Bikoluwa ndia Bhakwenda 17

Paulo nakitebeza ka Sesalonika

1Paulo na Silasi ndia bhakolia ka tau̱ni̱ ndia ka Anfipoli na Apoloniya, bhabi̱ka ka tau̱ni̱ ndia ka Sesalonika ka Ndabho kindia Bhayu̱daya yabhalami̱li̱aga. 2Nesi̱ abhi̱ nali mu̱li̱ye ndia Paulo, ai̱ya ka Ndabho kindia Bhayu̱daya yabhalami̱li̱aga dhakia Sabbato salo nalia kihanula na bhakpa tuka ka Ndia Bhahandika. 3Ali̱ka toliabho na ani̱sa mazima eti Masiya alina ena bhu̱su̱ toli̱ ahu̱mbu̱ke. Nakigia bhiyo; “Yesu mindie nilikatolianu̱be miyo andiye Masiya.” 4Bemoti̱ kowa Bhayu̱daya na bhakali̱ bhatua ngu̱ko na Bhagi̱li̱ki̱ bi̱yabho ndibhabhi̱ kimulami̱aga Mambombi̱ bhabhala eti ndia Paulo na Silasi bhali̱ka ongai̱ andi mazima.

5No bhasali̱a ndibha Bhayu̱daya i̱ni̱ abhugba toli̱ nibhakibhukumesa bhayayi andu̱lu̱ bhatine nsi̱si̱ ka tau̱ni̱ manyeta. Bhai̱ya ka i̱nji̱ ndia Yasoni̱ nibhaki̱bhu̱na ki̱ku̱ku̱ sa ndabho ndiaki nibhakakabha Paulo na Silasi bi̱ki̱sabho ka bi̱ya bhakpa. 6No ndia bhakabhudwanaku̱, bhamu̱i̱sa Yasoni̱ na bhai̱ki̱li̱za ndibhetolo kei̱soa bhasali̱a ndibha ka tau̱ni̱ manyeta, nibhagbei̱ habhaga bhiyo; “Bhaluku bhehe ndibhabi̱ki̱ tina nsi̱si̱ ka nsi poni bhabi̱ki̱ mehe, 7toli̱ Yasoni̱ abhubhali̱sani̱ bi̱kabho kindiaki. Bhoponi bhakomi kilagilo ndia Kai̱sali̱, bhagbei̱ gia eti alibe sali̱a mindietolo, i̱naki andiye Yesu.” 8Bhakpa poni na bhasali̱a ndibha ka tau̱ni̱ manyeta ndia bhaoka yoho, nibhakituntula. 9Du̱mbi̱ bhasali̱a ndibha ka tau̱ni̱ nibhakingia Yasoni̱ na bhai̱ki̱li̱za daki eti bhasasule mbangana andu̱lu̱ bhabhudhwelie. Ndia bhadhakia sasula mbangana, nibhakibhudhwelia.

Paulo na Silasi ka Bbeleya

10Ki̱li̱a injo, bhai̱ki̱li̱za bhanteti̱sa Paulo na Silasi ka tau̱ni̱ ndia ka Bbeleya. Ndia bhaki̱dhaku̱, bhai̱ya ka Ndabho kindia Bhayu̱daya yabhalami̱li̱aga. 11Bhakpa ndibha ka Bbeleya bhaoka toli̱ nibhakibhala makulu ndia Paulo aonga nibhadhedhelu̱ koli̱sa bhenjo ndibha ka Sesalonika. Yabhasomaga tuka ka Ndia Bhahandika tolo poni kabha i̱ba ndia Paulo na Silasi bhabhi̱ ka ongai̱ nali mazima. 12Du̱mbi̱ Bhayu̱daya bi̱yabho imamoti̱ na Bhagi̱li̱ki̱ bhakali̱abho bhatua ngu̱ko na bhalu̱ku̱abho nibhaki̱hi̱ki̱li̱za.

13No Bhayu̱daya ka Sesalonika ndia bhaoka eti Paulo agbei̱ tebeza kigambo ndia Mambombi̱ ka Bbeleya, bhai̱yaku̱ nibhakitina nsi̱si̱. 14Bhai̱ki̱li̱za nibhakinteti̱sa Paulo ka mwalo mesi̱yo, no Silasi na Timisewa nibhaki̱ti̱ga ka Bbeleya. 15Bhenjo ndibha bhamueki̱sa Paulo, bhamu̱i̱sa ka Atena, nibhaki̱si̱ki̱a ka Bbeleya nibhakimulagilia Silasi na Timisewa tomba Paulo yau̱.

Paulo nakitebeza ka Atena

16Paulo nalia ka Atena nabhu̱bhu̱ndi̱li̱ Silasi na Timisewa, mulima naki̱nzi̱gidha si̱ni̱ nanga tau̱ni̱ manyeta yoho yamadhi̱ku̱ bhakihongano. 17Naki̱ya ka Ndabho kindia Bhayu̱daya yabhalami̱li̱aga nakibhuhakani̱za Bhayu̱daya imamoti̱ na Bhagi̱li̱ki̱ ndibhabhi̱ kimulami̱aga Mambombi̱ toli̱ yabhuegesaga bhakpa ndibhabhi̱ kimuokianaga tolo poni ka si̱mana. 18Bi̱ya bhakpa bhatua magezi̱ ndibhabhi̱ ka kpata ndia Epi̱ku̱li̱yo na bhenjo ndibha bhai̱bi̱ kilagilo nibhakimuhakani̱za. Bemoti̱ nibhakiolu̱li̱a bhiyo; “Andiki ndia ki̱ngi̱ minjo akionga?” Ndibhetolo nibhakigia bhiyo; “Ali bhia eti akaongabe bhamambombi̱ ndibha bhakpa ndibha mbamba bhakibhulami̱aga.” Bhaonga yoho nanga Paulo ali̱ka tebeza Makulu Mabhonga ndia angbei̱be Yesu na hu̱mbu̱ka ndiaki. 19Du̱mbi̱ nibhakinkunga Paulo bi̱kaki ka ku̱sei̱ ngbeku ka tau̱ni̱ ndia ka Aleopago nibhakingia bhiyo; “Okitolie egesa ndiako mpiaka yoho agbei̱be eki?” 20Olika onga kima ndie bhikiokimbebe, toli̱ kikikabha i̱ba makulu si̱. 21Bhakpa poni ndibha ka Atena na ndibha bhatuka mbamba li̱kabho ka Atena bhadhakia tolo mamadha nibhalia kibhutolia ndibhetolo kima mpiaka ndia bhaoki̱o toli̱ nabho okiana kima ndietolo mpiaka.

22Paulo atelema ka ku̱sei̱ injo ndia ka Aleopago nakibhugia bhakpa ndibha ka Atena bhiyo; “Nitangi̱ nesi̱ bhuli bhatua di̱ni̱ si̱ni̱. 23Nanga kindie nimamikiliani̱o, nitakaniku̱ kindie bhukulami̱li̱aga toli̱ nitangi̱ kindie bhukusumbiliaga kibhembo ndianu̱ nibhahandi̱ki̱be bhiyo; Kowa mambombi̱ mindie bhi̱ki̱mu̱i̱bi̱. Makulu si̱ bhu̱ku̱mu̱i̱bi̱ mindie bhukumulami̱aga toli̱ yoho andu̱lu̱ ndie nikaya tolianu̱be.”

24Mambombi̱ mindia ahanga nsi na kima poni ndia ali̱ku̱, andiye Sali̱a Mambombi̱ mindia alemi̱ gulu na nsi toli̱ kaki̱li̱kaga ka hekalo ndia nkpa ahali̱ki̱o. 25Toli̱ nkpa kakinkoliliaga bhia eti ali na kima poni ndia akikabha. Bhuai̱be ye nku̱mi̱ akimpaga nkpa bwomezi̱ na kima ndietolo poni. 26Mambombi̱ amuhanga nkpa moti̱ mindia abhokota ntu̱la poni, naki̱bi̱sabe tolo ndiabho ndia bhakidhakia ka nsi toli̱ ali̱ka nabhoi̱ kyalo sa ntu̱la poni na mutano si̱ kindia aki̱li̱ka. 27Mambombi̱ akola yoho andu̱lu̱ bhankabhage kindia ali̱o kedha bhakintangi̱a nakabha ndiaka nseli̱be nkpa poni. 28Nanga bhahandi̱ki̱ bhiyo;

“Ka mani̱ ndia Mambombi̱ kili na bwomezi̱ toli̱ kikimamikanaga.”

Nesi̱ bemoti̱ kowa bhahandi̱ki̱ bhagia bhiyo;

“Bhesu̱ poni kili bhani̱ki̱ ndibhaki.”

29Nesi̱ kili bhani̱ki̱ ndibha Mambombi̱, bhikilikyeli̱li̱kana eti Mambombi̱ ali bhia kihongano ndia nkpa akoli̱o tuka ka feza, zabbu kedha tali. 30Kalasi̱o Mambombi̱ kabhi̱ nasigani̱ i̱ba kima yoho, no endindi akibhulagilia bhakpa poni kindie bhali̱o kwesi̱ki̱aku̱. 31Nanga abhoi̱ tolo ndia ada kibhucueliaku̱ bhakpa poni musango na bwi̱ngani̱za toli̱ muluku mindia amboi̱o akicuwa ndie musango. Abhuani̱sa yoho bhakpa poni ndia amu̱hu̱mbu̱la.

32Ndia bhaoka ndia agbei̱be hu̱mbu̱ka, bemoti̱ bhantebiaga, no ndibhetolo nibhakigia bhiyo; “Tolo ndietolo kikikabha oka nokuongabe si̱ni̱ di̱ni̱ ndio ogbei̱ tebezai̱be.” 33Du̱mbi̱ Paulo nakituka ka ku̱sei̱. 34Bemoti̱ bhamu̱hi̱ki̱li̱za Yesu toli̱ nibhakibha ka kpata ndia bhenjo ndibha bhala ndia Paulo aongabe. Kowabho yabhi̱ku̱ Di̱yonensi̱yo, ntua ngu̱ko ka ku̱sei̱ ndiabho ndia yabhagiagaku̱ Aleopago na nkali̱ nandiye Damali̱ na ndibhetolo bi̱yabho.

Currently Selected:

Bikoluwa ndia Bhakwenda 17: KWAMBA

Highlight

Copy