Matayo 20
20
Eꞌyo òꞌbezà àzíꞌbá wɨ́nò nga alɨa vɨɨ ɨnɨ drìa vɨɨ
1“Kárí ꞌbùnɨ vɨɨ ꞌonɨ kɨ̀le agú àloo nga apíri drʉ pʉ̀le àja òꞌbuti drɨ̀ò ꞌbandépi ɨ̀pàngɨle àzí ngajʉ nɨ awo wɨ́nò nga alɨa vɨɨ lé. 2Àtì ɨnɨ òfèjʉ dɨ̀narɨ̀ #20:2 Dɨ̀narɨ̀ ꞌdɨ̀vɨɨ ɨ̀rɨ ndráánɨ́ òya òfèle àzíꞌbá lèjà ngale vɨɨ ꞌyowa oꞌdú àlʉ nɨ vɨ́ɨvɨɨ tia vɨɨ ɨ.àlʉ oꞌdú àlʉàlʉ bʉ yɨ̀ díká pè ɨnɨ ti mu azí nga nɨ awo wɨ́nò nga alɨa ra.
3“Sawà naa òꞌbuti, kodrì mu cúùa díká ndrè ꞌba àlóo òsó ká rɨ́ ovʉ àzí kó drʉ. 4Kɨ́nɨ̀ ɨnɨ yɨ́, ‘Àmɨ mú pàbaa àzí nga ma awo wɨ́nò nga alɨa ɨ̀ndɨ̀ díká ma ngaa àmɨ òfèe àje kílílí yɨ̀.’ 5ꞌBa ndee mú rá.
“Pʉ̀ mu àja díká ògògò sawà azɨa vɨɨ alɨa àloo sawà óròmɨ̀ vɨɨ alɨa díká ꞌo pàbaa eꞌyo àlʉàlʉ vɨɨ ɨ. 6Pàbaa ògògò sawà mudrí drìa àlʉ vɨɨ alɨa tɨ̀ ꞌba alóo ka òsòle náni àzí ko drʉ vɨ́ɨvɨɨ ɨnɨ drìa díká. Zi ɨnɨ kɨ́nɨ̀, ‘Àmɨ òsò ka vɨ̀a àndrʉ̀ zùù àzíkó drʉ àrɨ eꞌyo yɨ̀ yà?’
7“Òmvɨ́ ɨ̀rɨ́ yɨ́ kɨ́nɨ̀, ‘Àrɨ̀yɨ̀kʉ ꞌba àloo awɨɨ àma ɨ̀pàngɨ kʉ.’
“ꞌYo ɨnɨ yɨ́ kɨ́nɨ̀, ‘Tevɨ́nɨ àmɨ mú pàbaa azí nga ma awo wɨ́nò ngaa.’
8“Acete òndrotilébe àzí ngazà butia, nga apíri omve nɨ awo àzíꞌbá drìle nɨ kɨ́nɨ̀, ‘Mɨ omve ꞌba àzí ngaꞌba ꞌdɨ̀vɨɨ ɨnɨ díká mɨ òfè ꞌyowa òya azí ngajʉ vɨɨ ɨnɨ, ɨꞌdojʉ ꞌba cale àzíá àva vɨɨ ɨnɨ yɨ̀ díká dejʉ ꞌba àzí ɨꞌdole òkò vɨɨ ɨnɨ yɨ̀.’
9“Àzíꞌbá ɨ̀pàngɨ le àva sawà mudrí drìa àlʉ alɨa vɨɨ cá díká ꞌba òfé ɨnɨ dɨ̀narɨ̀ àlʉàlʉ. 10Ànɨ ꞌba cale àzí ndee alɨa òkò vɨɨ ɨgá ꞌba muu ànɨ òfèe tʉ̀. Te isú drɨ́á òya dɨ̀narɨ̀ àlʉàlʉ. 11Ànɨ ɨnɨ nɨ isújʉ́ ꞌbá, ɨꞌdó ono agú ɨnɨ yɨ́ azí fèle vɨɨ bʉ. 12Àgu ndee ꞌyó ɨ̀rɨ yɨ́ kɨ́nɨ̀, ‘ꞌBa cale ava azí ngale kíríá sawà àlʉ vɨɨ ɨnɨ te mɨ òfè àma be trótrò vɨɨ dèè àma nga àzí tʉ̀a nɨ̀ díká ìtú ɨve àma zùù àzí ndee ngarɨa.’
13“Te òmvɨ ɨnɨ ɨ̀sɨle àloo yɨ́ kɨ́nɨ̀, ‘Àrɨmee, ma ꞌoo te àmɨ onzɨ kʉ ꞌba. Àmɨ àtìi té àzí ngajʉ dɨ̀narɨ̀ àlʉ yɨ̀ kʉ yà? 14Àmɨ ꞌdú àmɨ ꞌyowa òya díká àmɨ mvɨ́ àkúá. Ma lè òya fe agú cale àva vɨɨ yɨ́ àmɨ be trótrò. 15Ma òkpo séndè ma awo vɨɨ ayʉjʉ ma nɨ lèle vɨ́nɨ yʉ yà? Nòsɨ̀kʉ àmɨ ngìrí ꞌoo manɨ ꞌba drɨ́á ꞌdule àlʉ vɨɨ yɨ̀ yà?’ ”
16Yesu ꞌyo derɨa kɨ́nɨ̀, “ꞌBa àva vɨɨ ɨnɨ ngaa ovʉʉ òkò, díká ꞌba òkò vɨɨ ɨnɨ ngaa ovʉʉ àva.”
Yesu nɨ nɨ awo dràtaa vɨɨ eꞌyoa ondríjʉ́ vɨɨ
17Ace Yesu nɨ murɨa Yerusalemua, ꞌdu ꞌba ɨ̀rɨ nɨ ɨmbale mudrí drìa ìrì vɨɨ ɨnɨ ɨ̀ndɨ̀ díká ꞌyo ɨnɨ yɨ́ kɨ́nɨ̀, 18“Àma mu kpere Yerusalemua, te àle ꞌba ngaa ꞌBa Mvápi òꞌdɨ nyaa ꞌba imgbelé orɨ ɨteꞌba vɨɨ ɨnɨ yɨ́ àloo ɨmbaꞌba àzítáá ɨmbale vɨɨ ɨnɨ yɨ́. Ɨnɨ ngaa drà lii ɨ̀rɨ drìa ɨ 19díká ɨnɨ ngaa ɨrɨ jii fèe ꞌba júrú drʉ vɨɨ ɨnɨ yɨ́ ɨ̀rɨ igíjʉ́, cojʉ díká ɨ̀rɨ dijʉ patí àlazà drìa. Te oꞌdú na vɨɨ alɨa Orɨ nɨ ngaa ɨ̀rɨ ɨ̀gàa ra!”
Yakobo ayopi nɨ ɨnɨ eꞌyo zijʉ Yohana be vɨɨ
20Acete Zibidayo izípi Yakobo ɨnɨ ayopi drʉ Yohana be vɨɨ mú Yesu bʉ àguanzɨ ɨ̀rɨ awo ìrì vɨɨ ɨbe, díká sì ùlùúti ɨ̀rɨ drìlia asíndrɨ̀zà àꞌíjʉ́ ɨ̀rɨ bʉ.
21Yesu zi ɨ̀rɨ kɨ́nɨ̀, “Mɨ lè àrɨ nɨ yà?”
Izí ndee òmvɨ ɨ̀rɨ kɨ́nɨ̀, “Mɨ fè àguanzɨ ma awo ìrì ꞌdɨ̀vɨɨ ɨnɨ àlʉa yɨ́ rɨ mɨ gí ndépia díká àloo yɨ́ gí ìjíá kárí mɨ awo vɨɨ alɨa ɨ̀ndɨ̀.”
22Yesu kɨ́nɨ̀ ɨnɨ yɨ́, “Àmɨ nìi àmɨ lè àrɨ eꞌyo zi ɨ ya vɨɨ kʉ,” Àmɨ ɨco àfa manɨ lèle mbule kópò càndɨ nɨ vɨɨ alɨa vɨɨ mbu ra ya?
Òmvɨ́ kɨ́nɨ̀, “Àma ɨco ra.”
23Yesu ꞌyo ɨnɨ yɨ́ kɨ́nɨ̀, “Tàándí drʉ àmɨ ngaa àfa mbuu kópò ma awo càndɨ nɨ vɨɨ alɨa ra,#20:23 Àfa mbujʉ kópò Yesu awo vɨɨ alɨa vɨɨ ɨkɨ́a drìcijʉ Yesu be túàlʉ. te rɨjʉ ma gí ìjíá nòsɨ̀kʉ gí ndépia vɨɨ àyotaa ma bʉ yʉ. Kara ꞌdɨ̀vɨɨ ɨnɨ ꞌba Àtamà nɨ otʉle vɨɨ ꞌyowa nɨ.”
24ꞌBa Yesu nɨ ɨmbale alóo mudrí vɨɨ ɨnɨ nɨ eꞌyo ꞌdɨ̀vɨɨ ɨrɨjʉ ꞌba, cá àdrà yɨ̀ ꞌba ìrì vɨɨ ɨbe. 25Yesu omve ɨnɨ drɨ́á nɨ bʉ díká ꞌyo ɨnɨ yɨ́ kɨ́nɨ̀, “Àmɨ nì ra ꞌba ꞌba júrú drʉ vɨɨ ɨnɨ drìceꞌba vɨɨ ɨ́ le ɨ̀ce ànɨ òkpò be díká ꞌba ꞌyowa imgbelé ɨnɨ drìceꞌba vɨɨ ɨ́ ovʉ àyɨ̀kò yɨ̀ àyotaa sijʉ ɨnɨ drìa. 26Te ngaa nɨ ꞌo àmɨ be vɨ́nɨ kʉ. Ɨ̀ndɨ̀a ráaka ꞌbarʉʉ lèe ovʉʉ àmɨ ɨ̀sɨlɨa ꞌba ìmgbélé drʉ vɨɨ lè ɨ̀rɨ ovʉʉ àmɨ ꞌyowa àzíꞌbá drʉ 27díká ꞌbarʉʉ àmɨ ɨsɨlɨa lèe ovʉʉ drìcere drʉ vɨɨ lè ɨ̀rɨ ovʉ àmɨ ꞌyowa àtɨꞌboo drʉ. 28ꞌBa Mvápi caa ꞌbanɨ azí ngajʉ ɨ̀rɨ yɨ́ kʉ, te caa àzí nga òꞌbɨ yɨ́ díká nɨ ɨdrɨ fèjʉ ɨnɨ òpajʉ drà alɨa vɨɨ yɨ̀.”
Yesu nɨ àgu mule ko ìrì vɨɨ ɨnɨ àtɨ̀jʉ vɨɨ
29Yesu ɨnɨ nɨ rɨrɨa Yeriko nɨ kʉrɨa ꞌba ɨ̀rɨ nɨ ɨmbale vɨɨ ɨbe, òꞌbɨ mʉ̀mʉrà rɨ́ ɨ̀rɨ buti bɨ nɨ̀. 30Àgu muleko ìrì rɨ́ ngùꞌdù tia, díká ace ɨnɨ nɨ ɨ̀rɨjʉ Yesu nɨ àlii nɨ̀, ɨꞌdó ɨtre kɨ́nɨ̀, “Opɨ, Daudi Mvápi, mɨ ꞌbà asíndrɨ̀zà àma drìa ꞌdoo!”
31Te òꞌbɨ ɨꞌdó ɨtre ɨnɨ drìa díká rɨ́ ꞌyó ɨnɨ yɨ́ kɨ́nɨ̀, “Àmɨ ajɨ́ cɨ́rɨ́.” Te ɨ̀ndɨ̀a ace rɨ́ àtre àále oru yɨ̀ kɨ́nɨ̀, “Opɨ, Daudi Mvápi, mɨ ꞌbà asíndrɨ̀zà àma drìa ꞌdoo!”
32Yesu sòka díká omve ɨnɨ nɨ bʉ, zi ɨnɨ tia kɨ́nɨ̀, “Àmɨ lè màá ꞌo àmɨ yɨ́ àrɨ nɨ yà?”
33Òmvɨ́ ɨ̀rɨ yɨ́ kɨ́nɨ̀, “Opɨ àma lè àngʉ̀ ndre.”
34Yesu ꞌo asíndrɨ̀zà ɨnɨ be ra díká ɨlo ɨnɨ mule ra. Cotícotí ɨnɨ mule ɨꞌdo àngʉ̀ ndre ra díká bɨ́ ɨ̀rɨ buti ra.
Currently Selected:
Matayo 20: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
