1 Samuel 20

1Koker Daudi anyoun koNaiot toma Rama, kobu neejai Yonatan kotema ŋes atiar, “Eswama eoŋ anyoika? Anyoika numam adoli teka? anyoin akaronis mama ejai papakon, tape ŋes ekoto akaijar?” 2#Age 44:7; Yos 22:29. Kotema ŊES atiar, “Madi akuj; mam itwani: koany, mam papaka iswamai idiobore yenepol arai yenedit, komam ketejenuni eoŋ: kanukinyo kemunonikina papaka eoŋ na? Mere kwaŋin.” 3Kiyapo Daudi bobo atiar, “Ejeŋi papakon eut ebe adumunit asianut kakonyenekon; ebala ebe, ‘Kinyek Yonatan ajenun akiro nun, kinyek akadakin.’ Konye abeit, kwape ejaria EJAKAIT, kwape ejaria ekonitau da, ejai kidinika ka atwanareka ailamet adiopet bon.” 4Kosodi Yonatan atemar Daudi ebe, “Anyoika ikoto ijo keswamak, tetcre keswamakin?” 5#Mar 10:10; 28:11; 2 Ika 4:23; 1 Siit 23:31; 2 Siit 2:4; Esr 3:5; Nek 10:33; Sab 81:3; Isa 1:13; Esk 45:17; 46:6; 1 Sam 19:2; Sab 55:12; Yok 8:59; Asw 17:14. Kotema Daudi Yonatan atiar, “Koany, ilamuni elap moi, mam tikakurwoki aiboikin ainyam kekabaka: konye kisiikinai kalot, tetere anopi komanikor aitodol apaaran nakiwuniet eboŋ. 6#1 Sam 16:4; 9:12. Arai keanyu papakon ebe amamei, itemari do atiar, ‘Abu Daudi keŋit eoŋ apedor alosit oreke Bet-lekem: naarai einakini ekekike kere asubanit naka ŋolikaru.’ 7#Ikis 1:23; 2 Sam 17:4. Arai ketema ebe, ‘Ejok’; inapakin ekonikejaanakinan: konye arai kenyunyurikin, ijenuni ebe epeleikinit aswam aronis. 8#Yos 2:14; Rus 1:8; 1 Sam 18:3; 23:18; 2 Sam 14:32. Kanuka nun kikonak ekonikejaanakinan kasianut; naarai itutukoto kekonikejaanakinan aitutuket naka EJAKAIT: konye arai kejaunos numam adolit mamaka, koar ijo eoŋ elopet; naarai kanukinyo tikiyaunia eoŋ mama ejai papakon?” 9Kotema Yonatan atiar, “Madi akuj; naarai arai kajen eoŋ ebe epeleikinit papaka aiswamakin jo aronis, mam eoŋ tikalimok jo?” 10Kosodi Daudi atemar Yonatan atiar, “Iŋai bo kalimokin eoŋ arai kiibonok papakon jo kadedeŋ?” 11Kotema Yonatan Daudi atiar, “Kobia kaloto okitui.” Kouparos kesi iarei okitui.

12 # Yos 22:22. Kotema Yonatan Daudi atiar, “EJAKAIT, Edeke loka Isirael koraun ekaienan; naadaunia abokobok papaka kosawa kalo moi, arai apaaran nakiwuniet, koany, arai ejokuka kama ejai Daudi, mam kereka eoŋ ejukuni mamakon, ketejeni jo? 13#Rus 1:17; Yos 1:5; 1 Sam 17:37; 1 Siit 22:11,16. Kiswamak EJAKAIT Yonatan kwaŋin, ka adepar da, arai kitojok papaka aiswamakin jo aronis, komam eoŋ ketejenuni jo, katwar jo, tetere ilosi inapakina: kojai EJAKAIT kajo, kwape ajaar lem kapapaka, 14Mam jo kitodianakini eoŋ asianut naka EJAKAIT aroko ajari bon, tetere mam atwani: 15#2 Sam 9:1-7; 21:7; Age 21:23. Konye mam ilemari akonisianut kokaleka ikar kere: eebo, mam ilemari naemudiaria EJAKAIT lukasurup kere luka Daudi kakwap.” 16#1 Sam 25:22; 31:2; 2 Sam 4:7; 21:8. Kitutuk Yonatan kekek loka Daudi ebe, “Itepeseni EJAKAIT nin kakan naka lukasurup luka Daudi.” 17#1 Sam 18:1; 19:2; 2 Sam 1:26. Kisiyapo Yonatan Daudi bobo, kanuka amina naamina ŋes: naarai amina ŋes bala eketau elopet.

18Kosodi Yonatan atemar ŋes atiar, “Ilamuni elap moi: eanyunio ebe imamci ijo, naarai emameun ituŋanan koicolonokon, 19#1 Sam 19:2. Kidau apaarasia auni, iwonyari alosit, kodol aibois nainopitor kapaaran kaya, isalakini osiep loka amoru Esel, 20Agumuni eoŋ ikojoi iuni owaike, bala agumi ibore. 21#Ikis 6:13; 10:20; Sab 63:11; Isa 65:16; Yer 4:2. Ido koany, ejukuni etelepat, kabala ebe, ‘Kolot komou ikojoi.’ Arai katema eoŋ etelepat atiar, ‘Koany, ejaas ikojoi osiepikon lailo: kolem kes’; kobu, naarai ejai jo ainapakin, emamei aronis, kwape ejarra EJAKAIT. 22Konye arai atemari eoŋ etelepat atiar, ‘Koany, elamaros ikoioi kinarenikon,’ kolot ijo; naarai kijuka EJAKAIT joo 23Konye akiro nukiner ijo keoŋ koany, ejai EJAKAIT kidinikon keoŋ ikar kere.”

24 # Awa 27:12. Konop do Daudi kokitui: nakilamu elap, kiboikin ekabaka ainyam inyamat. 25#1 Sam 14:50. Kiboikin ekabaka oicoloŋoke, kwape atapitor, ŋes eicoloŋ loidunyas karwatat; kiteos Yonatan kaŋes, kiboikin Abiner osiep loka Saul: konye amamei etuŋanan kaibois naka Daudi.

26 # Leb 6:2; 7:21; Mar 19:16; 1 Kor 15:33; 2 Kor 6:17; Pes 2:1-3; 5:11. Konye mam Saul abu kolim adiokirot kapaaran kaŋin: naarai aomit ebe, “Adoiki ŋes akirot, mam ŋes elai; abeit mam ŋes elai.” 27Kosodi kanen kapaaran naatupakini, kedau elap ailamun, ŋes apaaran nakiareit, amamei etuŋanan kaibois naka Daudi: kotema Saul Yonatan okokuke atiar, “Kanukinyo mam okoku loka Yese ebunitor ainyam, bian karaida lolo?” 28Koboŋok Yonatan Saul ebe, “Abu Daudi kenit eoŋ kaimaimait noi alosit Bet-lekem: 29Kobala ebe, ‘Kisiikinai kalot, kenainait; naarai einakini ekekikosi asubanit kore; eeoraki da onaeeka eoŋ ajaun nina: asa do arai adumunit asianut kakonyenekon, kisiikinai kalot, kenainait, aanyun ikainaean.’ Kanuka mm ŋes emam ebunitor omesa loka ekabaka.”

30Kosodi anyunyura naka Saul ainepun aluikin Yonatan, kotema ŋes atiar, “Ikoku ijo yenika aberu naimaranana nakepali, mam eoŋ ajeni ebe iseunit ijo okoku loka Yese aisurum jo elopet ileic, aisurum da amujalal naka totokon ileje? 31Naarai mam jo icasi karaida akonijakanut eroko okoku loka Yese ejari kakwap. Aso do kijuka koomikinai, naarai abeit etwani.” 32#Age 31:36; 1 Sam 19:5; Sab 25:3; 69:4; Awa 14:25; 24:11; Mat 27:23; Luk 23:32; Yok 7:31; 15:25. Koboŋok Yonatan Saul papake ebe, “Kanukinyo earere ŋes? Anyoika iswamat ŋesi?” 33Koremo Saul akekwara aeamun ŋes; ŋes do ajenunia Yonatan ebe epeleikinit papake aiar Daudi. 34Konyou Yonatan komesa kanyunyura naededen, mam abu konyam kapaaran nakiareit naka elap: naarai akadakinit kanuka Daudi, naarai abu papake kisurum ŋes ileje.

35Kosodi kanen tupuruc kolot Yonatan okitui kapak naaseunito kaDaudi, ka etelepat loedit nepepe kaŋes. 36Kotema ŋesi etelepat atiar, “Koker cabo, komou ikojoi luagumari.” Ekeri etelepat, koguma ekojo ailam ŋes, 37Kosodi kedol etelepat aibois naadoi ekoj loagumari Yonatan, kiworo Yonatan etelepat ebe, “Mam ekojo kilamit jo?” 38Kiworo Yonatan etelepat ebe, “Koker, kiwonya, sirikiyap.” Kotukok etelepat loka Yonatan ikoioi, kobu mama ejai ejakaitike. 39Konye mam etelepat abu kojen idiobore: Yonatan ka Daudi bonik kes ajenete akirot. 40Koinak Yonatan eketelepat lujiisike, kotema ŋes atiar, “Kolot, koyana kes ore.” 41Atipet kelot etelepat, konyou Daudi kaibois naka ari naka Eŋalakimak, kibiror ebuburia, kokukum irwan auni: konuanaros, komonyata, aitodol neadeparia Daudi. 42Kotema Yonatan Daudi atiar, “Kolot inapakina, naarai kiyapo oni kere kokiror loka EJAKAIT ebe, “Eiaenena EJAKAIT kidinikon keoŋ, kidin da aurika ka aurikon, ikar kere.’’’ Konyou, kolot: koloma Yonatan ore.

Currently Selected:

1 Samuel 20: AOV1961

Highlight

Copy

Compare