की तंग्हय पत्त नू ब'आ हेल्लरस:
2“अना बेल अग्रिपास, यहुदिर एंगन लगाबचका हुरमी दोस ही पत्त नू इन्ना एन निंग्हय अगू नू एन एंग्हय पत्त नू ब'आ गे ख़क्खका नू एन कोहड़े खुसमारका र'अदन। 3निन बेस्स कुना यहुदिर ही चलन अउर आना-नखरका कत्था ही पत्त नू अख़दय। औंगे एंग्हय कत्थन ध्यान चि'आ की मेना ब'अदन की निंगन बिन्ती नन्दन।
4“एंग्हय जतियर ही मझी नू अउर यरुसलेम नू ओरे ती एकसे रहचकन अउर सन्नी तिम एंग्हय जिन्गी ही पत्त नू होरमा यहुदिर अख़नर। 5ढेर पहले तिम आर अख़चका कत्था दुम हिके का एन एम्हय धरम ही हुरमी ती कट्टर फरिसी गोहड़न्ता आलन मन्जकन की जिन्गी उज्जकन। आर ब'आ बेद्दोर होले ई कत्था ही गोवाह चि'आ ओंगनर।#मुध चेलर २३:६; फिलिप्पिर ३:५ 6धर्मेस नम्हय पुरखरिन गच्छरका नू एन असरा उइय्का करने इन्ना एन ई मुद्दा नू इज्जका र'अदन। 7एम्हय बारह गोतरर ई असरन ख़क्खा गे उल्लामाख़ा ओन्द जिया मना की ओहमा नन्नर। अना बेलायो, एन ई असरा दुम नन्जका करने यहुदिर एंगन दोस लगाचका र'अनर। 8धर्मेस केच्चकारिन उज्जत'अदस ब'अना कत्थन एन्देरगे निम मला पत्त'आ ओंगदर?
9“पहले तो, एन हूँ नासरत ता येसुस ही नामे ही बिड़दो नू बग्गे कत्था नना पड़ार'ओ ब'आ की सोच्चका रहचकन। 10एन यरुसलेम नू अन्नेम नन्जका रहचकन, अउर यहुदी मुध नैगर ती अधिकार ख़क्खकन की उर्बा येसुस नू पत्त'उरिन जेहेल नू सजताचकन अउर आरिन पिटना नू एन हूँ सहमत मन्जकन। 11ख़ने होरमा यहुदिर ही सभा'एड़पा गुट्ठी नू केरर की आर पत्त'आ गे अम्बा नेक'आ ब'आ की दन्डे चिताचकन। आर ती एन ई बग्गे कयरारका रहचकन का कयर लेके दोसरा राजी ता सहर गुट्ठी नू हूँ केरकन की आरिन साधचकन।#मुध चेलर ८:३; २२:४-५
तंग्हय बादलारना ही पत्त नू पावलस तेंगदस
(मुध चेलर ९:१-१९; २२:६-१६)
12“एन्नेकी ओन्द उल्ला यहुदी मुध नैगर ती अधिकार अउर पेसका चिट्ठी ख़क्खकन की एन दमस्कस तरा केरकन। 13अना बेलायो, दुपाहरा तरा डहरे नू काला लक्कन ख़ने एन मेर्ख़न्ता बिड़ी ती हूँ कोहड़े बिल्चना बिल्लिन इरकन, एकदन एन अउर एंग्हय गने डहरे इकुर ही चारो तरा बिल्चिया। 14एम होरमम ख़ेख़ेल नू खतरकम। ख़ने एन हिब्रू भखा नू एन्ने ब'अना अवाजन मेन्जकन, ‘सा'उल, अना सा'उल, निन एन्देरगे एंगन सताब'आ लगदय? अच्च नू लथ'ए होले निंगागेम नुज'ओ।’ 15ख़ने एन बाचकन, ‘अना उर्बायो, निन ने हिकदय?’ उर्बस एंगन बाचस, ‘एन येसू हिकदन नेकन निन सताब'अनुम र'अदय। 16लेकिन चो'आ अउर निंग्हय ख़ेड्ड नू इज'आ। एन निंगन एंग्हय सेवक अउर एंग्हय गोवाह चि'ऊ आल कम'आ बेद्दन। औंगे एन निंग्हय गुसन एथरका र'अदन। निन एंग्हय पत्त नू इरका कत्था अउर एन निंगन ख़ोख़ा नू एद'आना हुरमी कत्था दोसरा आलरिन तेंगा पड़ार'ओ। 17एन निंगन यहुदी अउर नन-यहुदिर गुसन त'इय्या लगदन। निंगन आर ती बछाब'ओन। 18निन आर ही ख़न्नन खोल्ला की आरिन उख़ा ती बिल्ली तरा अउर सैतान ही सवंग ती धर्मेस तरा किर्रत'आ। एन्नेकी आर पाप ही छेमा ख़क्खोर अउर एंगन पत्ताचका करने नेम्हा मन्जकर ही अड्डा आर ख़क्खोर।’
पावलस तंग्हय नलख ही पत्त नू तेंगदस
19“औंगे, अना बेलायो अग्रिपास, एन मेर्ख़ा ती ख़क्खका देखार ही पेसकन मला मन'आ की र'अम पोलकन। 20लेकिन पहले दमस्कस नू अदिही ख़ोख़ा यरुसलेम नू अउर गोट्टे यहुदिया प्रदेस नू अउर दोसरा जतियर ही राजी गुट्ठी नू हूँ काला की एन आलरिन तम्हय-तम्हय पाप ती जियन किर्त'आ की धर्मेस तरा किर्रा नेक'आ बाचर की तिंगियर। धर्मेस तरा किर्रकन ब'अना कत्था ही सबुत ताम नन्जका नलख ती एद'आ पड़ार'ओ ब'अनुम सिखाबचकन।#मुध चेलर ९:२०, २८-२९ 21औंगे यहुदिर एंगन धर्मेस ही मन्दिर नू धर'आ की पिटा गे बिद्दियर। 22लेकिन धर्मेस ती संगरा ख़क्खकन की सन्नी-कोहाँ होरमारिन गोवाह चि'अनुम एन इन्ना गुटी इज्जका र'अदन। अउर अगमजानिर अउर मोसस ख़ोख़ा नू पुरा मनो ब'आ की बाचका कत्था गुट्ठिन अम्बकन की एन दोसरा एक'अम कत्थन मला बाचका र'अदन। 23आर बाचका रहचर का ख्रिस्तस गे दुक्खे खेप'अम पड़ार'ओ, अउर केच्चका ती उज्जा चोचका पहेला मनोस की आस तंग्हय बछरना ही बिल्लिन यहुदिर नू अउर नन-यहुदिर नू तेंगोस।”#यसायाहस ४२:६; ४९:६; १ कोरिन्थिर १५:२०
24आस तंग्हय पत्त नू ब'आ लगियस ख़नेम फेस्तसस कोहाँ सोर नू बाचस, “अना पावल, निन बथहा हिकदय, निंग्हय कोहड़े पढ़चका निंगन बथहा कमचकी र'ई।”
25लेकिन पावलस बाचस, “अना महोदय फेस्तस, एन बथहा मलदन। लेकिन मानी अउर लुर ही कत्था ब'आ लगदन। 26बेलस इबड़ा कत्था गुट्ठी ही पत्त नू अख़दस, नेख़य पत्त नू एन डिढ़ ती ब'आ लगदन। एन्देरगेका ई कत्था गुट्ठी मधे ओन्टा हूँ आस ती नुख़रकी र'ई ब'अना लेखा एंगा मला लग्गिया, एन्देरगेका इद एक'अम कोड़ा नू नुख़र'अर मल मन्जकी र'ई। 27अना बेल अग्रिपास, एन्दरा निन अगमजानिर लिखचका कत्था ही पत्त नू पत्त'अदय? एन अख़दन, निन पत्त'अदय।”
28अग्रिपासस पावलसिन बाचस, “एन्दरा निन एंगन एन्ने चाँड़ेम ख्रिस्तियन कम'आ बेद्ददय?”
29ख़ने पावलस बाचस, “जोक्क समे नू मना का बग्गे समे नू, निन लेका माला, लेकिन इन्ना इसन एंग्हय कत्था मिनू होरमा आलर एंग्हय लेखा मना नेक'आ ब'आ की एन धर्मेसिन गोहरारदन। लेकिन एंग्हय लेखा सिकड़ी गुट्ठी ती निमन हेरका एन मला चाहदन।”
30ताब बेल अग्रिपासस, कोहाँ हाकिम फेस्तसस, बरनिकी अउर आर गने बरचका होरमा आलर चोचर। 31अउर बाहरी उरख़र ख़ने ताम-ताम नू एन्ने बाचर की कत्था नन्जर, “ई आलस थुनरना या पिटरना दन्डे ख़क्खना लेखा एन्देर नलख हूँ मला नन्जका र'अदस।” 32अग्रिपासस फेस्तससिन बाचस, “ई आलस रोमी कोहाँ बेलस गुसन बिन्ती मला नन्ना होले तो अम्बना चि'अना होले हूँ मनो पहें।”
Currently Selected:
मुध चेलर 26: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
