मुध चेलर 13
13
बरनाबासस अउर सा'उलसिन चज्जका
1एन्टि'ओखिया ता कलिसिया नू अगमजानिर अउर सिखाब'ऊ आलर रहचर। आर बरनाबास, मोख़ारो ब'अना सिमियोनस, कुरेनी ता लुकियसस, सा'उलस अउर प्रदेस ता सासक हेरोदस गने परदका मनेनस रहचर। 2आर उपास र'आ की उर्बसिन ओहमा नना लक्का बेड़ा नू नेम्हा बोलतस बाचस, “एन सा'उलसिन अउर बरनाबाससिन एका नलख ही खतरी मिख़का र'अदन, आ नलख ही खतरी छिन्डा।”
3ख़ने गोहरारना अउर उबसका ख़ोख़ा आर सा'उलस अउर बरनाबासस म'इयाँ ख़ेक्खा उइय्यर की आरिन त'इय्यर चिच्चर।
बरनाबासस अउर सा'उलस सा'इप्रस नू
4बरनाबासस अउर सा'उलस नेम्हा बोलतस ती त'इरका करने आर सिलुकिया नू केरर अउर असलेकी आर नव नू अरगियर की सा'इप्रस टापू तरा केरर। 5अउर आर सलामिस नगरे नू अड़सियर की यहुदिर ही सभा'एड़पा गुट्ठी नू धर्मेस ही दवसमाचारन तिंगियर। ई नलख नू संगरा नना गे मरकुस ब'अना युहन्नस आर गने रहचस।
6आर हुरमी टापुन इकनुम पाफोस गुटी अड़सियर ख़ने, आर ओरोत बार-येसू ब'अना झुठा यहुदी अगमजानी जादुगरसिन ख़क्खियर। 7आस सा'इप्रस टापू ता कोहाँ हाकिमस सर्गियस पौलुसस ही एड़पा नू र'आ लगियस। सर्गियस पौलुसस ओन्टा बुधियर आल रहचस। आस सा'उलस अउर बरनाबाससिन मेख़ा की धर्मेस ही बचनन मेना बिद्दियस। 8लेकिन आ जादुगर एलुमासस (ग्रिक भखा नू एलुमास ही मने जादुगर मनी) सर्गियस पौलुसस येसुस नू मला पत्त'आ नेक'आ ब'आ की बरनाबासस अउर सा'उलसिन बिड़दो नना हेल्लरस। 9लेकिन सा'उलस नेकन पावल हूँ ब'अनर, नेम्हा बोलतस ती निन्दरस की एलुमाससिन एरनुम बाचस, 10“निन दियाबलस ही तंग्दय, हुरमी धर्मी नलख ही बैरी, हुरमी झुट अउर मलदव नलख ती निन्दरका, एन्दरा निन उर्बस ही सोझ डहरेन टेड़हो नना गे मला अम्बोय? 11अक्कू एःरा, उर्बस निंगन दन्डे चि'ओस अउर निन अन्धा मनोय अउर जोक्क उल्ला गुटी बिड़ी ही बिल्लिन एःरा पोल्लोय।” ताब आ बिरिम आस ही ख़न्न धुन्दरा मन्जा केरा अउर उख़ा मन्जा केरा। अउर आस इज्गु'अज्गू कप्पा कुद्दा हेल्लरस का नेक'इम आसिन ख़ेक्खन धर'ओर की हो'ओर नेक'आ।
12इबड़ा मन्जकन इरियस की आ जादुगरस पत्ताचस एन्देरगेका उर्बस ही सिखाब'अना नू आस हयकट मन्जस।
पिसिदिया ता एन्टि'ओखिया नू पावलस अउर बरनाबासस
13पावलस अउर आस ही संगेर पाफोस ती कोहाँ डोँगा नू अरगियर की पामफिलिया ता पर्गा नू अड़सियर अउर युहन्नस आर ती अम्बरस की यरुसलेम किर्रियस। 14पावलस अउर बरनाबासस पर्गा ती पिसिदिया ता एन्टि'ओखिया नू केरर अउर जिरारना-उल्ला नू यहुदिर ही सभा'एड़पा नू केरर की उक्कियर। 15मोसस ही चिच्चका व्यवस्था अउर अगमजानिर लिखचका पुथी ती पढ़चका ख़ोख़ा यहुदिर ही सभा'एड़पा ता सासकर पावलसिन अउर बरनाबाससिन मिख़ियर की बाचर, “अना भ'इरो, निम्हय गुसन आलरिन डिढ़ चि'अना एन्दर'उम कत्था र'ई होले ब'आ।”
16ख़ने पावलस इज्जस की ख़ेक्खा ती इसारा नन्जस की बाचस, “अना इस्रा'एल ता आलर अउर धर्मेसिन इल्चुरो, मेना, 17इस्रा'एली जातिता धर्मेस नम्हय पुरखरिन चज्जियस अउर आर मिसर राजी नू रहचर ख़ने आर ही गिन्ती नू बग्गे मन्नुम केरर। तंग्हय सवंग एदाचस की धर्मेस आरिन मिसर राजी ती ओत्थरस की ओन्दरस।#उरख़ाकाना १:७; १२:५१ 18फिटकी अड्डा नू लगभग चालिस बछर गुटी आस आरिन इरियस ख़ुजियस।#गिन्ती १४:३४; व्यवस्था १:३१ 19ताबसिले आस कनान राजी नू सात ठो जतियरिन नास नन्जस अउर आ राजिन नम्हय पुरखर गे चिच्चस।#व्यवस्था ७:१; यहोसुस १४:१ 20आ बेड़ा गुटी ४ सय ५० बछर कट्टका ख़ोख़ा धर्मेस नम्हय आलरिन अगमजानी समु'एलस ही परिया गुटी सासन नना गे न्याय ननुरिन चिच्चका रहचस।#हाकिमर २:१६; १ सामु'एलस ३:२०
21“ताबसिले आर तमा गे बेल नेचर अउर धर्मेस बेन्यामिन गोतर ता किसस ही तंग्दस सा'उलसिन चिच्चस। अउर आस चालिस बछर गुटी राजी नन्जस।#१ सामु'एलस ८:५; १०:२१ 22धर्मेस आसिन तरकुटी नन्जस की दा'उदसिन बेल कमचस। दा'उदस ही पत्त नू धर्मेस एन्नेकी बाचका र'अदस, ‘यिसैस ही तंग्दस दा'उदसिन एन एंग्हय जिया लेखा ही आल ख़क्खका र'अदन। ने एंग्हय हुरमी मनेन पुरा ननोस।’#१ सामु'एलस १३:१४; १६:१२; अस्सनापाड़ना ८९:२० 23ई आलस ही ख़द्दर तिम धर्मेस गच्छरका लेखा आस इस्रा'एल ही खतरी ओरोत बछब'ऊ येसुसिन त'इय्यस। 24आस बरना ती अगुतिम युहन्नस इस्रा'एल ता होरमा आलरिन पाप ती जिया किर्त'अना ही बप्तिस्मा ही पत्त नू तिंगियस।#मरकुस १:४; लुकस ३:३ 25युहन्नस तंग्हय नलखन मुन्जा हेल्लरस ख़ने बाचका रहचस, ‘निम एन ने हिकदन ब'अदर? एन निम असरा इरु ख्रिस्त मलदन। लेकिन एःरा, एंग्हय ख़ोख़ा ओर्तोस बर'आ लगदस, नेख़य ख़ेड्ड ता जुता ही फिता खोल्लना जोगे ही हूँ एन मलकन।’#मत्तिस ३:११; मरकुस १:७; लुकस ३:१६; युहन्नस १:२०, २७
26“अना भ'इ-बहिनरो, अब्राहामस ही बनस ता ख़द्दर अउर धर्मेसिन इल्चू नन-यहुदी आलरो, बछरना ही पत्त ता दवसमाचार नम्हय गुसन त'इरकी र'ई। 27लेकिन यरुसलेम नू र'ऊ आलर अउर आर ही सासकर येसुसिन बछाब'ऊ हिकदस ब'आ की मल चिन्हचर। अगमजानिर धरमपुथी नू लिखरका कत्था आर हुरमी जिरारना-उल्ला नू पढ़चर अन्नू हूँ मला बुझरर। आसिन पिटना दन्डे चिच्चर की आर धरमपुथी नू आस ही पत्त नू लिखरका कत्था गुट्ठिन पुरा नन्जर। 28आर आस नू पिटना जोगे ही दोस एन्दरा हूँ मला ख़क्खियर अन्नू हूँ येसुसिन पिटा पड़ार'ओ ब'आ की पिलातुससिन बिन्ती नन्जर।#मत्तिस २७:२२-२३; मरकुस १५:१३-१४; लुकस २३:२१-२३; युहन्नस १९:१५ 29आर आस ही पत्त नू धरमपुथी नू लिखचका हुरमी कत्थन पुरा नन्जका ख़ोख़ा जोक्क आलर आसिन क्रुस ती एत्ताचर की मसड़ा नू उइय्यर।#मत्तिस २७:५७-६१; मरकुस १५:४२-४७; लुकस २३:५०-५६; युहन्नस १९:३८-४२ 30लेकिन धर्मेस आसिन केच्चकन्ती उज्जताचस। 31तंग्हय गने गालिल ती यरुसलेम नू बर'उर गुसन आस बग्गे उल्ला गुटी एथरस अउर अक्कुन आर आलर ही खतरी गोवाह र'अनर।#मुध चेलर १:३ 32अक्कू एम धर्मेस नम्हय पुरखर गने गच्छरका ही दवसमाचारन निमन तेंगदम। 33धर्मेस आ गच्छरकन येसुसिन केच्चका ती उज्जताचस की नाम आर ही ख़द्दर अउर नन्नर ही खतरी पुरा नन्जस चिच्चस। अस्सना पाड़ना पुथी ता दोसरा अध्याय नू आस ही पत्त नू एन्नेकी लिखिरकी र'ई,
‘निन एंग्दय हिकदय,
इन्ना एन निंग्हय बोहे मन्जका र'अदन।’#अस्सनापाड़ना २:७
34धर्मेस आसिन केच्चका ती उज्जताचस अउर अक्कू आस इकला हूँ मला खे'ओस ब'आ की बाचका कत्था ही पत्त नू धर्मेस एन्ने बाचका र'अदस,
‘एन निमा गे नेम्हा अउर इकला हूँ मला बदलारना आसिस चि'ओन
एकदन एन दा'उदस ती गच्छरका र'अदन।’#यसायाहस ५५:३
35अउर दोसरा डन्डी नू हूँ एन्ने लिखिरकी र'ई,
‘निन निंग्हय नेम्हा आलस ही देहन कित्ता गे मला चि'ओय।’#अस्सनापाड़ना १६:१०
36ई कत्था गुट्ठी दा'उदस तंग्हय पत्त नू मल बाचका र'अदस एन्देरगेका आस तो तंग्हय उज्जका बेड़ा नू धर्मेस ही मने लेखा सेवा नन्जस की केच्चस। अउर आसिन तंग्हय पुरखर हेद्दे भट्ठर अउर आस ही देह मसड़ा नू कित्तिया। 37लेकिन नेकन धर्मेस केच्चका ती उज्जताचस आस ही देह मला कित्तिया। 38औंगे भ'इ-बहिनरो, येसुस तिम निम निम्हय पाप ती छेमा ख़क्खोर ब'आ की एन निमन तेंगा बेद्दन। 39अउर होरमा आलर ने आस नू पत्त'अनर आर होरमर तम्हय पाप ती बछर'ओर, एकदा ही खतरी मोसस ही व्यवस्था निमन निम्हय पाप ती अम्बत'आ पोल्लो। 40औंगे होसियार र'आ, महलेता धरमपुथी नू लिखिरका इबड़ा हुरमी कत्था निम्हय म'इयाँ बर'ओ।
41‘ए निन्दा ननू आलारो, एःरा हयकट मना अउर खे'आ कला,
एन्देरगेका निम्हय बेड़ा नू एन ओन्टा नलख ननोन,
आ नलख ही पत्त नू नेक'उम निमरिन तेंगोर अन्नू हूँ
निम अदिन मला पत्त'ओर।’”#हबकुकस १:५
42पावलस अउर बरनाबासस यहुदिर ही सभा'एड़पा ती उरख़ियर की काला हेल्लरर ख़ने आलर बरना जिरारना-उल्ला नू इबड़ा कत्थन फेर मेन्त'आके चि'अके बाचर की बिन्ती नन्जर। 43सभा मुन्जरा ख़ने बग्गे आलर यहुदिर अउर यहुदी धरम नू बरचका नन-यहुदिर पावलस अउर बरनाबासस ही ख़ोख़ा लग्गियर। पावलस अउर बारनाबसस आर गने कच्छनखरनुम आरिन धर्मेस ही अनुग्रह नू र'अके बाचर की सम्झाचर।
44दोसरा जिरारना-उल्ला नू आ सहर ता लगभग होरमा आलर उर्बस ही कत्थन मेना गे बरचर। 45एन्ने कोहाँ गोहड़न इरियर की यहुदिर डाहा नना हेल्लरर, अउर पावलस बाचका कत्था ही बिड़दो नन्नुम केब्बरर। 46लेकिन पावलस अउर बरनाबासस डिढ़ नन्जर की बाचर, “धर्मेस ही बचनन हुरमिन्ती अगू निमरिनुम मेन्त'अना चाड़ रहचा। लेकिन निम इदिन मला इन्जरकर की निम निमरिनुम मुन्जा मलका उज्जना ही जोगे मलका कमचकर। औंगे एम अक्कू नन-यहुदिर गुसन कालोम। 47उर्बस एमरिन एन्नेम ननके बाचस की पेसका र'अदस,
‘ख़ेख़ेल ही फेच्चा गुटी ता आलरिन बछरनन ख़क्खा नेक'आ ब'आ की
एन नन-यहुदिर ही खतरी निंगन बिल्ली कमचका र'अदन।’”#यसायाहस ४२:६; ४९:६
48ई कत्थन मेन्जर की नन-यहुदिर रिझर'आ हेल्लरर अउर धर्मेस ही बचन ही ओहमा नन्जर। मुन्जा मलका उज्जना ही खतरी चाजरकर पत्ताचर।
49उर्बस ही बचन गोट्टा छेत्र नू बिड़रा। 50लेकिन पावलस अउर बरनाबासस ही बिड़दो नू यहुदिर धर्मेस ती इल्चू मुक्करिन अउर सहर ता मुध-मुध आलरिन हुचकाचर अउर आरिन तम्हय छेत्र ता सिमाना ती बाहरी ओत्थरर चिच्चर। 51औंगे पावलस अउर बरनाबासस आर ही बिड़दो नू तम्हय ख़ेड्ड ता धुली गुट्ठिन ख़ित्तियर की आइकोनियन नू केरर।#मत्तिस १०:१४; मरकुस ६:११; लुकस ९:५; १०:११ 52असता पत्त'उर बग्गे रिझरर अउर नेम्हा बोलतस ती निन्दरर।
Currently Selected:
मुध चेलर 13: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
