2 Samuel 3
3
1 #
Sab 46:9; Isa 2:4; Mik 4:3; Mat 10:35,36; Gal 5:17; Pes 6:12. Kojai ejie apak naepol kidiŋ kekek loka Saul ka ekek loka Daudi: kiyatanakin Daudi agogoŋor, konye kiyatanakin ekek loka Saul anonokiar.
2 #
1 Siit 3:1; 1 Sam 25:43. Aponi kourikinai Daudi odwe koKeburon: ekiyaike ŋes Aminon, loka Akinoam Ayesereelit: 3#2 Sam 13:37; 1 Sam 27:8. Lokiareitike, Kileab, loka Abigail aberu kolo naka Nabal Akaramelit; lokiwuniet, Abisalom okoku loka Maaka akoku naka Talumai ekabaka loka Gesur; 4#1 Ika 1:5; 2:13-25. Lokiwononet, Adoniya okoku loka Kagit; lokikanyet, Sepatia okoku loka Abital; 5Lokikanyetekape, Itiream, loka Egula aberu naka Daudi. Aponi ŋul kourikinai Daudi koKeburon.
6 #
2 Sam 2:8,9; 2 Siit 25:8. Kosodi kanen, kapak naajaar ejie kidiŋ kekek loka Saul ka ekek loka Daudi, kogogoŋor Abiner kokek loka Saul. 7#2 Sam 21:8,10. Ajai Saul abusiat, ekekiror Risipa, akoku naka Aia: kotema Is-boset Abiner atiar, “Kanukinyo ilomaria ijo mama ejai abusiat naka papaka?” 8#Ikis 23:18; 1 Sam 24:15; 2 Sam 16:9. Konyunyurikin Abiner noi kakiro nuka Is-boset, kotema atiar, “Arai eoŋ akou naka ekiŋok loka Yuda? Etodik lolo eoŋ asianut ekek loka Saul papakon, iinacanake ka ipaperoke, mam kejaikinit jo akan naka Daudi, konye kilimit eoŋ lolo kakirot naka aberu. 9#1 Sam 15:28; 16:1,12; 1 Siit 12:23; Rus 1:17; 1 Ika 19:2; Sab 78:70; 89:19,20; Asw 13:22. Kiswamak Edeke Abiner kwaŋin ka adepar da, arai, kwape eyapoikinia EJAKAIT Daudi, mam eoŋ eswamakini ŋes kwaŋin. 10#Tub 20:1; 2 Sam 17:11; 1 Ika 4:25. Aijul ajakanut alemar kokek loka Saul, ka asipokin ajakanut naka Daudi airum Isirael, ka Yuda, anyoun koDan kiton Beer-seba.” 11Mam abu kopedo aboŋokin Abiner adiopekirot, naarai akuriana ŋes.
12Kijuka Abiner ikiyakia kokirorike mama ejai Daudi, kotema ebe, “Nakaŋai akwap? “ebe da, “Kitutuk keoŋ, ido koany, kojaun akanika kajo, aibelokin Isirael kere mamakon.” 13#Age 43:3; 44:23,26; 1 Sam 18:20. Kotema atiar, “Ejok; etutuki eoŋ kajo: konye akoto ibore idiopet kamakon, ŋes yenita, mam ianyuni akonyeneka, dimarai kisiau ber ayaun Mikal akoku naka Saul, naibunio aanyun eoŋ.” 14#1 Sam 18:25,27. Kijuka Daudi ikiyakia mama ejai Is-boset okoku loka Saul kotema ebe, “Koinakinai Mikal akaberu, naesinerit eoŋ kamunyin akwatat nuka ekiliokane loka Ipilisitian.” 15Kiyakia Is-boset, kodemu ŋes kama kokilenike, ŋes Palutiel okoku loka Lais. 16#2 Sam 19:16. Kouparos okilenike kaŋes, kolosi emonyi, kotupite ŋes kiton Bakurim, Kosodi Abiner atemar ŋes atiar, “Ape, koboŋo.” Kosodi ŋesi aboŋor,
17Abu Abiner kinerunito kimakio luka Isirael ebe, “Imootos yesi kolo Daudi araun ekabakakus: 18Aso do kiswamata: naarai abu EJAKAIT kiner nuka Daudi ebe, ‘Kakan naka ekakejaanakinan Daudi etajari ikatuŋa Isirael kakan naka Ipilisitian, kakan da naka lukasurupokec kere.’’’ 19#1 Siit 12:29. Kiner da Abiner kaki nuka Benyamin: kolot da Abiner einer kaki nuka Daudi koKeburon kere nukitojokit Isirael, ka ekek kere loka Benyamin.
20Kobu Abiner mama ejai Daudi Keburon, koupas kituŋa akaisaarei, Kipoik Daudi Abiner ka ituŋa luajaas kaŋes epucit. 21#Ikis 14:26; 1 Ika 11:37; Sab 20:4. Kotema Abiner Daudi atiar, “Anyouni kalot, atukonokini Isirael kere mama ejai ejakaitika ekabaka, kitutukoto kajo, kirum ijo kere luipuda ekonitau.” Kotwar Daudi Abiner; kolot inapakina.
22Ido koany, apotu ikejaanakinak luka Daudi ka Yoab koboŋut kaiŋat, koyaut luaŋatunitai luipu kakes: konye mam Abiner ajai kaDaudi Keburon; paarai atwarit ŋes, alot inapakina. 23Kedol Yoab ka ajore kere naajai kaŋes, kolimokis Yoab ebe, “Abu Abiner okoku loka Ner, mama ejai ekabaka, atwar ŋes, alot inapakina.” 24Kosodi Yoab abunore mama ejai ekabaka, kotema atiar, “Iswama anyoika? Koany, abu Abiner mama ijai; kanukinyo itwaria ŋes ido alot cut? 25#Mar 27:17; Ikis 28:6; 1 Sam 29:6; Sab 121:8; Isa 37:28. ŋjeni ijo Abiner okoku loka Ner, abu ŋesi aiŋal jo, ajenun akonilomun ka akonilomar, ajenun da kere nuiswamai.”
26Kelom Yoab kaneajai Daudi, kijuka ikiyakia atupakin Abiner, kinyakutu ŋes katan naka Sira: konye mam Daudi ajeni. 27#1 Ika 2:5; 2 Sam 20:9,10; Age 4:8; 2 Sam 2:23; 4:6. Keboŋ Abiner Keburon, koyaŋa Yoab ŋes awai kidiŋ orute einer kaŋes kaiyeiyea, kicum ŋes akoik kanen, kotwana, kanuka aokot nuka onaeeke Asakel. 28Kokau kiira Daudi, kotema atiar, “Mam nukabeikinete eoŋ ka ajakanutuka kakonyen nuka EJAKAIT ikar kere kaokot nuka Abiner okoku loka Ner: 29#Tub 9:54-57; 1 Ika 2:32,33; Sab 7:11,16; 94:22,23; Awa 2:22; 5:22; Leb 15:2. Kobeikis akou naka Yoab, ka ekek kere loka papake: kinyek akurwokin ajaun kokek loka Yoab, yenelelei, arai yenikatapon, arai yenegoŋakina obela, arai yeniketwani kekileŋ, arai yenekadit atap.” 30#2 Sam 2:23. Kwaŋin koara Yoab ka onaceke Abisai Abiner, naarai abu koar onacekec Asakel koGibeon kojie.
31 #
2 Sam 1:2,11; Yos 7:6; Tub 11:35; 2 Ika 19:1; Age 37:34; Yob 16:15; Yok 1:8. Kotema Daudi Yoab ka ituŋa kere luajaas kaŋes atiar, “Koeila anapitokus, kocna epuko, kibworo Abiner.” Kotupa ekabaka Daudi asaduku naadakitere lokatwan, 32#1 Sam 31:4; 2 Sam 1:12; 18:33; Awa 24:17. Kidaikis Abiner Keburon: kodelo ekabaka, komony kates naka Abiner: komonyata ituŋa kere. 33#2 Sam 13:13; Lim 2:15,16. Kokuudian ekabaka kanuka Abiner, kotema atiar,
“Ibusakinit kereka Abiner atwanare kwape ketwania lobaŋ?
34Mam akonikanin aenen,
Karaida akejekon aenen kirikoi:
Kwape ibirokinor etuŋanan kakonyen nuka idwe luka lumam adolit,
Ibu ijo kibiror kwaŋin.”
Komonyata ituŋa kere bobo kanukeŋ, 35#2 Sam 12:17; Yer 16:7; Rus 1:17; 2 Sam 1:12. Kopotu ituŋa kere kimaimata Daudi ainyam atap koriŋa apaaran edauna: konye kiyapo Daudi kotema atiar, “Keswamak Edeke eoŋ kwaŋin ka adepar da, arai keir atap arai icebore kere aitodol naelomaria akoloŋ.” 36Kopuput ituŋa kere, kitojokata: kwape kitojokiata ituŋa kere nueswamaenenei ekabaka. 37Kojenut ituŋa kere ka Isirael kere kapaaran kaŋin ebe mam arai akirot naka ekabaka aiar Abiner okoku loka Ner. 38Kotema ekabaka ikejaanakinakake atiar, “Mam ijenete ebe ebiror ekapolon ido loajenikina koIsirael lolo? 39#2 Sam 19:7,13; 1 Ika 2:5,6,33,34; Sab 28:4; 62:12; 2 Tim 4:14. Eoŋ da lolo anonok, karaida arai ekabaka loenyonyoikina akinyet; ketelekarito eoŋ ituŋa lu odwe luka Seruia kagogoŋ: korop EJAKAIT lokeswaman aronis kwape ejaar aronisike.”
Currently Selected:
2 Samuel 3: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.