Matayo 25

Eꞌyo oꞌbezà alɨrɨa mudrí vɨɨ ɨnɨ drìa vɨɨ

(Matayo 25:1-13)

1Yesu mu drìle ɨnɨ yɨ́ eꞌyo oꞌbezà be kɨ́nɨ̀, “Sawà ꞌdànaa yɨ̀ Kárí ꞌBùnɨ vɨɨ nɨ mu ovʉʉ kòꞌbò alɨrɨa mudrí ànɨ ꞌyowa tálà ꞌdule ɨ̀ndɨ̀ díká muꞌba izíó nɨ ndrèle vɨɨ ɨnɨ lé. 2Tòwí vɨɨ ɨnɨ bàdìbàdì drʉ te alóo tòwí vɨɨ ɨnɨ òndʉ̀ʉ̀ drʉ. 3Bàdìbàdì vɨɨ tó kírí tálà òdʉ ꞌyowa tálà alɨa, te awɨ́ɨ́ tálà òdʉ ji tuutu alɨa ɨ̀ndɨ̀ kʉ, 4vɨɨ dèè òndʉ̀a be vɨɨ ꞌdú tálà òdʉ tuutu alɨa tálà ꞌyowa vɨɨ be ɨ̀ndɨ̀. 5Izíó nɨ sawà ꞌdule angɨrɨ cajʉ vɨɨ yɨ̀, oꞌdú biribiri ɨꞌdo ɨnɨ ji díká oꞌdú ꞌbe ɨnɨ ra.”

6“Iní ale agaa vɨɨ alɨa, oyi nga kɨ́nɨ̀, ‘Izíó ca ꞌdò! Àmɨ pʉ́ mú drì fu ɨ̀rɨ be ꞌdò!’

7“Acete alɨrɨa mudrí vɨɨ orʉ́ oꞌdúá vɨɨ yɨ̀ drɨ́á díká ɨꞌdó ꞌyowa tálà bawú ɨ̀nga. 8Bàdìbàdì vɨɨ ꞌyó òndʉ̀ʉ̀ be vɨɨ ɨnɨ yɨ́ kɨ́nɨ̀, ‘Àmɨ fé àma yɨ́ tálà òdʉ ɨ̀ndɨ̀ àrɨ̀yɨ̀kʉ àma ꞌyowa tálà ɨnɨ bɨ̀ɨbɨ̀.’”

9“Zi ndee òndʉ̀ʉ̀ be vɨɨ òmvɨ́ ɨnɨ yɨ́ kɨ́nɨ̀, ‘Yʉ, òdʉ vɨɨ caa ꞌbéè àma yɨ́ àmɨ be kʉ, ráaka àmɨ mú òdʉ je àmɨ yɨ́ ꞌba ózɨ́ꞌbá vɨɨ ɨnɨ bʉ.’

10“Te ɨnɨ nɨ ace murɨa létia òdʉ jerɨa, vɨɨ dèè isú izíó ca ace ꞌba. Alɨrɨa ovʉꞌba ngóndé vɨɨ fɨ́ izíó ɨbe òmù izíruzà nɨ vɨɨ alɨa díká ꞌba òpí ace jótile òmù nɨ vɨɨ ra.

11“Butia alɨrɨa alóó vɨɨ cá ꞌbá dèè kɨ́nɨ̀, ‘Atamva, atamva! Mɨ zì àmá yɨ́ jótile!’

12“Te òmvɨ kɨ́nɨ̀, ‘Ma lè ꞌyo àmɨ́ yɨ́ tàándí drʉ, ma nìi àmɨ kʉ.’

13“Ànɨ àmɨ ovʉ́ mule be, àrɨ̀yɨ̀kʉ àmɨ nìi oꞌdúa kʉ nòsɨ̀kʉ sawàa kʉ.

Eꞌyo oꞌbezà àzíꞌbá na vɨɨ ɨnɨ drìa vɨɨ

(Luka 19:11-27)

14“Oꞌdú ꞌdànaa yɨ̀, Kárí ꞌBùnɨ vɨɨ nɨ muu ovʉʉ kɨ̀le agú mule àcìa vɨɨ nɨ nɨ awo àzíꞌbá vɨɨ ɨnɨ omvele díká ɨnɨ òꞌbàle àfa nɨ awo vɨɨ ɨnɨ drìle drʉ vɨɨ lé. 15Fè àzíꞌbá àlʉàlʉ yɨ́ àfa ɨnɨ nɨ ɨcole tàa mbale ra butia yɨ̀. Fè àlʉa yɨ́ tàlantò#25:15 Tàlantò àlʉ vɨɨ ɨ̀rɨ ògògò séndè dolà alɨ̀fù àlʉ vɨ̀pɨ. tòwí, àloo vɨɨ yɨ́ ìrì, díká àloo yɨ́ àlʉ. Acete mu nɨ awo àcìa ra. 16Agú tàlantò isúlé tòwí vɨɨ kodrì cotícotí àzí fe séndè nɨ awo vɨɨ yɨ́ díká isú drìa òròdrí tòwí atɨzà drʉ. 17Pàbaa tàlantò isúlé ìrì vɨɨ, isú nɨ awo vɨɨ drìa òròdrí atɨzà drʉ ìrì. 18Te àzíꞌbá tàlantò isúlé àlʉ vɨɨ ga ꞌbúlé díká sa ìmgbélé awo séndè vɨɨ ꞌbúlíá.

19“Oꞌdú òꞌbɨ́ butia, ꞌba ìmgbélé kàdrì àcìa vɨɨ yɨ̀ díká rɨ àzíꞌbá vɨɨ ɨbe àfa ɨ̀rɨ nɨ fèle vɨɨ ɨnɨ kambʉ drojʉ. 20Agú tàlantò isúlé tòwí vɨɨ ji ɨ̀rɨ drìlia tòwí díká kɨ́nɨ̀, ‘Ose, mɨ fè ndráánɨ́ má yɨ́ tàlantò tòwí. Mɨ ndrè ngà, ma isú drìa òròdrí tàlantò tòwí.’

21“Ɨrɨ awo ꞌba ìmgbélé òmvɨ ɨ̀rɨ́ yɨ́ kɨ́nɨ̀, ‘Vɨɨ ònyɨ̀be, àzíꞌbá àlá díká ìgènizà vɨɨ lá! Mɨ ibúu ovʉ ìgènizà drʉ àfa were yɨ̀. Ànɨ ma muu mɨ ꞌbàa àfa òꞌbɨ́ drìle drʉ. Mɨ mu àyɨ̀kò nya mɨ awo ꞌba ìmgbélé be ꞌdò!’

22“Agú tàlantò isúlé ìrì vɨɨ mu pàbaa ìmgbélé bʉ kɨ́nɨ̀, ‘Ìmgbélé, mɨ fè ndráánɨ́ má yɨ́ tàlantò ìrì, mɨ nè, ma isú drìa ìri díká ꞌdò ɨ.’

23“Ɨrɨ awo ìmgbélé òmvɨ ɨ̀rɨ́ yɨ́ kɨ́nɨ̀, ‘Vɨɨ ònyɨ̀be, mɨ àzíꞌbá àlá díká ìgènizà nɨ! Ma muu mɨ ꞌbàa àfa òꞌbɨ́ drìle drʉ. Mɨ mu àyɨ̀kò nya mɨ awo ꞌba ìmgbélé be ꞌdò!’

24“Acete agú tàlantò isúlé àlʉ vɨɨ ca ꞌba ìmgbélé bʉ kɨ́nɨ̀, ‘Ose, ma nì ra mɨ ꞌbarʉʉ eꞌyo mbaa tʉ̀ nɨ, mɨ àfa lo kara mɨnɨ ꞌàjʉ kʉ vɨɨ alɨa díká àfa ti tra kara mɨnɨ òrɨ rɨjʉ kʉ vɨɨ alɨa. 25Ànɨ òrì ꞌo ma cɨ díká fè ma sa tàlantò mɨ awo vɨɨ búlíá. Mɨ nè, àfa mɨ awo vɨɨ ꞌdɨ̀.’

26“Ɨrɨ awo ìmgbélé òmvɨ ɨ̀rɨ́yɨ́ kɨ́nɨ̀, ‘Àzíꞌbá asíònzɨ díká ɨ̀gɨ̀ be vɨɨ! Ɨ̀ce kɨ́nɨ̀ mɨnɨ ꞌyolea yɨ̀ mɨ nì ma àfa lo kara manɨ ꞌàjʉ kʉ vɨɨ alɨa díká àfa ti tra kara manɨ òrɨ rɨjʉ kʉ vɨɨ alɨa’ vɨɨ ra yà? 27Acete ꞌyéè, mɨ ndráá cɨ̀a ma awo séndè vɨɨ ji tàa mbaa ɨ̀ró séndè tà mbajʉ vɨɨ alɨa ànɨyɨ̀ manɨ drì kàrɨa, ma té isúu drìa òròdrí be benì.

28“Acete fè òkpo àzíꞌbá alóo yɨ́ kɨ́nɨ̀, ‘Mɨ ꞌdu tàlantò ɨ̀rɨ bʉ vɨɨ ra díká mɨ fè àzíꞌbá tàlantò be mudrí vɨɨ yɨ́.’ 29Àrɨ̀yɨ̀kʉ ꞌba àfa fèle ɨnɨ yɨ́ vɨɨ àyʉle kílílí vɨɨ, ꞌba ngaa ɨràa ɨ̀mèꞌdɨɨ ɨnɨ yɨ́ angɨrɨ díká ɨ̀rɨ ngaa ovʉʉ àfa be angɨrɨ. ꞌBa àfa fèle ɨnɨ yɨ́ vɨɨ àyʉle ꞌyée kʉ vɨɨ ɨnɨ ꞌyowa wereá vɨɨ ꞌba ngaa ꞌdu ra. 30Ànɨ àmɨ ꞌdú àzíꞌbá òròdríkó ꞌdɨ̀vɨɨ ꞌbe àja dúmú alɨa, nàale àwʉ nɨ ngaa ovʉʉ sí nyazà be cɨ.

Eꞌyo lizà àsìjʉ vɨɨ

31“ꞌBa Mvápi tè nga caa ìnzìtaa ose yɨ̀ díká malaika nɨ awo vɨɨ ɨnɨ be, ɨ̀rɨ ngaa rɨɨ òpɨ̀ komɨ ɨ̀rɨ awo vɨɨ drìa ìnzìtaa ose ꞌbùnɨ vɨɨ be. 32Sụ́rụ́ drɨ́á wúdrìkúrùa vɨɨ ɨnɨ ngaa anɨ traa ɨrɨ drìlia, díká ɨ̀rɨ nga ꞌba ɨ̀sɨle ya mgbimgbi kɨ̀le agú ànyàfa ocele vɨɨ nɨ kàbèlè ɨsɨle yale ndri be vɨɨ lé. 33Ɨ̀rɨ ngaa kàbèlè ꞌbàa nɨ gí ndépia díká ndri ꞌbàa nɨ gí ìjíá.

34“Acete Opɨ nɨ ngaa ꞌyo ꞌba nɨ gí ndépia vɨɨ ɨnɨ yɨ́ kɨ́nɨ̀, ‘Àmɨ mú ꞌdò, àmɨ ꞌba Ata ma awo vɨɨ nɨ asíndrɨ̀zà ꞌbàle ɨnɨ drìa ꞌba vɨɨ ɨnɨ drʉ, àmɨ ꞌdú kòlònzɨ̀ àmɨ ꞌyowa vɨɨ ɨnɨ, Kárí otʉle ngónde dèè ngà ndráánɨ́ ꞌba òꞌbáá wúdrìkúrù kʉ vɨɨ. 35Àrɨ̀yɨ̀kʉ manɨ ndráánɨ́ ovʉrɨa àbírí yɨ̀, àmɨ fè má yɨ́ tà nya ra, yí àbírɨ́ nɨ ma kiria, àmɨ fè má yɨ́ yí mbuzà ra, manɨ ovʉrɨa júrú drʉ, àmɨ àꞌí ma àmɨ ꞌyowa àkúá ra. 36Manɨ ovʉrɨa bòngoko drʉ, àmɨ fè mayɨ́ bòngo sùzà ra, manɨ ovʉrɨa àzo drʉ, àmɨ mba ma tà rá, manɨ ovʉrɨa màbúsùa, àmɨ ca ma ndre ra.’

37“Acete ꞌba àlátárá vɨɨ ɨnɨ ngaa ɨ̀rɨ òmvɨ kɨ́nɨ̀, ‘Opɨ, àma isú mɨ àbírí yɨ̀ díká àma fè mɨ́ yɨ́ tà nya, nòsɨ̀kʉ àma isú yí àbírí ki mɨ díká àma fè mɨ́ yɨ́ yí mbu ra àrɨngérè yà? 38Àma ndrè mɨ júrú drʉ díká àma àꞌí mɨ àma bʉ àkúá ra, nòsɨ̀kʉ àma isú mɨ rúá bòngo yʉ díká àma fè mɨ́ yɨ́ bòngo sùzà ra àrɨngérè yà? 39Àma isú mɨ àzo drʉ nòsɨ̀kʉ màbúsùa díká àma mu mɨ ndre ra àrɨngérè yà?’

40“Opɨ nɨ muu ɨnɨ òmvɨɨ kɨ́nɨ̀, ‘Ma lè ꞌyo àmɨ́ yɨ́ tàándí drʉ, eꞌyo àmɨ nɨ ꞌole ꞌba ma àwo ɨꞌdale àzíkóko ꞌdɨ̀vɨɨ ɨnɨ yɨ́ vɨɨ, àmɨ ꞌo ɨnɨ má yɨ́.’

41“Acete ɨ̀rɨ mu ꞌyo ꞌba ɨ̀rɨ gí ìjía vɨɨ ɨnɨ yɨ́ kɨ́nɨ̀, ‘Àmɨ ꞌdá àmɨ ma bʉ ra, àmɨ ꞌba trɨzà drʉ, àmɨ mú àcɨ nánináni ɨdele sitani ɨnɨ yɨ́ ɨ̀rɨ awo malaika vɨɨ ɨbe vɨɨ alɨa. 42Àrɨ̀yɨ̀kʉ ndráánɨ́ manɨ ovʉrɨa àbírí yɨ̀, àmɨ fèe má yɨ́ tà nyazà kʉ, yí àbírí nɨ ma kiria àmɨ fèe má yɨ́ yí mbuzà kʉ. 43Manɨ ovʉrɨa júrú drʉ, àmɨ awɨɨ ma àꞌí àkúá kʉ, manɨ ovʉrɨa bòngoko drʉ, àmɨ awɨɨ má yɨ́ bòngo sùzà fe kʉ, manɨ ovʉrɨa àzo drʉ díká màbúsùa, àmɨ awɨɨ asɨ ma yɨ̀ kʉ.’

44“Ɨnɨ pàbaa mu òmvɨɨ kɨ́nɨ̀, ‘Opɨ, àma isú mɨ àbírí yɨ̀ nòsɨ̀kʉ yí àbírí ki mɨ ra nosìkʉ júrúú drʉ nòsɨ̀kʉ bòngoko drʉ nòsɨ̀kʉ àzo drʉ díká màbúsùa te àma awɨɨ mɨ àzàko kʉ àrɨngérè yà?’

45“Opɨ nɨ muu ɨnɨ òmvɨɨ kɨ́nɨ̀, ‘Ma lè ꞌyo àmɨ́ yɨ́ tàándí drʉ, eꞌyo àmɨ nɨ awɨle ꞌole ꞌba ma awo ɨꞌdale àzíkóko ꞌdɨ̀vɨɨ ɨnɨ yɨ́ kʉ vɨɨ, àmɨ awɨɨ ɨnɨ ꞌo má yɨ́ kʉ.’

46“Acete ɨnɨ muu panga nánináni vɨɨ alɨa, te ꞌba àlátárá vɨɨ ɨnɨ muu ɨdrɨ nánináni vɨɨ alɨa.”

Currently Selected:

Matayo 25: MADI-URL

Highlight

Copy