१ थेसलोनिकिर 2
2
थेसलोनिका नू पावलस ही नलख
1अना भ'इ-बहिनरो, निम्हय गुसन एम अन्नेम मला बरचका रहचकम ब'आ की निम अपनेम अख़दर दुम। 2असन निम्हय गुसन बरना ती अगू फिलिप्पी ता आलर एमरिन कय बग्गे साधचर की लज्जे मोख़ताचर की ब'अना कत्थन हूँ निमा गे अख़दर। एमरिन अन्ने कोहड़े बिड़दो नन्जर, अन्नू हूँ निमरिन ख्रिस्तस ही दवसमाचार मेन्त'आ गे धर्मेस एमा गे डिढ़ चिच्चस।#मुध चेलर १६:१९-२४; १७:१-९ 3एन्देरगेका एम निमरिन एन्दर'उम ठकना कत्था, मला बेस्स बिचार ती या एन्देर'उम छल-कपट ही कत्था ती मला सिखाबाचका रहचकम। 4लेकिन धर्मेस एमन जोगे इरियस की दवसमाचार तेंगना जिम्मा चिच्चस। औंगे एम आलरिन मला लेकिन नम्हय जियन जँच'ऊ धर्मेसिन खुस नना गे दवसमाचार तेंगदम। 5एन्देरगेका निम अख़दर, एम इकला हूँ खुसामद ही कत्था मला नन्जकम, न तो लोभ ती बाहना नन्जकम। इदिही गोवाह धर्मेस र'अदस। 6ख्रिस्तस ही मुध चेलर मन्जका नाता ती निम्हय म'इयाँ अधिकार चलब'आ ओंगोम पहें। अन्नू हूँ एम आलर ती आदर मला बिद्दकम, न तो निम्हय ती, न तो दोसरा नेख़'अम ती। 7लेकिन एकसे सुसार ननू अयो तंग्हय ख़द्दख़र्ररिन सुसार ननी, अन्नेम एम निम्हय मझी नू लुद'ऊ मन्जका रहचकम। 8औंगे एम निमरिन कोहड़े चोन्हा ननू मन्जका करने धर्मेस ही दवसमाचार नू लेका मला लेकिन एम अपना जियन हूँ चि'आ गे सपड़ारका रहचकम। एन्देरगेका एम निमरिन कोहड़े चोन्हा नन्जकम। 9अना भ'इ-बहिनरो, एम नन्जका नलखन अउर दुक्खेन निम अख़दर का एकसे एम निम मधे नेकन हूँ ओत्था मला चेड़त'ओम बाचकम की उल्ला-माख़ा नलख नन्तेम निमरिन धर्मेस ही दवसमाचार तिंगकम।
10निम्हय गने रहचकम ख़ने एम्हय बेबहार नेम्हा, मानी अउर निर्दोस रहचा। धर्मेस अउर निम हूँ ई कत्था ही गोवाह र'अदर। 11एन्देरगेका निम अख़दर का निम होरमर गने बबस तंग्हय ख़द्दख़र्रर गने नन्जका लेखम एम निमा होरमर गने बेबहार नन्जकम। 12अउर एम निमा गे उपदेस चिच्चकम, डिढ़ चिच्चकम अउर बिन्ती नन्जकम। औंगे निम्हय चाल-चलन धर्मेस ही अगू नू जोगे मना नेक'आ। अउर आस निमरिन तंग्हय राजी अउर महबा नू मेख़दस।
13एम निमा गे धर्मेस ही बचनन तिंगकम ख़ने निम इदिन आलर ही कत्था मला बुझरकर की धर्मेस ही बचन दुम हिके बाचकर की इन्जरकर। मानिम इद धर्मेस ही बचन दुम रहचा। ई बचन अक्कुन हूँ निम पत्तउर नू नलख नन्तेम र'ई। औंगे एम धर्मेसिन सगरो धन्नेबाद चि'अते र'अदम। 14भ'इ-बहिनरो, निम यहुदिया प्रदेस नू ख्रिस्त येसुस नू मन्जका धर्मेस ही कलिसिया ही देखासिखी ननुर मन्जकर, एन्देरगेका एकसे आर यहुदिर ती दुक्खे खेपचर, अन्नेम निम हूँ अपना राजी नू र'उर ती अन्नेम दुक्खे खेपचका र'अदर।#मुध चेलर १७:५ 15अबड़ा यहुदिर दुम उर्बा येसुसिन अउर अगमजानिरिन हूँ पिटयर अउर एमरिन हूँ साधचर की अस्ते ती ओथरर चिच्चर। आर धर्मेसिन मला रिझाब'अनर अउर होरमा आलर ही बिड़दो नन्नर।#लुकस २४:२०; मुध चेलर ९:२३; १३:४५; १८:१२ 16अउर सगरो तम्हय पाप ही अड़िन निन्द'आ गे आर धर्मेस ही दवसमाचारन नन-यहुदिर मेन्जर की बछरनन मला ख़क्खा नेकआ ब'आ की निमरिन दवसमाचार तेंगा गे छेकना कोसिस नन्जर। लेकिन अक्कू तो आर म'इयाँ धर्मेस ही कयर बरचकी र'ई।
पावलस थेसलोनिकिरिन फेर ख़क्खा बेद्दस
17लेकिन भ'इ-बहिनरो, जोक्क बेड़ा खतरी एम निम्हय ती छिन्डरका रहचकम। एम देह नू निम्हय गुसन मलकम लेकिन एम्हय जिया तो निम्हय गनेम रहचा। निमरिन कोहड़े ख़क्खा बिद्दका रहचकम। 18औंगे एम निम्हय गुसन बर'आ गे कोहड़े कोसिस नन्जकम। एन पावल कय बेर निम्हय गुसन बर'आ गे बिद्दकन लेकिन सैतान एमन बर'अम मला चिच्चा। 19नम्हय उर्बा येसुस एकाबिरी किर्रोस की बर'ओस आबिरी आस ही अगू नू नम्हय असरा या रिझ या गर्व नन्ना ही मुकुट निमुम तो हिकदर! मलदर दरा? 20ह'ए, मानिम एम्हय महबा अउर रिझ निमुम हिकदर।
Currently Selected:
१ थेसलोनिकिर 2: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
