मुध चेलर 23
23
1पावलस यहुदिर ही कोहाँ सभा तरा इरनुम बाचस, “अना भ'इरो, इन्ना गुटी धर्मेस ही एरना नू एन सुध विचार ती जिन्गी उज्जका र'अदन।” 2एन्ने आस बाचस ख़ने, हुरमी ती कोहाँ यहुदी नैगस हननियस पावलस हेद्दे इज्जका आलरिन आस ही ब'ई नू थपड़'आ गे आनियस। 3ख़ने पावलस आसिन बाचस, “अना चुना लेके इगरका टट्टी#२३:३ चुना लेके इगरका टट्टी: इद ही मने कपटी मनी। , धर्मेस निंगन लो'ओस! एन्देरगेका निन व्यवस्था लेखा एंग्हय न्याय नना गे उक्का र'अदय। एन्दरा निन व्यवस्था ही बिड़दो नू एंगन लो'आ गे आनदय?”#मत्तिस २३:२७-२८
4ख़ने हेद्दे नू इज्जका आलर बाचर, “एन्दरा निन धर्मेस ही हुरमी ती कोहाँ यहुदी नैगसिन अपमान नन्दय?”
5ताबसिले पावलस बाचस, “अना भ'इरो, आस हुरमी ती कोहाँ यहुदी नैगस हिकदस ब'अनन एन बल्ला लक्कन। एन्देरगेका लिखरकी र'ई, ‘निन निंग्हय आलर ही सासकस ही बिड़दो नू मलदव अमा ब'आ।’”#उरख़ाकाना २२:२८
6लेकिन एकाबिरी पावलस ओन्द गोहड़ा सदुकिर अउर दोसरा गोहड़ा यहुदी ब'अना फरिसिर र'अनर ब'अना कत्थन अख़चस, ख़ने ताब आस यहुदिर ही कोहाँ सभा नू चिच्चियारस, “अना भ'इरो, एन फरिसिर ही ख़द्दन फरिसी हिकदन। केच्चका आलर फेर उज्जा चो'ओर ब'अना असरा उइका करने इसन एंग्हय मुद्दा चलर'आ लगी।”#मुध चेलर २६:५; फिलिप्पिर ३:५
7आस एन्ने बाचका ख़ोख़ा यहुदी ब'अना फरिसिर अउर सदुकिर नू कत्था मा मिल्लरा। औंगे गोहड़ा ख़ोट्टरा केरा। 8एन्देरगेका सदुकिर ब'अनर का केच्चका ती उज्जा चो'अना, मेर्ख़ादुत, बोलता ब'अना एन्दरा हूँ मल्ली। लेकिन फरिसिर अबड़ा हुरमिन पत्त'अनर।#मत्तिस २२:२३; मरकुस १२:१८; लुकस २०:२७ 9ख़ने असन होहल्ला मन्जा, अउर असन जोक्क मोसस ही व्यवस्था सिखाब'उर रहचर, ने की फरिसी गोहड़ा ता रहचर, आर चोचर की एन्ने ब'अनुम बिड़दो नना हेल्लरर, “एम ई आलस नू एन्दरा हूँ मलदव मला ख़क्खकम। अगर बोलतस या मेर्ख़ादुतस इसिन एन्ने बाचका र'अदस होले एन्दरा मन्जा तो?”
10असन कोहाँ आनानखरना मन्जा ख़ने आर ही ख़ेक्खा ती पावलसिन टुकड़ा-टुकड़ा ननोर की पिटोर ब'आ की इल्चियस की सेनापतिस सिपाहिरिन कि'इयाँ काला की आसिन आर ही मझी ती जबरजस्ती ओन्दर'आ की ब्यारेक भितरी हो'आ कला बाचस की पेसस।
11ख़ने दोसरा माख़ा उर्बस आस ही हेद्दे इज्जस की बाचस, “अना पावल, हिम्मत नना, एन्देरगेका एकन्ने निन यरुसलेम नू एंग्हय पत्त नू गोवाह चिच्चका रहचकय, अन्नेम निन रोम नू हूँ गोवाह चि'आ पड़ार'ओ।”
पावलसिन पिटा गे योजना कमचका
12पैरी मन्जा ख़ने यहुदिर ख़ोड़रर की पावलसिन पिटना योजना नन्जर अउर आर एन्ने बाचर की किरिया मोक्खर, “पावलसिन मला पिटना गुटी नाम एन्दरा हूँ मला ओनोतमोख़ोत।” 13एन्नेकी पिटोत ब'आ की किरिया मुख़ुर चालिस गोड़ेर ती बग्गे रहचर। 14अदिही ख़ोख़ा यहुदी मुध नैगर अउर मोसस ही व्यवस्था सिखाब'उर गुसन केरर की बाचर, “एम पावलसिन मला पिटना गुटी एन्दरा हूँ मला ओनोममोख़ोम बाचकम की किरिया मोक्का र'अदम। 15औंगे अक्कू निम अउर यहुदिर ही कोहाँ सभा ता आलर बेस्स कुना पावलस ही कत्थन बुझरना र'ई ब'आ की सेनापतिसिन ब'आ। अउर आसिन सिपाहिर ही ब्यारेक ती यहुदिर ही कोहाँ सभा नू ओन्दर'आ हेल्लर'ओर होले डहरे नुम एम आसिन पिटोम।”
16लेकिन पावलस ही तंगभगनस ई कत्थन अख़चस की ब्यारेक भितरी केरस की पावलसिन तिंगियस चिच्चस। 17ताबसिले पावलस कप्तानर मधे ता ओर्तोसिन मिख़ियस की बाचस, “ई कुक्कोसिन सेनापतिस गुसन अड़सत'आ चि'आ, एन्देरगेका इस ही आस गने एन्दर'उम ब'अना कत्था र'ई।” 18औंगे आस आ कुक्कोसिन होच्चस की सेनापतिस गुसन अड़सताचस चिच्चस की बाचस, “कैदी पावलस एंगन तंग्हय गुसन मिख़ियस की ई कुक्कोसिन निंग्हय गुसन हो'आ कला बाचस की बिन्ती नन्जका र'अदस। एन्देरगेका इस निंगन एन्दर'उम कत्था ब'आ बेद्दिका र'अदस।”
19सेनापतिस आस ही ख़ेक्खन धरचस की एकतरा होच्चस की मेन्जस, “निन एन्दरा ब'आ बेद्ददय?”
20ख़ने आस बाचस, “यहुदिर पावलस ही पत्त नू कय बग्गे कत्था और हूँ बेस्स कुना जँच'आ गे आसिन नेला कोहाँ सभा नू ओन्दर'आ चि'आ, ब'आ की निंगन बिन्ती नना गे आर सल्हा नन्जका र'अनर। 21लेकिन निन आर ही कत्थन मला मनके, एन्देरगेका चालिस गोड़े ती बग्गे आलर पावलसिन पिटोम ब'आ की असरा नन्जका र'अनर। आर तो आसिन मला पिटना गुटी एन्दरा हूँ मला ओनोममोख़ोम बाचर की किरिया मोक्खर की सपड़ारका र'अनर। आर निंग्हय पेसना ही आसे नन्जका र'अनर।”
22औंगे सेनापतिस आ कुक्कोसिन एन्ने बाचस की त'इय्यस, “निन एंगन ई खबर तिंगका कत्थन नेकन हूँ अमके तेंगा।”
पावलस कैसरिया नू त'इरका
23अदिही ख़ोख़ा आस कप्तानर मधे दु'ई गोड़ेरिन मिख़ियस की बाचस, “इन्ना माख़ा नौ ख़रख़का तरा १ सय सिपाहिर, अउर सत्तर गोड़े घोड़ो अरगू सिपाहिर अउर २ सय भालावाल सिपाहिरिन कैसरिया गुटी काला गे सपड़'आ की उइय्या। 24अउर पावलस ही खतरी हूँ घोड़ो ही व्यवस्था नना, अउर आसिन कोड़ेम हाकिम फेलिक्सस गुसन अड़सत'आ।” 25आस एन्ने ओन्टा चिट्ठी हूँ लिखचस:
26“महोदय हाकिम फेलिक्सस गे क्लौडियस लुसियसस ही मोन्जरा! 27ई आलसिन यहुदिर धरचर की पिटा गे बिद्दका रहचर, लेकिन इस रोमी आल हिकदस ब'आ की एन अख़चकन औंगे सिपाहिर गने असन अड़सकन की इसिन अम्बताचकन। 28ख़ने आर आसिन एन्देर दोस लगाबचका र'अनर बाचकन की अख़'आ बिद्दकन की एन आसिन कि'इयाँ आर ही कोहाँ सभा' नू ओन्दरकन। 29आर ही दुम व्यवस्था ता प्रस्न ही पत्त नू आसिन दोस लगाचका रहचर, लेकिन पिटा गे या जेहेल नू उइना जोगे ही दोस एन्दरा हूँ मल्ला ब'आ की एन अख़चकन। 30एन नेख़'अम ती मेन्जकन का कय गोड़े यहुदिर आसिन पिटा गे योजना कमचका र'अनर। औंगे एन आसिन निंग्हय गुसन त'इय्या लगदन। पावलसिन गुन्हा ठेकाब'ऊ यहुदिरिन हूँ निंग्हय अगू नुम आस ही गुन्हा एद'आ गे हूँ पेसका र'अदन।”
31औंगे पेसका लेखा सिपाहिर पावलसिन माख़ाम एन्टिपाट्रिस सहर नू अड़सताचर। 32दोसरा उल्ला पैरिम सिपाहिर आसिन घोड़ो अरगू दोसरा सिपाहिर गने काला नेक'आ ब'आ की ब्यारेक नू किर्रयर। 33कैसरिया अड़सियर ख़ने आ चिट्ठिन हाकिमस गे चिच्चर की आर पावलसिन हूँ हाकिमस ही ख़ेक्खा नू सोपचर चिच्चर। 34हाकिमस आ चिट्ठिन पढ़चस की पावलसिन एका इलाका ता हिकदय बाचस की मेन्जस ख़ने आस किलिकिया ता हिकदस ब'अनन अख़चस। 35ख़ने एन्ने बाचस, “निंग्हय बिड़दो नू दोस लगबु'उर बरचका ख़ोख़ा निंग्हय मुद्दन एरोन चि'ओन।” ख़ने आस पावलसिन हेरोद बेलस कमचका बेल एड़पा नू उइय्या ब'आ की सिपाहिरिन पेसस।
Currently Selected:
मुध चेलर 23: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
