मुध चेलर 19
19
पावलस एफिसस नू
1अपोल्लोसस कोरिन्थ नू रहचस ख़ने पावलस भितरी इलाका गुट्ठी मन्जस की एफिसस नू बरचस। असन आस जोक्क पत्त'उरिन ख़क्खियस। 2पावलस आरिन बाचस, “एकाबिरी निम पत्ताचकर, आ बिरी एन्दरा निम नेम्हा बोलतसिन ख़क्खकर?”
ख़ने आर बाचर, “नेम्हा बोलतस हिकदस ब'अना कत्थन तो एम मेना हूँ मा मेन्जका र'अदम।”
3ख़ने पावलस आरिन बाचस, “होले निम एका खल्ल ही बप्तिस्मा होच्चकर?”
आर बाचर, “युहन्नस सिखाबचका लेखा बप्तिस्मा होच्चकम।”
4ताबसिले पावलस बाचस, “युहन्नस सिखाबचका बप्तिस्मा पाप ती जिया किर्त'अना खतरी रहचा। आस तो ‘एंग्हय ख़ोख़ा बर'ऊ आलस म'इयम पत्त'आ’ ब'आ की आलरिन तिंगियस। आस ही ख़ोख़ा बर'ऊ आ आलस येसू ख्रिस्तस दुम रहचस।”#मत्तिस ३:११; मरकुस १:४, ७-८; लुकस ३:४, १६; युहन्नस १:२६-२७
5ई कत्थन मेन्जर की आर उर्बा येसुस ही नामे नू बप्तिस्मा होच्चर। 6एकाबिरी पावलस आर ही म'इयाँ ख़ेक्खन उइय्यस, ख़ने नेम्हा बोलतस आर म'इयाँ बरचस, अउर आर दोसरा भखा नू कच्छनखरर अउर मुध तेंगा हेल्लरर। 7आर लगभग बारह गोड़े लेखा रहचर।
8पावलस यहुदिर ही सभा'एड़पा नू कोरचस की तिन महिना गुटी धर्मेस ही राजी ही पत्त नू आर गने डिढ़ ती बहस नन्जस अउर आलरिन पत्त'अना नू ओन्दर'आ गे कोसिस नन्जस। 9लेकिन कय गोड़ेर मनन कठोर नन्जर की उर्बस नू मला पत्ताचर। आर उर्बस ही डहरे ही बिड़दो नू आलर ही अगू नू मला बेस्स बाचर। औंगे पावलस आर ही सभा'एड़पा नू काला गे अम्बियस चिच्चस अउर उर्बस नू पत्त'ऊ चेलारिन तंग्हय गने होच्चस केरस। अदिही ख़ोख़ा पावलस टुरान्नस ता लुड़कुड़िया नू बहस नना हेल्लरस। 10एन्नेकी ई नलख दु'ई बछर गुटी मन्नुम रहचा, अउर एसिया प्रदेस नू र'उर होरमर यहुदिर अउर ग्रिकर उर्बस ही बचनन मेन्जर।
स्केवासस ही कुक्को ख़द्दर
11धर्मेस पावलस ही ख़ेक्खा ती कोहड़े हयकट नलख गुट्ठी नन्जस। 12इय्या गुटी का आस ही देह नू रुमाल गुट्ठी या गम्छा गुट्ठिन ओंसत'आ की बेमरहर गुसन हो'आ लगियर। एन्ने की बेमरहर कोड़े मना काला लगियर अउर मलदव बोलता गुट्ठी आर ती उरख़ा लगिया। 13इज्गु'अज्गू कुद्दू झाड़फुक ननू यहुदिर हूँ उर्बा येसुस ही नामे नू मलदव बोलता ओथर'आ बिद्दियर। आर मलदव बोलतन ब'आ लगियर, “पावलस तिंगिका येसुस ही नामे नू एन निंगन उरख़ा गे पेसदन।” 14असन ओरोत स्केवास नामे मन्जका हुरमी ती कोहाँ यहुदी मुध नैगस ही सात गोड़े कुक्को ख़द्दर रहचर, आर एन्नेम नना लगियर।
15लेकिन ओन्द उल्ला मलदव बोलता आरिन बाचा, “येसुसिन एन चिन्हदन। पावलसिन हूँ एन चिन्हदन। लेकिन निम ने हिकदर?”
16ताब आ मलदव बोलता लक्का आलस आर तरा डिगनुम झपटारस की आरिन पटगाचस अउर आर थोताम मन्जर की भैरदेह खादी-खादी मन्जर की अस्ते ती बोंगर। 17ई कत्था एफिसस नू र'ऊ होरमा यहुदिर अउर ग्रिकर हूँ अख़चर अउर आर होरमर इल्चियर। अउर उर्बा येसुस ही नामे ही ओहमा मना हेल्लरा। 18बग्गे गोड़े पत्ताचकर बरचर की आर नन्जका तम्हय मलदव नलखन होरमर ही अगू इन्जरर। 19अउर जादुटोना ननुर ती हूँ बग्गे गोड़ेर तम्हय पुथी गुट्ठिन ख़ोड़चर की अदिन होरमर ही अगू नू ओल्दाचर चिच्चर। आर अदिही दाम जोड़चर ख़ने पचास हजार चँदी ही डल्लर उरख़िया। 20एन्नेकी उर्बस ही बचन सवंग ती बिड़रनुम केरा।
एफिसस नू हुलहुली
21अदिही ख़ोख़ा पावलस माकेडोनिया अउर अखैया इलाका मन्जस की यरुसलेम काला गे निर्नय नन्जस। आस बाचस, “यरुसलेम केरका ख़ोख़ा एन रोम सहर हूँ कालाम पड़ार'ओ।” 22आस गे संगे चि'ऊ दुवो गोड़े, तिमोथिसिन अउर इरास्तससिन माकेडोनिया नू त'इय्यस, लेकिन तान जोक्क उल्ला एसिया प्रदेस नूम रहचस।
23आ बेड़ा नू उर्बस ही डहरे ही पत्त नू कोहाँ हलचल मन्जा। 24एन्देरगेका डेमेतिरियस नामे मन्जका ओरोत सुनार आर्तेमिस#१९:२४ आर्तेमिस: ग्रिकर आर्तेमिस ब'अना देविन आलर अउर दोसरा देवता गुट्ठी ही अयो ब'आ की पत्त'अनर। देवी ही सन्नी-सन्नी मुर्ती गुट्ठी कम'आ लगियस। ई नलखन नना की आस अउर तान उइका कारिगरर हूँ बग्गे ढिबा आर्ज'आ लगियर। 25ताबसिले इरिन अउर दोसरा एन्नेम नलख मन्जकरिन आस ख़ोड़'आ की ब'आ लगियस, “अना भ'इरो, निम अख़दर दुम का ई नलख ती नमा गे बेस्स कुना नफा मनी। 26निम एरदर अउर मेन्दर, एफिसस लेका मला, लेकिन लगभग गोट्टा एसिया नुम आलर ही ख़ेक्खा ती कमरका देवता दुम मल्ली ब'अनुम पावलस बग्गे आलरिन बहका लगदस। 27औंगे एन्नेकी नम्हय व्यापार लेका मला, लेकिन कोहाँ देवी आर्तेमिस ही मन्दिर ही हूँ हेला मनो अउर एसिया अउर गोट्टा ख़ेख़ेल ता आलर मननुम बरचका कोहाँ देवी आर्तेमिस ही पुजा हूँ बन्द मनो।”
28इदिन मेन्जर की असन ख़ोड़रका आलर कोहड़े कयरारर। अउर आर एन्ने चिच्चियारनुम ब'आ हेल्लरर, “एफिसिर ही आर्तेमिस देवी दुम कोहाँ हिके।” 29अउर गोट्टा सहर नू हलचल मन्जा अउर पावलस ही संगे नू डहरे इकू माकेडोनिया नू र'ऊ गायस अउर अरिस्तार्खससिन धरचर की रंगसाला नू घिस्या'अनुम होच्चर। 30पावलस आलर ही गोहड़ा नू काला बिद्दयस, लेकिन पत्त'उर आसिन कला मला चिच्चर। 31एसिया ता कय गोड़े मुध आलर ने पावलस ही संगेर रहचर, आर पावलसिन रंगसाला भितरी अमा कला ब'आ की खबर त'इय्यर। 32आलर ही गोहड़ा नू हल्ला मना हेल्लरा। ने ओन्टा कत्था ब'आ की चिच्यार'आ लगियर होले दोसरर दोसरा कत्था ब'आ की चिच्चियार'आ लगियर। लेकिन बग्गे आलर ई आलर एन्देरगे ख़ोड़रका र'अनर ब'आ की बल्ला लगियर। 33गोहड़ा ता कय गोड़े आलर अलेक्जेन्ड्रसिन अगू त'इय्यर, नेकन यहुदिर इजताच'का रहचर। अलेक्जेन्ड्रस ख़ेक्खा ती इसारा नन्जस की गोहड़ा ता आलर ही मझी नू एन्दरा मन्जकी रहचा अदिही पत्त नू एन्दर'उम ब'आ बिद्दयस। 34लेकिन आस यहुदी रहचस ब'अना कत्थन अख़चस की आर होरमर ओन्टम सोर ती दु'ई घन्टा लेखा एन्ने ब'अनुम चिच्चियारर, “एफिसिर ही आर्तेमिस देवी दुम कोहाँ हिके!”
35ख़ने आ सहर ता हाकिमस आलरिन सान्त नन्जस की बाचस, “अना एफिसस ता आलरो, एफिसिर ही सहर कोहाँ देवी आर्तेमिस ही अउर मेर्ख़ा ती खतरका अदी ही मुरुत ही ख़ापू हिके ब'अना कत्थन ने बलनर दरा? 36निम अख़दर का एक'अम आलर ई कत्था मानी मल्ली ब'अम पोल्लोर। औंगे निम छछेम र'आ अउर बेगर सोच'अम एन्दर'उम मला बेस्स नलख मल ननके। 37एन्देरगेका निम इबड़ा आलरिन धरचकर की ओन्दरका र'अदर। आर मन्दिर ती एन्दरा हूँ मला लुटचका र'अनर अउर नम्हय देवी ही बिड़दो नू एन्दरा हूँ मला बाचका र'अनर। 38औंगे डेमेतिरियस अउर आस ही संगे नू मन्जका कारिगरर गने नेख़'अम बिड़दो नू एन्दर'उम कत्था र'ई होले अदालत खुलम र'ई, अउर न्याय ननुर हूँ र'अनर। औंगे आर तम्हय मुद्दा गुट्ठिन अदालत नू ओन्दरा नेक'आ। 39लेकिन दोसरा कत्था गुट्ठी ही पत्त नू मेना बेद्दोर होले अदिही फसला यहुदिर ही सभा'एड़पा नू मनो। 40एन्देरगेका इन्ना ता ई हुलहुली ही अबजस एम्हय म'इयाँ लग्गना इल्चका र'ई। ई अबजस लग्गिया होले बेगर करनेम हुलहुली मन्जका नू एम एन्दर'उम बाहना नना गे पोल्लोम।” 41ई बग्गे बाचस की आस गोहड़न बिदा नन्जस।
Currently Selected:
मुध चेलर 19: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
