१ थेस्लोनिकि 4
4
पर्मेसोरका मन पर्लाहार जिबन
1अन्तिमम ए हम्र दाजुभाइ आ दिदि-बहिनसब, तोर्स्या जेनामे हमर्सिस पर्मेसोरका मन पर्लाहार जिबन जिअ लागि सिख्ल स्या, ओनाहिमे कर्ति पनि स्या। अनि झन आरो ओनाहिमे कर्ति जो कहिक हमर्स्या प्रभु येसुक नामम तोर्सिका बिन्ति कर्स्यो। 2किरकि तोर्सिका थाहा छो, हमर्स्या प्रभु येसुक मार्फतस पाइल कुन-कुन आग्या तोर्सिका देल छल्यो कहिक। 3किरकि पर्मेसोरले तोर्सिका पबित्र भेल देख चाहाछो। ओहेस तोर्स्या बेभिचारस दुर रह। 4तोर्स्या सभे जनाले आप्न देहका अधिनम राखिक पबित्र आ इज्जतदार भइक जिअ लागि सिख पर्तो।#4:4 गिरिक भसास यि पदका एनामे पनि अनुबाद कर सक्ब: पबित्र आ आदर्निय तरिकास आप्न बहुसङ जिबन बिताइलाहार बात सभे मानुकले जान पर्तो। 5पर्मेसोरका नाइ चिन्लाहार अरु मानुकसिक जक्या छरा इच्छाम फस नाइ हेतो। 6एहेन खराब काम करिक कुन्हुँले बिस्वासि भाइस गलत फैदा लुत नाइ हेतो। किरकि एहेन काम कर्लाहार्सिका प्रभुले कठोर सजाए देतो। एक्र बारेम हमर्स्या अगाहि तोर्सिका करा चेताबनि देल स्यो। 7किरकि पर्मेसोरले आपन्सिका अपबित्र हब लागि नाइ तर पबित्र जिबन जिअ लागि बलाइल स्यो। 8ओहेस जुन मानुकले यि आग्याका इन्कार कर्तो, ओइले मानुकका नाइ तर तोर्सिका पबित्र आत्मा देल्हार पर्मेसोरका इन्कार कर्तो।
9तर बिस्वासि दाजुभाइ आ दिदि-बहिनस्या केनामे एक-दस्रोका मयाँ कर पर्तो कहिक तोर्सिका निख खाँचो नाइ छो। किरकि एक-दस्रोका मयाँ कर लागि पर्मेसोरले आप्नि तोर्सिका सिखाइल छो। 10तोर्स्या साँच्चेक माकेडोनिया पर्देसक सभे बिस्वासि दाजुभाइ आ दिदि-बहिनसिका ओनाहिमे मयाँ पनि कर्ति स्या। एनाहिमे तोर्स्या एक-दस्रोका झन आरो मयाँ कर्ति जो कहिक हमर्स्या बिन्ति कर्स्यो। 11हमर्स्या आग्या देले जक्या तोर्स्या सान्त सोभाबक भइक जिबन बिता। अनि आप्ने कामक फिक्रि कर् आ आप्ने हाथस मेहेनत करिक कमा। 12एना कर्ब त अरु मानुकस्या तोर्सिका सम्मान कर्तो। अनि तोर्सिका कक्रो उप्रिम पनि भर पर नाइ पर्तो।
मोर्ल बिस्वासिसब फेरि जिउँत भेल्हार बारेम
13तर ए हम्र दाजुभाइ आ दिदि-बहिसब, मोरि सक्ल बिस्वासिसिक बारेम तोर्सिका थाहा हउस कहिक हमर्स्या चाहास्यो, ताकि जिबनक आस नाइ भेल अरु मानुकसिक जक्या तोर्सिका सोक कर नाइ परुस। 14किरकि आपन्स्या बिस्वास कर्छ कि येसु मोर्लो आ फेरि जिउँत भइक उठ्लो। ओनाहिमे मोरि सक्ल बिस्वासिसिका पर्मेसोरले येसुक मार्फत फेरि जिउँत कर्तो।
15प्रभुक बचन अन्सार हमर्स्या तोर्सिका यि कह स्यो कि आपन्स्या जतेक जना प्रभुक आइलाहार दिन् तलिक जिउँत रहब, मोर्ल मानुकसिस अगा कुन्हुँ हालतम पनि प्रभुका भेट नाइ पाइब। 16किरकि प्रभु आप्नि बर्कि आदेसक अबाजम सोर्गस एतो। उजुमा मुल सोर्गदुतक सोर आ पर्मेसोरक तुरहि बज्ल बर्कि अबाज सुनाइतो। अनि खिरिस्टम मोर्ल बिस्वासिसब सभेस अगा जिउँत भइक उठ्तो। 17तब आपन्स्या जतेक जना जिउँत रहब, प्रभुका अकासम भेट लागि ओकर्सिसङि मेघम उठाइल जेब। एनामे आपन्स्या सब्दिन प्रभुसङ रहब। 18ओहेस तोर्स्या एक-दस्रोका यि बातस हौसला धि।
Currently Selected:
१ थेस्लोनिकि 4: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
