१ तिमोथि 4
4
झुठा सिछ्याक बारेम चेताबनि
1पबित्र आत्माले एक्दम अस्लिमे कहल छो कि पछास आइलाहार समैम कुन्हुँ-कुन्हुँ मानुकसब ठक्लाहार आत्मा आ भुत-पेरेतक सिछ्याम मन लगाइक बिस्वासस पछा हट्तो। 2एहेन सिछ्या झुठ बज्लाहार कप्टि मानुकसिस आब्छो। ओकर्सिक बिबेक धिप्त फलामस डामिक मोर्ल जक्या रह छो। 3ओकर्स्या बिह्या कर आ कुन्हुँ-कुन्हुँ खाइलाहार चिजसब खाइ गल्ति स्यो कहिक मानुकसिका सिखाइ छो, जुन चिज बिस्वास कर्लाहार आ सत्ये जान्लाहार मानुकस्या पर्मेसोरका धन्येबाद दैक खाइ सक्तो किरकि उ सभे चिजका पर्मेसोरले सिरिस्टि कर्ल स्यो। 4पर्मेसोरले सिरिस्टि कर्ल सभे चिज एक्दम अस्लि छो। ओहेस पर्मेसोरका धन्येबाद दैक उ सभे चिज खाइ सक्ब। 5किरकि पर्मेसोरक बचन आ पर्थनाले उ सभे चिजका सुद्द कर्छो।
अस्लि सेबक
6तुइं यि बातसब अरु बिस्वासि दाजुभाइ आ दिदि-बहिनसिका सिखाइब त तुइं पालन कर्ति आइल नियम आ बिस्वासक बचनम जोर्गर भइक खिरिस्ट येसुक अस्लि सेबक हेब। 7तुइं पर्मेसोरस दुर कर्लाहार बात आ कल्पना करिक बनाइल खिसासिस दुर रह। बरु पर्मेसोरक भक्तिम जिबन बिताब लागि कोसिस कर्। 8किरकि देहक कस्रतस त कनेके मत्रे फैदा हेतो तर पर्मेसोरक भक्तिस त सभे बातम फैदा हेतो। किरकि भक्तिक जिबनम अखन्क आ पछास पाइलाहार जिबनक पनि बाचा छो। 9यि बात साँच्चेक स्यो, एक्रा सभेले सुइकार कर पर्तो। 10एहे कारन हमर्स्या पुरा मन लगाइक मेहेनत कर्स्यो किरकि आपन्सिक आस जिउँत पर्मेसोरम छो। उ सभे मानुकसिक, खास करिक ओक्रम बिस्वास कर्लाहार्सिक मुक्ति देल्हार स्यो।
11तुइं एहे बातसब सिखा आ पालन कर लागि आग्या धि। 12तुइं जबान स्या तर तोर उमेरक कारनस कुन्हुँले तोर हेला कर्लाहार मौका नाइ पाउस। ओहेस बिस्वास कर्लाहार मानुकसिक बिचम तोर बोलि-बचन, चाल-चलन, बिस्वास, मयाँ आ पबित्र भइक रहलाहार बातम एगो उदाहरन बन्। 13हम नाइ आइल तलिक तुइं बिस्वासिसिका धर्मसास्तर पह्रिक सुना अनि ओकर्सिका हौसला धि आ सिछ्या देति रह। 14जुन बरदान तुइं एल्डरस्या तोर उप्रिम हाथ राख्त खुमा अगमबानिक मार्फत पाइल छल, ओक्र हेला नाइ कर्। 15तुइं आप्न पुरा ध्यान आ सक्ति एहे सिखाइलाहार कामम लगा, ताकि तोर कर्ल अस्लि कामसब सभेले देखुस। 16तुइं आप्न जिबन आ आप्न सिखाइल सिछ्याक बारेम होसयार भइक रह। अनि उ कामम लग्ले रह, एना कर्ब त तुइं आप्न आ तोर बात सुन्लाहार्सिक जिबन बचाइब।
Currently Selected:
१ तिमोथि 4: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
