१ थेस्लोनिकि 5
5
प्रभु आइलाहार दिनक लागि तयार रह
1ए हम्र दाजुभाइ आ दिदि-बहिनसब, प्रभु कह्या आ कुन जुमा एतो कहिक तोर्सिका निख खाँचो नाइ छो। 2किरकि यि बात तोर्सिका एक्दम अस्लिमे थाहा छो, जेनामे चोर नाइ सोच्ल जुमा राति आब्छो, ओनाहिमे प्रभुक दिन् पनि अन्चकिएम एतो। 3जब मानुकस्या “एक्दम सान्ति आ सभे ठिक छो” कहिक कहति रहतो। ओहे जुमा देहभारि भेल जनिका बेथा लग्ल जक्या अन्चकिएम ओकर्सिक उप्रिम बिनास एतो अनि ओकर्स्या कथ्यो करिक पनि बच नाइ सक्तो। 4तर ए हम्र दाजुभाइ आ दिदि-बहिनसब, तोर्स्या यि बातक बारेम अन्जान नाइ स्या। ओहेस प्रभु आइलाहार दिन् चोर जक्या अन्चकिएम एतो त तोर्सिका अचम्म मान नाइ पर्तो। 5किरकि तोर्स्या सभे जना इजोत आ दिनक सन्तान स्या। आपन्स्या रात आ अँन्हारक सन्तान नाइ स्या। 6ओहेस अरु मानुकसिक जक्या आपन्स्या नाइ सुतुम तर जग्ले रहिक होसियार रहुम। 7किरकि सुत्लाहार मानुकसब राति सुत्छो आ मध पिक मत्लाहारसब पनि रातिए मत्छो। 8तर आपन्स्या दिनक सन्तान भेल कारनस होसियार रहिक सेनाले छातिम कबच पिन्ले जक्या आपन्स्या बिस्वास आ मयाँक कबच पिन्हुँम अनि मुक्तिक आसका टोप जक्या पिन्हुँम। 9किरकि पर्मेसोरले आपन्सिका सजाए दिअ लागि नाइ तर आपन्सिक प्रभु येसु खिरिस्टक मार्फत मुक्ति दिअ लागि चुन्ल छो। 10प्रभु येसु आपन्सिक लागि यि कारन मोर्लो कि आपन्स्या चाहे जिउँत रह कि मोर्ल रह, आपन्स्या सभे जना ओक्रेसङ जिअ सकुम। 11ओहेस तोर्स्या अखन कर्ले जक्या एक-दस्रोका हौसला धि आ बिस्वासम जोर्गर बनाइलाहार काम कर्।
अन्तिम अर्ति
12ए हम्र दाजुभाइ आ दिदि-बहिनसब, हमर्स्या तोर्सिका यि बिन्ति कर्स्यो कि तोर्सिक बिचम एक्दम मन लगाइक प्रभुक काम कर्लाहार आ तोर्सिका सिछ्या देल्हार अगुवासिक आदर कर्। 13ओकर्स्या कर्ल कामक लागि ओकर्सिका मयाँ आ बर्कि सम्मान कर्। अनि तोर्स्या चाहिं आपसम मेलमिलाप करिक रह।
14तर ए दाजुभाइ आ दिदि-बहिनसब, कोर्ह्या मानुकसिका चेताबनि धि आ हिम्मत हार्ल मानुकसिका हौसला धि। अनि कम्जोर मानुकसिका सहयोग कर् आ सभे मानुकसिका सहनसिलता देखा। 15कुन्हुँले तोर्सिक खराबि कर्तो त ओक्रसङ बद्ला नाइ ले तर सब्दिन एक-दस्रोका आ सभे मानुकसिका भलाइ कर्लाहार कोसिस कर्।
16अनि सब्दिन खुसि भइक रह, 17आ पर्थना कर्ति रह। 18अनि जेहेन अबस्ताम पनि पर्मेसोरका धन्येबाद धि किरकि खिरिस्ट येसुम तोर्सिक लागि एहे इच्छा छो।
19पबित्र आत्माका काम कर धि। 20अनि पर्मेसोरक तर्फस आइल अगमबानिका हेला नाइ कर्। 21तर सभे बातक अस्लिमे जाँच् कर् आ जुन बात अस्लि छो ओक्राहि पक्रिक रह। 22अनि सभे खालक खराब कामस हट्ले रह।
23सान्ति देल्हार पर्मेसोरले आप्नि तोर्सिका पबित्र राखुस। अनि आपन्सिक प्रभु येसु खिरिस्ट नाइ आइल तलिक तोर्सिक आत्मा, परान आ देह खोट बिनाक रहुस। 24तोर्सिका बलाइलाहार पर्मेसोर बिस्वासिलो छो, ओहेले यि सभे बात पुरा करि देतो।
25ए हम्र दाजुभाइ आ दिदि-बहिनसब, हमर्स्योक लागि पर्थना करि दे।
26अनि ओइलगक सभे दाजुभाइ आ दिदि-बहिनसिका हमर्स्या पबित्र मयाँस गोरलाग्ल स्यो कहिक सुनाइ धि।
27हम तोर्सिका प्रभु येसुक नामम बिन्ति कर्स्यो कि यि चिठि सभे दाजुभाइ आ दिदि-बहिनसिका पह्रिक सुनाह्य।
28आपन्सिक प्रभु येसु खिरिस्टक किर्पा तोर्सिक उप्रिम रहुस।
Currently Selected:
१ थेस्लोनिकि 5: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
