१ थेस्लोनिकि 2
2
थेस्लोनिका सहरम पावलक काम
1ए हम्र दाजुभाइ आ दिदि-बहिनसब, तोर्सिका यि बात थाहा छो कि हमर्स्या तोर्सिलग आइल बिना कामेक नाइ भेलो कहिक। 2तोर्सिका एहो थाहा छो कि हमर्स्या तोर्सिलग आबस अगा फिलिप्पि सहरम हमर्सिका कतेक सताइल्को आ बिजेत करल्को कहिक। तैयो पर्मेसोरले हमर्सिका ओहोन बिरोध हब्त खुमा पनि खुसिक खबर सुनाब लागि साहास देल्को। 3किरकि हमर्स्या पर्चार कर्ल बात गलत आ झुठ नाइ छलो, न त ओइम कुन्हुँ छल-कपट छलो। 4तर पर्मेसोरले हमर्सिका लायकक सम्झिक खुसिक खबर सुनाब लागि जिम्मा देल्को। ओहेस हमर्स्या सुनाइ स्यो। हमर्स्या मानुकसिका खुसि कर लागि नाइ तर आपन्सिक मनका जाँच्लाहार पर्मेसोरका खुसि कर लागि पर्चार कर्स्यो। 5तोर्सिका एहो थाहा छो कि हमर्स्या अस्लि-अस्लि बातसब कहिक तोर्सिका कह्याहु नाइ फुस्लाइल्यो, न त कथ्यो पाइलाहार लोभ करिक तोर्सिक सङ् बन्ल नाटक कर्ल्यो। यि बातक गबाह पर्मेसोर आप्नि छो। 6हमर्स्या खिरिस्टक पेरेरित भेल कारनस तोर्सिक उप्रिम अधिकार चलाब सक्ते। तैयो हमर्स्या कुन्हुँ मान्खस आदर नाइ खोज्ल्यो न त तोर्सिस, न त अरु मान्खस। 7बरु जेनामे एगो दुध पियाइलाहार मतारले आप्न बच्चा-बुच्चिक स्याहार-सुसार कर्छो, ओनाहिमे हमर्स्याहु तोर्सिसङ नम्र भइक बेबहार कर्ल्यो। 8तोर्सिसङ हमर्सिक थुप्रे मयाँ भेल कारनस हमर्स्या तोर्सिका पर्मेसोरक खुसिक खबर सुनाब मत्रे नाइ तर आप्न ज्यान दिअ लागि पनि तयार भेल छल्यो। किरकि तोर्स्या हमर्सिक लागि एक्दम दुलार भेल छल। 9ए हम्र दाजुभाइ आ दिदि-बहिनसब, तोर्सिका हमर्सिक दुख आ मेहेनत थाहे छो। तोर्सिभोरि कक्राहु भार नाइ हउस कहिक हमर्स्या दिन-रात काम कर्ति पर्मेसोरक खुसिक खबर तोर्सिका सुनाइल्यो।
10हमर्स्या तोर्सिसङ रहत खुमा पबित्र, ठिक आ निर्दोस भइक रहल्यो। यि बातक पर्मेसोर आ तोर्स्या गबाह स्या। 11तोर्सिका एहो थाहा छो, जेनामे एगो बापले आप्न बेटा-बेटिसिका सिखाइ छो, ओनाहिमे हमर्स्याहु तोर्सिका अर्ति आ सिछ्या दैक हौसला देल्यो, 12ताकि जुन पर्मेसोरले तोर्सिका आप्न राज्ये आ महिमाक लागि बलाइल छो, ओक्र अगाम तोर्सिक जिबन मन पर्लाहार हउस।
13ओहेस हमर्स्या सब्दिन पर्मेसोरका धन्येबाद देस्यो। किरकि हमर्स्या पर्मेसोरक जुन बचन तोर्सिका सुनाइल्यो, उ तोर्स्या मानुकसिक बचन स्यो कहिक नाइ तर पर्मेसोरक बचन स्यो कहिक सुइकार कर्ल, जुन बचनले अखन पनि तोर्सिसिक जिबनम काम कर्ति छो। 14किरकि ए हम्र दाजुभाइ आ दिदि-बहिनसब, तोर्स्या येसु खिरिस्टम भेल यहुदिया पर्देसक पर्मेसोरक मन्डलिसिक जक्याहि भेल स्या। किरकि जेनामे येसु खिरिस्टम बिस्वास कर्ल कारन ओकर्स्या आप्ने जात यहुदिसिस दुख पाइल छलो, ओनाहिमे तोर्स्याहु आप्ने जातक मानुकसिस दुख पाइल स्या। 15ओहे यहुदि जातक मानुकस्या अगमबक्तासिका आ प्रभु येसुका पनि मारल्को। अनि हमर्सिका पनि सताइल्को आ भाग कर् लगाइल्को। ओकर्स्या पर्मेसोरका मन नाइ पर्लाहार कामसब कर्छो आ सभे मानुकसिक बिरोध कर्छो। 16अनि दस्रो जातक मानुकसिका मुक्तिक बारेम खुसिक खबर सुनाइत खुमा ओकर्स्या हमर्सिका रोकल्को। एनामे ओकर्स्या आप्न पापक घैला भोर्ति छो तर अन्तिमम पर्मेसोरक रिस ओकर्सिक उप्रिम पर्ल छो।
थेस्लोनिकिसिका भेट लागि पावलक इच्छा
17ए हम्र दाजुभाइ आ दिदि-बहिनसब, यहुदिस्या हमर्सिका सताइल कारनस कन्हेक समैक लागि तोर्सिस बर्कि दुरि भेल स्यो तर हमर्सिक मन त तोर्सिएसङ छो। ओहेस तोर्सिका भेट लागि हमर्स्या एक्दम कोसिस कर्ल्यो। 18हमर्स्या तोर्सिलग आब खोज्ल छल्यो। हम पावल त झन थुप्रे बाजि आब लागि कोसिस कर्ल्यो तर सैतानले हमर्सिका रोकल्को। 19जब आपन्सिक प्रभु येसु एतो त उजुमा ओक्र अगाम हमर्सिक आस, आनन्द आ गौरबक मुकुट तोर्स्याहि नाइ स्या झन? 20साँच्चेक हमर्सिक गौरब आ आनन्द तोर्स्याहि स्या।
Currently Selected:
१ थेस्लोनिकि 2: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
