Iromayon 15

1Kibusakinit oni lukagogoŋok aibwok akalanyanut naka luemamei agogoŋ, kwabo mere aisiyalamikina bonik. 2#1 Kor 9:19; 10:24,33. Kesiyalamikisi oni ŋinituŋanan ikeidunyet kodum ajokis kodukoi da. 3#Sab 69:9. Naarai Kristo da mam esiyalamikina elopet bon; dimarai kwape iwadikatere ebe, “Amorosito nuka lukimoromoroete jo, apotu kadoikis eoŋ.” 4#Rom 4:23,24; 1 Kor 10:11. Naarai nuewadikatai sek, ewadikatai kanuka aisisianakinia oni, tetere kanuka atitiŋikin ka aitalakara naka nukiwadikatai kidumuni amun. 5#Pil 3:16. Edeke da loka atitiŋikin ka aitalakara koinak yes aomit adiopet bonik ka bonik koidicane loka Kristo Yesu, 6tetere itopoloorete Edeke Papa da loka Ejakaitiwok Yesu Kristo, ketau ediopet ka eporoto da ediopet.

7Kanuka ŋun, kisukunyanakinos bonik ka bonik, kwape kiisukunyikinia Kristo oni, tetere itopoloorio Edeke. 8#Mat 15:24; Asw 3:25. Naarai kalimokini ebe araun Kristo ebulesit loka aitutuket naka akepio kanuka abeit naka Edeke, tetere itogogoŋi aisumuneta nuka lukapapaakosi, 9#2 Sam 22:50; Sab 18:49; Rom 11:30. bobo da tetere Imo itopoloorete Edeke kanuka akeitim, Kwape iwadikatere ebe,

“Kanuka ŋun ŋes kalimonoria jo kotoma atekerin,

Ayeikinenei ekonikiror.”

10 # Ikis 32:43. Bobo da ebe,

“Kolelata, yes atekerin, nepepe kiketuŋa.”

11 # Sab 117:1. Bobo da ebe,

“Yes atekerin kere, kituroto Ejakait,

Kituroto da ŋes Ituŋa kere.”

12 # Isa 11:10; Apu 5:5. Bobo da ebala Isaia ebe,

“Ejaun aliasit naka Yese,

Ŋes loenyouni ayait atekerin;

Emunokinos ŋol atekerin.”

13Edeke da loka amun kilelebik yes aiyalama kere ka ainapakin kotoma aiyuun, kiyatanakinos noi ajaut kamun kotoma apedor naka Emoyo Lokalaunan.

14Ikainacan, etogogoŋit eoŋ elopet kanukus ebe ileleba yes da ajokis, isilelebitai acoa kere, bobo da ipedorete aikwenyanar bonik ka bonik. 15#Rom 1:5; 12:3. Konye kewadikakinit yes katitiŋ naepol katutubeta ace, aisiitun, kanuka asianut nakainakinit Edeke, 16#Rom 11:13; Pil 2:17. tetere araun ebulesit loka Kristo Yesu mama ejaas atekerin, keswamak Akiro Nukajokak nuka Edeke aswam naka esasedoti, tetere eraunete atekerin asubanit naecamunitai, naitalaunit Emoyo Lokalaunan, 17Aso ejai akirot naaolobobotor kotoma Kristo Yesu kakonyen nuka Edeke. 18#2 Kor 3:5. Naarai mam atitiŋikini einer akirot namam Kristo iswamat kotomakaŋ, tetere erimarete atekerin, kanuka akirot arai aswamisioit, 19#Mk 16:17. kotoma apedor naka aanyuneta ka nukaumokin, kotoma apedor naka Emoyo Lokalaunan, kwaŋin ameun ka Yerusalem, kiton da airiamar Iliriko etodol alimonokin Akiro Nukajokak nuka Kristo, 20#2 Kor 10:15,16. kwabo alosikinit alimonokin Akiro Nukajokak, mere neelimoritere ekiror loka Kristo, kenyek adukokin apetetait naka icetuŋanan, 21#Isa 52:15. konye kwape iwadikatere ebe,

“Eanyunete ŋul lumam alimonokinitai akekiro,

Ejenunete da ŋul lumam iirarito.”

22 # Rom 1:10-13. Kanuka ŋun ŋes ketikokinitere irwan ipu kenyek abunore mamakus, 23konye kwana, naarai emamei bobo eoŋ aibois katutubeta kanu, bobo da ameun ikar luipu emiela abunore mamakus, 24#1 Kor 16:6. amuno aanyun yes naetorio alosit Sipain, yes da kinyamakinete eoŋ korotoka, kadau ber aipejokin yes adaun aimue. 25#1 Kor 16:1-4. Konye kwana alosi Yerusalem, ejaanakini lukalaunak. #Asw 19:21; 20:22. 26#1 Kor 16:1; 2 Kor 8:1; 9:2,12. Naarai isiyalamikinito luko Makedonia ka Akaia atukonokin iboro akorakin lukican lukotoma lukalaunak luejaas Yerusalem. 27#1 Kor 9:11; Rom 9:4. Naarai isiyalamikinito kesi, ido da ejai kes apesen kamakec, naarai arai imorikikinete Imo arereŋesiokec nuka emoyo, ibusakinit da kes aijaanakin ŋul karereŋesiokec nuka akuan. 28Aso kadau eoŋ ŋun, kepucak kes araito ŋin, etori mamakus alosit Sipain; 29#Rom 1:11. ido ajeni ebe naabunio mamakus, abuni kaileleba naka arereŋ naka Kristo.

30 # 2 Kor 1:11; Pil 1:27; Kol 4:3; 2 Ses 3:1. Keŋaiŋait yes, iinacan, kanuka Ejakaitiwok Yesu Kristo, kanuka amin da naka Emoyo, koutas nepepe keoŋ kotoma ailipikus kanukaŋ mama ejai Edeke, 31ebe ketajari kama ejaas lukepali kotoma Yudaya, bobo da akaijaanakin nakijaar ŋina Yerusalem korau naisiyalamikinit lukalaunak; 32tetere adoluni mamakus kaiyalama, kanuka akote naka Edeke, keyeŋ nepepe kayes. 33Edeke loka ainapakin kojai nepepe kayes kere. Amen.

Currently Selected:

Iromayon 15: AOV1961

Highlight

Compare

Copy