मुध चेलर 20
20
पावलस माकेडोनिया नू अउर ग्रिस नू
1ई हल्ला सान्त मन्जा ख़ने पावलस पत्त'उरिन ख़ोड़चस अउर आरिन पत्त'अना नू डिढ़ ख़क्खर'आ नेक'आ ब'आ की होसला चिच्चस की माकेडोनिया इलाका तरा केरस। 2आ इलाका गुट्ठी मन्नुम काला लगियस ख़ने आरिन बग्गे होसला चिच्चस की आस ग्रिस राजी नू केरस। 3असन तिन महिना गुटी रहचस। आस कोहाँ डोँगा नू अरगियस की सिरिया तरा काला हेल्लरस ख़ने यहुदिर आसिन पिटा गे योजना नन्जका करने पावलस माकेडोनिया मन्नुम किर्रना विचार नन्जस। 4ताबसिले बेरिया नू र'ऊ पुरसस ही तंग्दस सोपात्रोसस, थेसलोनिके ता अरिस्तार्खसस अउर सिकन्दसस, डर्बी ता गायसस अउर तिमोथिस, अउर एसिया ता तुखिकसस अउर त्रोफिमसस आस गने केरर। 5इर अगुम अड़सियर की एमरिन त्रो'आस नू इज्जका रहचर। 6ताबसिले एम अखमिरी असमा ही पबनी ही उल्ला गुट्ठी ख़ोख़ा फिलिप्पी ती कोहाँ डोँगा नू डहरे इक्कम की पाँच उल्ला नू त्रो'आस नू आर गुसन बरचकम, अउर सात उल्ला रहचकम।
युटिकससिन उज्जताचका
7हप्ता ही पहला उल्ला नू एकाबिरी एम उर्बस ही भोजे ओना-मोख़ा गे ख़ोंड़ोरकम, ख़ने पावलस दोसरा उल्ला काला बिद्दका रहचका करने, आर गने आधहा माख़ा गुटी कच्छनखरनुम रहचस। 8एका म'इयन्ता तल्ला ही कोठली नू एम ख़ोड़ोरका रहचकम असन बग्गे बिल्ली गुट्ठी लघर'आ लगिया। 9युकिटस नामे मन्जका ओरोत जोंख़स झ्याल नू उक्का रहचस। पावलस बग्गे देरी गुटी कत्था नना लगियस ख़ने आस कुगा लगियस अउर ख़न्दरस केरस अउर आस ख़न्दरनुम तिसर तल्ला ती कि'इयाँ ख़ेख़ेल नू खत्तरस अउर आसिन आर उठब'आ केरर ख़ने आस केच्चस केरका रहचस। 10ताबसिले पावलस कि'इयाँ इत्तियस, अउर ख़ोल्ख़रस की आसिन ख़ु'इचियस अउर बाचस, “अमा अक्तार'आ एन्देरगेका आस उज्जनम र'अदस।” 11ताब आस फेर म'इयाँ केरस की असमन किच्चियस की मोक्खस ख़ने पैरी मल मन्ना गुटी बग्गे देरी गुटी आर गने कच्छनखरनुम रहचस। अदिही ख़ोख़ा बिदा मन्जस। 12ख़ने आर आ जोंख़सिन उज्जका परिया नुम आस ही एड़पा होच्चर चिच्चर अउर कोहड़े खुसमारर।
त्रो'आस ती मिलेटस गुटी
13पावलसिन अम्बकम की एम कोहाँ डोँगा ती पहले अस्सोस सहर नू केरकम। पावलस अस्सोस सहर गुटी एकते काला गे अउर असानुम कोहाँ डोँगा नू अरगा गे बिचार नन्जका रहचस। 14आस अस्सोस सहर नू एमा गे ख़क्खरस ख़ने, एम आसिन कोहाँ डोँगा नू अरगकम की मितिलेने नू बरचकम। 15अस्ते ती एम कोहाँ डोँगा ती डहरे इक्कम की दोसरा उल्ला खियस टापू हेद्दे अड़सकम। नेलबेन्जा तरा सामोस टापू नू अड़सकम। अस्ते ती दोसरा उल्ला मिलेटस नू अड़सकम। 16पावलस एसिया नू मल र'अना विचार नन्जका करने आस एफिसस मला कोर'आ की काना विचार नन्जस। एन्देरगेका आस गे यरुसलेम नू चाँड़ेम अड़सा गे बिद्दका रहचस। आस पेन्तिकोस ही पबनी नू अड़सा गे सोच्चका रहचस।
एफिसस ता कलिसिया ता अगुवर गने पावलस ही बिदा'ई
17आस मिलेटस ती एफिसस नू आलरिन कलिसिया ता अगुवरिन मेख़ा त'इय्यस। 18आर अड़सका ख़ोख़ा आस बाचस, “निम अख़दर दुम एसिया नू बरचका उल्ला तिम निम्हय गने एन अबड़ा उल्ला नू एकसे रहचकन। 19यहुदिर एंगन घड़ी-घड़ी पिटा बिद्दयर अन्नू हूँ एन लुद'ऊ मन्जकन की ख़न्जल्ख़ो खतब'अनुम उर्बा येसुस ही सेवा नन्जकन। 20निम्हय होरमर ही अगू नू अउर एड़पा-एड़पा नू काला की सिखाब'आ हेल्लरकन ख़ने निम्हय सोग्गे मन्ना कत्था गुट्ठी तेंगा गे एन ख़ोख़ा मल हटरकन। 21यहुदिरिन अउर ग्रिकरिन पाप ती जियन किर्रत'आ नेक'आ की धर्मेस तरा किर्रा अउर नम्हय उर्बा येसू ख्रिस्तस म'इयाँ पत्त'आ नेक'आ ब'अना कत्था ही गोवाह एन चिच्चका र'अदन। 22अक्कू एःरा नेम्हा बोलतस बाचका लेखा एंगा गे यरुसलेम कालाम पड़ार'ओ, अउर असन एंगा गे एन्दरा-एन्दरा मनो अदिन एन बलदन। 23इदिन लेका अख़दन का हुरमी सहर नू कैद अउर दुक्खे एंग्हय म'इयाँ बर'ओ ब'आ की नेम्हा बोलतस एंगा गे गोवाह चिच्चका र'अदस। 24लेकिन एंग्हय जिन्गिन एंग्हय खतरी एन्देर मोल ही मल्ला। एन ई बग्गे लेका चाहदन का धर्मेस आलरिन अनुग्रह नन्जका र'अदस ब'अना दवसमाचार बिड़रना नलखन एन पुरा नना ओंगोन नेक'आ, एका नलखन उर्बा येसुस दुम एंगन बाचका र'अदस।#२ तिमोथिस ४:७
25“अक्कू एःरा, एन अख़दन का निम मधे होरमर, नेका-नेकन एन धर्मेस ही राजी ही पत्त नू तिंगनुम केरका र'अदन, निम एंग्हय ब'इय्यन फेर इकला हूँ मला एरोर। 26औंगे एन इन्ना निमरिन गोवाह चि'अदन का अगर निम मधे नेक'उम नास मनोर होले एंगा गे अदिही दोस मला लग्गो। 27एन्देरगेका धर्मेस ही हुरमी योजना निमरिन तेंगा गे एन ख़ोख़ा मला हटरकन। 28औंगे निम्हय पत्त नू अउर हुरमी जेर#२०:२८ जेर: पत्त'उर ही पत्त नू होसियार र'आ। नेम्हा बोलतस निमरिन जेरन इरु-ख़ुजू कमचका र'अदस औंगे आस तंग्हय ख़ेस तिम ख़िन्दका धर्मेस ही कलिसियन एःरा-ख़ोजा। 29एन्देरगेका एन अख़दन, एन कालोन होले निम्हय मझी नू इल्चका लग्गना हुड़ार लेखा आलर बर'ओर, ने गोहड़ा गुट्ठिन मल अम्बोर। 30निम्हय मझी तिम एन्ने आलर चो'ओर की पत्त'ऊ आलरिन तम्हय तरा नतगा गे टेंकोभेंको कत्थन सिखाब'ओर। 31औंगे इदिन सुरता नना की होसियार र'आ का तिन बछर गुटी उल्लामाख़ा चिख़नुम होरमा आलरिन एन चेताब चि'अनुम रहचकन।
32“अक्कू एन निमरिन धर्मेस ही जिम्मा नू अउर आस ही अनुग्रह ही बचन नू अम्बदन। एकदा निमन बड़ियर कम'ओ अउर नेम्हा नन्तारका होरमा आलर ही मझी नू आसिस ही हकदार कम'ओ। 33एन नेख़'अम सोना, चँदी, झुला गुट्ठी ही लोभ मला नन्जकन। 34निम अख़दर का एन इबड़ा ख़ेक्खा तिम एंग्हय अउर एंग्हय गने र'ऊ आलर ही चाड़ गुट्ठिन पुरा नना गे नलख नन्जकन। 35एन्नेकिम मेहनत नना की निम कमजोर आलरिन संगरा नना ब'आ की एन निमरिन हुरमी कत्थन एदका र'अदन। अउर निम उर्बा येसुस ही बचन गुट्ठिन सुरता नना, एका बचनन आस अपनेम बाचका रहचस, ‘हो'अना ती चि'अना कोहड़े बेस्स हिके।’”
36ई बग्गे बाचस की पावलस मुक लिद्दरस अउर होरमर गने मिल्रस की गोहरारस। 37आर होरमर चिंख़ियर, अउर पावलसिन ख़ु'इचियर की चुंखियर। 38आर फेर इकला हूँ आस ही ब'इय्यन मला एरोर ब'अना कत्था नू कोहड़े दुखी मन्जर। अउर आर पावलसिन कोहाँ डोँगा गुटी अड़सताचर।
Currently Selected:
मुध चेलर 20: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
