Bikoluwa ndia Bhakwenda 19

Paulo nakitebeza ka Efeso

1Apolo nalia ka Koli̱nto, Paulo akolilia ka kyalo ndia ka Galati̱ya na Fi̱li̱gi̱ya naki̱ki̱dha ka Efeso kindia abhutakana bhai̱ki̱li̱za bemoti̱ 2du̱mbi̱ nakibhuolu̱li̱a bhiyo; “Mwoyo Mawelikana abhu̱bi̱kabe ndie bhu̱hi̱ki̱li̱za?”

Nibhaki̱nsi̱ki̱aku̱ Paulo bhiyo; “Bba, bhikiokimbebe eti Mwoyo Mawelikana ali̱ku̱.”

3Du̱mbi̱ Paulo ndia abhu̱olu̱li̱a bhiyo; “Andi bati̱za tina ndie bhutunga?”

Nabho nibhaki̱nsi̱ki̱aku̱ bhiyo; “Bati̱za ndia Yohana.”

4Du̱mbi̱ Paulo naki̱bhu̱si̱ki̱aku̱ bhiyo; “Bati̱za ndia Yohana abhi̱ sa kwesi̱ki̱aku̱. Yohana abhutolia bhakpa ndibha ka Isaleli̱ hi̱ki̱li̱za Yesu mindia aki̱bi̱ka mbu̱saki.” 5Ndia bhaoka yoho, nibhaki̱bhu̱bati̱za ka i̱na ndia Sali̱a Yesu. 6Paulo ndia abhu̱bi̱sabe kibhoko, Mwoyo Mawelikana naki̱bhu̱bi̱kabe, nibhakitandika onga ka loki̱ ndia kali ndiabho na pesi̱a bhunabbi̱ ndia Mambombi̱. 7Bhabhi̱ bhia bhaluku komi̱ na bhebhali.

8Dhakia sungi salo, Paulo yai̱yaga ka Ndabho kindia Bhayu̱daya yabhalami̱li̱aga nakionga ndia kali na bhoko, nalia kibhulia bhakpa dhaka ka ndia agbei̱be kusali̱a ndia Mambombi̱. 9No bemoti̱ nibhakikoma hi̱ki̱li̱za nibhakitandika ongabe zidhi Sali̱a Yesu ka bi̱ya bhakpa. Du̱mbi̱ Paulo naki̱hu̱wa ka Ndabho kindia Bhayu̱daya yabhalami̱li̱aga, naki̱ya imamoti̱ na bhai̱ki̱li̱za toli̱ nakitandika hanula nabho nji̱li̱ ndia angbei̱be Yesu tolo poni ka kisika manyeta kindia Ti̱lano yabhuongiliaga bi̱ya bhakpa. 10Paulo akola yoho poni dhakia mwaka bhali doi̱sa kindia Bhayu̱daya na Bhagi̱li̱ki̱ ndibhabhi̱ ki̱li̱kaga ka kyalo ndia ka Asi̱ya oka kigambo ndia Sali̱a Yesu.

11Mambombi̱ ampesi̱a Paulo mani̱ sa kola kima ndia akitina nki̱li̱. 12Kitambala ndiaka kibhoko imamoti̱ na ngoye ndia yagbagabe yabhai̱saga ka ndibha bhalwali̱o du̱mbi̱ bhalamiliabe na bhali̱mo bhabhutukabe.

13Bhayu̱daya bemoti̱ yabhai̱yaga ka kyalo poni nibhalia kibhubhiyabe bhakpa bhali̱mo ka i̱na Sali̱a Yesu. Yabhagiaga bhiyo; “Ka i̱na Yesu mindia Paulo akintebezagabe, nili ka lagilianu̱ bhubhutukebe bhakpa bhenjo.” 14Bhani̱ki̱ bhalu̱ku̱abho ncambu̱ ndibha Si̱kewa, ngbekua bhabhembi̱ ndibha Mambombi̱ ka Bhayu̱daya bhali̱ka ndibho lagilia bhali̱mo tukabe bhakpa. 15Tolo moti̱ mu̱li̱mo naki̱bhu̱si̱ki̱aku̱ bhiyo; “Yesu ni̱mu̱i̱bi̱a, na Paulo niniki̱mu̱i̱ba, toli̱ bhenu̱ bhuli bhani?” 16Du̱mbi̱ muluku mindia mu̱li̱mo yambi̱be nakibhugwelia toli̱ naki̱bhu̱koli̱sa mani̱ bhoponi. Abhu̱bhi̱nda, nakibhunweliaga ngoye ka kozo du̱mbi̱ nibhakitetia hu̱wabho ndu̱mbu̱ ka ndabho na hula-hula bi̱yai̱.

17Bhayu̱daya na Bhagi̱li̱ki̱ ka Efeso ndia bhaoka ndia abhuenikanabe bhani̱ki̱ ndibha Si̱kewa, nibhakibha na bhoko du̱mbi̱ nibhakinsinda Sali̱a Yesu. 18Bi̱yabho kowa bhai̱ki̱li̱za bhabi̱ka nibhakyesi̱ki̱aku̱ kibi ndiabho. 19Bhakpa bi̱yabho bhatua mani̱ sa limba bhabi̱ki̱sa kitabo ndiabho ndia yabhupaga mani̱ sa kola kima sa limba nibhaki̱su̱mba kei̱soa bi̱ya bhakpa. Ndia bhakumesa muhendo sa kitabo injo poni ndia bhasu̱mba nakigba mbangana bi̱yai̱.#19:19 Bbai̱bbu̱li̱ ndietolo ali na dulakima mutwalo tano. Dulakima moti̱ yakinganani na nsasu̱li̱ sa tolo moti̱ ka bwile ndie kala. 20Kigambo ndia Sali̱a nakidhakiaga kyalo poni du̱mbi̱ bhakpa bi̱yabho nibhaki̱hi̱ki̱li̱za.

21Kima injo naladhaki̱ enikanai̱ ka Efeso, Paulo atinaku̱ yaki ka Yelusalemu na koli̱li̱ ka Makedoni̱ya na ka Akaya. Du̱mbi̱ Paulo nakigia bhiyo; “Ki̱ki̱dha ka Yelusalemu, nili na yami ka Loma dhe.” 22Abhutika bhaluku bhebhali ndibhabhi̱ kikolaga naye, Timisewa na Elasito eti bhai̱ye ka Makedoni̱ya, ye naki̱ti̱ga ka kyalo ndia ka Asi̱ya.

Nsi̱si̱ nakitinika ka Efeso

23Ka bwile injo, nsi̱si̱ atinika ka Efeso nanga kigambo ndia Sali̱a Yesu. 24Yabhi̱be muluku moti̱ ntu̱tu̱li̱ i̱naki nandiye Di̱mi̱ti̱li̱yo mindia abhi̱ ki̱tu̱laga na kola ndabho ku̱ti̱ tukai̱ ka zabbu ndie nyagi̱ hekalo kindie bhakpa ndibha ka Efeso yabhalami̱li̱aga kihongano mindia Bhagi̱li̱ki̱ nkali̱aki i̱naki nandiye Atemi̱si̱. Bhakoli̱ ndibhaki bhatunga mbangana bi̱yai̱ nanga sa subula yoho. 25Abhueka imamoti̱ bhenjo ndibha yakolaga nabho na ndibhetolo ndibha yakolaga mulimo tabhi ndiaki nakibhugia bhiyo; “Bhadami, bhu̱i̱bi̱ nesi̱ kili na mbangana bi̱yai̱ nanga mulimo yoho ndie kikikolaga. 26Toli̱ bhu̱zi̱bi̱ na oka nesi̱ Paulo abhu̱li̱ dhaka bi̱ya bhakpa ka Efeso mehe na ka kyalo poni ndia ka Asi̱ya nakibhugia eti, kihongano poni ndia nkpa akoli̱o kali kihongano toto. 27Kima yoho kakisu̱nga ka bhakpa ongabe zidhi mulimo ndiasu̱ no na hekalo ndia kihongano nkali̱aki Atemi̱si̱ ntua mani̱ kakibha na mugaso toli̱ na mani̱ ndia kihongano mindia bhakimulami̱aga ka kyalo poni ndia ka Asi̱ya na ka nsi poni aki̱ya siyai̱be.”

28Ndia bhaoka Di̱mi̱ti̱li̱yo ndia aonga, ki̱ni̱ga nakibhugba nibhakitandika habhaga nibhakigia bhiyo; “Atemi̱si̱ mindia Bhefeso andi ntua mani̱.” 29Du̱mbi̱ bhakpa ndibhetolo bi̱yabho ka tau̱ni̱ nibhakitandika habhaga. Nibhakingba Gayo na Alisitako ndibha ka Makedoni̱ya ndibhabhi̱ kamamikana na Paulo nibhaki̱bhu̱i̱sa yau̱ ka kikalo kindia yabhasi̱dha-si̱dhaniliaga zi̱ba mbi̱na na zeni ka tau̱ni̱. 30Paulo yakabhi̱ yaki ka bi̱ya bhakpa bhenjo andu̱lu̱ abhuongilie, no bhai̱ki̱li̱za nibhakinkomi̱sa. 31Bhalemi bemoti̱ ka kyalo injo ndibhabhi̱ bhabhotua Paulo bhanti̱ki̱si̱li̱a makulu eti kala kikingabe godhaki ka kikalo kindia bhakpa bi̱yabho yabhasi̱dha-si̱dhaniliaga.

32Ka bwile injo bhakpa ndibhabhi̱ ka si̱dha-si̱dhana nibhakitandika habhaga makanga okana nanga bhakpa bi̱yabho yabhakai̱bi̱ ndia adhu̱ nibhekumesi̱li̱ ka ndabho injo. 33Bhayu̱daya ka si̱dha-si̱dhana kenjo bhamulagilia Alekizanda eti ai̱ye ateleme namusa. Nakibhudakisa bhakpa na kibhoko ndiaki andu̱lu̱ etonganebe. 34No bhakpa bi̱yabho ndia bhai̱ba nesi̱ Alekizanda andi Mu̱yu̱daya, bhoponi nibhakihabhagilia imamoti̱ dhakia bhia saha bhali nibhalia kigia bhiyo; “Atemi̱si̱ mindia Bhefeso andi ntua mani̱.”

35Andu̱lu̱ nsakagi̱ mindia ka tau̱ni̱ ndia abhudakisa nakigia bhiyo; “Bhefeso dami, nkpa poni ka nsi ai̱bi̱ nesi̱ bhakpa ndibha ka tau̱ni̱ ndia ka Efeso bhali ndibho na mulimo sa bhundilia hekalo ndia Atemi̱si̱ na tali ndia atuka gulu ndie kikilami̱aga bhia Atemi̱si̱? 36Nesi̱ ndia kalibe mindia akitoka teli̱ai̱, agbokiliani̱ bhududhukane, toli̱ bhukulukubhukolabe kima poni. 37Bhu̱bhu̱bi̱ki̱si̱ bhaluku bhehe mehe ndia bhakali na ndia bhai̱bi̱o ka hekalo kedha bbaki̱si̱a kihongano ndiasu̱. 38Kabha Di̱mi̱ti̱li̱yo na bhatu̱tu̱li̱ daki nibhali na musango na nkpa poni, bhai̱ye ka koti̱ bhanyegele. Odhuwe bhai̱yeku̱ bhabhunyegele 39Kabha nalibe kima ndietolo ndie bhukukabha ongai̱be, aki̱seli̱a ka ku̱sei̱ ndia bhakpa poni ndia abhali̱ani̱ na kilagilo. 40Nili na bhoko sa bi̱sasu̱be musango sa tina nsi̱si̱ lelu nesi̱ ndie bhikili na nsonga poni sa pesi̱ai̱ku̱ ndia akiani̱sa eti nsi̱si̱ agbokiliani̱a.” 41Ndia adhakia onga yoho, nakibhulaka bhakpa.

Currently Selected:

Bikoluwa ndia Bhakwenda 19: KWAMBA

Highlight

Copy