मुध चेलर 12
12
हेरोद बेलस कलिसियन साध'आदस
1अबड़ा उल्ला नू हेरोद बेलस कलिसिया ता कय गोड़ेरिन साध'आ हेल्लरस। 2आस युहन्नस ही तंग भ'ई याकुबसिन तड़री ती पिटताचस। 3ई नलख ती यहुदिर गे बेस्स लग्गिया। औंगे आर पतरुससिन हूँ धरना विचार नन्जर। आ बेड़ा अखमिरी असमा ही पबनी समे रहचा। 4आस पतरुससिन धरताचस की जेहेल नू सजताचस अउर असन ख़ापा गे चार-चार गोड़े सिपाहिर ही चार ठो गोहड़न उइय्यस चिच्चस। हेरोद बेलस आसिन कट्टना पबनी ही ख़ोख़ा आलर ही अगू नू ओन्दर'आ गे बिद्दका रहचस।#उरख़ाकाना १२:१-२७ 5औंगे पतरुसस जेहेल नू उइतारस लेकिन आस ही खतरी कलिसिया धर्मेसिन कोहड़े जिया ती गोहरार'आ लगिया।
पतरुसस जेहेल ती अम्बतारका
6हेरोदस पतरुससिन आलर ही मझी नू ओन्दरना ती मुन्द माख़ा आस दु'ई ठो सिकड़ी ती हेरका दु'ई गोड़े सिपाहिर ही मझी नू बिडरका रहचस। अउर सिपाहिर बली ही अगू तरा जेहेलन ख़ापा लगियर। 7अनचोख'एम उर्बस ही ओरोत मेर्ख़ादुतस आस गुसन इज्जस अउर जेहेल नू बिल्ली बिल्चिया। ख़ने मेर्ख़ादुतस आस ही पन्जरा नू लोचस की “चाँड़े चो'आ” बाचस की उठाचस। अउर पतरुसस ही ख़ेक्खा ती सिकड़ी खोल्रा की खत्तरा। 8ख़ने मेर्ख़ादुतस आसिन बाचस, “कड़मन हे'आ अउर जुतन अत्ता।” ख़ने आस अन्नेम नन्जस। फेर मेर्ख़ादुतस आसिन बाचस, “चदेरन झपर'आ की एंग्हय ख़ोख़ा लग्गा।” 9ख़ने आस उरख़स की मेर्ख़ादुतस ही ख़ोख़ा-ख़ोख़ा लग्गियस। आ मेर्ख़ादुतस ती नन्तरका कत्था मानिम हिके ब'आ की आस बल्लस। लेकिन आस “एन देखार एःरा लगदन” बाचस की सोच'आ लगियस। 10एकाबिरी आर पहला अउर दोसरा ख़ापू सिपाहिर ही गोहड़न कट्टियर की सहर ता पन्ना ही मुध बली गुसन अड़सियर। ख़ने आ बली तानिम तिस्गरा। आर बाहरी उरख़र की गली डहरे मन्तेम कला लगियर, ख़ने अहाबाकिम मेर्ख़ादुतस आसिन अम्बियस की केरस।
11ख़ने पतरुसस ही होस बरचा ख़ने आस बाचस, “अक्कू एन मानिम अख़चकन का उर्बस तंग्हय मेर्ख़ादुतसिन त'इय्यस की हेरोदस ही ख़ेक्खा ती अउर यहुदिर एन्दरा नना बेद्दा लगियर अबड़ा हुरमिन्ती एंगन बछाचस।”
12इदिन अख़चस की आस मरकुस ब'अना युहन्नस ही तंगियो ही एड़पा बरचस। असन बग्गे आलर ख़ोड़रर की गोहरारनुम रहचर। 13पतरुसस बलिन#१२:१३ बलिन: इसन ई सब्दद एड़पन चारोतरा घेरचका देवाल ही मुध बलिन बुझाब'ई। ठोकठोकम बाचस ख़ने, रोदा नामे मन्जका ओरोत नोकर्नी बलिन तिस्ग'आ गे बरचा। 14पतरुसस ही सोरन चिन्हचा की आद खुसमारनुम बलिन मला तिस्गा किम बुंगनुम केरा की, “पतरुसस बली गुसन इज्जका र'अदस” बाचा की तिंगिया। 15आलर इदिन मेन्जर की अदिन बाचर, “निन बथही हिक्दिन।” लेकिन आद बाचका मानी कत्था हिके बाचा की आद जिद्द नन्जा। ख़ने आर बाचर, “आद आस ही मेर्ख़ादुतस हिकदस होत्'एन।”
16लेकिन पतरुसस बलिन ठोकठोकब'अनुम रहचस, ख़ने आर बलिन तिस्गर ख़ने आर पतरुससिन इरियर की छक्केम मन्जर। 17आस ख़ेक्खा ती छछेम र'आ गे इसारा नन्जस अउर आस आरिन तिंगियस का धर्मेस आसिन एकसे जेहेल ती ओत्थरस की ओन्दरस। ख़ने “इबड़ा कत्थन याकुबसिन अउर पत्त'ऊ भ'इय्योरिन तेंगके चि'अके” बाचस की आस असलेकी दोसरा अड्डा चले केरस।
18बिज्जिया ख़ने सिपाहिर पतरुसस गे एन्दरा मन्जा ब'आ की कोहड़े अकबकरर। 19हेरोदस आसिन बिद्दियस की हूँ मला ख़क्खियस ख़ने सिपाहिरिन मेन्जस-ख़ुजियस लेकिन आर बिड़द'आ की एन्दरा हूँ ब'आ पोल्लर औंगे आर गे पिटना दन्डे चिच्चस। अदिही ख़ोख़ा हेरोदस यहुदियन अम्बियस की कैसरिया नू केरस की असानुम र'आ हेल्लरस।
हेरोदस ही खे'अना
20आ बेड़ा हेरोदस टुरोस अउर सिदोन ता आलर गने कोहड़े कयरारका रहचस। लेकिन अबड़ा आलर ओन्टम मन्जर की आस गुसन भेट नना गे बरचर अउर आर बेलस ही ओरोत पत्त'अना जोगे नलख ननू बलस्तससिन खुसामद नन्जर की मिलरना ही खतरी बिन्ती नन्जर। एन्देरगेका हेरोद बेलस ही राजी तिम आर ही राजी नू ओन्ना-मोख़ना गुट्ठी बर'आ लगिया।
21ख़क्खा गे तोक्चका उल्ला नू हेरोदस बेल झुलन अत्तियस की बेलगदी नू उक्कियस अउर आलरिन तेंगा हेल्लरस। 22ख़ने आलर चिच्चियार नुम, “इद आलस ही कत्था मल्ली इद तो धर्मेस ही कत्था हिके” बाचर। 23आ बिरिम उर्बस ही मेर्ख़ादुतस आसिन बेमार ती लोचस, एन्देरगेका आस धर्मेस ही महबा मला नन्जस। अउर आस ही देह नू पोचगो पुच्चिया की आस केच्चस।
24लेकिन उर्बस ही बचन बढरनुम अउर बिड़रनुम केरा।
25बरनाबासस अउर सा'उलस तम्हय नलखन मुन्जियर की तम्हय गने मरकुस ब'अना युहन्नसिन हूँ यरुसलेम नू ओन्दरर।
Currently Selected:
मुध चेलर 12: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
