Matayo 24

Yesu nɨ eꞌyo ɨ̀cejʉ Orɨ jó Ìmgbélé vɨɨ drì jàtaa drìa vɨɨ

(Mariko 13:1,2; Luka 21:5,6)

1Yesu kʉ kalɨ Orɨ jó nɨ ovʉjʉ vɨɨ ra díká ɨ̀rɨ nɨ murɨa, ꞌba ɨ̀rɨ nɨ ɨmbale vɨɨ mú ɨ̀rɨ bʉ ɨ̀rɨ yɨ́ jó Orɨ jó ndee rúá vɨɨ ɨnɨ ɨ̀ꞌdajʉ. 2Zi ɨnɨ kɨ́nɨ̀, “Àmɨ nè afa ꞌdɨ̀vɨɨ ɨnɨ drɨ́á ra yà? Ma lè ꞌyo àmɨ́ yɨ́ tàándí drʉ, káꞌdí ɨrà ꞌdɨ̀vɨɨ ɨnɨ àloo ꞌba ngáá kʉ́ àrípi drìa kʉ, ɨnɨ ngaa ovʉʉ drɨ́á oꞌbezà drʉ nyáwúá.”

3Yesu nɨ rɨrɨa ꞌBee Olivu patí nɨ vɨɨ drìa, ꞌba ɨ̀rɨ nɨ ɨmbale vɨɨ cá ɨ̀rɨ bʉ dèè ɨ̀rɨ aꞌdúle. Zí kɨ́nɨ̀, “Mɨ ꞌyo àmá yɨ́ eꞌyo ꞌdɨ̀vɨɨ ɨnɨ ngaa ànɨ ꞌoo drɨ́á àrɨngérè yà vɨɨ, díká ɨ̀cetaa mɨ awo cataa nɨ àloo àsìzà nɨ vɨɨ nɨ nga ovʉʉ àrɨ nɨ yà?”

4Yesu òmvɨ kɨ́nɨ̀, “Àmɨ ovʉ́ mule be díká àmɨ fé ꞌba àloo ɨ̀rɨ ole àmɨ kʉ. 5Àrɨ̀yɨ̀kʉ ꞌba òꞌbɨ́ nɨ ngaa caa ma rú yɨ̀ ꞌyojʉ kɨ́nɨ̀ ‘Ma Kristo ɨ,’#24:5 Nòsɨ̀kʉ Mesia pàbaa vásì 23. díká ɨnɨ nga ꞌba òꞌbɨ́ olee ra. 6Àmɨ nga eꞌyo ɨrɨ àꞌdí drìa ògògò díká vàlà, te ɨ̀rɨ fè àmɨ́ yɨ́ òrì kʉ. Lè eꞌyo ꞌdɨ̀vɨ́ɨvɨɨ ɨnɨ ꞌó ànɨ ra, te àsìzà wúdrìkúrù nɨ vɨɨ nɨ koo lèe caa ra. 7Sụ́rụ́ ꞌwàrà nɨ nga àꞌdí ꞌdii ànɨ ɨ̀sɨlɨa, díká kárí drɨ́á nɨ ngaa anɨ òkii ànɨ ɨ̀sɨlɨa. Àbírí nɨ ngaa zòo díká òyàkʉ̀yà nɨ ngaa ovʉʉ àngʉ̀ drɨ́á alɨa. 8Eꞌyo ꞌdɨ̀vɨɨ ɨnɨ ngaa ànɨ ꞌoo kɨ̀le òsitaa àzo òkò vɨɨ lé àsìzà wúdrìkúrù nɨ yɨ́.”

9“Acete ꞌba nga mɨ fèe eꞌyo lizà drìlia, mɨ kijʉ ra, díká ꞌba súrú drɨ́á alɨa vɨɨ ɨnɨ nga àmɨ ngùu ònzɨ ma eꞌyo yɨ̀. 10Sawà ꞌdànaa yɨ̀ ꞌba òꞌbɨ́ányá àꞌɨ̀taa nɨ nga nɨ dee ra díká ɨnɨ nga ànɨ òꞌdɨ nyaa àloo ànɨ ngùu ànɨ ɨ̀sɨlɨa. 11Acete Nàbíà ɨ̀nzò drʉ vɨɨ ɨnɨ ngaa pʉ̀ʉ tree díká ɨnɨ nga ꞌba òꞌbɨ́ olee. 12Eꞌyo ònzɨ nɨ gale tree vɨɨ yɨ̀, ꞌba oꞌbɨ́ nɨ nga ca lètaa koko drʉ. 13Te ꞌbarʉʉ eꞌyo ꞌdɨ̀vɨɨ tia tale kpere àsìrɨa vɨɨ nɨ nga ovʉʉ pazà drʉ. 14Oꞌdúkó Ònyɨ̀be Kárí ꞌdɨ̀vɨɨ drìa vɨɨ ꞌba nga òlʉ̀ʉ wúdrìkúrù drɨ́á alɨa eꞌyo soti ɨ̀ꞌdazà drʉ súrú ꞌwàrà drɨ́á yɨ́, acete àsìzà nɨ ngaa caa ndò.”

15“Ànɨ àmɨ tè ndrèe kara àlátárá vɨɨ alɨa ‘eꞌyo òrìòrì drʉ drìjàzà fèle díká ɨcoo fèe ꞌbanɨ ɨ̀rɨ adɨjʉ ra’#Danieli 9:27; 11:31; 12:11 kòꞌbò dráánɨ agú eꞌyo ondrílé Danieli drʉ vɨɨ nɨ ꞌyole ꞌba vɨɨ lé nɨ, (ꞌbarʉʉ eꞌyo ꞌdɨ̀vɨɨ làle vɨɨ ɨ̀rɨ và ɨkɨ́a ra) 16acete lè ꞌba Yudea vɨɨ ɨnɨ dú ꞌbee ɨnɨ drìa. 17Ànɨ lè ꞌba àloo tè ɨ̀rɨ isúu nɨ awo jó drìa uru vɨɨ ɨ̀rɨ sɨ nyawúá àfa àloo ꞌdu jó ndee alɨa vɨɨ yɨ̀ ji àja kʉ. 18Ànɨ lè tè ꞌba àloo isúu nɨ awo nga alɨa ɨ̀rɨ kàdrì àva mu nɨ awo bòngo ꞌbele rúá vɨɨ ꞌdu kʉ. 19Ma nìi càndɨa nɨ ngaa ovʉʉ zi anzɨ be alɨa díká anzɨ nyɨ́rɨ́ ɨ̀ndrʉꞌba vɨɨ ɨnɨ yɨ́ ngòpɨa vɨɨ kʉ! 20Àmɨ zí Orɨ nɨ lè ɨ̀rɨ fè àmɨ́ ꞌdú sawà àngʉ̀ nɨ ambɨjʉ tʉ̀ vɨɨ alɨa yɨ̀ kʉ nòsìkʉ Sàbátʉ̀ ale yɨ̀ kʉ. 21Ɨ̀rɨ vɨ́nɨ àrɨ̀yɨ̀kʉ eꞌyo ɨ̀wa drʉ ꞌdɨ̀vɨɨ nɨ muu eꞌyo ɨ̀wa ɨꞌdojʉ iwú òkò wúdrìkúrù òꞌbàjʉ vɨɨ yɨ̀ cajʉ kpere àndrʉ̀ vɨɨ ɨnɨ ɨ̀gàtɨɨ drɨ́á rá díká àloo nga ovʉ trótrò ꞌdɨ̀vɨɨ lé kʉ. 22Orɨ tèté oꞌdú ꞌdànaa ɨnɨ kàlàfe òmvɨɨ kʉ, ꞌba àloo àlʉ vɨ́ɨvɨɨ ngaa té nɨ pa kʉ. Te ꞌba òpèzà eꞌyo yɨ̀, Orɨ nɨ ngaa oꞌdú ndee ɨnɨ kàlàfe òmvɨɨ ra.

23“Sawà ꞌdànaa yɨ̀ ꞌba àloo tè ꞌyo mɨ́ yɨ́, ‘Mɨ ndrè ngà, Kristo nɨ ꞌdò, nòsɨ̀kʉ Ɨ̀rɨ ꞌdà,’ mɨ àꞌɨ̀ kʉ. 24Àrɨ̀yɨ̀kʉ Kristo ɨ̀nzò drʉ àloo ꞌba eꞌyo ondrɨ́lé ɨ̀nzò drʉ vɨɨ ɨnɨ ngaa ɨ̀pʉ̀ʉ tree díká ɨnɨ nga ɨ̀cetaa òꞌbɨ́ ɨ̀ꞌdaa àloo talɨ òꞌbɨ́ ꞌoo ꞌba òꞌbɨ́ olejʉ káꞌdí pàbaa ꞌba Orɨ awo òpèzà vɨɨ ɨnɨ olejʉ tè àꞌba ɨcoo nɨ ꞌoo ra nɨ. 25Àmɨ ɨ̀rɨ́! Ma ꞌyo àmɨ́ yɨ́ drɨ̀òdrɨ̀ò.”

26“Ànɨ ꞌba àloo tè ꞌyo àmɨ́ yɨ́ kɨ́nɨ̀, ‘Ɨ̀rɨ àja àngʉ̀ aꞌwɨa ꞌdà,’ àmɨ mú àja kʉ, nòsɨ̀kʉ tè ꞌyo kɨ́nɨ̀, ‘Ɨ̀rɨ jóá nòa ꞌdò,’ àmɨ àꞌí kʉ. 27Àrɨ̀yɨ̀kʉ ꞌBa Mvápi nɨ nga ca kòꞌbò òvɨ ꞌdàle ɨ̀ga ìtú nɨ pʉ̀rɨa vɨɨ nɨ àngʉ̀ àzàle kpere ɨ̀ga ìtú nɨ zòrɨa vɨɨ lé. 28Kara àꞌbʉ̀ nɨ ovʉjʉ vɨɨ alɨa, ròo nɨ nga ovʉʉ cɨ.”

Drì kàtaa ꞌBa Mvápi awo vɨɨ

(Mariko 13:24-27; Luka 21:25-28)

29“Càndɨ oꞌdú ꞌdànaa ꞌyowa vɨɨ butia cotícotí,

‘Ìtú nɨ ngaa bìi inicici drʉ,

díká mba ngaa di kʉ,

ɨwɨ́lɨ́ ɨnɨ nga òzòo ɨngajʉ ꞌbùa vɨɨ yɨ̀ ra,

àfa ꞌbùa vɨɨ ɨnɨ nga caa òyàzà drʉ.’”#Isaya 13:10; 34:4

30“Oꞌdú ꞌdànaa yɨ̀, ɨ̀cetaa ꞌBa Mvápi awo vɨɨ nɨ ngaa nɨ ɨꞌda ꞌbù mulia, díká súrú drɨ́á nyawú drìa vɨɨ ɨnɨ nga wʉʉ ra. Ɨnɨ nga nèe ꞌBa Mvápi nɨ carɨa iríti ꞌbùa vɨɨ drìa yɨ̀, òkpo be díká ìnzìtaa ose be. 31Ɨ̀rɨ ngaa malaika nɨ awo vɨɨ ɨnɨ ti pèe gùá ꞌba omvejʉ àálé uru yɨ̀ vɨɨ be, díká ɨnɨ ngaa ꞌba ɨ̀rɨ awo òpèzà vɨɨ ɨnɨ omve ɨngajʉ nyawú kalati su vɨɨ alɨa drɨ́á, ɨꞌdojʉ ꞌbù ɨ̀ga àloo vɨɨ alɨa cajʉ kpere aloo vɨɨ alɨa.”

Ɨmbataa ɨlʉ́ʉ patí drìa vɨɨ

(Mariko 13:28-31; Luka 21:29-33)

32“Tèvɨ́nɨ àmɨ òní ɨmbataa eꞌyo oꞌbezà ꞌdɨ̀ ɨlʉ́ʉ patí drìa vɨɨ alɨa. Àtràkàlea drìlia nɨ ɨꞌdorɨa nɨ ꞌbarɨa ꞌba, díká bía nɨ ɨꞌdorɨa nɨ ꞌbarɨa bùlùbùlù ꞌba, lè àmɨ ní rá ɨlɨ ca ace ògògò. 33Káꞌdí ànɨ àmɨ tè eꞌyo ꞌdɨ̀vɨɨ ɨnɨ ndrèe drɨ́á ra, àmɨ ɨcoo ni ra ɨ̀rɨ àwo sawà drì kajʉ vɨɨ ca ace ògògò jótilia. 34Ma lè ꞌyo àmɨ́ yɨ́ tàándí drʉ eꞌyo ꞌdɨ̀vɨɨ ɨnɨ nga ànɨ ꞌoo drɨ́á ráká aꞌbɨanzɨ#24:34 aꞌbɨanzɨ nòsɨ̀kʉ yɨla. ꞌdɨ̀vɨɨ ɨnɨ nga drìjàa káyɨ̀ ndò. 35ꞌBù ɨnɨ ngaa ànɨ dee nyawú be ra, te eꞌyo ma awo vɨɨ ngáá ànɨ de kʉ.”

Oꞌdúa ɨnɨ sawàa be ꞌbànɨ nìjʉ kʉ vɨɨ

(Mariko 13:32-37; Luka 17:26-30,34-35)

36“ꞌBa àloo nìi oꞌdúa ɨnɨ sawàa be kʉ, káꞌdí malaika ꞌBùa vɨɨ níi kʉ, Mvápia nìi kʉ, te Atapi nì lʉ́ nɨ̀. 37Cataa ꞌBa Mvápi awo vɨɨ nɨ nga ovʉʉ Kòꞌbò ndráánɨ́ Noa ngarè vɨɨ lé. 38Àrɨ̀yɨ̀kʉ ndráánɨ́ dèè ngà yí tìzà caa kʉ, òꞌbɨ rɨ́ àfa nya, àfa mbu, zi ru, díká ònyɨ ru kpere oꞌdú Noa nɨ fɨjʉ yee alɨa vɨɨ yɨ̀. 39Káꞌdí níí àrɨ eꞌyo nɨ koo nɨ ꞌoo nɨ̀ yà vɨɨ kʉ kpere yí tìzà nɨ carɨa ɨnɨ jiria. Ɨ̀rɨ muu ovʉ bèbè vɨ́nɨ oꞌdú ꞌBa Mvápi nɨ cajʉ vɨɨ yɨ̀. 40Oꞌdú ꞌdànaa yɨ̀, àgu ìrì nɨ muu ovʉ ngaa, àlʉa ꞌba nga ꞌdu ra díká àlʉa ꞌba nga kʉʉ àva. 41Zi ìrì nɨ muu ovʉʉ nya ꞌiria ɨrà ꞌbanɨ nya ꞌijʉ vɨɨ drìa, àlʉa ꞌba nga ꞌdu ra díká àlʉa ꞌba nga kʉʉ àva.” 42Tèvɨ́nɨ, àmɨ ovú mule be àrɨ̀yɨ̀kʉ àmɨ nìi oꞌdú Opɨ àmɨ ꞌyowa vɨɨ nɨ mujʉ cajʉ vɨɨ kʉ. 43Te lè àmɨ vá eꞌyo ꞌdɨ̀vɨɨ ra, Jó apíri tèté nìi ògíú nɨ caa iní sawà síá vɨɨ ra, ɨ̀rɨ té ovʉʉ mule ꞌbe díká fèe té nɨ awo jótile ŋo ògíú ndee yɨ́ kʉ. 44Ànɨ lè pàbaa àmɨ ovʉ́ ngónde, àrɨ̀yɨ̀kʉ ꞌBa Mvápi nɨ nga caa sawà àmɨ nìle kʉ vɨɨ yɨ̀.

Àzíꞌbá àꞌɨ̀taa be díká àꞌɨ̀taa ko vɨɨ

(Luka 12:41-48)

45“Àrɨ nɨ acete àzíꞌbá àꞌɨ̀taa be díká òndʉ̀ʉ̀ be vɨɨ ɨ nɨ̀ yà? Ɨ̀rɨ agú ꞌba ìmgbélé nɨ pèle àzíꞌbá drìle drʉ tà fèjʉ ɨnɨ yɨ́ sawà drìa vɨɨ ɨ. 46Ɨ̀rɨ muu ovʉʉ àyɨ̀kò yɨ̀ àzíꞌbá vɨɨ yɨ́ ɨ̀rɨ awo ꞌba ìmgbélé nɨ drì kàrɨa, tèè isúu ɨ̀rɨ eꞌyo ꞌdɨ̀vɨɨ ꞌorɨa kòꞌbò vɨ́nɨ. 47Ma lè ꞌyo àmɨ yɨ́ tàándí drʉ ɨ̀rɨ awo ꞌba ìmgbélé nɨ muu ɨ̀rɨ ꞌbàa nɨ awo àfa drɨ́á drìle drʉ. 48Te àzíꞌbá ndee ꞌdɨ̀vɨɨ tè ovʉʉ ꞌbarʉʉ asíònzɨ be nɨ ꞌyojʉ kɨ́nɨ̀, ‘Ma awo ꞌba ìmgbélé nɨ ovʉʉ àja oꞌdú angɨrɨ,’ 49Díká ɨꞌdoo arípí àzíꞌbá drʉ vɨɨ ɨnɨ òkiiòki àloo àfa nyaa díká nɨ mbuu omadɨ be. 50ꞌBa ìmgbélé nɨ muu ca oꞌdú ɨ̀rɨ nɨ ɨgale kʉ vɨɨ yɨ̀ díká sawà ɨ̀rɨ nɨ nìle kʉ vɨɨ yɨ̀. 51ꞌBa ìmgbélé nɨ muu ɨ̀rɨ ògaa nyɨ́rɨ́nyɨ́rɨ́ díká ɨ̀rɨ ngaa ɨ̀rɨ ꞌbàa ꞌba lókìrí be vɨɨ ɨnɨ bʉ. Nàale àwʉ nɨ ngaa ovʉʉ sí nyazà be cɨ.”

Currently Selected:

Matayo 24: MADI-URL

Highlight

Copy