मुध चेलर 18
18
कोरिन्थ नू पावलस
1अदिही ख़ोख़ा पावलस एथेन्स ती बिदा मन्जस की कोरिन्थ नू केरस। 2आस अकिलास नामे मन्जका ओरोत यहुदिसिन ख़क्खियस। आस भरखरे तंग्हय आली प्रिस्किला गने इटालिया ती बरचका रहचस एन्देरगेका रोमी बेल क्लौडियस होरमा यहुदिरिन रोम ती उरख़ा कला ब'आ की पेसका रहचस। पावलस आरिन ख़क्खा केरस। 3आर ही नलख हूँ ओन्टम मन्जका करने आर संगेम रहचर अउर नलख नन्जर, एन्देरगेका आर हूँ पावलस लेखा तम्बू कम'ऊ आलर रहचर। 4हुरमी जिरारना-उल्ला नू आस यहुदिर ही सभा'एड़पा नू बहस नना लगियस। यहुदी अउर ग्रिकरिन येसुस ही पत्त नू बेस्स कुना बुझब'आ बेद्दा लगियस।
5एकाबिरी सिलासस अउर तिमोथिस माकेडोनिया ती अड़सका ख़ोख़ा पावलस तंग्हय गोट्टे बेड़न दवसमाचार तेंगना नलख नू लग्गियस। आस यहुदिरिन “येसुस दुम ख्रिस्त हिकदस” ब'आ की सिखाब'आ लगियस। 6लेकिन आर पावलस ही बिड़दो नन्जर की आसिन केब्बरर। पावलस आरिन चेताब मना नेक'आ ब'आ की तंग्हय झुला ती धुलिन ख़ेत्तनुम#१८:६ झुला ती धुलिन ख़ेत्तनुम: ओन्टस दोसरसिन अक्कू ती आस गने एन्दर'उम सम्बन्ध मल्ला ब'आ की नन्ना ओन्टा संकेत हिके। बाचस, “नास मनोर होले निम अपनेम दोस ही करने नास मनोर। एंगा गे दोस मला लग्गो। अक्कू ती एन नन-यहुदिर गुसन कालोन।” 7ख़ने आस अस्ते ती उरख़स की युस्तस नामे मन्जका ओरोत आलस धर्मेस ही भक्ती ननू आलस ही एड़पा नू केरस, नेख़ाय एड़पा यहुदिर ही सभा'एड़पा गनेम जुड़रकी रहचा। 8यहुदिर ही सभा'एड़पा ता मुध सासक क्रिस्पसस अउर आस ही होरमा परिवारर उर्बस म'इयाँ पत्ताचर अउर कोरिन्थ ता बग्गे आलर हूँ दवसमाचार मेन्जर की पत्ताचर अउर बप्तिस्मा होच्चर।
9ओन्द माख़ा उर्बस पावलसिन देखार चिच्चस की बाचस, “नेख़ाम ती अमा एल्चा, छछेम मला र'आ। दवसमाचार तेंगतेम कला। 10एन निंग्हय गने र'अदन अउर नेक'उम हूँ निंगन एन्दर'उम नना पोल्लोर एन्देरगेका ई सहर नू एंग्हय बग्गे आलर र'अनर।” 11अउर धर्मेस ही बचनन सिखाब'अनुम पावलस ओन्द बछर छव महिना गुटी आर गने रहचस।
12अखैया छेत्र नू गलियोन ब'अना आलस कोहाँ हाकिम रहचस ख़ने यहुदिर मिल्रर की पावलसिन धरचर की कोहाँ हाकिमस गुसन अदालत नू ओन्दरर। 13आर आसिन एन्ने बाचर, “ई आलस व्यवस्था ही बिड़दो नू धर्मेस ही ओहमा नना गे सिखाब'अदस की आलरिन बिगड़'आ बेद्दा लगदस।”
14ख़ने पावलस कच्छनखर'अम बिद्दका रहचस ख़ने गलियोनस आ यहुदिरिन बाचस, “अना यहुदिरो, अगर ई मलदव नलख या कोहाँ गुनहा ही कत्था र'अना होले एन निम्हय कत्थन मेना की न्याय नन्ना ठिक रहचा। 15लेकिन इबड़ा कत्था तो सब्द गुट्ठी, नामे गुट्ठी अउर निम्हय दुम व्यवस्था ही पत्त नू प्रस्न मन्जका करने निम अपनेम सोच'आ, एन्देरगेका एन एन्ने कत्था गुट्ठी ही न्याय नना मला बेद्दन।” 16एन्ने बाचस की गलियोनस आरिन अदालत ती त'इय्यस चिच्चस। 17ताबसिले आर होरमर यहुदिर ही सभा'एड़पा ता सासक सोस्थेनेससिन धरचर की अदालत ही अगू नू लौचर। लेकिन गलियोनस अबड़ा कत्थन मल गदनाचस।
एन्टि'ओखिया नू पावलस ही किर्रना
18पावलस असन और बग्गे उल्ला गुटी रहचस। अदिही ख़ोख़ा आस पत्त'उर ती बिदा मन्जस की प्रिस्किला अउर अकिलासस गने कोहाँ डोँगा नू अरगियस की सिरिया इलाका तरा केरस। जोक्क उल्ला अगू भाकल नन्जका करने पावलस किंक्रिया सहर नू कोहाँ डोँगा नू अरगना ती पहले चुट्टिन मुन्डरस।#गिन्ती ६:१८ 19अदिही ख़ोख़ा आर एफिसस नू बरचर, अउर पावलस प्रिस्किला अउर अकिलाससिन असानुम अम्बियस। अदिही ख़ोख़ा आस यहुदिर ही सभा'एड़पा भितरी कोरचस की यहुदिर गने बहस नना हेल्लरस। 20ताबसिले आर आसिन और जोक्क उल्ला र'आ गे बिन्ती नन्जर ख़ने आस मला इन्जरस। 21लेकिन एन्ने ब'अनुम आस आर ती बिदा मन्जस, “धर्मेस ही मने मनो होले एन निम्हय गुसन फेर किर्ररोन की बर'ओन।” ताब आस कोहाँ डोँगा नू अरगियस की एफिसस ती केरस।
22ख़ने पावलस कैसरिया सहर नू अड़सियस की आस यरुसलेम नू केरस अउर अस्ता कलिसिया ता पत्त'उर गने ख़क्खर-नखरस। अदिही ख़ोख़ा आस एन्टि'ओखिया सहर नू केरस। 23जोक्क उल्ला गुटी रहचस की आस अस्ते ती उरख़स। अदिही ख़ोख़ा आस गलातिया, फ्रिगिया ता इलाका मन्नुम अड्डा-अड्डा नू केरस की पत्त'उरिन पत्त'अना नू बड़ियर मना गे डिढ़ चिच्चस।
अपोल्लोसस एफिसस सहर नू
24आ बेड़ा नू अलेक्जेन्ड्रिया सहर नू कुन्दुरका अपोल्लोस नामे मन्जका ओरोत यहुदिस एफिसस नू बरचस। आस तो कोहड़े दवले कच्छनखर'आ गे ओंगा लगियस। धरमपुथिन हूँ बेस्स कुना अख़'आ लगियस। 25ई आलस उर्बस ही डहरे ही सिखाब'अना ख़क्खका रहचस, अउर बोलता नू रिझ मन्जस की आस उर्बस ही पत्त नू बेस्स कुना मानी कत्था गुट्ठी कच्छनखर'आ लगियस अउर सिखब'आ लगियस। लेकिन आस युहन्नस ही बप्तिस्मन लेका अख़चका रहचस। 26ख़ने आस डिढ़ ती यहुदिर ही सभा'एड़पा नू कच्छनखर'आ हेल्लरस। आस कच्छनखरका कत्थन मेन्जर की प्रिस्किला अउर अकिलासस आसिन तंग्हय एड़पा नू ओन्दरर, अउर धर्मेस ही डहरे ही मनेन और बेस्स कुना बुझाबाचर चिच्चर। 27ख़ने एकाबिरी आस अखैया नू काला बिद्दियस ख़ने, एफिसस नू मन्जका उर्बस ही चेलर आसिन काला गे उत्साह चिच्चर अउर अपोल्लोसस ही स्वागत ननके ब'आ की अस्ता चेलारिन ओन्टा चिट्ठी हूँ लिखचर चिच्चर। अखैया नू अड़सका ख़ोख़ा अपोल्लोसस असन उर्बस ही अनुग्रह ती पत्त'अना नू बरचकरिन बग्गे संगरा नन्जस। 28एन्देरगेका आस येसुस दुम ख्रिस्त हिकदस ब'आ की यहुदिर गने आना-नखरनुम नेम्हा धरमपुथी ता बचन गुट्ठी ती आर गे सबुत चिच्चस।
Currently Selected:
मुध चेलर 18: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.