Bikoluwa ndia Bhakwenda 20

Paulo naki̱ya ka Makedoni̱ya na ka Bhu̱gi̱li̱ki̱

1Nsi̱si̱ ndia asi̱yabe, du̱mbi̱ Paulo naki̱bhu̱ti̱ki̱sa bhai̱ki̱li̱za nakibhutolia kigambo ndia aki̱bhu̱si̱ki̱saku̱ mani̱, nakibhulaka, naki̱mei̱sa yaki ka kyalo ndia ka Makedoni̱ya. 2Paulo akolilia ka kyalo injo nalia kibhutolia bhai̱ki̱li̱za kigambo ndia aki̱bhu̱si̱ki̱saku̱ mani̱, du̱mbi̱ naki̱ki̱dha ka Bhu̱gi̱li̱ki̱, 3kindia adhakia sungi salo. Nalia kyetekaniza yaki ka Si̱li̱ya, aoka eti Bhayu̱daya bemoti̱ bhangondhili mabhi̱li̱ ka kabha olaki du̱mbi̱ nakitinaku̱ si̱ki̱aki koliliaki ka Makedoni̱ya. 4Bhaluku bhehe bhamueki̱sa ndibho Paulo; Sopateli̱ mi̱ki̱ mindia Pi̱lo, mindia ka tau̱ni̱ ndia ka Bbeleya ndia ka Makedoni̱ya na Alisitako na Seku̱ndo ndibha ka tau̱ni̱ ndia ka Sesalonika na Gayo mindia ka tau̱ni̱ ndia ka Delubbe na Ti̱ki̱ko na Tu̱lofi̱mo ndibha ka kyalo ndia ka Asi̱ya imamoti̱ na Timisewa. 5Bhaluku bhehe bhai̱ya na Paulo nibhakindwelilia mbu̱sa, nibhaki̱ya namusa ka tau̱ni̱ ndia ka Tulowa kindia bhambundilia. 6No kidhaya meli̱ tukasu̱ ka Fi̱li̱pi̱ Bhu̱geni̱ sa Mugati̱ ndia kali̱ku̱ Ki̱tu̱mbi̱so nalasi̱be. Tolo tano nalakoli̱be, kibhutakana ndibhetolo ka Tulowa kindie kidhakia tolo ncambu̱.

Paulo naki̱mu̱hu̱mbu̱la Yu̱ti̱ko ka Tulowa

7Ka tolo ndia kateketa ka wi̱ki̱, kyekumesa leliaga imamoti̱. Nesi̱ abha kakabha yaki umali̱, Paulo ali̱ka nalia kionga na bhakpa doi̱sa saha nkaga ndia ki̱li̱a. 8Ka kisika sa golofa kindie yeki̱si̱dha-si̱dhani̱li̱o, abha nali̱ku̱ tala mamadha. 9Kowa bhenjo ndibhabhi̱ nibhamuokiani Paulo, yabhi̱ku̱ ntabhana moti̱ i̱naki nandiye Yu̱ti̱ko abha nali̱kagi̱ ka di̱li̱sa tolo nakingba. Paulo nalia kiegesa, atukilia ka kisika ndiake salo sa golofa naki̱gu̱wa gwabhi̱mba. Ndia bhai̱ya mei̱saki bhantakana naku̱. 10Paulo asi̱ma gwabhi̱mba nakingombabe ntabhana naki̱mu̱mei̱sa. Nakibhugia bhakpa bhenjo bhiyo; “Bhukulukutuntula, alia nali̱ki̱.” 11Du̱mbi̱ Paulo naki̱si̱ki̱a na bhakpa gulu ka golofa kindia abhi̱o ka egesabho. Ndia bhadhakia liaga imamoti̱, naki̱li̱ki̱li̱a hanula nabho dhakia bwile mamadha doi̱sa u̱ma-u̱ma du̱mbi̱ naki̱ya. 12Bhai̱ki̱li̱za bemoti̱ bhamueki̱sa ntabhana minjo i̱saki ka i̱nji̱ nibhadhedhelu̱ si̱ni̱ nanga abha nali̱ki̱.

Paulo nakituka ka Tulowa naki̱ya ka Mileto

13Bhesu̱ kidhaya meli̱ ni̱ki̱ki̱ya ka tau̱ni̱ ndia ka Asosi, kindia Paulo abha kaya dhai̱lia meli̱. Akitolia eti kikole bhiyo nanga abha kayakiku̱ na kigu. 14Ndie kitakanana na Paulo ka Asosi, adhaya ka meli̱ kindie ki̱bhi̱o ni̱ki̱ki̱ya ka tau̱ni̱ ndia ka Mitilene. 15Tolo ndia adhabhiabe, kidhaya meli̱ ni̱ki̱ki̱ki̱dha ka kizinga ndia ka Ki̱yo. Du̱mbi̱ sibhau̱ma nikikizaba ka tau̱ni̱ ndia ka Samosi̱. Tolo ndia adhabhiabe dhe, ni̱ki̱ki̱ki̱dha ka tau̱ni̱ ndia ka Mileto. 16Paulo abha nati̱ni̱ku̱ makanga tombaki ka tau̱ni̱ ndia ka Efeso andu̱lu̱ kalakidhakia tolo mamadha ka kyalo ndia ka Asi̱ya, nanga abha kayaki yau̱ ki̱dhaki ka Yelusalemu yatokikane ka tolo sa Pentekoti̱.

17Nikilia ka Mileto, Paulo abhu̱ti̱ki̱sa bhangbeku ka bhai̱ki̱li̱za ndibha ka Efeso i̱ya takananaki. 18Ndia bhaki̱dha, Paulo nakibhugia bhiyo; “Bhu̱i̱bi̱ nesi̱ yeni̱li̱kaga na bhenu̱ tolo poni, tukilia ka tolo ndie nikidhiliaku̱ ka kyalo ndia ka Asi̱ya doi̱sa tolo ndie nitukiliaku̱. 19Ninkolilia Sali̱a Yesu ninidhoti̱ toli̱ mulima nanizigidhi nanga Bhayu̱daya dami bhanigodhilia mabhi̱li̱. 20Bhu̱i̱bi̱ nesi̱ nitebeza toli̱ ninikibhuegesa kigambo ndia angbei̱be Sali̱a Yesu ka bi̱ya bhakpa na ka i̱nji̱ ndianu̱. 21Ni̱bhu̱toli̱ Bhayu̱daya na Bhagi̱li̱ki̱ eti bhesi̱ki̱eku̱ kibi ndiabho andu̱lu̱ bhasi̱ki̱e kindia Mambombi̱ toli̱ bhamu̱hi̱ki̱li̱ze Sali̱a Yesu Ki̱li̱si̱to.”

22Toli̱ endindi Mwoyo Mawelikana anilagi̱li̱ eti niye ka Yelusalemu ndie ki̱hi̱bi̱ ndia akinienikanabe. 23Ndie ni̱hi̱bi̱o ali ndia Mwoyo Mawelikana ndia akinitoliaga ka tau̱ni̱ poni kindie nikiyaga eti, bhakpa bhakinigba, bhani̱bi̱se ka nkomo toli̱ bhanieni̱se bhu̱su̱. 24No bwomezi̱ ndiamo kali na mugaso kowa emi, mulimo ndiamo andi dhakia lubhimbi ndia Sali̱a Yesu ndia ani pesi̱o sa tolia bhakpa Makulu Mabhonga ndia agbei̱be kobhu̱ ndia Mambombi̱.

25Ni̱hi̱bi̱ nesi̱ kowa bhenu̱ ndibhe nibhutebezi ndia agbei̱be kusali̱a ndia Mambombi̱, kalibe mindia akitodha tangiami. 26Nilikatolianu̱ eti tukilia lelu nkpa poni kasi̱ki̱a mbu̱sa ka hi̱ki̱li̱za ndiaki, kili na musango poni, ndiamo mulimo nidhakia. 27Nanga nibhutolia poni ndia Mambombi̱ akabhi̱o. 28Bhwegendi̱e ka hi̱ki̱li̱za ndianu̱ toli̱ bhubhubhundilie bhakpa ndibha Mwoyo Mawelikana abhu̱pesi̱ mulimo eti bhubhubhundilie. Bhubhubhundilie bhai̱ki̱li̱za ndibha Mambombi̱#20:28 bhai̱ki̱li̱za ndibha Mambombi̱ Bbai̱bbu̱li̱ ndietolo ali na bhai̱ki̱li̱za ndibha Sali̱a Yesu. abhusumba na magi̱la ndia mi̱ki̱ mindiaki ndia adhu̱kana. 29Ni̱hi̱bi̱ nesi̱ kibhutukabe, bhakpa bhatua mbela bhakibhubi̱kaku̱ bhalu̱ze hi̱ki̱li̱za ndianu̱ nesi̱ bhanyama ndibha ka mabhi̱li̱ bhamakalamaga bhakiguaga ka bhi̱hi̱o sa bhantama bhabhuswekisa. 30Na kowa bhenu̱, akibhaku̱ bhai̱ki̱li̱za ndibha bhakibha na egesa sa mbela andu̱lu̱ bhabhubhuebe bhai̱ki̱li̱za ndibhetolo. 31Ti̱-no bhwelinde, bhukanilie nesi̱ nidhakia mwaka salo ninilia kibhuhabhula toli̱ niena bhu̱su̱ si̱ni̱ tolo poni nanga bhenu̱.

32“Endindi ndie nikadhuanu̱, nili kakunga Mambombi̱ eti abhubhundilie toli̱ bhu̱li̱ke ni̱bhu̱hi̱ki̱li̱zi̱ eti akikizunaga nanga kobhu̱ ndiaki. Mambombi̱ aki̱bhu̱pesi̱a nki̱sa ndia alaki̱sana pesi̱a bhakpa ndibhaki ndibha abhuwelikesi̱o. 33Kikabhimbebe feza, zabbu kedha ngoye mabhonga ndia nkpa poni. 34Bhu̱i̱bi̱ nesi̱ nikola ninikitunga mbangana ndia akinigasilia na bhadami.” 35Kakola mulimo poni na mani̱ nesi̱ nikola, nibhuani̱sa eti akigbokiliani̱ konia bhanako. Bhukanilie kigambo ndia Sali̱a Yesu nku̱mi̱ aonga bhiyo; “Andi sa nki̱sa si̱ni̱ uwe pesi̱aku̱ koli̱sa pesi̱ako.” 36Paulo ndia adhakia ongilia bhakpa, asu̱ku̱mana nakisaba imamoti̱ nabho. 37Bhamulaka nibhalia kigama si̱ni̱ nanga Paulo abhi̱ ka dhuwabho. 38Paulo ndia abhugia eti bhakada kitodha tangiaki, bhakadhedhelua. Du̱mbi̱ nibhakimueki̱sa kai̱ya dhaya meli̱.

Currently Selected:

Bikoluwa ndia Bhakwenda 20: KWAMBA

Highlight

Copy