१ थेस्लोनिकि 1
1
1पर्मेसोर बाप आ प्रभु येसु खिरिस्टम भेल थेस्लोनिका सहरक मन्डलिसिका हम पावल, सिलास आ तिमोथिले यि चिठि निख्ति स्यो।
पर्मेसोरले तोर्सिका किर्पा आ सान्ति दिउस।
थेस्लोनिका सहरक मानुकसिक जिबन आ बिस्वास
2जब हमर्स्या पर्थना कर्स्यो त सब्दिन तोर्सिका सम्झ स्यो अनि तोर्सिक लागि पर्मेसोरका धन्येबाद देस्यो। 3किरकि हमर्स्या सब्दिन आपन्सिक पर्मेसोर बापक अगाम तोर्सिक बिस्वासक काम, मयाँस कर्ल मेहेनत आ आपन्सिक प्रभु येसु खिरिस्टम राख्ल आसम तोर्स्या जोर्गर भेल बातका सम्झ स्यो। 4ए हम्र दाजुभाइ आ दिदि-बहिनसब, हमर्सिका यि बात थाहा छो कि पर्मेसोरले तोर्सिका थुप्रे मयाँ कर्छो, ओहेस तोर्सिका चुन्ल छो। 5किरकि हमर्स्या जुन खुसिक खबर तोर्सिका सुनाइल्यो उ बेकार बात नाइ छलो तर पबित्र आत्मा आ सक्तिम सुनाइल एक्दम साँच्चेक बात छलो। जब हमर्स्या तोर्सिसङ छल्यो त हमर्सिक जिबन केहेन छलो, उ सभे बात तोर्सिका थाहा छो। 6तोर्स्या प्रभु आ हमर्सिक देखा-सिखि करिक दुखम पर्ल जुमा पनि पबित्र आत्माले देल आनन्दस खुसिक खबरका सुइकार कर्ल। 7एनामे तोर्स्या माकेडोनिया आ अखैया पर्देसम भेल सभे बिस्वासिसिक लागि एगो उदाहरन बन्ल स्या। 8किरकि तोर्सिक मार्फत प्रभुक बचन माकेडोनिया आ अखैया पर्देसम मत्रे नाइ फैललो तर पर्मेसोरक उप्रिम कर्ल तोर्सिक बिस्वासक बारेम पनि सग्रो फैलल छो। ओहेस एक्र बारेम हमर्सिका कथ्यो कह नाइ छो। 9किरकि हमर्स्या तोर्सिलग आब्त खुमा तोर्स्या केनामे हमर्सिका स्वागत कर्ल आ केनामे मुर्तिसिक पुजा कर छोरिक साँच्चेक आ जिउँत पर्मेसोरक सेबा कर लागि घुमिक एल, यि बात ओकर्स्या आप्नि कहछो। 10ओकर्स्या यि कहछो कि तोर्स्या केनामे पर्मेसोरक बेटा येसु, जक्रा पर्मेसोरले फेरि जिउँत करल्को, उ फेरि सोर्गस एतो कहिक पैरा ताकिक अस्याइल स्या। ओहेले आपन्सिका आब लग्ल पर्मेसोरक सजाएस बचाइतो।
Currently Selected:
१ थेस्लोनिकि 1: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
