मुध चेलर 22

1“अना भ'इरो अउर बोहे बगारो, निम्‍हय अगू नू एंग्‍हय तरती के ब'आ पड़ारना कत्‍थन मेना।” 2आस हिब्रू भखा नू कच्‍छनखरकन मेन्‍जर की आर होरमर छछेम मन्‍जर।

3पावलस बाचस, “एन किलिकिया ता सहर नू कुन्‍दुरका यहुदी हिकदन, लेकिन एन ई यरुसलेम सहर नुम पोसरकन की गुरु गमलि'एलस ती सिखरकन। एम्‍हय पुरखरतिम मन्‍नुम बरचका धरमपुथी ता व्‍यवस्‍थन एन बेस्‍स कुना सिखरका र'अदन। इन्‍ना निम धर्मेस ही अगू नू ज्‍या बग्‍गे उत्‍साह एदका र'अदर, एन हूँ आ बग्‍गेम उत्‍साह एदका रहचकन।#मुध चेलर ५:३४-३९ 4औंगे एन उर्बस ही डहरेन ख़ोख़ा बुउरिन खे'अना गुटी साधचकन। एन मेतर अउर मुक्‍कारिन हे'अनुम जेहेल नू सज्‍जकन चिच्‍चकन। 5एन बाचका कत्‍था मानी हिके ब'आकी हुरमी ती कोहाँ यहुदी मुध नैगस अउर यहुदिर ही कोहाँ सभा ता गोट्‍टे आलर दुम एंग्‍हय खतरी गोवाह चि'अनर। आर ती एन यहुदी भ'इय्‍योर ही खतरी चिट्‍ठी ख़क्‍खकन, अउर असन मन्‍जका पत्‍त'उरिन दन्‍डे चित'आ गे हे'आ की यरुसलेम नू ओन्‍दर'आ गे एन दमस्‍कस नू केरका रहचकन।#मुध चेलर ८:३; २६:९-११

पावलस तंग्‍हय बदलारना ही पत्‍त नू तेंगदस

(मुध चेलर ९:१-१९; २६:१२-१८)

6“दमस्‍कस नू अड़सा हेल्‍लरकन ख़ने दुपाहरा ही बेड़ा रहचा। अनचोख'एम मेर्ख़ा ती एंग्‍हय चारो तरा कोहड़े बिल्‍ली बिल्‍चिया। 7एन ख़ेख़ेल नू खतरकन केरकन अउर एन्‍ने ब'अना ओन्‍टा ख़रख़नन मेन्‍जकन, ‘अना सा'उल, अना सा'उल, निन एन्‍देरगे एंगन सताब'आ लगदय?’ 8ख़ने एन मेन्‍जकन, ‘अना उर्बायो, निन ने हिकदय?’ ख़ने आस एंगन बाचस, ‘एन नासरत ता येसू हिकदन, नेकन निन सताब'आ लगदय।’ 9एंग्‍हय गने मनुर बिल्‍लिन तो इरियर, लेकिन एंग्‍हय गने कच्‍छनखर'उस ही अवाजन आर मला बुझरर। 10ख़ने एन बाचकन, ‘अना उर्बायो, अक्‍कू एन एन्‍देर ननोन?’ ख़ने उर्बस एंगन बाचस, ‘चो'आ, अउर दमस्‍कस नू कला। असन निन नन्‍ना पड़ारना तोक्‍चका नलखन निंगा गे तेंगतार'ओ।’ 11कोहड़े बिल्‍ली ही करने एन एन्‍दरा हूँ एःरा पोल्‍कन। ताब एंग्‍हय गने मनुर एंग्‍हय ख़ेक्‍खन धरचर की एंगन दमस्‍कस नू ओन्‍दरर।

12“आ सहर नू हननिया नामे मन्‍जका ओरोत आलस रहचस। आस मोसस चिच्‍चका व्‍यवस्‍थन पेसर'ऊ धर्मी आलस रहचस। दमस्‍कस नू र'ऊ होरमा यहुदिर आसिन आदर नना लगियर। 13आ आलस एंग्‍हय गुसन बरचस की एंग्‍हय हेद्‍दे इज्‍जस की बाचस, ‘सा'उल भ'ई, फेर एःरा उंग्‍गू मना।’ आस एन्‍ने बा'अतेसात एन एःरा ओंगना मन्‍जकन केरकन।

14“ख़ने आस बाचस, ‘नम्‍हय पुरखर ही धर्मेस आस ही मने अख़'आ गे आ धर्मी आलसिन#२२:१४ धर्मी आलसिन: येसुसिन इद'ई एःरा गे अउर आस ही ब'ई ता कत्‍थन मेन्‍ना खतरी निंगन चज्‍जका र'अदस। 15एन्‍देरगेका निन एन्‍दरा इरकय अउर मेन्‍जका र'अदय, आ कत्‍था ही पत्‍त नू निन होरमा आलर ही अगू नू आस ही गोवाह मनोय। 16अक्‍कू एन्‍देरगे दिरी नन्‍दय? चो'आ अउर बप्‍तिस्‍मा हो'आ, अउर आस ही नामे ती गोहरार'आ की निंग्‍हय पाप गुट्‌ठिन नोड़ा।’

पावलस नन-यहुदिरिन मिख़ियस की सिखाबचका

17“यरुसलेम नू किर्रकन ख़ने धर्मेस ही मन्‍दिर नू गोहरार'आ लक्‍कन ख़ने एन देखार इरकन। 18देखार नू आस एंगन एन्‍ने ब'अनन एन मेन्‍जकन, ‘चाँड़े नना की यरुसलेम ती उरख़ा कला, एन्‍देरगेका एंग्‍हय पत्‍त नू निन चिच्‍चका गोवाह आर मल पत्‍त'ओर।’ 19ख़ने एन बाचकन, ‘अना उर्बायो, एन यहुदिर ही सभा'एड़पा गुट्‍ठी नू काला की निंग्‍हय म'इयाँ पत्‍त'उरिन जेहेल नू सज्‍जकन अउर लोचकन आर होरमर अख़नर। 20निंग्‍हय गोवाह चि'ऊ स्‍तिफनससिन पिटा लगियर ख़ने, एन हूँ असन रहचकन। अउर ई कत्‍था नू संगे मन्‍जकन अउर आसिन पिटू आलर ही झुलन ख़ापा लक्‍कन।’#मुध चेलर ७:५८ 21लेकिन उर्बस एंगन बाचस, ‘कला, एन्‍देरगेका एन निंगन गेच्‍छा नन-यहुदिर गुसन त'इय्‍योन।’”

22आर पावलस ही कत्‍थन इय्‍या गुटी लेका मेन्‍जर, अउर एन्‍ने ब'अनुम जोरसे चिच्‍चियार'आ हेल्‍लरर, “इसिन पिटम पड़ार'ओ, एन्‍देरगेका इस ख़ेख़ेल नू उज्‍जना जोगे ही मल्‍लस।” 23आर तम्‍हय झुलन चर्रनुम अउर धुलिन उड़बा'अनुम चिच्‍चियार'आ हेल्‍लरर। 24इदिन इरियस की रोमी सेनापतिस ब्‍यारेक भितरी होच्‍चस की पावलसिन कोर्रा लगब'आ गे पेसस की बाचस “इसिन कोर्रा लेके लो'आ की जाँच'आ का यहुदिर एन्‍देरगे इस ही बिड़दो नू चिच्‍चियारते र'अनर।” 25ख़ने एकाबिरी आर पावलसिन कोर्रा लो'अना बेड़ा नू, पावलस हेद्‍देम इज्‍जका कप्‍तानसिन मेन्‍जस, “एन्‍दरा रोमी नागरिकसिन आस गुनहा नन्‍जका सबुत मला ख़क्‍खकम कोर्रा लो'आ गे रोमी कानुन निमा गे चि'ई?”

26कप्‍तानस इदिन मेन्‍जस की सेनापतिस गुसन केरस की बाचस, “निन एन्‍दरा नना बिद्‍दका र'अदय? एन्‍देरगेका ई आलस तो रोमी नागरिक हिकदस।”

27ताब सेनापतिस बरचस की पावलसिन मेन्‍जस, “एंगन ब'आ, एन्‍दरा निन रोमी नागरिक हिकदय?”

आस बाचस, “ह'ए, हिकदन।”

28सेनापतिस बिड़दाचस की बाचस, “एन तो ई नागरिक हकन बग्‍गे ढिबा तिरचकन की ख़िन्‍दका र'अदन।”

पावलस बाचस, “लेकिन एन तो कुन्‍दुरका तिम रोमी हिकदन।”

29औंगे आसिन जाँच नना गे सपड़ारका होरमर तुरतेम ख़ोख़ा हट्‍टरर केरर। अउर पावलस ओरोत रोमी नागरिक हिकदस ब'आ की अख़चस की सेनापतिस हूँ इल्‍चियस, एन्‍देरगेका आस पावलसिन हेचका रहचस।

पावलस यहुदिर ही कोहाँ सभा नू

30लेकिन दोसरा उल्‍ला यहुदिर पावलस म'इयाँ एन्‍देर करने गुनहा ठेकाब'आ लगियर, सेनापतिस ही उरुबस अदिन बुझुरना इच्‍छा ती आसिन खुल्‍लियस चिच्‍चस, अउर होरमा यहुदी मुध नैगर अउर यहुदिर ही कोहाँ सभा ता आलरिन ख़ोड़र'आ गे पेसस, ख़ने पावलसिन कि'इयाँ ओन्‍दरस की आर ही अगू नू इज्‍जताचस।

Currently Selected:

मुध चेलर 22: KRUX

Highlight

Copy

Compare