Bikoluwa ndia Bhakwenda 18

Paulo nali ka Koli̱nto

1Paulo ndia atuka ka ku̱sei̱ ndia ka Aleopago, adhakia tolo nke, nakituka ka Atena du̱mbi̱ naki̱ya ka Koli̱nto. 2Nakintakanaku̱ Mu̱yu̱daya i̱naki nandiye Akwi̱la nabhokotiani ka kyalo ndia ka Ponto, andu̱lu̱ ndia yabhatu̱ki̱ ka nsi ndia ka Itale na nkaki Pu̱li̱si̱la nanga sali̱a Ku̱lau̱di̱yo abha nalagi̱li̱ eti Bhayu̱daya bhoponi bhatuke ka Loma. Paulo ai̱ya zi̱babho. 3Paulo ali̱ka na Akwi̱la na nkaki Pu̱li̱si̱la nanga bhoponi bhabhi̱ kikolaga hema masumbesa. 4Tolo poni sa Sabbato Paulo yai̱yaga ka Ndabho kindia Bhayu̱daya yabhalami̱li̱aga liya dhaka Bhayu̱daya na Bhagi̱li̱ki̱ eti bhamu̱hi̱ki̱li̱ze Yesu.

5Silasi na Timisewa ndia bhatuka ka Makedoni̱ya, Paulo adhakia tolo ndiaki poni ka tebeza na pesi̱a bwakai̱so ka Bhayu̱daya nesi̱ Yesu andiye Masiya. 6No Bhayu̱daya ndia bhakoma oka ndia Paulo ali̱ka tebezabho na ongiaki loki̱ zidhi, abhungana nakibhugia bhiyo; “Kibi ndianu̱ ali guanu̱ toli̱ Mambombi̱ ka bhufubilia kali guami. Tuka endindi ni̱ki̱ya tebeza Bhakpa ndibha kali Bhayu̱daya.”

7Du̱mbi̱ Paulo naki̱hu̱wa ka Ndabho kindia Bhayu̱daya yabhalami̱li̱aga naki̱ya ka ndabho ndia Ti̱to Yositansi, Nkpa mindia Mu̱yu̱daya mindia abhi̱ kimulami̱aga Mambombi̱ nali̱ki̱ bi̱ya na Ndabho kindia Bhayu̱daya yabhalami̱li̱aga. 8Ku̱li̱si̱pasi sali̱a ngbeku ka Ndabho kindia Bhayu̱daya yabhalami̱li̱aga amu̱hi̱ki̱li̱za Sali̱a Yesu imamoti̱ na i̱nji̱ ndiaki poni toli̱ Bhakoli̱nto bi̱yabho ndia bhaoka ndia Paulo atebeza, bhahi̱ki̱li̱za du̱mbi̱ nibhakibhubati̱za.

9Tolo moti̱ ki̱li̱a, Sali̱a Yesu amuenikiliana Paulo nakingia bhiyo; “Kolo kubhutiya bhaluku bhehe, oli̱ke nolia kitebeza ndia anigbei̱be toli̱ kolo kudhwelilia. 10Nanga nili newe toli̱ kalibe mindia akitoka kolako zidhi nanga nibhuli na bhakpa ndibhamo bi̱yabho ka tau̱ni̱ manyeta yoho.” 11Du̱mbi̱ Paulo naki̱li̱ka ka Koli̱nto dhakia mwaka moti̱ na gbu̱tu̱si̱ nalia kibhuegesa bhakpa kigambo ndia Mambombi̱.

12Gali̱yo ndia abha nali gavuna mindia ka kyalo ndia ka Akaya, bhasali̱a ndibha Bhayu̱daya ndibha ka Koli̱nto bhekumesa nibhakingba Paulo nibhaki̱mu̱i̱sa kei̱soaki cueliaki musango. 13Bhantolia Gali̱yo bhiyo; “Muluku miyo agbei̱ liya bhakpa dhaka eti bhamulami̱e Mambombi̱ nesi̱ ndia kali ka kilagilo ndia Mambombi̱ ampesi̱a Musa.”

14Paulo nali bi̱ya kwetonganabe, Gali̱yo nakibhugia bhasali̱a ndibha Bhayu̱daya bhiyo; “Bhenu̱ Bhayu̱daya, ambe muluku miyo nakoli̱ kima ndia kabhongi̱ kedha musango sa mani̱, ni̱bhi̱ kibha ninibhuokiani. 15No nesi̱ aliku̱ mpaka ndia agbei̱be kigambo, i̱na imamoti̱ na kilagilo ndianu̱, bhenu̱ bhaku̱mi̱ bhudhakie nsonga injo. Kikicu̱waku̱ musango.” 16Du̱mbi̱ nakilagilia eti bhabhu̱hu̱i̱se ka koti̱. 17Du̱mbi̱ Bhayu̱daya bhehe nibhakingwelia Sositene mulemi ngbeku ka Ndabho kindia Bhayu̱daya yabhalami̱li̱aga nibhakimbi̱nda kei̱soa gavuna Gali̱yo, toli̱ Gali̱yo kasigana.

Paulo naki̱si̱ki̱a ka tau̱ni̱ ndia ka Anti̱oki̱ya ndia ka Si̱li̱ya

18Paulo ali̱ka ka Koli̱nto dhakia tolo mamadha, du̱mbi̱ nakibhulaka bhai̱ki̱li̱za naki̱ya ka Kenkeleya. Akpolia si̱kamuhu ndiaki na tombi̱li̱li̱ asi̱li̱ ndia Bhayu̱daya hi̱ki̱li̱za lakana ndia akola na Mambombi̱. Du̱mbi̱ nakidhaya meli̱ yaki ka Si̱li̱ya kindia Pu̱li̱si̱la na Akwi̱la bhai̱ya nibhamueki̱si̱. 19Bhaki̱dha ka tau̱ni̱ manyeta ndia ka Efeso kindia Paulo anduwa Pu̱li̱si̱la na Akwi̱la. Paulo nku̱mi̱ naki̱ya ka Ndabho kindia Bhayu̱daya yabhalami̱li̱aga nakibhuhakani̱za Bhayu̱daya. 20Bhai̱ki̱li̱za bhankunga Paulo dhakia nabho tolo mamadha ka Efeso, no nakikoma. 21No kayaki, nakibhulaki̱sana bhiyo; “Ni̱ki̱si̱ki̱a, Mambombi̱ kanibhali̱sana.” Du̱mbi̱ nakidhaya meli̱ nakituka ka Efeso. 22Ndia aki̱dha ka Kai̱sali̱ya, agu̱si̱a ka Yelusalemu nakibhumati̱sa bhai̱ki̱li̱za du̱mbi̱ naki̱di̱da ka Anti̱oki̱ya.

23Ndia adhakia tolo mamadha ka Anti̱oki̱ya, Paulo atukaku̱, naki̱ya ka kyalo poni ndia ka Galati̱ya na Fi̱li̱gi̱ya, nalia ki̱bhu̱si̱ki̱saku̱ mani̱ bhai̱ki̱li̱za bhoponi.

Apolo ka Efeso na ka Koli̱nto

24Ka bwile injo, Mu̱yu̱daya i̱naki nandiye Apolo nabhokotiani ka tau̱ni̱ ndia ka Alekizandu̱li̱ya ka kyalo ndia ka Mi̱si̱li̱, abi̱ka ka Efeso. Abha nali muluku mindia asomi̱o toli̱ nai̱bi̱ Ndia Bhahandika. 25Yabhamwegesi̱be ndia angbei̱be Sali̱a Yesu toli̱ yamuongagabe Yesu na egesa ndia angbei̱be bhiani. No abha nai̱bi̱ ndia agbei̱be bati̱za ndia Yohana u̱kaka. 26Nakitandika onga ndia kali na bhoko ka Ndabho kindia Bhayu̱daya yabhalami̱li̱aga. Pu̱li̱si̱la na Akwi̱la ndia bhamuoka, nibhakimueka ka i̱nji̱ ndiabho toliaki kulungi ndia angbei̱be Mambombi̱.

27Apolo ndia akabha yaki ka Akaya, bhai̱ki̱li̱za ndibha ka Efeso nibhakinsagika eti ayeku̱. Bhabhuhandikilia bhai̱ki̱li̱za ndibha ka Akaya eti bhantangililie kulungi. Ndia aki̱dhaku̱, abhukonia bhenjo ndibha bhamu̱hi̱ki̱li̱za Yesu nanga kobhu̱ ndia Mambombi̱. 28Yabhuhakani̱zaga toli̱ abhu̱si̱nga Bhayu̱daya ndibha bhakoma hi̱ki̱li̱za kei̱soa bhakpa nalia kiani̱sa tuka ka Ndia Bhahandika eti Yesu andiye Masiya.

Currently Selected:

Bikoluwa ndia Bhakwenda 18: KWAMBA

Highlight

Copy