मुध चेलर 14
14
आइकोनियन नू पावलस अउर बरनाबासस
1अक्कू आइकोनियन नगरे नू पावलस अउर बरनाबास सगरो उल्ला लेखा यहुदिर ही सभा'एड़पा नू केरर। आर एन्ने किसिम ती कच्छनखरर का, असन मन्जका यहुदी अउर ग्रिक जाती ता बग्गे आलर येसुस नू पत्ताचर। 2लेकिन मला पत्त'ऊ यहुदिर नन-यहुदिरिन भड़काचर की पत्त'उर ही बिड़दो नू आर ही मनन तित नन्जर चिच्चर। 3उर्बस नू भरोसा उइय्यर की डिढ़ ती कच्छनखरनुम बग्गे उल्ला गुटी असानुम रहचर। उर्बस आर ही ख़ेक्खा ती चिन्हा गुट्ठी अउर हयकट नलख गुट्ठी नन्त'आ की तंग्हय अनुग्रह ही बचनन साबित नन्जस चिच्चस। 4लेकिन आ सहर ता आलर छिन्डरर की दु'ई भाग मन्जर। जोक्क आलर यहुदिर तरा अउर जोक्क आलर मुध चेलर तरा केरर।
5नन-यहुदिर अउर बिड़दो ननू यहुदिर अउर आर ही सासकर मिल्लरर की पावलस अउर बरनाबाससिन हिड़'आ गे अउर पखना ती लो'आ की पिटना मने नन्जर। 6एकाबिरी अबड़र ई कत्थन अख़चर, ताब आर लुकोनिया ता नगरे गुट्ठी लुस्तरा, डर्बी अउर हेद्दे-हेद्दे ता छेत्र मन्नुम बोंगर केरर। 7अउर आर असन हूँ दवसमाचारन तिंगियर।
लुस्तरा अउर डर्बी नगरे नू पावलस अउर बरनाबासस
8लुस्तरा नगरे नू ओरोत लेंगड़ा आलस रहचस। आस कुन्दुरका तिम लेंगड़ा रहचस अउर आस इकला हूँ एका पोलका रहचस। 9पावलस कच्छनखर'आ लगियस ख़ने आस बेस्स कुना मेना लगियस। पावलस आस ही कोड़े मना ओंगना पत्त'अनन इरियस की आस तरा इरनुम 10कोहाँ सोर ती चिच्चियारस की बाचस, “निंग्हय ख़ेड्ड नू इज'आ।” ख़ने आस तुरतेम चोचस की एका हेल्लरस। 11एकाबिरी पावलस नन्जका ई नलखन इरियर, ताब आर लुकोनिया ता भखा नू कोहाँ सोर ती एन्ने बाचर, “देवता गुट्ठी हूँ आल मन्जर की नम्हय गुसन बरचका र'अनर।” 12आर बरनाबाससिन “जि'उस देवता” बाचर अउर पावलसिन “हर्मेस देवता” ब'आ हेल्लरर, एन्देरगेका आस कच्छनखरना नू मुध आलस रहचस। 13सहर ही हेद्देम जि'उस देवता ही मन्दिर रहचा। जि'उस देवता ही नैगस अड्डो, पुप-माला गुट्ठी ओन्दरस की सहर ही बली नू बरचस। आस बरनाबासस अउर पावलस ही अगू नू दाँड़े अरग'आ गे बिद्दियस।
14लेकिन मुध चेलर बरनाबासस अउर पावलस ई कत्थन मेन्जर की आर तम्हय झुलन चर्रियर की एन्ने ब'अनुम आलर ही मझी नू बुंगनुम केरर की बाचर, 15“अना भ'इरो, निम एन्देरगे एन्ने नलख नन्दर? एम हूँ तो निम्हय लेखम दुक्खे-सुक्खे भोग'ऊ आलम हिकदम। एम तो निम एन्ने बेकार कत्थन अम्बा की मेर्ख़ा, समुन्दर, ख़ेख़ेल अउर अइय्या नू मन्जका हुरमिन कम'ऊ उज्जना धर्मेस तरा किर्रा ब'आ की दवसमाचार तेंगा गे बरचका र'अदम।#उरख़ाकाना २०:११; अस्सनापाड़ना १४६:६ 16आस केरका बेड़ा नू हुरमी जतियरिन तम्हय-तम्हय मने लेखा एका चिच्चस। 17अन्नू हूँ आस इकला हूँ दव अउर सोग्गे नलख गुट्ठी नना गे मला अम्बका र'अदस। आस मेर्ख़ा ती चेँप पुँ'इताचस की ठिक बेड़ा नू उब्जा चिच्चस। ढेर बग्गे ओन्ना-मोख़ना चिच्चस की आलर ही जियन रिझ ती निन्दस चिच्चस। एन्नेकी धर्मेस ही नलख गुट्ठी दुम आस ही गोवाह चि'ई।” 18ई कत्थन मेन्जर की पावलस अउर बरनाबासस मुस्किल ती आरिन दाँड़े अरग'अना ती छेकचर।
19अदिही ख़ोख़ा जोक्क यहुदिर एन्टि'ओखिया अउर आइकोनियन ती असन अड़सियर अउर आर आलरिन तम्हय तरा नन्जर की पावलसिन पखना ती लोचर अउर आस केच्चस होत'एन बाचर की सहर ती बाहरी घिस्यानुम होच्चर की हिबड़ियर चिच्चर। 20लेकिन एकाबिरी पत्त'उर आस ही चारो तरा इज्जर अउर आस चोचस की सहर तरा केरस। अउर दोसरा उल्ला बरनाबासस गने उरख़ियस की डर्बी नू केरस।
सिरिया ता एन्टि'ओखिया नू पावलस अउर बरनाबासस किर्र बरना
21पावलस अउर बरनाबासस डर्बी नगरे नू दवसमाचार तिंगियर अउर एक्का बग्गेरिन चेला कमचर। अदिही ख़ोख़ा आर लुस्तरा, आइकोनियन अउर एन्टि'ओखिया नू किर्रियर। 22असन आर पत्त'उरिन पत्त'अना नू बड़ियर र'आ बाचर की डिढ़ चिच्चर अउर नाम ढेर बग्गे दुक्खे खेप'आ की धर्मेस ही राजी नू कोर'आ पड़ार'ओ बाचर की सिखाबचर। 23पावलस अउर बरनाबासस आ हुरमी कलिसिया नू अगुवरिन चज्जियर अउर उबसियर की गोहरारनुम अबड़ा चेलारिन तान पत्ताचका उर्बस गे सोपचर चिच्चर।
24अदिही ख़ोख़ा आर पिसिदिया इलाका ती मन्नुम पामफिलिया नू बरचर। 25पर्गा नगरे नू दवसमाचारन तिंगियर की आर अटालिया नगरे नू केरर। 26ताब असन कोहाँ डोँगा नू अरगियर की एन्टि'ओखिया नगरे नू किर्रियर। इसानुम उर्बस नू पत्त'ऊ भ'इय्योर पावलस अउर बरनाबाससिन धर्मेस ही एरनाख़ोजना नू सोपचर की दवसमाचार तेंगना ही नलख नू त'इका रहचर अउर आ नलखन पुरा नन्जर की आर असानुम किर्रियर।
27आर एन्टि'ओखिया नू अड़सियर की अस्ता कलिसिया ता पत्त'उरिन ख़ोड़चर। अउर धर्मेस आर ती नन्जका हुरमी नलखन अउर नन-यहुदिर हूँ बछरनन ख़क्खोर नेक'आ ब'आ की धर्मेस आर खतरी एकसे बलिन तिस्गस ब'अना कत्थन तिंगियर। 28असन आर पत्त'उर गने ढेर उल्ला गुटी रहचर।
Currently Selected:
मुध चेलर 14: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
